Atthu antxipale esomme mwanvayi iversu iya enniikoha nikoho nna nri vasulu va. Mene yaakhala alopwana eeli yeeri Mefiboxethi yaavolonwe mwaheene yoola, nave hiyo pooti oxuttera etthu woohima sa mwaheene yoola nihokoleelaka osoma ele yaakhumelenle.

Mwene Sawuli aakhalano anamwane asilopwana ni asithiyana. Mwaana oopatxera mapele eeriwa Yonathani. Nto woottharana Sawuli aakhalano mwaana mukina mwaamulopwana eeriwa Mefiboxethi, mwaana a ekuxo ya mwene Sawuli, eeriwa Rispa. Mootikhiniha, Yonathani aakhalano mwaana mwaamulopwana eeriwa Mefiboxethi. Tivawonto, Mwene Sawuli aakhalano mwaana mwaamulopwana eeriwa Mefiboxethi ni osuulu awe eeriwa-tho Mefiboxethi.

Ehuhu ekineene, mwene Sawuli ahaapittikuwela atthu oGiboni yaawo yaakhala eriyari ya ana Israeli ni aaheerera waathuwiha moomalela. Akina a yaawo yaahiviwa. Mwaha wa heeni? Mwaha wooweera mahuku a Yehoxuwa, mamwene a ana Israeli yaapaka nivarihano ni aGiboni.—Yeh. 9:3-27.

Mene nto nivarihano nne yaapankaaya mamwene a ana Israeli ni maGiboni niisa nihaakunve omala emaara mwene Sawuli aalamulelaawe. Avirikanyihaka ele yaavarihaniwe, mwene Sawuli aaheerera othuwiha nloko na aGiboni. Mene nto etthu ela yaananara enakumihera “mulattu wa Sawuli ni wa emp’awe, anyi mulattu wa ephome.” (2 Sam. 21:1) Nto okhwipiwaya, Davidi avariwa omwene. Nto woowoonani eyo aGiboni yaawo yaahalahanle akumi, yaamuleela Davidi etthu ele yoonanara yaapakeñye. Tivawonto Davidi aakoha moota aGiboni yeeraaya ettikihe isikula mwaha wa ele Sawuli aapankaawe ni weera Yehova avirelele oreeliha elapo ele. Mene aGiboni ohiya ovekela musurukhu, yanvekenle anamwane athanu neeli [7] a mulopwana ole “aapanke epahu ele” weera yiiviwe. (Nam. 35:30, 31) Mene Davidi aahaakhulela yoovekelaaya.—2 Sam. 21:2-6.

Mene nto ehuhu ele Sawuli ni Yonathani iisa akhwiiyeene okhottoni, mene Mefiboxethi mwaana a Yonathani eera areene mukumi. Mefiboxethi aarakanle areene mwaana mwaha wa erisa, woonaru khaatthaaniye emaara Sawuli aaronwaawe owana ni aGiboni. Davidi tho aapaka nivarihano ni Yonathani, nenno neera nivirelelihe nloko na Yonatani, omuhela mpuwa mwaana a Yonathani, Mefiboxethi. (1 Sam. 18:1; 20:42) Yoolepa enahima weera: “Vano mwene [Davidi] àmùsunka Mefiboxethi, mwana a Yonathani, mwana a Sawuli niwoko nolipela yalipelihannaya Davidi ni Yonathani, mwana a Sawuli, vaholo va Yahvéh.”—2 Sam. 21:7.

Nnaamweera vareene hiiho, Davidi ahaakhulela yoovekela ya aGiboni. Owo ahaaveleela anamwane eeli asilopwana a Sawuli, vaavo mmoha a yaawo aari Mefiboxethi, ni athanu a yaawo yaari osuulu wa Sawuli. (2 Sam. 21:8, 9) Tivawo nto, omoroxeliwa wa ephome ya Davidi yaamala.

Yooweereya yaari yooluluwanya. Tivawo nlamulo na Muluku naahima mooluluwanya. Nno neera: “Ehìviwe ana nthowa na sottheka sa asitithi.” (Ola. 24:16) Yehova khaakela waakhulela weera yiiviwe anamwane eeli a Sawuli ni osuulu awe athanu yaawo yahaatthenke etthu. Nlamulo nno nahaatxeerera neeraka: “Koma mutthu ti mutthu ìviwe nthowa na sottheka sawe.” Enhoveleya eri yooweera, anamwane ale eeli ni oosuulu wa Sawulii yaakhwiiye yaarowa owanano aGiboni. Ntoko yookhumelelaaya, anamwane ale athanu orwa eeli yaalinve ephome ya aGiboni mwaha wa yootthekaaya.

Yooweereya ela enoonihera weera mutthu khanwereya okhalano mathowa mwaha wa yoottheka ya mutthu mukina. Ebuukhu ya Miruku ennahima yeeraka: “Otikiteihe ephiro nnani ná nnanyikalaya’vo, ni anakwatthala á othene ekhale oloka.”—Mir. 4:24-27; Aef. 5:15.