MWAHA ONTHOKORORIWA 34
“Nvirelele weetta mweekhaikhaini”
“Khawa’vo ohakalala otokotoko wa miyo, ohikhanle osuwela wi anamwan’aka annètta mwa ekhaikhai.”—3 YOH. 4.
ETXIPO 111 Itthu Sinniiriha Ohakalala
ELE NINKELA AHU OXUTTERA *
1. Mwaha wa heeni oraaya wootthuneya oleelana moota nxuttenraahu “ikhaikhai”?
“NYUWO musuwenle hayi ekhaikhai?” Moohihovela, nyuwo mootoko okohiwa nikoho nna ikwaha sintxipale. Nna nikoho noopatxera muniiwaanyu vaavo mumpatxeraanyu omusuwela munna. Tiwooreera osuwela moota munna opatxenraawe omusuwela Yehova. Tiwooreera-tho hiyo othaliha moota nixuttenraahu ekhaikhai. (Arom. 1:11) Otthekula moota ola onnanuupuxera weera ekhaikhai tiyootepa ontthuneya wa hiyo. Opwaha mwa yeeyo, ninnathanla ‘ovirelela weetta mweekhaikhaini’—eyo-tiyo okhala moovarihana ni makhalelo ammusivela Yehova.—3 Yoh. 4.
2. Eheeni ninkelaahu woona mwa yoosomeene yeela?
2 Mwa yoosomeene yeela, ninkela woona mwaha wa heeni ninsiveliwaahu ni ekhaikhai. Avinyaka, ninkela woona moota heeni nneeraahu noonihereke weera ninnasiveliwa ni ekhaikhai. Yoosoma ela enookela onikhavihera omuxukurela Yehova mwaha woonipurulela mweekhaikhaini. (Yoh. 6:44) Nave-tho enoonivaha ntthuno noowaaxuttiha atthu akina ekhaikhai.
MWAHA WA HEENI NINSIVELIWAAHU “EKHAIKHAI”
3. Nthowa heeni ninneriha osiveliwa ekhaikhai?
3 Hiyo nokhalano mathowa mantxipale anneriha osiveliwa ekhaikhai, mene nthowa nootepa otthuneya na mathowa ala nri noowera nintthuna omuhakalaliha Yehova napwipwi a ekhaikhai. Mbiblyani hiyo nohona ikuru sa Yehova ovarihenlawe muteko opakaka itthu sootheene, nave-tho hiyo nihona weera Tithiihu a wiirimu onnanithokorora. (1 Ped. 5:7) Hiyo nosuwela weera Muluku ahu “opixa murima òsapwanyeya, òtxerewa osarasareya ni òsareya mahala ni ororomeleya.” (Ott. 34:6) Opwaha mwa yeeyo, Yehova ennamusivela exariya. (Yes. 61:8) Emaara yeeyo onnonaawe nihaawaka owo onnanvoreya murima nave-tho onnona ewoora onkelawe omaliha maxupo ootheene. (Yer. 29:11) Hiyo khaniwera woona ewoora sinkelaya wereya itthu iya, mene nto itthu iya siri itthu sinneriha omusivela vantxipale Yehova!
Ekhaikhai sa mBiblyani siri ntoko . . . Nankura
Ntoko hiihale nankura onamulipihaawe barco emaara ya epheyo, nroromelo nahu ninkhuma mBiblyani ninnanikhavihera ovirelela okhala oomala naakumanakano maxupo. Nave ikhaikhai sa mBiblyani sinnaneeriha otthuna waaleela atthu akina yooweherera ahu ya muhoolo (Nwehe eparagrafu 4-7)
4-5. Mwaha wa heeni murummwa Paulo alikanxeraawe yoowehererahu ni nankura?
4 Mathowa heeni makina anneriha osiveliwa ekhaikhai? “Ekhaikhai ennanivaha yooweherera ni ennahiyaniha ekumi ahu. Moone etthu Paulo alikanxerawe: “Nroromelo nle hiyo nrino ntoko nankura olipa.” (Aheb. 6: 19) Ntoko hiihale nankura onamwemexawe barco nipuro noophwanelela envireene epheyo etokotoko, emoha-moharu enereya ni nroromelo nahu nenno ninkhuma mBiblyani ninanikhavihera okhala omala navirihaka maxupo.
5 Ekhaikhai weera Paulo uluma sa makristu oothanliwa yaawo enkela okhala wiirimu, mene masu ale ennavareleya muteko wa makristu arino yooweherera yookhala valaponi mparadiso. (Yoh. 3:16) Muroromeleke weera yoororomela eyo muraanyuno yokhalano ekumi yooreera.
6-7. Moota heeni oxuttera ekhaikhai wamukhavihenraya murokora Yvonne woohima sa itthu sakela wereya muhoolo?
6 Nwehe etthu yamukhumelenle murokora oneriwa Yvonne. Owo khahuwale mweekhaikhaini, emaara araawe mwaana anova vantxipale okhwa, ekwaha emoha owo asoma yoowereya emoha ya mBiblyani yeeyo ahattiwanlawe yahima weera: “Omalo khonkela oxa.” Owo ohimme ha: “Masu ala yanikiyeleliha etempu aka ni ikhove kuupuwelaka. Kannaviriha ohiyu wootheene kupuwelaka etthu yeera yereye muhoolo. Okumi ohikhaleke hiiha.” Nto kanupuwela ha: “Mwaha wa heeni kiiraaka mukumi? Miyo nkatthuna okhwa!”
7 Evinreene etempu emaara Yvonne onnuwawe, owo amusuwela Namoona a Yehova mmoha owo onera: “Miyo kapatxera ororomela weera kamukhala mparadiso valaponi mahiku ootheene.” Moota heeni murokora ola okhaviherenyaawe mwaha wooxuttera ekhaikhai? Owo onnavirelela eraka: “Olelo nkinvinya-tho ohiyu kixupeyaka ni etthu eneera yeereye muhoolo.” Vanoneya weera Yvonne onasiveliwa vantxipale ekhaikhai ni onnavara muteko woolaleera ni waleela atthu akina yooweherera ya muhoolo.—1 Tim. 4:16.
Ekhaikhai sa mBiblyani siri ntoko . . . Muhakhu
Onvarela muteko Yehova vaanano ni okhalano yooweherera weera nnoovarela muteko Yehova mahiku ootheene nlamuleliwaka ni Omwene wa Muluku muhakhu. Wiilipihera wahu wootheene khaiyene ti wa mahala (Nwehe eparagrafu 8-11)
8-9. (a) Eheeni mulopwana a niphwanaphwaniho na Yesu apankaawe aphwanyakaru muhakhu ole? (b) Nyuwo munhela moota heeni mwiitti ekhaikhai musuwenlaanyu?
8 Mitthenka sooreera woohima sa Omwene wa Muluku. Nave sinnerela eparte ekhaikhai sa mBiblyani. Yesu alikanxera Omwene wa Muluku ni muhakhu wavithiwe yoowo onromoliwa va Matheyo 13:44, Yesu ohimme ha: “Omwene wa wirimu onaphwanaphwana ni muhakhu ovithiwe mmattani mutthu ottonttaiye, àvitha tho. N’ohakalala wawe àrowa otumiha sothesene araiyeno, anathuma ematta ele.” Vanoneya weera mulopwana ole khasa muhakhu ole, mene emaara aphwannyawe owo ahilipihera vantxipale weera owere okhalano muhakhu ole. Ekhaikhai weera owo athumiha itthu sootheene araweno. Mwaha wa heeni? Mwaha woowera aasuwela weera muhakhu ole waari wotthuneya ni aasuwela weera watthuneya opaka etthu weera owere okhalano muhakhu ole.
9 Mohihovela, nave nyuwo munnahela mwiitti ekhaikhai muxutteranyu. Hiyo noosuwela weera khiyavo etthu mulaponi enhakalaliha nalikanxera ni onvarela muteko Yehova vanano va, olamuleliwa ni Omwene wa Muluku. Okhalano onthamwene wooreera ni Yehova eparakha yooreera ophwaha yoovaha eri poothe. Osuwela weera ninamuhakalaliha Yehova “onnatxerera ohakalala wahu.”—Akol. 1:10.
10-11. Mwaha wa heeni Michael apankaawe matxentxo mwekumini mwaawe?
10 Asinna antxipale ahiilipihera vantxipale weera ekhale emusivelihaka Yehova akina a yawo aahiya itthu sintxipale ottuli ntoko wiwanyeya ni akina aahemexera otthimakela muhakhu ni akina atxentxa momalela mukhalelo aya wa okumi. Mwaha wa ele axuttenraya mene ti yeeyo yereñye ni munna Michael, “owo khahunwale ni etthoko ya makristu emaara arawe mmiravo anamuxuttera karaate.” Mene emaara yeeyo Michael amuxutterawe Biblya, owo axuttera moota Yehova onoonelaawe woohima sa owali. (Nsal. 11:5) Michael onavirelela othaliha eraaka: “Ntheli nakisomiha Biblya khannakilele weera mwemexere omuxuttera karaate, mene awo yakixuttiha ikhaikhai sa mBiblyani.”
11 Emaara yeeyo Michael avirelelawe oxuttera woohima sa Yehova nsivelo nawe nannavirelela waatxerereya. Etthu yamuttuntthe murima Michael saari ikharari sa Yehova onwoniheraawe arumeyi awe, moovira etempu owo ahiwexexa weera wanatthuneya opaka yoothanla mwekumini mwaawe. Ni owo asuwela weera ohiya omuxuttera karaate yaari etthu yatempe omuxupa mwekumini mwaawe, mene okhala weera atthuna onvarela muteko annaroromela weera anwera wiilipihera weera anvarele muteko Yehova. Michael aasuwela ikhaikhai sa mBiblyani weera saari sootthuneya, mene nto owo apaka matxentxo otthuneya mwekumini mwaawe.—Yak. 1:25
Ekhaikhai sa mBiblyani siri ntoko . . . Luuxu
Luuxu onnanikhavihera woona ohoolo wa ephiro ninviraahu ya epiphi. Vamoharu, masu a Muluku annanikhavihera moota woopaka soothanla sooreera elapo ela yoonanara ya Satana (Nwehe eparagrafu 12-13)
12-13. Ikhaikhai sa mBiblyani samukhavihenre hayi Mayli?
12 Ikhaikhai sa mBiblyani sinnalikanxeriwa ni muthuko ommwalela nipuro nraya epiphi, nlikanyiho nna ninanikhavihera wiiwexexa moota ikhaikhai sa mBiblyani siraaya sootthuneya. (Nsal. 119:105; Aef. 5:8) Mayli onkhala wa Azerbaijão onnaxukurela vantxipale moota masu a Muluku ammwalelaya ekumi awe, owo onnuwe vaate va atthu okawanyeya ittiini. Apapawe yaari mmaka ni ameyawe mujudia owo oneera: “Miyo kanamuroromela Muluku, mene itthu ikina kanahovela ni sannakihiya kixupenyene ni kanikoha ha: mwaha wa heeni Muluku onipattunxawe? Mwaha wa heeni atthu anhawaya ni woopopihiwa orohinwa omoroni? Atthu akina yeera otthuna wa Muluku. Nto miyo kanikoha, ‘neereke Muluku onnamusivela nahawaka?’”
13 Mayli avirelela waasasa waakhuliwa wa makoho awe. Evinreene etempu, owo aapatxera omusoma Biblya ni ahikhala Namoona, owo oneera: “waakhuliwa woottuttha murima wa mBiblyani waatxentxa momalela mupuwelo aka woohima sa ekumi nave waakikhavihera okhalano murettele.” Antoko hiihale Mayli hiyo ninnanvuwiha Yehova “yole owitthanneni mwepiphini wera ovoloiheni mowaryani mwawe motikhiniha.”—1 Ped. 2:9.
14. Ninkela waatxerera hayi osiveliwa wahu ekhaikhai? (Nwehe equaadro “ Maphwanaphwaniho makina.”)
14 Awo ari matakihero anonihera weera ikhaikhai sa mBiblyani ti sootthuneya, mohihovela nyuwo munnawera owuupuwela atthu antxipale. Munoonela hayi nyuwo waasasa mpuwa mwa yoosoma anyu ya omwanene mathowa makina anneriha osiveliwa ni ekhaikhai? Vaavo ninvirelelahu osiveliwa ekhaikhai ninnonihera eyo mwekumini mwahu.
NINKELA WOONIHERA HAYI WEERA NINNASIVELIWA EKHAIKHAI
15. Ninkela woonihera moota heeni weera ninnasiveliwa ekhaikhai?
15 Hiyo ninnonihera weera ninnasiveliwa ekhaikhai nimusomaka Biblya mahiku ootheene ni iliivuru sinikhumiheriwa ni mareherero ahu nihipwatthaka iyaakha ikavi nraahu mweekhaikhaini. Mene hiyo ninnatthuneya ovirelela oxuttera. Erevista yoopatxera ya A Sentinela ohimme weera “ekhaikhai eri ntoko efloori yootthuneya variyari va ifloori, weera niphwanye efloori eyo hiyo nintthuneya wiilipihera vantxipale. Mene waphwanya vale khontthuneya owehexexa yeeyoru paahi. . . . Mene ontthuneya ovirelela waasa ifloori ikina. Ekhaikhai weera omusoma Biblya khohiyono wookhweya, mene ontthuneya wiilipihera. . . . Mene ontthuneya wiilipihera weera nikhavihereye ni ele ninsomaahu.”
16. Mumpaka moota heeni mwasomaka vale? (Miruku 2:4-6)
16 Ekhaikhai weera khohiyono otheene hiyo onnanisivela osoma. Mene Yehova onnaniwopa weera “nivireleleke waasasa ikhaikhai” sa mBiblyani. (Mmusome Miruku 2:4-6.) Emaara yeeyo hiyo nnilipiheraahu ninnawera owina maxupo, munna mmoha oneeriwa corey eriye: “Vaavo kimpakaka yoosoma aka ya Biblya kinnawehexexa eversu emoha-moharu, ni onnatxerera eraaka miyo kinnasoma inoota sootheene ireferensia adicional ni cruzado kaapaka haawo miyo kinakhavihereya kihipwatthaka etempu kinvarihelaka muteko. . . . Ni kinnonihera-tho weera kinnahela mwitti ikhaikhai sa mBiblyani vaavo kiisukeraka etempu weera kimusome Biblya ni wiilipihera opaka eyo.”—Nsal. 1:1-3.
17. Ontaphulela heeni okhala mwekhaikhai? (Yakobe 1:25)
17 Oxuttera ikhaikhai sa mBiblyani, mene onnatthuneya ovirelela opaka eyo, nave onnatthuneya okhala movarihana ni ekhaikhai naari neere ha ovarela muteko ele munxutteranyu neera haawo nnowera okhalano ohakalala wekhaikhai. (Mmusome Yakobe 1:25.) Mene ninkela osuwela moota heeni weera ninnetta mwekhaikhaini? Munna mmoha ohimme weera ontthuneya wiiwehexexa weera noone nipuro heeni nintthuneyaahu oreherera. Nivarihelaka muteko ele ninsomahu, murummwa Paulo enre: “Wakhala siso, yeeyo niphiyerahu’mo mwemmo, ene nètteleke’mo.”—Afil. 3:16.
18. Mwaha wa heeni nintthuneyahu ovirelela weetta mwekhaikhaini?
18 Nyuwo muhemela mupuwelela moota mukhavihereñyaanyu mwaha “woovirelela weetta mwekhaikhaini”! Ekumi ahu ti yootepa oreera, opwaha mwaha yeeyo, hiyo ninnaweera ohakalaliha murima wa Yehova naahiyaka asinna ohakalala. (Mir. 27:11; 3 Yoh. 4) Mohihovela hiyo nookhalano mathowa mantxipale anneriha osiveliwa ekhaikhai ni ovirelela weetta mwekhaikhaini.
ETXIPO 144 Nuupuweleke Etthuvo ya Muhoolo!
^ Mweekhaikhai hiyo ninnahima soororomela sahu ni ekumaahu ennakhala moovarihana ni “ekhaikhai”. Nnaamweera hiyo nixuttenreene ekhaikhai khalayeene naari vaanano, ninnatthuneya wuupuwela etthu yaaneerinhe oxuttera ekhaikhai. Wuupuwela eyo enoonikhavihera ovirelela omusiveliha Yehova.
