1. Eheeni Yehova onuupuwelaawe wa muloko awe?

YEHOVA Muluku “onnasiveliwa ni muloko awe.” (Nsal. 149:4) Tivooreera oosuwela eyo! Yehova oosuwela mikhalelo sahu, oosuwela nikotenlaahuvo ni onnanikhavihera weera nikhale nthamwene awe. Navirelela okhala oororomeleya wa Yehova, owo onookhala nthamwene ahu mpakana khalayi!—Yoh. 6:44.

2. Mwaha wa heeni atthu akina ahinroromelaaya weera Yehova onnaasivela?

² Apaale akina pooti ohima weera: ‘Miyo koosuwela weera Yehova onnasivela muloko awe wootheene, vano kinkela ororomela hayi weera owo onnakisivela?’ Mwaha wa heeni atthu anhovelaaya hiiho? Oksana *, yoowo nnunwe moohaawani enre: “Miyo kibatiziwakaru, kaahakalala, ni kaapatxera ovara muteko wa opiyoneira. Mene sivirakaru iyaakha 15, itthu kaavirinhaaka muttuli sapatxera okoopopiha. Miyo kaaphiyera wuupuwelela weera nkaaphwanele va maithoni wa Yehova ni nkaphwanela osiveliwa ni yoowo.” Yua yoowo ari piyoneira ni uununwe mmaxuponi oneera: “kaahiivaherera wa Yehova mwaheene kaatthuna omusiveliha. Mene kannoona weera Yehova khaarowa okisivela.”

3. Mwaheene yoola ninkela oxuttera eheeni?

³ Ntoko seereñyaaya ni asirokora ale ehimmwe nyuwo pooti omusivela Yehova ni-tho, pooti ohovela waari weera owo onnoosivelani. Mwa yoosomeene yeela ninkela woona wakhuliwa wa makoho meeli: Mwaha wa heeni muneeraanyu muroromeleke weera Yehova onnoosivelani? Ni etthu heeni eneera yookhavihereni ovenxa muupuwelo owo?

4. Heeni oraaya woowoopiha ohovela weera Yehova onnanisivela?

⁴ Nsivelo ikuru sinneeriha opaka etthu. Ororomela weera Yehova onnansivela ni onikhavihera, onnanipakiha onvarela owo ni murima ahu wootheene namwi nivirihaka maxupo a  mweekumini. Nave ohovela onnakhumelela nto wakhala weera ninnoona weera Muluku khananipwattha, “ikuru sahu sinoovukuwa”. (Mir. 24:10) Wakhala weera nookhulumuwa ni nanimalela nroromelo nahu noomusivela Muluku, hiyo ninnamukhweihera Satana.—Aef. 6:16.

5. Eheeni yaakhumelenle ni asinna anhovela nsivelo na Yehova?

⁵ Ohovela wootteettheiha nroromelo na asinna akina. Mutokweene a mmoha mmulokoni yoowo oneeriwa James ohimme há: “Miyo kaavara oBetheli nave kaakhavihera muloko mmoha wa nuulumo na anamarwa, mene kaapatxera ohovela waari weera Yehova annaakhulela muteko kanvarelaka. Miyo kaaphiyera wiikoha há: ‘Neereke Yehova onniiwa mavekelo aka?’” Eva, yoowo-tho onvara muteko wa ehuhu yootheene, onnahima há: “Miyo kinoona weera ohovela nsivelo na Yehova ti woowoopiha mwaha wooweera eyo ennamuhokoloxera mutthu ottuli. Eyo ennavukula osiveliwa ni itthu soomunepani ni ohakalalela muteko wa Yehova.” Michael, yoowo ori piyoneiru a nthiti ni mutokweene a mmulokoni oneera: “Wakhala weera nyuwo khamunaakhulela weera Muluku onnoopwatthani nyuwo munoohiya onvarela muteko.”

6. Vano ninkela opaka heeni wakhala weera nnoopatxera ohovela mmuupuweloni mwahu nsivelo na Yehova?

⁶ Yaakhumelenle ni asinna awo enoonihera weera ohovela onnanariha nroromelo nahu. Vano ninkela opaka heeni wakhala weera nnoopatxera ohovela mmuupuweloni mwahu? Onatthuneya ohiya muupuwelo owo moowaakuveya! Munvekele Yehova weera ookhavihereni otxentxa “muupuwelo owo” moorweela mwa ‘murettele wa Muluku onapwaha nyupuwelo sothene ni onosunka murima anyu’. (Nsal. 139:23, enoota; Afil. 4:6, 7) Ni muupuweleke weera khamukhanle meekhiinyu. Asinna akina, anawanano nyuupuwelo ntoko iyo, mpaka arumeyi oororomeleya akhalayi a Yehova, wannitthuneya ovilela maxupo yaavirihaaya. Moone ele ninkelaahu oxuttera ni ntakihero na murummwa Paulo.

7. Maxupo heeni murummwa Paulo aavirinhaawe?

⁷ Emaara ekineene nyuwo munnoona woolemelani miritti mukhalannaanyu, ni munoona ovila okwanihera miritti iyo? Vano munkela wiiwexexa mukhalelo wa murummwa Paulo. Owo aahoona ovila oxekura, ohiya paahi muloko mmoha, mene “miloko sothene.”  (2 Akor. 11:23-28) Nyuwo mookhalano maxupo a ekumi ampisa omala yaawo anooriipihani murima? Paulo aaviriha maxupo eene yaawo ni aitthana okhala “miiwa sa mwerutthuni” apaale mahooxo a mweekumi yamphwannye. Paulo khaayaamusivela omphwanya maxupo ala. (2 Akor. 12:7-10) Mwaha wooyaariwa ni yoottheka neereke onnookhulumulani? Emaara ekina Paulo annoona haawo. Owo aahimme weera “òtakhaliwa ti miyo mutthu,” aahima hiiha mwaha wooweera annawanano sootteettheya sawe.—Arom. 7:21-24.

8. Eheeni yaamukhavihenre Paulo ovilela maxupo awe?

⁸ Paulo aaviriha maxupo yaawo yeerenre nroromelo nawe ni yamukhulumunle, naamwi vareene hiiho, owo aavirelela onvarela Yehova. Vano owo ikuru seene aaphwannye woowi? Naamwi aasuwenleene weera aari oohimalela, Paulo aakhalano nroromelo noohittikinyeya mwa yoowopola. Owo-tho, aasuwela yoolaihera ya Yesu eneera: ‘yoole ori ootheene onamwiiwelela Yesu, anookhalano ekumi yoohimala.’ (Yoh. 3:16; Arom. 6:23) Moohihovela Paulo annaroromela yoowopola ya mukuttho wa Yesu. Owo aaxuttera weera Yehova toolevelela mpaka onnaalevelela atthu yaale epake yoottheka etokweene, nave enapittukuxa murima.—Nsal. 86:5.

9. Ninxuttera heeni ni masu a murummwa Paulo ari va Agalata 2:20?

⁹ Paulo annaroromela weera annasiveliwa vantxipale ni Muluku, mwaha wooweera owo aasuwela wera Muluku aamurumiha Yesu weera amukhwele. (Mmusome Agalata 2:20.) Moone masu ooreera a murummwa Paulo, okhwipi wa eversiikulu aneera: “Mwana a Muluku okitthunne miyo ni ìvelenle nthowa na miyo.” Paulo khuupuwela weera nsivelo na Muluku khanaakotela wa atthu akina, owo khuupuwela: ‘Yehova onaasivela asinna paahi, mene owo khankisivela.’ Paulo aawuupuxera Aroma masu ala: “Koma Muluku òlipiha onitthuna wawe hiyo niwoko nrene nlelo anamattheka, Kristu anikhwenle hiyo.” (Arom. 5:8) Onsivelawawe Yehova khonkota!

10. Aroma 8:38, 39 onnixuttiha eheeni?

¹⁰ Mmusome Aroma 8:38, 39. Paulo anniroromela weera owo anisiveliwa vantxipale ni Yehova. Owo alepa weera khaavo anaawere “onimwalanyiha onitthunawawe Muluku.” Paulo asuwela weera Yehova, aahaapixera murima ana a Israeli, ni ahammorela ikharari. Nnimuuluma mookwasa masu a Paulo aalepenlaawe Aroma moota ola, ‘wakhala weera Yehova oomurumiha mwanawe weera akhwe niwoko na miyo, nkihovela weera owo onnakisivela.—Arom. 8:32.

11. Naamwi Paulo apanke soottheka siri va 1 Timotheyo 1:12-15, mwaha wa heeni owo aaroromelaawe weera Yehova annamusivela?

 ¹¹ Mmusome 1 Timotheyo 1:12-15. Apaale Paulo uupuwela itthu aapakaawe ottuli, sannamoopopiha. Mpaka ohima weera mwa anamattheka ootheene “òpatxera ti miyo.” Ahinaakuveene oxuttera ekhaikhai, annasonda makristu a ecidade ni ecidade, aatthukihaka ni akina aakhulelaka weera yiiviwe. (Mit. 26:10, 11) Mwaatoko wuupuwelela Paulo amphwanyaka mmiravo ekwaasuni mwaha wa Paulo? Mweekhaikhai Paulo anniphuka mulattu. Paulo wannamwiina murima mwaha wa soottheka aapankaawe, mene owo khaawera otxentxa itthu sa muttuli. Ohiya wiiphuka mulattu, owo annaroromela weera Kristu aamukhwela. Mene aalepa há: “Nto mwaha wa mahala a Muluku kiri yeeyo kiraka.” (1 Akor. 15:3, 10) Ela ennixuttiha eheeni? Mwakhuleleke weera Yesu ohookhwa niwoko na nyuwo, ni oopakiha weera mukhalane onthamwene woolipa ni Yehova. (Mit. 3:19) Apaale nyuwo pooti wiiphuka mulattu mwaha wa soottheka mpankaanyu muttuli naari mureene namoona a Yehova. Muupuweleke weera Yehova ompwattha itthu nimpakaahu vaanaano ni itthu nneeraahu nipake muhoolo, ohiya soottheka nipankaahu muttuli.—Yes. 1:18.

12. Noonaka weera khanaanono mwiitti naari ohiphwanelela osiveliwa, 1 Yohani 3:19, 20 onrowa onikhavihera hayi?

¹² Muupuwela weera Yesu ohookhwa weera akhittelele soottheka sanyu apaale nyuwo pooti weera, ‘Miyo nkimphwanelela yoovaheene yeeyo.’ Mwaha wa heeni mweeraanyu mooneleke hiiho? Murima ahu pooti onoototha ni onuupuweliha weera khanimphwanela osiveliwa. (Mmusome 1 Yohani 3:19, 20.) Napatxera wuupuwela haawo, onnitthuneya wuupuwela weera “Muluku mutokweene opwaha murimaahu.” Nsivelo ni olevelela wa Tiithi ahu a wiirimu onnapwaha ohovela nikhalannaahu. Onitthuneya oxuttera waakhulela  weera Yehova onnanisivela. Mwa yeeyo, onnitthuneya osoma masu a Muluku veeli-veeli, opaka mavekelo voohihiyerera ni waakhulela nikhavihero ennivahaaya asinna. Mwaha wa heeni opaka itthu iya oraaya wootthuneya?

13. Omusoma Biblya onanikhavihera hayi? (Moone ekwadru “ekhaviherinwe ni masu a Muluku.”)

¹³ Musomeke masu a Muluku mahiku ootheene. Mweera hiiho muneereke ovirelela oxuttera mikhalelo sooreera sa Yehova. Nyuwo munimwiiwexexa weera owo onnoosivelani. Otthokelela mwaha mwa masu a Muluku mahiku ootheene, animookhaviherani oreeherera nyuupuwelo sanyu, “ivanyaka” nyuupuwelo sanyu soonanara sa mmurimani mwanyu. (2 Tim. 3:16) Mutokweeene mmoha a mmulokoni onittaniwa Kevin owanne ni nyuupuwelo sa wiihovela, ohimme há: “osoma yoolepa ya Nsalmu 103 ni otthokelela, onnakikhavihera wuupuwela nnene ni wuupuwela etthu Yehova ontthunaawe okipakela.” Eva nimuhimmaahu woopatxerani ohimme tho há: “oxekuwa miyo kinnaivaha ehuhu weera kitthokelele etthu ontthunaawe Yehova, nto eyo ennakivaha murettele mmurimani mwaka ni waatxerera nroromelo naka.”

14. Nivekelo ninnikhavihera hayi?

¹⁴ Nvekeleke voohihiyerera. (1 Ates. 5:17) Naatthunaka okhalano onthamwene woolipa ni mutthu, ontthuneya wuulumihana mahiku ootheene, nleelanaka etthu nnuupuwelaahu. Etthu emoharu enneereya ni onthamwene nraahuno ni Yehova. Nanvekelaka owo nimuleelaka ele nnuupuwelaahu, ninhaawelaahu ni maxupo ahu, ninnoonihera weera ninnamuroromela ni noosuwela weera onnansivela. (Nsal. 94:17-19; 1 Yoh. 5:14, 15) Yua, ohimmwale woopatxerani, ohimme há: “Miyo kaavekelaka vale, kinnuuluma ntoko itthu kipankaaka vanihikuni, kinnahula murima aka weera kimuleele Yehova moota kinoonelaka. Vakhaani-vakhaani kinnaxuttera omoona Yehova ohiya ntoko mwaneene empresa, mene kinnamoona ntoko Tiithi onamusivelaxa mwanawe”—Nwehe ekwadru “Moomusoma buukhu ene yoowo?”

15. Yehova onoonihereera hayi weera onnampwattha mutthu ti mutthu a hiyo?

¹⁵ Mwaakhuleleke nikhavihero na asinna; awo yoovaha ya Yehova. (Yak. 1:17) Tiithi ahu a wiirimu onnoonihera weera onnanipwattha ootheene ahu, mwaha woonivaha emusi ya asinna ni asirokora oomunepani elapo yootheene, yaawo annoonihera nsivelo “ehuhu yothene.” (Mir. 17:17) Mwa ekaratta aalepenlaawe Akolosi, Paulo aahaahima asinna akina yaamukhavihenre. Owo aahimme weera “yannakilipiha murima aka”. (Akol. 4:10, 11) Mpaka Yesu aatthuneya okhaviheriwa ni asinthamwene awe ntoko malaika, naari nikhavihero naatthu, nto owo annatthapela nikhavihero naya.—Lu. 22:28, 43.

16. Moota heeni asinna eneeraaya enikhavihere okhalano onthamwene woolipa ni Yehova?

 ¹⁶ Munnaphurela etthu mwaha wa yoovaha ya Yehova? Omuleela itthu sinooxupani munna oolipa moomunepani, kheenoonihera weera muroolosowa; mene pooti wookhaviherani. Moone ele James ole othalihiwe woopatxerani ohimmaawe: “Okhalano onthamwene woolipa ni asinna olipa moomunepani kinnakhavihereya vantxipale. Kakhalano muupuwelo woohirerela mmurimani mwaka, asinthamwene awo moopixa murima ennakiwiriyana ni ennahima weera annakisivela. Moorwela mwa yaawo kinnamoona Yehova moota onkithokororaawe nave okisivela.” Mweekhaikhai ti wootepa otthuneya okhalano onthamwene woolipa ni asinna!

17-18. Taani nintthuneyaahu weera nimwiiweleleke, ni mwaha wa heeni?

¹⁷ Satana ontthuna weera muhiyerere opaka itthu sooreera. Owo ontthuna weera mwaakhuleleke weera Yehova khanoosivelani ni weera nyuwo khamuhiyono ootthuneyaxa. Mene ntoko nonnaahu, sootheene iyo ti soowootha.

¹⁸ Yehova onnoosivelani vantxipale. Mwaamwiiwelelaka, nyuwo ‘munoovirelela okhala moosivelani mwawe’ ntoko Yesu. (Yoh. 15:10) Nto mwihinwiriyane Satana, naari vakhaaneene mwihipwatthe murima anyu. Opwaha mwa yeeyo, munwiriyaneke Yehova yoowo onweha mikhalelo sahu sooreera. Muroromeleke weera Yehova “onnisiveliwa ni muloko awe,” ni emmuhela mpuwa mutthu ootepa otthuneya, nyuwo!