1-2. (a) Moovarihana ni Miruku 16:31, niwooneleke hayi asinna oowuuluvala? (b) Makoho heeni ankela waakhuliwa mwa yoosoma ene yeela?

YOOKHALA eparke eri Arkansas, w’Estados Unidos, vaavo ehinxupaaya ophwanya idiamante sireene vathi. Mene mwaha wooweera khasirehereriwe atthu antxipale anvira vawo, annawehexexa nave annawehexexa mihakhu iyo.

² Moolikana asinnihu oororomeleya oowuuluvala, anlikana ni Idiyamante iye. Awo mihakhu sootthunenya. Masu a Muluku annaalikanxera mayihi aya ootteela ntoko ekhara ari mmuru. (Mmusome Miruku 16:31; 20:29) Mene mihakhu iyo, pooti wooniwa ni ohaaweliwa ni atthu antxipale. Mene amiravo annasuwela moota asinna awo oowuuluvala araaya ootthuneya ni pooti oxuttera itthu sootepa otthuneya opwaha muhakhu ni asinna awo oowuuluvala. Wa yoosomeene yeela, ninkela wiiwa waakhuliwa waya wa makoho ala mararu: Mwaha wa heeni Yehova onwoonaawe asinna oowuuluvala okhala ootthuneya? Mwaha wa heeni awo araaya ootthuneya mmarehereroni mwa Yehova? Ninkela oxuttera hayi ni matakihero aya?

3. Moovarihana ni Nsalmu 92:12-15, mwaha wa heeni asinna oororomeleya oowuuluvala araaya oororomeleya vamaithoni va Yehova?

³ Asinna oororomeleya owuuluvala tootthuneya vamaithoni va Yehova. Owo onnawera woona mirima sa asinna owuuluvala, ohaasuwela ni omusivela mikhalelo saya sooreera. Yehova omusivela vaavo asinna oowuuluvala anaavahaaya miruku amiravo. Seiyo axuttenraaya iyaakha sa muttuli mmutekoni mwa Yehova. (Yobi 12:12; Mir. 1:1-4) Yehova tho onnahela mwiitti ovilela waya. (Mal. 3:16) Ekumi ya asinna awo, khoiyono waari wookhweya ni omuroromela waya Yehova khuwaavukunwe ni yoowehereraaya ya muhoolo ti yoolipa mpaka khalayi. Yehova onnaasivela vantxipale asinna awo mwaha wooweera “nnaamweera  yuuluvanle annawera onvuwiha nsina nawe.”—Mmusome Nsalmu 92:12-15.

4. Eheeni enkela waalipiha asinnihu oosiveleya oowuuluvala?

⁴ Wakhala weera nyuwo munuuluvala munvarelaka Yehova, txontte muroromeleke weera Yehova onnuupuwelela itthu munvarenlaanyu. (Aheb. 6:10) Nyuwo mookhavihera ni murima wootheene muteko woolaleera nto eyo yoomuhakalaliha tiithi a wiirimu. Nyuwo mooviriha maxupo mantxipale—mpaka maxupo yaale oovila ovilela—nyuwo mohaakiha malamulo a mBiblyani, mwannakosoopa miritti mwaakhelaanyu mmarehereroni mwa Yehova ni mwannaaxuttiha atthu akina. Nyuwo mwannapaka ele munweraanyu weera mutthare matxentxo ampakiwa mmarehereroni mwa Yehova. Nave nyuwo mwannaakhavihera ni owooperera ale anvara muteko woolaleera mwa ehuhu yootheene. Ororomeleya wanyu onnaatxeerereya ni nsivelo Yehova okhalannaawe ninyuwo. Owo oolanhera weera, “khanattiwala anakharari awe”! (Nsal. 37:28) Owo onnaaroromeliha asinna owuuluvala eeraka: “mpaka omela ipwi kini kotexeni.” (Yes. 46:4) Mene nto mwaha woowuuluvala nyuwo muhuupuweleke weera khamuhiyono ootthuneya mmarehereroni mwa Yehova. Mweekhaikhai nyuwo tootepaxa otthuneya!

5. Eheeni asinna owuuluvala entthuneyaaya wuupuwela?

⁵ Asinna awo aakhalano itthu sintxipale soopaka. Ekhaikhai weera khaakhalanne ikuru ntoko yaakhalannaaya khalayi, mene iyaakha iyo evirinhaaya aakhalano sookumanano sintxipale. Awo pooti ovirelela onvarela Yehova nimikhalelo soovirikana. Tiyeeyo matakihero anttharelana akhalayi ni avaanaano enkelaaya wonihera.

6-7. Matakihero heeni a mBiblyani aatthu owuluvala yaawo yaareelihiwe ni muteko aya woororomeleya.

⁶ MBiblyani hiyo nnoophwanya matakihenro ooreera a arumeyi oororomeleya yaawo yaavirelenle onvarela muteko Yehova nnaamweera yuuluvanleene. Mwa ntakihero Mose emaara aaraaweno iyaakha 80, aapatxera onvarela muteko Yehova ntoko mprofeti ni aakhala muhooleli a nloko na Ana Israeli. Nave Daniyeli vanooneya weera emaara aaraaweno iyaakha 90, Yehova aavirelela onvarela muteko ntoko mprofeti. Woonaru tho murummwa Yohani vaavo  aakhalannaawe iyaakha 90, aahupuxeriwa olepa ebuukhu ya Apokalise.

⁷ Atthu akina khaanaasuwela weera yaari oororomeleya. Mene Yehova anniwoona ni annaareeliha mwaha woororomeleya waya. Mwa ntakihero, Biblya onnathaliha sa vakhani sa mulopwana mmoha “axariya ni omova Muluku” eeriwa Simoni. Mene Yehova anvaha eparakha yoomoona Yesu areene mwaana ni okwanihera soolohera ikana sa Yesu ni amayawe. (Lu. 2:22, 25-35) Ni aakhalawotho mprofeti muthiya eeriwa Ana ni ninnahima weera “khanatxompele mithukumano.” Nnaamweera aakhalanneene iyaakha 84, ninnahima weera Biblya onnathaliha weera owo “khanatxompele orowa opeweni.” Mwa yeeyo, Yehova anvaha ethoonyero ni eparakha yoomoona Yesu areene mwaana. Vanooneya weera Simoni ni Ana yaari atthu ootthuneya vamaithoni va Yehova.—Lu. 2:36-38.

8-9. Nvahe ntakihero nnoonihera weera asirokora anaamukhweli tootthuneya mmarehereroni mwa Yehova.

⁸ Mahukwaahu ala asinna antxipale oororomeleya owuuluvala annaavaha ntakihero nooreera amiravo. Moone ntakihero nooreera na murokora owuuluvala  Lois Didur. Owo opatxenre ovara muteko wa opiyoneiru wookilaatheya oCanada emaara aaraaweno iyaakha 21. Avinyaka aatheliwa owo ni Aiyawe John, yaavara muteko wa mutokweene ooxekura miloko mpuwa mwa iyaakha sintxipale. Muhoolo mwaya awo yaavara muteko oBetheli mpuwa mwa iyaakha 20. Owo ni aiyawe Jhon sivirakaru iyaakha 58, owo ni aiyawe yaawompwa weera yakhavihereke muteko oBetheli ya Ucrania. Yoonenle hayi nwopelo owo? Neereke yaahuupuwela, va nuuluvanlaahu va neereke nnoowera othaamela elapo ekina? Awo yaahaakhulela nave Jhon aathanliwa okhala mutokweene a Ekomisau ya Ucrania. Moovira iyaakha 7 Jhon aahookhwa mene amwaariye Loise yaavirelela okhala. Vano Loise ookhalano iyaakha 81, nave onnavirelela onvarela Yehova moororomeleya oBetheli ya Ucrania ni ootheene a wuuwu annamusivela vantxipale.

⁹ Asinaamukhweli ntoko Loise pooti weera khanaakhela nikhavihero ntoko yeeraaya asiyaya ereene akumi. Mene mwaha wookhala asinaamukhweli khovukunwe mwiitti aya naari vakhaaneene. Asirokora ala mwaha woovara iyaakha sintxipale yaakhaviheraka asinñyaya, ovirelela onvarela muteko Yehova ni ororomeleya. (1 Tim. 5:3) Mpaka va noowera woonelela mwaha wa heeni awo eraaya ootthuneya vamaithoni va Yehova, awotho ntakihero nooreera nnaalipiha amiravo.

10. Ntakihero heeni nooreera munna Tony onnivahaawe?

¹⁰ Asinna antxipale owuuluvala ni oororomeleya yaawo ankhala mapuro enkosoopiwaaya atthu owuuluva eri ntoko mihakhu sootthuneya. Mwa ntakihero munna mmoha oneeriwa Tony olelo okhala mapuro ntoko yaawo, owo oBatizinwe akhalanneene iyaakha 20 eyaakha ya 1942 mweeri wa Agosto oPennsylvania, w’Estados Unidos. ABatiziwakaru khaapinse ni okhootta orowa okhottoni. Mene mwaha wookhootta orowa okhottoni owo aawaleliwa  okalipooso. Moovira iyaakha piili ni emeya owo naamwaariye Hilda, yahaahuwa anamwane eeli mweekhaikhaini. Mene moovira iyaakha sintxipale owo aavara muteko ntoko mutokweene anxikura miloko (presidente yoowo olelo va oneeri Coordenador aasitokweene) ni mutokwene a muloko miraru ni ntoko mutokwene a muthukumano wa assembleya a Sirkwiitu. Owo aapakiha mithukumano ni soosoma mukalipooso. Olelo Tony ookhalano iyaakha 98, ni khanuupuwela otthikela ottuli. Onnapaka ele onweraaweraawe weera anvarele Yehova vamoha naasinna a muloko awe!

11. Munkela woonihera hayi weera asitokweene yaawo ankhala mapuro enkosoopiwaaya atthu owuuluvala tootthuneya wa hiyo?

¹¹ Ninkela waattittimiha hanyi asinna awo oowuuluvala yaawo enkhala mapuro enkosoopiwaaya atthu owuuluvala? Asitokweene a mmulokoni pooti waavaha impari sa mmulokoni waawereyaka vale. Hiyo tho pooti waakosoopa naari naaxikuraka moorweela mwa Chamada conferência. Mwaamusuwenleene munna onkhala mapuro awo ankosoopiwaaya atthu owuuluvala yoowo orakamelanne nimuloko hiyo nintthuneya omukosoopa moothanleya. Naahiikosoopavale hiyo pooti waattiwala asinna awo owuuluvala oosiveleya. Atthu akina pooti ohoona wooreera opaka eyo naari woona oxupa opakavo etthu. Mene wakhala weera nimmwaakoha asinna awo, nnoowiiwa ethalihaka ohakalala yaaphwannyaaya mmarehereroni mwa Yehova. Mene nto hiyo nnoolipa vantxipale.

12. Mmulokoni mwahu ninkela waaphwanya asinna a moota heeni?

¹² Pooti okhala ootutuxereya. Mmulokonimwahu pooti waaphwanya asinna owuuluvala oororomeleya owuuluvala yaawo eneera enivahe matakihero ooreera. Murokora mmoha oneereiwa Harriette yoowo anvarela muteko Yehova mpuwa mwa iyaakha sintxipale, muloko wa Nova Jersey, w’Estadaos Unidos owo aathaama weera akhaleke ni mwanawe. Asinna wa muloko munyowani aathaamenlaawe yannaviriha ehuhu aya yintxipale weera emusuwele nnene ni yaaphwanya muhakhu wootthuneya. Murokora Harriette aathaliha ithu sintxipale saamukhumelele mweekumini mmutekoni mwa Yehova. Emaara owo aaxuttenraawe ekhakhai mpuwa mwa eyaakha ya 1920. Mene ehuhu ele, owo aakelaawe mmutekoni moolaleera mpastani mwawe, owo annahela escova ya maino weera akuttheleke maino awaleliwa vale. Mweekhaikhai imaara piili mpuwa mwa eyaakha 1933 owo aawaleliwa moovira esemana emoha. Mene mpuwa mwa ihuhu iya, alopwana aamuthenle yaawo yahaakhanle Namoona a Yehova yannamukhavihera yaakosoopaka anamwa awe akhaanini. Moohihovela asinna oororomeleya ntoko Harriette annaphwanela weera naattittimiheke!

13. Ninxuttera eheeni ni othuneya waya asinna owuuluvala mmarehereroni mwa Yehova?

¹³ Asinnihu ni asirokorihu owuuluvala, tootthuneya mmarehereroni mwa Yehova. Tawo yaahoona nimaitho aya moota Yehova aareelinhaawe mareherro awe ni awo yaakhalano eparakha yooxuttera ni otthu sootthuneya ni soottheka saya. Nto nwooneleke asinna awo ntoko “naattuuttu a osuwela” ni muxuttere itthu sintxipale ni osuwela waya. (Mir. 18:4) Wakhala weera munniihiyera weera mwaasuwele nnenesene, nroromelo nayu nnookhala noolipa nave munooxuttera itthu sintxipale ni asinna awo!

14. Olaleya 32:7, onnooperera opaka eheeni?

¹⁴ Ikwaha ikina mpatxeriheke otthekula ni asinna owuuluvala. (Mmusome Olaleya 32:7.) Naari awo ehoonaka nnene naari ehikhalakano ikuru soowuuluma naari sooweetta, mene murima aya woohalavo. Nave-tho awo aapaka “nsina  nooreera” vamaithoni va Yehova. (Koh. 7:1) Muupuweleke mwaha wa heeni Yehova onwoonelaawe asinna awo ootthuneya. Mpwaherereke waakosoopa asinna awo oosiveleya ni nttittimiho. Mpakeke ntoko aapankaawe Eliseyo. Owo aanyeserera okhala ni Eliya mpaka mahuku oomalihera a ekumi awe. Mwa ikwaha tthaaru, owo aamweerela Eliya: “Nkirwa wohiya.”—2 Mam. 2:2, 4, 6.

15. Itthu heeni nneeraahu naakoheke asinna owuuluvala?

¹⁵ Moonihere weera munnaapwattha asinna owuuluvala mwaakohaka makoho ooreerela. (Mir. 1:5; 20:5; 1 Tim. 5:1, 2) Nyuwo pooti waakoha ntoko: “Nyuwo mwaaraanyu mmiravo, eheeni yoororomelihani weera moophwanya ekhaikhai?” “Maxupo mwaavirihaanyu, eheeni yookhavihenreni omwaattammmela Yehova?” “Eheeni yookhavihenreni ovirelela onvarela, muteko Yehova ni ohakalala?” (1 Tim. 6:6-8) Avinyaka nwiiweke noowiikosoopa emaara awo enthalihaaya sooweereya saya.

16. Mareeliho heeni amphwanyaaya vaavo asinnihu owuuluvala ni amiravo antthekulaaya vamoha?

¹⁶ Vaavo asinna owuuluvala ni amiravo antthekulaaya vamoha, ootheene annilipihana. (Arom. 1:12) Amiravo annaatxeerera nroromelo naya wa Yehova. Weera owo onnaakosoopa arumeyi awe oororomeleya ni asinna owuuluvala annoona weera annasiveliwa. Asinnihu owuuluvala annasiveliwa wooleelani moota Yehova aareelinhaaya mweekumini mwaya moota yanvarelaaya Yehova.

17. Mwaha wa heeni ninhimahu weera asinnihu owuuluvala oororomeleya annaphwaneliwa vaavo sinviraaya iyaakha?

¹⁷ Mweekhaikhai vaavo mutthu onunnuwawe, makhalelo a ekumi awe annatxentxeya naari neere annavukuwa. Mene yaale ammuroromela Yehova mahuku ootheene annakhala ooreera vamaithoni vawe. (1 Ates. 1:2, 3) Mwaha wa heeni? Mwaha wooweera iyaakha sintxipale evirinhaaya envarelaka Yehova, yahaakhulela weera munepa wa Muluku wareerihe naari neere ha, waakhavihere okhalano mikhalelo sooreera. Vaavo ninvirelelaahu waasuwela nnene asinna ni asirokora, ninnaxuttera weera awo aanivaha ntakihero nooreera ni weera awo muhakhu wootthuneya woohikontareya!

18. Eheeni ninkelaahu woona yoosoma enttharelana?

¹⁸ Muloko onnakhala woolipa ohiya paahi vaavo amiravo anaahelaaya mwiitti asinna owuuluvala mene tho, vaavo asinna owuuluvala anaahelaaya mwiitti asinna amiravo. Mwa yoosoma yoottharelana ninkela woona moota asinna owuuluvala anaahelaaya mwiitti amiravo.