Yesu aaxutta mikhalelo sooreera, nave ohoolo waya aakhala ntakihero nooreera eriyari ale yaakhanle anamuteko akina. Ninkela okhavihereya hayi ni ntakihero na Yesu? Nixuttera ntakihero nawe, nnimoona miruku miraru sineera sinikhavihere okhala anamuteko ooreera eriyari ya anamuteko akina eriyari ahu. Mikhalelo iyo sinoonikhavihera okhalano mikhalelo sineera sinikhavihere okhalano murettele ni anamiteko akhwiihu ni wiiraana.

Mukhwiihu ooreera ovarana muteko moowiiyeviha onnaahela mwiitti atthu onvaranaawe muteko ni khantthuna wiivuwiha. Mwaha ola woowiiyeviha ti etthu Yesu aaxunttaawe ni Atithawe. Nnaaweera yehova taphwanenle wiitthaniwa ntoko mpattuxa, owo aamuxuttiha muteko aavaraawe Mwaniye ni okhala mukhwaawe a muteko. Ninnoona eyo noonaka etthu Muluku uulummaawe eeraka: “Nimpake mutthu mwa enenero anyi, òphwanaphwana ni ekhov’ahu.” (Eph. 1:26) Araaya Yesu aahoona wiiyeviha wa Yehova.—Nsal. 18:35.

Emaara Yesu aaraawe elapo ya vathi, aahoonihera wiiyeviha ntoko atithawe. Emaara owo aattottopeliwaawe ni akina, ovuwa wootheene aamuroihela tiithaawe. (Mar. 10:17, 18; Yoh. 7:15, 16) Yesu annavaha ntakihero nooreera noowoonihera  murettele ni ale vaavaranaawe muteko vamoha ntoko oohusera awe nave annawoona okhala asinthamwene awe ohiya atthu piswa. (Yoh. 15:15) Mpakana owo aarapiha manaani a oohuseraawe weera aaxuttihe etthu yootepa otthuneya, ntoko wiiyeviha. (Yoh. 13:5, 12-14) Nave-tho hiyo nipakeke etthu emoha-moharu ni ale ninvaranaahu muteko. Onnitthuneya weera naaheleke mwiitti ale ninvaranaahu muteko nave ohela nipuro noopatxera sootthunaaya ohiya sawihu. Naahelanaka mwiitti mukina ni mukhwaawe, ni nihiittottopelaka mwaha wa itthu ninvaraahu, vanookhalavo nnene.—Arom. 12:10.

Mutthu oowiiyeviha onnaakhulela tho weera miteko sinkela weetta nnene wakhala weera “sinvariwa mowiwana ni antxipale.” (Mir. 15:22) Nihipwatthaka itthu nisuwenlaahu opaka naari okhumelela wahu nnene miteko ninvaraahu, onnitthuneya osuwela weera khaavo mutthu asuwenle sootheene. Mpaka Yesu ahaakhulela weera saakhala itthu owo ahaasuwenlaawe. (Math. 24:36) Mene owo annahela mwiitti itthu atthareli awe yaasuwenlaaya nnaaweera ao yaayarinweene ni yoottheka. (Math. 16:13-16) Mene mwaha woopaka eyo, yaaweera ale aavaranaawe muteko ekhaleke ootaphuwa wuuluma ni okhala vakhiviru ni yoowo! Emoharu, wakhala weera moowiiyeviha ninnoona weera itthu ikina khaninwera opaka ni weera akina enoowera okhavihera, nnoowera ovireleliha murettele no akina, nave nivaraka ootheene, “nnookhumelela nnene.”

Namuteko ooreera tiyoole ori oopisa onyoonyiwa vaavo onaavilelaawe asinkhwaawe amuteko. Owo toowaakuva oleva ni oopixa murima. Yesu aakhalano ebarakha yoowaaweha atithawe moota awo yaakhanlaaya oopisa onyoonyiwa. Mwa ntakihero, Yehova aamurumiha mwaniye weera atthu ewere oleveleliwa yoottheka yooyaraniwa.—Yoh. 3:16.

Emaara ekina, Yesu annileva. Muupuwele moota owo aamukhavihenraawe muthiyana mmoha oFiniciya, nnaamweera weera owo aarumihelewe empa ya ana Israeli. (Math. 15:22-28) Owo tho aari ooleva ni oopixa murima wa ele yaaweherereya wa oohusera awe. Emaara nthamwene awe Pedru aamukhoottiyaawe eriyari yaatthu, Yesu moowaakuveya aamulevelela. Muhoolo mwaya owo anvaha muritti mutokotoko Pedru. (Luka 22:32; Yoh. 21:17; Mit. 2:14; 8:14-17; 10:44, 45) Ntakihero na Yesu ninnoonihera weera onitthuneya “ohiya opisa wahu onyoonyiwa wooniwaka ni atthu akina” nooniheraka tho okhala oopixa murima.—Afil. 4:5.

 Nave okhala oopixa murima ni oomaaleleya, onoonikhavihera okhala oowaakuveya ovaleya naavaraka ni atthu eri poothe. Yesu aakhumelela nnene ni atthu yaawo yaakhala mukhiviru mwawe ni amwiittani ni ananrimanawe yaamothera okhala “nthamwen a àlipa a musonko ni anamattheka” yaawo yaakhulenle mitthenka. (Math. 11:19) Ntoko Yesu, neereke hiyo onoowereya okhumelela nnene wakhala weera nri eriyari yaatthu akhwiihu? Louis, munna yoowo aavirinhe ehuhu yintxipale areene mutokweene a eSirkwiitu ni aakhala oBetheli yoowo aavara ni atthu oovirikana, enre: “Kaaheerera waalikanyiha atthu ootheene yaawo kavaranaaka muteko kaahoona weera waari ntoko muuru waapakiwa ni maluku oovirikana. Vaavo mutthu ontxentxanihaawe maluku, onnaphwanyerera nluku nnookola exiri.” Ola mukhalelo wooreera keera!

Ninkela woonihera emaara heeni munepa woowiiraana mmulokoni mwahu? Hiyo nookhalano ebarakha yoowoonihera eyo emaara ninlaleyaahu mmutekoni moolaleerani. Hiyo onoowereya orowa olaleera ni anamalaleera erino miritti sintxipale ntoko erino itthoko naari tho erino iyaakha soovirikana ni sawihu. Neereke onnitthuneya wiilipihera weera nikhale oopixa murima nitxntxaka makhalelo ahu a mweekumini weera niwereke okhumelela nnene mmutekoni mwahu moolaleera?

Namuteko ooreera ovarano, tiyoole ori “okawela sawawe.” (1 Tim. 6:18) Emaara aavaraawe vakhiviru ni Apapawe, Yesu aahoona weera Yehova aari oowoolowa matata. Vaavo Yehova aakunkaawe ni “apankawe erimu,” Yesu “aari vaavo” ni anwereya oxuttera itthu sintxipale ni yoowo. (Mir. 8:27) Voottharana Yesu mwaneene moohakalala, aapaka etthu emoha-moharu ni oohusera awe “itthu sothesene ìwalawe” wa Atithawe. (Yoh. 15:15) Nuupuwelelaka eyo, hiyo tho onnitthuneya waaleela itthu nisuwenlaahu ale ninvaranaahu muteko. Mweekhaikhai, namuteko ooreerela khaakela okhala yoole paahi onuuluma paahi itthu weera muteko weette. Mene opwaha mwa yeeyo, moohakalala onnaaleela atthu akina itthu osuwenlaawe.

Naari hiyo poodi owuulumela masu oolipiha ale ninvaranaahu muteko. Vaavo mutthu mukina onoonaawe wiilipihera wahu ni onxukurelaawe ni murima wootheene, neereke eyo khenluttuwiha murima ahu? Yesu annaaserera ehu weera aaxukurele asinkhwaawe aavaranaawe muteko tthu sooreera awo yaapakaaya. (Mmulikanyihe ni Matheyo 25:19-23; Luka 10:17-20.) Mpaka owo aahima weera awo “yanvara sorera opwaha seiye” aavaraawe. (Yoh. 14:12) Ohiyu owo ahinaakuveene okhwa, owo ahaattottopela oohuseraawe oororomeleya, eeraka: “Nyuwo ti nyuwo mulekenle ni nthiti vamosá ni miyo.” (Luka 22:28) Munnuupuwela moota murima aya waattenlaaya yiiwakaru masu ale oovara murima! Ti vawo nto, wakhala weera ninnasunka ehuhu weera naattottopele asinkhwiihu ninvaranaahu muteko, awo enookhala oohakalala ni ovaheya ikuru.

“Namuteko ooreera eriyari ya anamuteko akina khantthuneya okhala oomalela,” muwehe ele munna oneeriwa Kayode, enraawe, owo ahimme ha “mutthu ootheya, nipuro onvaraawe muteko, muteko owo khonlemela.” Nyuwo namuteko moota owo? Munoonela hayi omwiitthana namuteko mukhwiinyu mukristu ni munamukaha mikhalelo seiyo onoonaawe wa nyuwo? Wakahala weera awo onnaasivela ovara vamoha ni nyuwo, ntoko atthareli a Yesu waasivelaaya ovara vamoha ni yoowo, nyuwo pooti omulatta murummwa Paulo yoowo enre: “nri anamuteko a ohakalala wanyu.”—2 Akor. 1:24.