EHUHU aalempwaawe Biblya, muttenko wa ole aathela aaliva emaara aathelaawe. Mene ole aathela ohiya oliva paahiru musurukhu, mene tho, anniliva itthu saakhanle sa musurukhu muntxipale naari axinama. Emaara ekina tho, wannaliviwa otxentxanihiwaka ni muteko. Mwa ntakiro, oyariwa wa Yakobe, yoowo aakhulenle ovara muteko iyaakha ithanu ni piili weera amuthume Rakheli weera amuthele. (Eph. 29:17, 18, 20) Mwaha wa heeni yaakhanlaaya yookhovelela?

Alipa ootholathonya nyaha sa mBiblyani Carol Meyers ennahima: “Yoolivela ya ntheli pooti waaliva amusi a muthiyana, etthu yaari yootepa otthuneya emusi ya atthu oolima.” Olivela iwo wannipakiha weera othunana wa emusi ya mulopwana ni ya muthiyana olipe. Nave imusi iyo piili saamukhala soowiiraana nave sookhaviherana ehuhu yoovalaveliha. Opwaha mwa yeeyo, yoolivela eyo yampakiha weera muthiyana ootthomeriwa akhale awehawehiwaka ni apapawe weera avirelele omuhakalaliha mulopwana ole aamutthomenre.

Olivela ekuxo khiyaataphulela weera namatheliwa akhale epottha naari opakiwa nakoso. Buukhu a malamulo a ana Israeli yoowo eeriwa—Sua vida e Instituição oneera: “Nlamulo nna noolivela musurukhu ekuxo, yannaaroromeliha amusi a muthiyana weera mwanaya aamutheliwa, mene nto khiyaataphulela weera aamuthuma moomalela mwaaruusi mwIsraeli. Mene nto epresu ya ekuxo, khiyaalikanela omuthuma muthiyana ntero, mene yooniheraka weera nannahela mwiitti muteko evanraaya asinaamuyari.”

Mahuku ahu ala, ilapo ikina nlelo sinnitthara etxisimo ela yoothuma ekuxo. Tivaavonto wakhala weera tihiiho elapo anyu onnitthuneya weera “opixa wanyu murima osuweliwe n’atthu othene” muhivekelaka musurukhu woopwahaxa mitita. (Afil. 4:5; 1 Akor. 10:32, 33) Tivawonto ontthuneyaaya weera, moonihere okhala atthu “òhisiveliwa muhakhu,” kapena ohiitthuna. (2 Tim. 3:2) Opwaha mwa yeeyo, asitiithi makristu onnitthuneya ohiliviha ekuxo musurukhu woowaattaxa mpaka omootxeeliha ole ontthuna oliva ekuxo opwanya musuruku woolivano mpakana anaasa wookophawo. Kapena aneemexera muteko wa opiyoneiro wa nthiti kapena okela onvara kaanyo weera aphwanye musurukhu woolivano ekuxo.

Impari ikana sa mulaponi, ipresu soolivela ekuxo enhimmwa moovarihana nlamulo na elapo. Wakhala hiiho, asitiithi a mwaaruusi enniiwelela nlamulo nno. Mwaha wa heeni? Mwaha wooweera Biblya, masu a Muluku ennooperera weera “niwìweleleke atthu anlamula” nto onnitthuneya ohivirikanyiha ele Muluku onnilamulaawe.—Arom. 13:1; Mit. 5:29.