Makoho empakiwa ni ale ansoma ibuukhu saahu
Wakhala weera mukristu oomwalana woohikhala niiyo anaakhuleliwa ni Biblya ni anathelana ni mutthu mukina, muloko wooneleke hayi ntheli noopatxera ni ntheli navaanano?
Mwaha ntoko ola, muloko ontthuneya woonela ntheli noopatxera ntoko noomwalaniwa ni ntheli navaanano ntoko noowakhuleliwa wamaithoni va epooma. Vano weera niiwexexe mwaha ola, nrowe noone ele Yesu aahimmaawe sa omwalana ni othelana ni mutthu mukina.
Va Matheyo 19:9, Yesu onnahima nthowa nimoha nnaakhuleliwa weera ntheli nimale. Owo enre: “Ole onamwalana ni mwariye, ohikhanle mwaha woraruwa, anamuthela mukina, onoraruwano.” Mwa yeeyo, ninxuttera weera, (1) oraruwa nthowa nimoha nnaakhuleliwa ni Biblya weera ale athelanne emwalane ni (2) mulopwana onaahiya amwaariye woohikhala nthowa nnaakhuleliwa mBiblyani ni anaathela athiyana akina onimweera waararuwela amwaariye. *
Neereke masu a Yesu antaphulela weera mulopwana araruwa ori oothaphuwa moovarihana ni Biblya weera amwalane ni amuthele muthiyana mukina? Araaya. Wakhala weera mulopwana ohaararuwela amwaariye, muthiyana otthekeliwe pooti othanla waalevelela aiyawe kapena hooye. Vano athanla ohaalevelela aiyawe, atthu ooweeli ala, ari oothaphuwa weera ethelane ni mutthu mukina, yamaliha oreherera ipaphelo soomwalana.
Pooti weera muthiyana oraruweliwe ontthuna waalevelela aiyawe ni ovirelela okhala wamoha. Vano ankha mulopwana aatthunaka omwalana? Aani, woona weera muthiyana onnatthuna waalevelela aiyawe, mulopwana kakhanle ootaphuwa moovarihana ni Biblya weera amuthele muthiyana mukina. Nto mulopwana anyeserera otthuna omwalana ni anamuthela muthiyana mukina naari ahikhanle ootaphuwa, owo onimwaararuwela amwaariye. Mwaha ntoko owo, asitokweene onnatthuneya opaka ekomisau yoophukela weera yuulume mwaha owo.—1 Akor. 5:1, 2; 6:9, 10.
Vanonto wakhala weera mulopwana ohaathela athiyana akina ahittharaka ele Biblya onhimaawe, muloko wooneleke hayi ntheli noopatxera ni ntheli navaanano? Neereke ntheli noopatxera ninnaakhuleliwa moovarihana ni Biblya? Muthiyana otthekeliwe, neereke pooti olevelela naari ohalevelela aiyawe akhalayi? Neereke muloko wooneleke ntheli navaanano okhala nooraruwa?
Khalayi niiwexexa weera muthiyana ororuweliwe aahikhwa, ahitheliwa ni ahiraruwa, ntheli navaanano noona weera nooraruwa. Mene Yesu khamuhimme muthiyana oraruweliwe emaara aahimaawe woohima sa omwalana ni ntheli nyowani. Opwaha mwa yeeyo, owo aahimme weera mulopwana aamwalanne ni mwaariye ohaakhuleleyaka mBiblyani ni omuthela muthiyana mukina, aamuraruwa. Tivawonto, omwalana ni omuthela muthiyana mukina onnamaliha ntheli nakhalayi.
“Ole onamwalana ni mwariye, ohikhanle mwaha wa oraruwa, anamuthela mukina, onoraruwa.”—Math. 19:9
Vaavo mulopwana ommwalanaawe ni mwaariye ni anamuthela muthiyana mukina, khuwaareerela woopiwa mulatthu muthiyana yoole ohiiwale. Tivawo, muthiyana ohiiwale khontthuneya wiipiwa murima waari weera ommwaalevelela aiyawe kapena hooye. Opwaha mwa yeeyo, moota muloko onkelaawe woonelaka ntheli nnyowani khonlipa waari weera muthiyana oraruweliwe ohookhwa, ootheliwa wanaaveeli kapena oraruwa. *
Ntakihero nthokoronraahu woopatxerani, mulopwana oopaka mararuwo ni ntheli nne noomala. Ankha waakhanle weera mulopwana ole khaapanke mararuwo nto nnaamweera vareene hiiho anathanla omwalana ni omuthela muthiyana mukina? Ni tho, waakhanle weera mulopwana ole khapanke mararuwo ahinaakuveene omwalana, nto apaka mararuwo awo amwalanneene ni anamuthela muthiyana mukina, nnamweera muthiyana oopatxera amulevelenleene? Nihipwatthaka moota itthu senttaaya, omwalana ni ntheli nnyowani ori oraruwa, mwa yeeyo, ntheli noopatxera ninnamala. Mene nto ntheli nnyowani sika nri ntheli moovarihana ni malamulo. A Sentinela a 1.º a Fevereiro a 1980, epaax. 32 othalinhe moota ola: “Yoowo oopaka ntheli nnyowani, nto, mwaheene wa yeeyo, khontthuneya omaliha ntheli nnyowani nno ni otthikela ntheli nakhalayi, ntheli nakhalayi noomala ni oraruwelana ni ntheli nnyowani.”
Matxentxo ala manyowani a moota woowiiwexexa wahu itthu woohima sa omwalana khontaphulela weera mukristu ahiyeke woona ntheli ntoko etthu yootteela naari tho opaka mararuwo kheiyono yootthekeya etokweene. Vaavo mulopwana onamuhiyaawe mwaariye woohikhala niiyo ehinvarihana ni ele Biblya onhimaawe ni opaka ntheli nikina asitokweene a mmulokoni onnitthuneya opaka ekomisau weera ewehe mwaha owo wa mararuwo. Wakhala weera muthiyana a naaveeli a mulopwana owo mukristu owo tho onnitthuneya opakeliwa ekomisau mwaha wooweera owo tho oopaka mararuwo. Nnaamweera ntheli nawe nnyowani ohikhaka oraruwa moohihovela mulopwana owo khankhala moovarihana ni malamulo a Muluku woohima sa ntheli. Mwa yeeyo mulopwana owo khaaphwanelela thooni okhalano miritti soothanleya mmulokoni mpaka ovira iyaakha sintxipale kapena mpaka asinna a muloko epatxere omuttittimiha tho ahiinaakuveene ovahiwa miritti asitokweene a mmulokoni onnitthuneya osuwela moota enkhalaaya amwaariye aakhalayi ni moota enkhalaaya anamwane oohiiwa.—Mal. 2:14-16.
Niwehaka maxupo enkhumelela vammwalaniwa ni ntheli nnyowani nihinvarihana ni Biblya, makristu onnitthuneya okhala a miruku ni omutakiha Yehova mootta owo onoonelaawe ntheli okhala etthu yootteela.—Koh. 5:4, 5; Aheb. 13:4.
^ Mwaha ola weera nikhweihere, ninkela ohima weera mulopwana aararuwenle amwaariye. Mene masu ninsomaahu va Marko 10:11, 12, anniiwanyeiha weera masu a Yesu ari va Matheyo 19:9 annavareleya muteko wa alopwana ni athiyana.
^ Ala eri matxentxo a wiiwexexa wahu itthu vaanaano ohiya moota niiwexexaahu khalayeene, vaavo noonaahu weera ntheli nnyowani waari oraruwa mpaka muthiyana ooraruweliwa otheliwa tho, opaka mararuwo naari okhwa.
