1. Itthu heeni sikina amiravo awenraya opaka?

 IYAAKHA sootheene amiravo annabatiziwa, wakhala weera nyuwo mmiravo mbatiziwe vaananoru muroromeleke weera asinna ni asirokora ari oohakalala mwaha wa yoothanlanyu, mohihovela Yehova onnahakalala! (Mir. 27:11) Nkupuwelani itthu nyuwo nwenraanyu opaka, nyuwo momusoma Biblya mowitthaleleya mene eyo pooti weera mpanke mpuwa mwa iyaakha sintxipale. Mwaha wa yeeyo, nyuwo mororomela weera Biblya masu a Muluku ni etthu yootepa otthuneya nyuwo momusuwela Yehova ni munnamusivela ni nsivelo nno mwalipiha mpaka wivaherera wa Yehova ni obatiziwa ninnahakalala mwaha wa yoothanlanyu.

2. Eheeni ninkelaahu woona yosomene yela?

 ² Nyuwo mowera oviriha maxupo yaawo yerenre nroromelo nanyu vaavo mwirehereranyu weera mbatiziwe. Mene nto nyuwo nweherereke oviriha maxupo matokotoko muhoolo, Satana onkela oopaka ele onweraawe weera oriirihe nsivelo muraanyuno ni Yehova ni woohiihani onvarela muteko. (Aef. 4:14) Nyuwo muhihiye eyo yeereyaka, eheeni enkela wookhaviherani ovirelela onvarela muteko Yehova? Ni owera okwanihera yoothanlaanyu ni okhala oolipa mmunepani naari neere ha “opwaherera wunnuwa” mmunepani. (Aheb. 6:1) Vano nyuwo munkela opaka moota heeni eyo?

3. Eheeni mukristu onntthuneyaawe opaka a batiziwa vale?

³ Nuumala obatiziwa ootheene hiyo nintthuneya otthara ele Paulo alenlaawe makristu Aefeso owo enre, watthuneya okhala  makristu “oolipa” mmunepani. (Aef. 4:13) Mwa masu makina ‘onnatthuneya opwaherera okela vahoolo,’ onnakhweya wupuwelela ele murummwa Paulo alempaawe nupuwelaka wunnuwa wa mwana. Mwekhaikhai mwaana onnahakalaliha asipaapa mene owo khanvirelela okhala mwaana aneereke wunnuwa, “vano kìnnuwaka, kòhiya sa onamwane.” (1 Akor. 13:11) Ntoko makristu enereya etthu emoharu. Nnitthuneya ovirelela okela vahoolo nabatiziwa vale, vano ninkela woona miruku mikina sinkela onikhavihera moota woopaka eyo.

4. Mikhalelo heeni sinkela wookhaviherani okela vahoolo mmunepani? (Afilipi 1:9)

⁴ Mmusivele vantxipale Yehova. Mohihovela nyuwo munnamusivela vantxipale Yehova. Moota heeni? Murummwa Paulo ohiwanyeiha moota woopaka eyo va Afilipi 1:9. (Mmusome.) Paulo avekela weera nsivelo na asinna “nipwaherereke wunnuwa.” Menento ti woowereya waatxerera nsivelo. Vano ninkela opaka moota heeni eyo? “Ontthuneya okhalano osuwela weekhaikhai ni iseru,” vaavo ninvirelela ahu omusuwela Yehova ninnamusivela ni otikhina omutthu awe moota ompakaawe itthu ni ninkela opakaka itthu sinimusivela yoowo khaninkela opaka itthu siri poothe sinkela omunanara, tivawo nnilipihera ahu weera niwexexe yootthuna ya Yehova. Ni moota woopaka itthu moovarihana ni yootthuna eyo.

5-6. Ninkela waatxerera moota heeni omusivela wahu Yehova?

⁵ Nsivelo nahu wa Yehova pooti ovirelela wunnuwa wakhala weera nnomusuwela mwanaawe, okhala weera owo anatakiha mikhalelo sooreera sa Atithawe. (Aheb. 1:3) Moota woomusuwela nneneseene Yesu ori osoma ivanjelyo ixexe, wakhala weera nyuwo khamukhovelenle omusoma Biblya mahiku ootheene. Munonela hayi opatxeriha olelo vaava? Vaavo munsomaanyu sa Yesu mwilipihereke weera musuwele mikhalelo sawe, atthu yanikhala otaphuwa omwattamela mpaka anamwane yanataphuwa ni yoowo.” (Mar. 10:13-16) Yesu ari oreera murima, ansivelo, ni atthareli awe khiyamoova. (Math. 16:22) Okhala weera Yesu aatakiha Atithawe, hiyo khanihovela weera Yehova okhalano mikhalelo iya. Hiyo pooti omuhulela murima ahu Yehova nihupuwelaka weera owo ononithoriha, owo onnansivela ni onikosoopa.—1 Ped. 5:7.

⁶ Yesu anaxupeya ni maxupo yaaphwanya atthu etempu ele, tivawonto mutthareli Matheyo alempaawe weera: “Ni ònalaiye miloko s’atthu àhàmorela yawo ikharari, niwoko yàri okhulumuwene ni òmwaramwareya ntoko iputtiputthi sihikhanle ni mukukhuli.” (Math. 9:36) Yehova onoonela hayi eyo? Nwehe ele Yesu ahimmawe weera: “siso kahiyene otthuna wa atith’inyu ari wirimu, wera mmosá a asikhanixa ala ariheye.” (Math. 18:14) Ti wooreera osuwela moota Yehova onoonelawe vaavo ninvirelela ahu omusuwela Yesu omusivela waahu Yehova onnatxerereya.

7. Heeni oviriha etempu ni asinna owiitthwa omunepani onkelaya wookhaviherani?

⁷ Etthu ekina enkela wookhaviherani ori okela vahoolo mmunepani ni oviriha etempu ni asinna oolipa omunepani ni owoona moota araya oohakalala. Mene awo khaneera keerelani mwaha wonvarela muteko Yehova ni mwakohe sookumanano aphwannyaya mmutekoni mwa Yehova, mwatthunaka opaka soothanla sooreera mwavekele miruku: “Ani asuweli annatxerera osuwela waya.”—Mir. 11:14.

8. Eheeni nyuwo munkelanyu opaka mwahovelaka ele Biblya onxuttihaawe?

⁸ Mmalihe ohovela. Ntoko nonnaahu  eparagrafu 2, Satana onoopaka ele onweraawe weera muhirowe ohoolo moomunepani. Moota  woopaka eyo, ori woohovelihani ikhaikhai Biblya onxuttihaawe. Mwa ntakihero, emaara nyuwo mununnuwanyu pooti ophwanya yooxuttiha ya othatuwa oxikola. Maprofesore anyu pooti woorumani okhavihera nyaha sa othatuwa, mene awo pooti weera khanuupuwele weera ookhala mpattuxa. Ti wooreera wupuwela ele onhimaawe Miruku 18:17: “Ole onattantta wixakiha onkhala ntoko khapahunle onnemela mwittani awe ni onnamuthoriha.” Araya nyuwo pooti woona weera itthu muxuttenranyu ti sekhaikhai, mwisukere etempu weera musome ele Biblya ohimaawe, mwaasase mpuwa mwa irevista sahu ni mutthekule ni asinna ni asirokora yawo yaaroromela othatuwa wa itthu. Nyuwo pooti waakoha etthu yaakhavihenre ororomela weera ookhala mpattuxa onnipwattha. Matthekulelo ala pooti wookhaviherani woona weera ookhala Mpattuxa.

9. Eheeni nyuwo muxuttenranyu ni ntakihero na Melissa?

⁹ Murokora mmoha oneriwa Melissa ahasasa nneene woohima sa othatuwa wa itthu. * Itthu owo ansaawe samukhavihera okhalano nroromelo na ele Biblya onxuttihaawe, owo oneera: “Oxikola maprofesore annuluma woohima sa othatuwa mwa moota nyuwo munkelanyu ororomela weera ekhaikhai. Mene miyo kannova vantxipale mwaha wa ohovela waka, miyo nkhatthuna wasasa wakhuliwa makoho ale, mene miyo kannova wonelela weera maprofesore aka aakhalano erazau. Nto miyo kahuupuwela weera Yehova khantthuna weera nimuroromeleke owo woohikhalano mathipelo. Mwa yeeyo, kannatthuneya oviriha ohovela waka. Kaapaka eyo kimusomaka liivuru oneera Existe um Criador Que Se Importa com Você? Ni ibroxura A Vida—Teve um Criador? ni A Origem da Vida—Cinco Perguntas Que Merecem Resposta. Eyo yaari etthu kahawelaka etempu ene yeele.”

10-11. Eheeni enkela onikhavihera ovirelela okhala ottela vamaithoni Yehova? (1 Atesalonika 4:3, 4)

¹⁰ Mutthaweke okonihana woohirerela. Emaara mununnuwaanyu mukhalelo wa otthuna okonihana pooti okhala woolipa, mene nto erutthu anyu pooti wonyesererani weera mukonihane nto muhittiwale weera ti yeeyo Satana ontthunawe weera nyuwo mpake. Eheeni enkela wookhaviherani oviriha yoowereriwa ela? (Mmusome 1 Atesalonika  4:3, 4.) Vaavo munanvekelaanyu Yehova mmuhuleleke murima anyu muhimukhuwaka eetthu. Muhimeke ekhaikhai ni munvekeleke nikhavihero weera oovaheeni ikuru. (Math. 6:13) Mupuweleke weera Yehova ontthuna wookhaviherani ohiya woothorihani. (Nsal. 103:13, 14) Nave omusoma Biblya pooti wookhaviherani, Melissa yoowo ohimmwale woopatxerani, oowina muupuwelo wa okonihani woohireerela owo onera: Omusoma “Biblya mahiku ootheene wookikhavihera ohikhulumuwa eyo yannakikhavihera wuupuwelela weera miyo ta Yehova. Miyo katthuna weera owo apakeleke eparte ekumi aka.”—Nsal. 119:9.

¹¹ Muherere oreherera maxupo mekhinyu. Mulume ni asipapinyu voohima sa etthu enoovirani, ekhaikhai weera pooti ohikhala wookhweya waleela asipapinyu itthu sinoovirani, mene ti wootthuneya opaka eyo. Melissa ohimme ha: “Miyo kanvekela Yehova weera okivahe olipa murima weera kuulume ni apapaka woohima sa maxupo aka. Kipakakaru eyo, kahoona owiitho kwee. Ni Yehova aahakalala ni miyo.”

12. Munawere hayi opaka soothanla sooreera?

¹² Mutthareke miruku sa mBiblyani. Vakhani-vakhani nyuwo pooti okhala ootaphuwa weera mpake soothanla sooreera, ekhaikhai ti yoowera sokhala itthu sintxipale muntthuneyaanyu oxuttera. Munaapake heeni weera muhinanarihe onthamwene anyu ni Yehova? (Mir. 22:3) Murokora mmoha oneriwa Kari onnahima etthu yamukhavihenre opaka soothanla sooreera, owo ahonelela weera yoole ori mukristu khontthuneya okhalano elista ya malamulo a yeele eri yoothanla, owo ohimme ha: “Miyo kaatthuneya wiwexexa malamulo a Yehova” ohiya osuwela paahi. Mwamusomaka Biblya mwiikoheke ha: “Yehova onkixuttiha eheeni woohima sa mwaha ola kinsomaaka?” Neereke miyo kooxuttera etthu mpuwa mwa yoosoma ela enkela okikhavihera opaka itthu soorera? Opaka ele Biblya onxuttihaawe enkela okikhavihera hayi? (Nsal. 19:7; Yes. 48:17, 18) Wakhala weera nyuwo munomusoma Biblya ni ovarela muteko etthu mumphwanyaanyu munimoona okhala wookhweya opaka soothala simmuhakalaliha Yehova. Vaavo mununnuwaanyu mmunepani munimonelela weera khontthuneya okhalano elista ya malamulo a yeele eri yoothanla weera mpake yoothanlanyu, mwaha wooweera nyuwo mmwereke wiwexexa moota Yehova ononelaawe woohima sa mwaha owo.

13. Anrowa wookhaviherani hayi asinthamwene oolipa moomunepani? (Miruku 13:20)

¹³ Mwathanleke asinthamwene ammusivela Yehova. Ntoko hiyo nulumaahu, asinthamwene anyu pooti ovolela mannuwelo anyu a omunepani. (Mmusome Miruku 13:20.) Murokora mmoha oneriwa Sara apatxera ottettheya, mene yookhala etthu emoha yamukhavihenre otxentxa moonelo awe. Owo ohimme ha: “Miyo kahaapaka asinthamwene oreera etempu yeeyo kahawelaka, miyo kapatxera oreherera yoosoma ya Nwehereri ni murokora mmoha a muloko ahu. Murokora mukina akikhavihera waakhula makoho empakiwa omithukumanoni. Mwaha wowaapaka asinthamwene oolipa moomunepani, miyo kaapatxera ohikuxera matheela yoosoma aka ya Biblya ni mavekelo. Ni onthamwenaka ni Yehova waapatxera olipa ni katthikela okhalano ohakalala.”

14. Juliano awenre hayi waapaka asinthamwene oreera?

¹⁴ Nyuwo munkela waapaka moota heeni asinthamwene owunnuwa mmunepani? Munna mmoha oneeriwa Juliano yoowo olelo ori mutokweene a mmulokoni ohimme  ha: “Emaara karaka mmiravo miyo kahapaka asinthamwene yaawo karowanaka woolalerani, asinthamwene awo yaari anthiti ni yakikhavihera weerela eparte muteko wolalera, awo yakikhavihera okhalano sooluluwanya sa omunepani. Nave miyo, kahoonelela weera kayelela eparakha yowapaka asinthamwene ooreera mwaha wooweera, miyo kapaka asinthamwene atthu paahi kalikanakano wunnuwa. Nto vano oBetheli nno, kinnavirelela waapaka asinthamwene oreera. Matakihero aya sa, annakikhavihera opaka soothanla sooreera voohima sa otthekula mwa nttittimiho ni awosa, annakikhavihera omwattamela Yehova.”

15. Paulo amulenle eheeni Timotheyo? (2 Timotheyo 2:20-22.)

¹⁵ Nankha nyuwo moonelela weera munna mmoha khahiyono nthamwene oreera? Murummwa Paulo asuwela weera makristu makina a etempu awe, khiyakhanle oolipa moomunepani, tivawonto amulenlaawe Timotheyo weera asepeke akristu ntoko awo. (Mmusome 2 Timotheyo 2:20-22.) Onthamwene ahu ni Yehova etthu yootepa otthuneya. Mwa yeeyo, khontthuneya omuhiya mutthu ananarihaka onthamwene ahu nrahuno ni Muluku yoowo nivirinhahu etempu yintxipale weera nipake.—Nsal. 26:4.

16. Soluluwanya heeni nyuwo muntthuneyanyu okhalano?

¹⁶ Muthanleke soluluwanya sooreera sa omunepani. Nyuwo pooti othanla soluluwanya sanyu sinkela olipiha nroromelo nanyu ni okhala mukristu oreera. (Aef. 3:16) Mwa ntakihero, nyuwo pooti woonelela weera yooluluwanyaanyu yooreera mukhanlanyu ookwanihera ori wunnuwihera yoosomanyu yoomekha ni omusoma wanyu Biblya. (Nsal. 1:2, 3) Apaale nyuwo munonelela weera ontthuneya otthipanyera opaka wanyu mavekelo. Araya, nyuwo tho pooti woonelela weera ontthuneya okhala owihiha weera mpakeke sothanla sa nnene voohima sa matthekulelo anyu ni moota munvarihelaanyu etempu anyu. (Aef. 5:15, 16) Yehova oonaka vale weera muniilipihera weera munnuwe mmunepani owo onnahakalala.

17. Wakhavihera atthu akina omphwanyiha eheeni?

 ¹⁷ Wakhavihera atthu akina pooti wookhaviherani okhala mukristu olipa. Yesu enre ha: “Ovaha ti etthu yorera opwaha wakhela.” (Mit. 20:35) Mwekhaikhai onookhala wooreera ovarela muteko ikuru sanyu weera mwakhavihere akina. Mwa ntakihero, nyuwo pooti okhalano yooluluwanya ya waakhavihera asinna ni asirokora owuuluvala ni ale anivoreiwa. Apaale nyuwo pooti wathumela etthu naari waakhavihera miteko sa vaate, nyuwo tho, pooti waakhavihera ovarela muteko ikaruma saya eletroniku. Waari weera nyuwo munna, pooti okhalano yooluluwanya ya okhala murmeyi oorumela weera mwakhavihere asinna mmulokoni. (Afil. 2:4) Nyuwo pooti owoonihera nsivelo atthu ehikhanle Anamoona a Yehova mwalaleraka. (Math. 9:36, 37) Wawereyaka nyuwo pooti ovolowa muteko wa ehuhu yootheene.

18. Ovara muteko wa ehuhu yootheene onkela wookhaviherani hayi wunnuwa mmunepani?

¹⁸ Ovara muteko wa ehuhu yootheene pooti wookhaviherani wunnuwa mmunepani. Ovara muteko wa opiyoneiru pooti ohula milako weera murowele exikola ya anamalalera a Omwene, ovara muteko oBetheli naari orowa ovara muteko wooteka. Mwamwali mmoha piyoneira oneriwa Kaitlyn ohimme ha: “Etthu yakikhavihenre wunnuwa mmunepani kibatiziwakaru waari oviriha ehuhu ni asinna ni asirokora oolipa mmunepani yaawo yaarino sookhumanano mmutekoni moolalera. Ntakihero naya nakikhavihera watxeerera omuroromela waka Biblya ni moota woowaaxuttiha atthu.”

19. Mareeliho heeni munkelanyu ophwanya mwiilipihera vale okela vahoolo mmunepani?

¹⁹ Mwailipihera vale wunnuwa mmunepani munimwakhela mareeliho. Mwa ntakihero, nyuwo khamunkela otthimakela itthu sihimphwanyiha etthu. (1 Yoh. 2:17) Mweera haawo, nyuwo khamunrowa okumanano maxupo mwaha woopaka soothanla soonanara ni nyuwo munoophwanya ekumi yooreera. (Mir. 16:3) Ntakihero nanyu nnimwalipiha asinna amiravo ni owuluvala. (1 Tim. 4:12) Ni etthu yootepa otthuneya nyuwo munookhalano murettele ni ohakalala mwaha woosuwela weera munnamuhakalaliha Yehova ni weera mookhalano onthamwene nuuwo.—Mir. 23:15, 16.