1. Yehova opanke heeni wa nyuwo?

NYUWO nwenre hayi okhala Namoona a Yehova? Etthu yoopatxera, nyuwo mwiiwale “mitthenka sooreera”—apaale moorweela wa amusi anyu, ale munsomaanyuno oxikola naari munvaraanyuno muteko. Naari apaale mphwanyiwe atthu elaleyaka empa ni empa. (Mar. 13:10) Nto ookhala ailipihenre ovarela muteko ehuhu awe ni ikuru sawe weera oopakihekeni yoosoma. Moorwela mwa yoosoma anyu, nyuwo mooxuttera omusivela Yehova ni mosuwela weera owo onnoosivelani. Yehova ohoopurulelani nyuwo mweekhaikhaini, vano nyuwo mutthareli a Yesu Kristu murinono yooweherera yookhala mahuku ootheene elapo ya vathi. (Yoh. 6:44) Yehova anvanhe mutthu ikuru weera ooxuttiheni ekhaikhai, ni oowakhulelani okhala murumeyi awe. Neereke nyuwo khamutthapenle?

2. Ninrowa oxuttera eheeni yoosomeene yeela?

² Vano nixuttenraahu ekhaikhai, nookhalano eparakha yoowaakhavihera atthu akina weetta ni hiyo ephiro emphwanyiha ekumi yoohimala. Apaale pooti onikhweela olaleya empa ni empa, mene pooti okhala woonixupa opakiha yoosoma ya Biblya. Nyuwo munoona hiiho? Wakhala weera muneera aani, miruku siri yoosomeene yeela sinimookhaviherani. Ninrowa woona etthu enneeriha waapaka atthareli. Nave ninrowa oxuttera moota wooviriha maxupo aneeriha wootxela opakiha yoosoma ya Biblya. Vahinaakuve ninrowa woona mwaha wa heeni nihintthuneyaahu okhala anamalaleera paahi, mene ontthuneya okhala anamahusiha a mitthenka sooreera.

3. Heeni hiyo ninlaleeraahu?

³ Emaara Yesu aaraawe elapo ya vathi, ahaavaha atthareli awe  miritti miili. Muritti woopatxera, Yesu ahaalamula oxuttera awe weera elaleyeke mitthenka sa Omwene ni aawoonihera moota woopaka eyo. (Math. 10:7; Lu. 8:1) Mwa itthu sene seiyo, Yesu aahaakhavihera atthareli awe moota woovilela moonelo wooreera naari woonanara emaara yeeraaya elaleyeke mitthenka sooreera sa Omwene. (Lu. 9:2-5) Owo aahima mpaka woowiini weeraaya ophiyewo muteko woolaleera, emaara ahimmaiye weera ohuseraawe yamuhelela “onamona wa amalapo othene”. (Math. 24:14; Mit. 1:8) Ehixikhaka moonelo wa atthu, atthareli wannatthuneya waalaleera atthu awo voohima sa Omwene ni ele onrowaaya opaka.

4. Moovarihana ni Matheyo 28:18-20, ohiya olaleera voohima sa Omwene, etthu heeni ekina nintthuneyaahu opaka?

⁴ Muritti heeni wanaaveeli Yesu aarummaawe atthareli awe opaka? Waaxuttiha ale yaatthuna okhala ooxuttera a Yesu weettela sooxuttiha sootheene owo arummaawe. Ntoko akina anihimaaya, neereke muteko ola woolaleya ni oxuttiha waarowa opakiwa paahi ni aKristu a seekulu yoopatxera? Hooye. Yesu ahoonihera weera muteko ola wootthuneya wampakiwa mpaka mahuku ahu ala. Naari neere: “mpaka emalihero ya olumwenku.” (Mmusome Matheyo 28:18-20.) Oweharu Yesu aavanhe nlamulo nna, emaara aisonihenraawe wa atthareli awe opwaha 500. (1 Akor. 15:6) Moonelo Yesu aamoonihenraawe murummwa Yohani, Yesu ahoonihera weera atthareli awe ootheene aakhalano muritti woowaakhavihera atthu akina oxuttera voohima sa Yehova.—Apok. 22:17.

5. Nlikanyiho murummwa Paulo opankaiye va 1 Akorinto 3:6-9, nnoonihera hayi weera olaleya ni oxuttiiha onnavarihana?

⁵ Murummwa Paulo aalikanxera muteko woowaapaka atthareli ni muteko woophatteya miri. Owo attittimihera weera onnatthuneya opakavo etthu, ohiya weera ophatteyaru. Paulo aawupuxera asinna oKorinto: “Miyo kòphatteya Apolo òrikelela . . . Vano nyuwo muri ematta ya Muluku.” (Mmusome 1 Akorinto 3:6-9.) Hiyo na anamuteko a “ematta ya Muluku”. Nimphatteya emaara ninlaleyaahu. Emaara nixuttihaahu onkhala ntoko nnoohelela. (Yoh. 4:35) Mene nintthuneya osuwela weera Muluku onunnuwiha.

6. Naaxuttihaka atthu ontthuneya waakhavihera opaka eheeni?

⁶ Hiyo ninwaasa ale “athanleliwe okumi wohimala”. (Mit. 13:48) Atthu awo weera ekhale atthareli, ontthuneya weera hiyo naakhavihereke (1) wiiwexexa, (2) waakhulela ni (3) ovarihela muteko ele anxutteraaya mBiblyani. (Yoh. 17:3; Akol. 2:6, 7; 1 Ates. 2:13) Atthu ootheene mmulokoni, pooti omukhavihera namasoma a Biblya. Ninnapaka eyo, naakosoopaka ni nsivelo, ni woonihera weera annaakheliwa nnene omuthukumanoni. (Yoh. 13:35) Ale ampakiha yoosoma ya Biblya, ontthuneya ovarihela muteko ehuhu aya ni ikuru saya weera emukhavihere namasomaaya “otoloxa ikwartelu solipaxa” [itthu soolipa]. Naari neere, ohiya opaka soororomela saya ni sookhovelela saya soonanara. (2 Akor. 10:4, 5) Omukhavihera mutthu opaka matxentxo awo amweekumini ophiyera oBatiziwa, pooti oviriha ehuhu. Wiilipihera iwo khoiyono wa mahala.

7. Eheeni enneeriha ovara muteko woolaleera ni woowaapaka atthareli?

⁷ Heeni ninvaraahu muteko woolaleya ni waapaka oxuttera? Yoopatxera, mwaha wooweera ninnamusivela Yehova. Nyuwo mwaapakaka ele munweraanyu weera mulaleere ni waapaka oxuttera, nyuwo munoonihera nsivelo wa Muluku. (1 Yoh. 5:3) Nkuupuwelani ela: nsivelo muraanyuno ni Yehova ninnaweerihani orowa olaleera empa ni empa. Neereke waahookhwelani opaka eyo? Oweharu hooye.  Munnuupuwela nihuku noopatxera mwanvenkaanyu hootti weera mpatxerihe olaleera? Apaale mwannoova. Mene mwaaxuttera weera Yesu ooniruma ovara muteko owo ni nyuwo mwaahaakhulela yooruma eyo. Noovira ehuhu, ovara muteko woolaleera waapaxera wookhweelani. Vano ankha opakiha yoosoma ya Biblya? Neereke wuupuwela eyo ennonyoonyihani? Wakhala weera eyo ennawereelani, munvekele Yehova weera ookhavihereni oviriha maxupo awo oomakela onyoonyiwa. Moohihovela, owo onimoovahani yootthuna yoowaapaka atthareli!

8. Moovarihana ni Marko 6:34, etthu heeni ekina enneriha waaxuttiha atthu?

⁸ Etthu ekina enneriha oxuttiha ekaikhai nri nsivelo nraahuno ni atthu. Ekwaha ekina Yesu ni oohusera awe yaakhulumuwa vantxipale emalakaru olaleera. Awo yannatthuna nipuro weera yiitthuuwe, mene moloko wa atthu wahaaphwanya va nipuro nne yaarowaaya wiitthuuwa. Aamorelaka ikharari, Yesu aapatxera wahusiha yawo ‘itthu sintxipale’. (Mmusome Marko 6:34.) Moohihovela, Yesu aatthuneya wiilipihera weera alaleere ehuhu ele. Mwaha wa heeni owo aapankaawe eyo? Owo iihela nipuro na atthu ale, owo tho, aahoona weera atthu ale yaamuhaawa ni moota awo yaahaawelaaya yooweherera. Yesu aatthuna waakhavihera. Emoha-moharu tiyeeyo eneereya ni atthu olelo va. Atthu awo pooti wooneyaka ntoko toohakalala, mene muhihiye weera ithoni saya soowokakani. Awo ankhala ntoko iputthiputthi sooriheya sihikhanleno ni mukukhuli. (Aef. 2:12) Murummwa Paulo aahimme weera atthu ntoko ala, khayaano Muluku naari yooweherera. Awo ari “mphironi onroiha woriheyani”. (Math. 7:13) Nuupuwelelaka moota atthu anhaawaaya woomunepani muttetthe ahu, nsivelo ni omoriwa ikharari, onnaneeriha waakhavihera. Moota woopaka eyo, ori waavaha awo yoosoma ya Biblya.

9. Moovarihana ni Afilipi 2:13, nikhavihero heeni Yehova okhanlaawe oowoovahani?

⁹ Nyuwo moosuwela weera opakiha yoosoma ya Biblya entthuneya ehuhu. Apaale pooti weeraka tiyeeyo enoonyonyihani. Wakhala weera munoona hiiho, mmuleele Yehova itthu munuupuwelaanyu. Munvekele Yehova weera ookhavihereni omphwanya mutthu weera mmuxuttiheke Biblya. (Mmusome Afilipi 2:13.) Murummwa Yohani onroromeliha weera Muluku onimwaakhula mavekelo ahu envarihana ni yootthunaawe. (1 Yoh. 5:14, 15) Vano muroromeleke weera Yehova onimookhaviherani okhalano yootthuna yoovara muteko woowaapaka atthareli.

10-11. Apaale eheeni enawootxelihani opakiha yoosoma ya Biblya?

¹⁰ Hiyo kaninkuxera matheela nlamulo Yesu onivanhaiye noowaapaka atthareli. Mene emaara ekina ennanikhumelela maxupo mmutekoni mmo annootxeliha opaka ele ninhaawelaahu. Ninrowa woona maxupo ni ele nikhanlaahu oopaka weera nivirihe maxupo awo.

¹¹ Mukhalelo ahu pooti onootxeliha ele naatthunaahu opaka. Mwa ntakihero, anamalaleera akina toowuluvala naari akina ekumi aya khenlipa-lipa. Nyuwo mwa mmoha murinono maxupo ala? Wakhala weera mookhalano maxupo awo, muupuwelele itthu nixuttenrahu ni eretta ya coronaviru. Noosuwela weera onnawereya opakiha yoosoma ya Biblya ni ikaruma eletroniku. Nto nyuwo pooti opatxeriha yoosoma ya Biblya mureene owaani. Opwaha wa yeeyo, atthu akina annatthuna omusoma Biblya nihiyo, mene khanwera opaka eyo ehuhu asinna anlaleeraaya. Mwaatoko wuupuwela wiivaherera weera mwaakhavihere atthu awo? Nyuwo pooti wiivaherera omusoma Biblya ni atthu awo ehuhu antthunaaya, apaale wooxixelo naari ohiyu. Munnuupuwela yooweereya ya Nikodemu? Owo alakenle wuuluma ni Yesu  ohiyu, ni Yesu ahaakhulela omuxuttiha emaareene yele.—Yoh. 3:1, 2.

12. Eheeni eneera enikhavihere ororomela weera nnokhala muhusiha a nnene?

¹² Khannisoona okhala oorehereya weera napakihe yoosoma ya Biblya. Apaale nyuwo munuupuwela wi weera mukhale muhusiha, ontthuneya okhalano osuwela naari owera weera mumpatxerihe omusomiha mutthu. Nwehe ipontu tthaaru sikhanle soowookhaviherani. Yoopatxera, Yehova onniwoonani okhala oophwanelela waaxuttiha akina. (2 Akor. 3:5) Yanaaveli, Yesu orinono “owerya, wothene wirimu ni elapo ya vathi” ohoovahani nyuwo muritti wooxuttiha. (Math. 28:18) Yanaararu, nyuwo pooti ororomela nikhavihero na atthu akina. Yehova aamuxuttiha Yesu etthu eeraawe uulumeke ni Yesu aaroromela sooxuttiha saapapawe, nyuwo pooti opaka emoha-moharu. (Yoh. 8:28; 12:49) Opwaha mwa yeeyo, munvekele muhooleli a ekhurupu anyu, pioneiru naari namalaleera orinono sookumanano sintxipale. Weera awoonihereni moota woopatxeriha yoosoma ya Biblya. Weera nwere opaka eyo, mmuhooleke mmoha a asinna ala aarowaka opakiha yoosoma awe, ni mooneke moota owo onipakihaawe yoosoma.

13. Mwaha wa heeni nintthuneyaahu okhovelela itthu inyowani?

¹³ Onnanivila okhovelela moota munyowani woolaleera ni ikaruma inyowani. Moota woopakiha yoosoma ya Biblya mahukwaano wootxentxa, vano, ekaruma ahu ninvarelaahu muteko ebuukhu Mukhaleno ekumi yoohimala!. Nto moota woowiireherera ni moota wooxuttiha wootxentxa. Ninsoma iparagrafo vakhaani ni otthekula vantxipale nnamasooma. Naaxuttihaka ninnavarela muteko iviidiyu ni ikaruma ikina eletroniku, ntoko JW Library^®. Mwahisuwenle ovarela muteko ikaruma iya, Munvekele munna onwera weera ooxuttiheni moota woovarela muteko ikaruma iyo. Atthu soopattuxiwa sikhalanne sookhovelela. Khavanikhweya okhovelela moota munyowani woopaka itthu. Mene nnikhavihero na Yehova ni asinna, nnoowera okhovelela moowakuveya matxentxo a moota woomuxuttiha Biblya. Ni onsivela omusoma Biblya ni atthu akina. Ntoko munna mmoha pioneiru ohimmaawe, omusoma moota ola Biblya ti “wooreera wa namahusiha ni namasoma”.

14. Naavaraka mapuro ooxupa opatxeriha yoosoma ya Biblya, eheeni nintthuneyaahu wuupulela, ni 1 Akorinto 3:6, 7, onrowa onilipiha hayi?

¹⁴ Naakhalaka nipuro onxupaaya opatxeriha yoosoma ya Biblya. Atthu pooti ohisiveliwa ni mitthenka sahu naari onisontta. Eheeni ekhanle yoonikhavihera okhalano moonelo wooreera naavaraka muteko mittetthe ntoko iya? Muupuweleke weera makhalelo aatthu pooti otxentxa moowakuveya. Nto yaale yahaatthuna oniiwelela pooti woonelela weera annatthuna miruku sa Muluku mweekumini mwaya. (Math. 5:3) Eyo yoheereya ni yaale yaakhootta waakhela ibuukhu sahu, muhoolo mwaya yaahakhulela yoosoma ya Biblya. Nave noosuwela weera Yehova Pwiya a soohepa. (Math. 9:38) Owo ontthuna weera nivireleleke ophatteya ni ohelela, mene muritti wa wuunnuwiha ti wa Yehova. (1 Akor. 3:6, 7) Nnaamweera nyuwo muhipakihaka yoosoma ya Biblya, muhittiwale weera Yehova onnitthuvela mwaha wa wiilipihera mwahu, ohiya mwaha wa yookhumelela ya muteko ahu. *

15. Yehova onoonela hayi mutthu aakhulela omusoma Biblya ni anavarela muteko ela onxutteraawe?

¹⁵ Yehova onnahakalala aamoonaka mutthu aakhulelaka ekhaikhai ni aaxuttihaka akina. (Mir. 23:15, 16) Ohakalala wawe wohaatxeerereya  mwaha wooweha ele eneereya olelo va. Mwa ntakihero, nnaamweera nnreene mpuwa mwa eretta ya coronaviru (COVID-19), etawanle elapo yootheene, eyaakha ya muteko ya 2020 soopakihiwa soosoma sa Biblya 7.705.765. Soosoma iyo, sohaakhavihera atthu 241.994 oveleela okumi aya wa Yehova ni oBatiziwa. Atthareli ala aBatiziwe, anoorowa tho opakiha soosoma sa Biblya ni waapaka atthareli anyowani. (Lu. 6:40) Moohihovela, Yehova onnahakalala vantxipale aanoonaka nivaraka muteko woowapaka atthareli.

16. Yootthuna heeni nikhanlaahu ookhalano?

¹⁶ Ontthuneya ikuru weera niwere ovara muteko woowaapaka atthareli, mene nnikhavihero na Yehova, nnoowera waaxuttiha anamasoma a Biblya omusivela Tithi ahu a wiirimu. Munoonela hayi okhalano yootthuna ya okhalano yoosoma emoha ya Biblya? Naivahereraka waapakiha yoosoma ya Biblya ale nnaphwanyaahu, pooti otikiniheya ni yookhumelela. Moohihovela, Yehova onooreliha wiilipihera wahu!

17. Nnooneleke hayi nawera opakiha yoosoma ya Biblya?

¹⁷ Olaleya ni waaxuttiha atthu akina ikhaikhai sa mBiblyani eparakha etokweene. Muteko ola onnanivaha ohakalala weekhaikhai. Murummwa Paulo aakhavihenre atthu antxipale a oTesalonika okhala atthareli a Yesu, aahuuluma moota oonelaiye: “tani anakhale ororomela wahu nari ohakalala nari nampurutxi òvuwa oholo wa Apwiy’ahu morwani mwaya, muhikhanle nyuwo? Khweli ti nyuwo ovuwa ni ohakhalala wahu.” (1 Ates. 2:19, 20; Mit. 17:1-4) Atthu antxipale olelo arino moonelo mmoharu. Murokora mmoha oneeriwa Stéphanie vamoha ni aiyawe yaakhavihenre atthu ophiyera oBitiziwa, anahima há: “kokhanle ohakalala onipwaha ohakalala mutthu omphwanyaawe amukhavihera mutthu wiivaherera wa Yehova.”