NEEREKE nyuwo mohoonelela weera atthu antxipale a elapo ela entthuna okhalano miritti, idireitu, naari okosoopiwa moothanleya? Mukhalelo ola wohaavoleela atthu antxipale oowiisunnuwiha ni oohixukhurela a mahiku ala oomalihera. — 2 Tim. 3:2.

Ekhaikhai ti yooweera, mukhalelo woowiisinnuwiha khaiyene onoopatxera. Adamu ni Heva yaalakela othanla mwaneene aya etthu yaari yooreera ni yoonanara ni yaahiikumihera maxupo. Iyaakha soottharelana, mwene Oziya a oYuda uupuwela weera aakhalano edireitu yoohisa erupani mutemplo, mene khaakhanleno edireitu yoopaka eyo. (2 Sow. 26:18, 19) Mwa mukhalelo mmoharu, afarisi ni asaduki yuupuwela weera yannaphwanela othokororiwa moothanleya ni Muluku mwaha wooweera yaari osuulu wa Abrahamu. — Math. 3:9.

Hiyo noorukureriwa ni atthu oowiisinnuwiha, ni mikhalelo saya pooti onivoleela. (Agal. 5:26) Hiyo pooti opatxera wuupuwela weera ninnaphwanela waakhela muritti, naari ninnaphwanela okosoopiwa moothanleya. Ninrowa osepa moota heeni muupuwelo ola? Woopatxerani, nintthuneya osuwela moonelo wa Yehova voohima sa mwaha owo. Miruku miili sa mBiblyani sinoorowa onikhavihera.

Yehova tonthanla etthu ninrowaahu waakhela. Nrowe noone matakihero vakhaani.

• Veemusini, mulopwana ontthuneya wiisoonaka weera onnattittimihiwa ni amwaarawe, ni  amwaarawe entthuneya wiisoonaka weera ennasiveliwa ni aiyaya. (Aef. 5:33) Atthu ethelanne entthuneya osivelanaka mukina ni mukhwaawe. (1 Akor. 7:3) Anamwane entthuneya ewiiweleleke asitiithi aya, ni asitiithi entthuneya ewoonihereke nsivelo ni waakhavihera anamwane aya. — 2 Akor. 12:14; Aef. 6:2.

• Mmulokoni, asitokweene a mmulokoni ennihoolela, hiyo onnatthuneya waattittimiha. (1 Ates. 5:12) Menento, awo esepeke waahoolela asinna ni asirokora moohireerela. — 1 Ped. 5:2, 3.

• Muluku ohaavaha anamalamulela a elapo edireitu yooliviha mpostu ni ottittimihiwa ni ale enaalamulelaaya. — Arom. 13:1, 6, 7.

Mwa nsivelo Yehova onnanivaha itthu sintxipale opwaha iye nimphwanelaahu. Mwaha wa mukhalelo ahu woottheka, hiyo naaphwanela paahi okhwa. (Arom. 6:23) Menento, Yehova onnanivaha mareeliho mantxipale mwaha woonisivela wawe. (Nsal. 103:10, 11) Owo onnanivaha mareeliho ni iparakha sootheene, ohiya mwaha wooweera ninnaphwanela mene mwaha wooweera onnanisivela vantxipale ni mwaha wooweera owo tooreera murima. — Arom. 12:6-8; Aef. 2:8.

Mwiikosoope ni mukhalelo wa mulaponi. Nihisuwelaka, hiyo pooti opatxera wuupuwela weera ninnaphwanela waakhela miritti waapwaha atthu akina. Yesu ohoonihera moota oraaya wookhweya okhalano mukhalelo owo avarihelaka ntakihero na anamuteko yaakhenle edenaario emoha. Anamuteko akina yaapatxenre ovara muteko oxeexelo mpaka oxekuwa, anamuteko akina yaavanre ewoora emoha paahi. Anamuteko oopatxera yuupuwela weera yaakhalano edireitu yoowaakhela musurukhu muntxipale mwaha wa muteko yaavanraaya. (Math. 20:1-16) Avarihelaka muteko ntakihero nna, Yesu ohoonihera weera atthareli awe entthuneya ohakalalaka ni itthu Muluku onaavahaawe.

Mukhaleke ooxukurela, ohiya ookhanyerera. (1 Ates. 5:18) Mmutakiheke murummwa Paulo yoowo aahaavekenle nikhavihero na weerutthuni asinna a oKorinto nnaamweera aarinono edireitu yoopaka eyo. (1 Akor. 9:11-14) Hiyo nintthuneya ovahaka mwiitti mareeliho nnaakhelaahu ni nsepeke mukhalelo wookhanyerera.

 Mukhale oowiiyeviha. Vaavo mutthu oniisuupuwelelaawe meekhaawe paahi, moohihovela mutthu owo onnuupuwela weera ookhalano edireitu yoowaakhela miritti mikina opwaha iye oraaweno. Wiiyeviha onoorowa okhavihera wa muupuwelo ene yoowo woonanara.

Profeta Daniyeli oovaha ntakihero nooreera na woonihera wiiyeviha. Emusi awe yoothanleya, ophwaneliwa, miruku ni itthu aaweraawe opaka pooti weeraka sammweeriha wuupuwela weera annaphwanela waakhela miritti iye aaraweno ni okosoopiwa moothanleya. (Dan. 1:3, 4, 19, 20) Menento, Daniyeli aavirelela okhala oowiiyeviha, ni mukhalelo owo waamweeriha okhala oosiveleya wa Yehova. — Dan. 2:30; 10:11, 12.

Nsepeke mukhalelo woowisinnuwiha yoowo osarenye mulaponi olelo va. Opwaha mwa yeeyo, nivirelele ohakalala ni mareeliho ootheene Yehova onnivahaawe mwaha wa oreera wawe murima.