Mary ni aiyawe John, a enkhala elapo yeeyo mitthenka sooreera sa omwene sikhanlaaya oolaleeriwa atthu antxipale yaawo envara muteko ekhumaka oFilipina. Emaara ya eretta ya COVID-19, Mary aahipatxeriha soosoma sintxipale sa Biblya ohiya paahi elapo ankhalaawe mene-tho ilapo ikina. Moota heeni owo apankaawe eyo?

Mary annaakoha anamasoma awe a Biblya, “Moomusuwela mutthu mukina ontthuna omusoma Biblya?” Wakhala weera awo yaakhula weera aani, owo annaavekela weera emusuwelihe owo. Opaka nikoha nna nookhweya imaara sintxipale onnakumihera itthu sooreera. Mwaha wa heeni? Mwaha wooweera atthu envaha mwiitti masu a Muluku imaara sintxipale onnaasivela waaleela amusi ni asinthamwene aya ele enxutteraaya. Etthu heeni yaakhumelenle mwaha woopaka nikoho nna?

Namasoma a Biblya a Mary Jasmin aahaawopa atthu axexe yaatthuna omusoma Biblya. Mmoha a yaawo Kristine, yannamusivela yoosoma awe ya Biblya mpaka onvekela Mary weera esomeke ikwaha piili vasemanani. Emaara Mary aamukonhaawe wakhala weera aamusuwela mutthu mukina aatthuna omusoma Biblya, Kristine aahaakhula eeraka, “Aani, kinimoowiiherani asinthamwene aka.” Mwa isemana vakhaani, Kristine aahimusuweliha Mary asinthamwene awe axexe yaatthuna omusoma Biblya. Muhoolo mwaya, Kristine aahaawiiha asinthamwene awe akina, akina a yaawo yaavirelela opaka etthu emoha-moharu ni atthu akina.

Kristine aatthuna-tho weera emusi awe enkhala oFilipina exuttere voohima sa Biblya. Nto, aahuuluma ni mwanaawe Andrea. Woopatxerani, Andrea uupuwela ha, ‘Anamoona a Yehova ettiini ya viinaano, khemmuroromela Yesu, ni enanvarihela waataana wa khalayi paahi.’ Mene oonelakaru yoosoma ya Biblya, itthu iye seethiru uupuwelaawe saahiiwanyeihiwa. Emaara aasomaawe owo aahima ha, “Okhala weera Biblya tonhima eyo, ela ekhaikhai!”

Noovira etempu, Andrea aamusuweliha Mary asinthamwene awe eeli ni koleeka awe mmoha aavaraaweno muteko ni aapatxera yoosoma ya Biblya. Opwaha mwa yeeyo, Mary ahisuwelaka weera titia awe Andrea yoowo ohinoona Angela, anniiwa vaavo yaapakaaya yoosoma ya Biblya. Nto, nihiku nimoha Angela anvekela Andreya weera amusuwelihe Mary ni aavekela yoosoma ya Biblya. Angela annasiveliwa vantxipale ni ele aaxutteraawe. Omalakaru mweeri mmoha owo annuupuwelela soolepa sintxipale ni aatthuna weera asomihiweke ikwaha ixexe vasemanani! Akhaviheriwaka ni Andrea, Angela aapatxera  woonela mithukumano voohihiyerereya avarelaka muteko videoconferência.

Vaavo Mary oonelenlaawe weera aiyaawe Kristine, Joshua yaanakhala vakhiviru ikwaha sootheene yaapakaaya yoosoma ya Biblya, Mary aahaakoha wakhala weera yannatthuna woonela yoosoma ya Biblya. Joshua aahaakhula eeraka, “Kinrowa wiiwelelaka paahi, mene muhikipakeleke makoho, wakhala weera munoopaka eyo, miyo kinoovinyavo.” Epatxerakaru yoosoma ya Biblya mpuwa mwa iminutu 5 paahi, awo yaapaka makoho mantxipale ompwaha Kristine ni yannatthuna ovirelela ni yoosoma ya Biblya.

Nikoho nookhweya na Mary naamweeriha opakiha soosoma sintxipale sa Biblya. Wa atthu akina, owo aapaka mareherero weera anamasaoma akina a Biblya esomihiweke ni asinna akina. Mary aapatxeriha soosoma sa Biblya sookwanelaka 28 mwa ilapo 4 soovirikana.

Jasmin, namasoma oopatxera ohimmwale mpuwa mwa yooweereya ela opatisinwe Abril a 2021. Kristine opatisinwe Maio a 2022 ni ootthikela oFilipina weera akhaleke ni emusi awe. Anamasoma akina a Biblya eeli yaawo Kristine aamusuwelinhaawe Mary aapatisiwa-tho. Angela opatisinwe sivirakaru miyeeri vakhaani mene vano onvara ntoko Piyoneira a nthiti. Aiyaawe Kristine, Joshua, ni mwanaya Andrea ni waahela mpuwa anamasoma akina a Biblya ennarowa vahoolo.

Eseekulu yoopatxera, mitthenka sooreera saamwaramwareya variyari va imusi ni asinthamwene. (Yoh. 1:41, 42a; Mit. 10:24, 27, 48; 16:25-33) Munoonela hayi waakoha anamasoma a Biblya ni atthu akina yaawo enoonihera ntthuno, “Neereke moomusuwela mutthu yoowo ontthuna omusoma Biblya?” Opaka nikoho nno nookhweya mutthu ori poothe a hiyo akhanlaawe oopaka pooti onikhavihera okumihera soosoma sa Biblya sintxipale.