1. Moota heeni nyuwo muniisoonelaanyu moovarihana ni ekhaikhai?

 ATTHU a Yehova ennaasivela ekhaikhai ya masu a Muluku. Mwaha wa yeeyo nroromelo nahu ninnalipa. (Arom. 10:17) Nroromeleke weera Yehova oopaka muloko wa ekristu ntoko “mukuryo ni ehitxe ya ekhaikhai.” (1 Tim. 3:15) Nave hiyo ninnawiiwelela ‘ale ennihoolela’ emaara yeeyo eniiwanyeihaaya ikhaikhai sa mBiblyani ni vaavo envahaaya miruku moovarihana ni yootthuna ya Muluku. — Aheb. 13:17.

2. Moovarihana ni Yakobe 5:19, yooweerera heeni ninvirihaahu noomala oxuttera ekhaikhai?

² Menento nnaamweera naakhulelaka ekhaikhai ni muritti mareherero a Yehova oraayano woovaha miruku soororomeleya, hiyo pooti ohapuxiwa. (Mmusome Yakobe 5:19.) Khiyaavo etthu ekina emmusivela Satana ohikhanle oneeriha oyeleela omuroromela Biblya ni miruku nnaakhelaahu mmarehereroni mwa Yehova. — Aef. 4:14.

3. Mwaha wa heeni nintthuneyaahu ovarexexa ekhaikhai? (Aefeso 6:13, 14)

³ Mmusome Aefeso 6:13, 14. Moohipisa va, Satana onoorowa ovarihela muteko owera wawe weera aawoke atthu antxipale weera emurukunuwele Yehova. (Apok. 16:13, 14) Nave-tho nroromeleke weera Satana onoorowa wiilipihera vantxipale weera aawoke atthu a Yehova. (Apok. 12:9) Mwaha wa yeeyo ti wootepa otthuneya wiitxentxeriha viinaano va weera noone ovirikana okhanle woohima sa ekhaikhai ni yoowootha,  weera nivirelele wiiwelela ekhaikhai. (Arom. 6:17; 1 Ped. 1:22) Mwaha wooweera mpuwa mwa maxupo matokweene ovuluwa wahu onlipa ni ekhaikhai.

4. Eheeni ninrowaahu othokorora mwa yoosoma ene yeela?

⁴ Mwa yoosoma ene yeela, nnoorowa woona mikhalelo miili sootepa otthuneya seiyo sinrowa onikhavihera osuwela ekhaikhai enkhuma mBiblyani, ni waakhulela miruku sa mareherero a Yehova. Muhoolo mwaya nnoorowa woona mikhalelo miraru seiyo sinrowa onikhavihera ovarexexa ekhaikhai.

MIKHALELO SOOTTHUNEYA WEERA NSUWELE EKHAIKHAI

5. Moota heeni omoova Yehova onnikhaviheraaya osuwela ekhaikhai?

⁵ Omoova Yehova. Vaavo nninnuwiheraahu omoova Yehova mooreerela, hiyo ninnamusivela vantxipale ni khanintthuna opaka etthu eri yootheene enkela omunyoonyiha. Hiyo ninnatthuna oxuttera woohima sa yooreera ni yoonanara, ekhaikhai ni yoowootha weera niwere waakhuleliwa ni Yehova. (Mir. 2:3-6; Aheb. 5:14) Hiyo nihaakhulele weera owoova wahu atthu okhale wa vasuluxa opwaha nsivelo nahu wa Yehova, mwaha wooweera ele enaasivela atthu ikwaha sintxipale khemmusivela Yehova.

6. Moota heeni oowoova atthu waaweerinhaaya anamahottela 10 a wIsraeli ohisuwela ekhaikhai?

⁶ Waakhanle weera hiyo ninnawoova vantxipale atthu ompwaha Muluku, hiyo naamurowa ohiya ekhaikhai. Moone ntakihero na anamahottela 12 yaawo yaaronwe ohottela elapo yeeyo Yehova aalaihenraawe waavaha ana a Israeli. Wa anamahottela ale 10 yannawoova vantxipale aKanani opwaha nsivelo yaaraayano ni Yehova. Awosa yaahaaleela ana a Israeli yeeraka: “Hoye, hiyo nòyevela otuphela muloko ole, wona wi ori wolipa wonipwaha.” (Nam. 13:27-31) Vamaithoni va atthu aKanani  yaari oolipa vantxipale waapwaha ana a Israeli, ni eyo ekhaikhai. Menento ohima weera ana a Israeli khiyaarowa owera waatuphela amwiittanaaya, enoonihera weera khiyaamuhenle mpuwa Yehova. Anamahottela ale 10 yannatthuneya owehexexa etthu Yehova aatthunaawe weera ana a Israeli epake. Nave-tho wannatthuneya ophimelela moota Yehova aakhavihenraawe khalayi. Yaapanke eyo yaamoonelela weera aKanani khiyaanoono ikuru ompwaha Yehova. Moovirikana ni anamahottela ale oohiroromela, Yehoxuwa ni Kalebi yaatthuna waakhuleliwa ni Yehova, nto awo yaahaaleela atthu yeeraka: “Yahvéh àkhulelá, onahala onivoloiha elapo ele ni onìnnyerera mmatatani mwahu.” — Nam. 14:6-9.

7. Ninrowa olipiha hayi omoova wahu Yehova? (Nwehe efootu.)

⁷ Weera ninnuwihere mukhalelo wa omoova wahu Yehova, nintthuneya omusiveliha mwa soothanla sootheene nimpakaahu. (Nsal. 16:8) Emaara munsomaanyu sooweereya sa mBiblyani, mwiikoheke ha, ‘Waakhanle weera kinnaviriha mukhalelo ola, yoothanla heeni kaarowaaka opaka?’ Mwa ntakihero, muupuwele weera munniiwa mitthenka sookhulumula sa anamahottela ale 10 a wIsraeli yuulumaaya nyuwo mwaamwaakhulela mitthenka iyo sookhulumula seiyo saahela mpuwa omoova mutthu, naari omusivela wanyu Yehova ni otthuna wanyu omusiveliha waamukhala wa vasuluxa? Muloko wootheene wa ana a Israeli khiwaakhulenle ekhaikhai yeeyo Yehoxuwa ni Kalebi yuulummaaya. Mwaha wa yeeyo, awo yaahiyeleela eparakha yoovolowa elapo yoolaiheriwa. — Nam. 14:10, 22, 23.

8. Mikhalelo heeni nintthuneyaahu wiilipihera weera ninnuwihere, ni mwaha wa heeni?

⁸ Wiiyeviha. Yehova onnaasuweliha ekhaikhai atthu yaale eri oowiiyeviha. (Math. 11:25) Moowiiyeviha, hiyo ninnaakhulela nikhavihero weera nixuttere ekhaikhai. (Mit. 8:30, 31) Nnaamweera vareene hiiho, hiyo nintthuneya wiikosoopa weera nihikhale atthu oowiisunnuwiha. Mwaha wooweera wiisunnuwiha pooti oneeriha woonaka weera miyuupuwelo sahu ti sootepa otthuneya opwaha miruku sa mBiblyani naari opwaha miruku seiyo sinvahiwa ni mareherero a Yehova.

9. Moota heeni ninrowaahu okhala atthu oowiiyeviha?

⁹ Weera nikhale atthu oowiiyeviha, hiyo nintthuneya wuupuwelelaka weera hiyo atthu ooyeva nalikanxeriwa ni Yehova. (Nsal. 8:4, 5 [8:3, 4, Tradução do Novo Mundo]) Nave-tho onnatthuneya onvekela Yehova weera ninnuwihere mukhalelo woowiiyeviha ni wooxuttiha. Yehova onoorowa onikhavihera ohela miruku onnivahaawe moorweela mBiblyani ni mareherero awe nipuro noopatxera opwaha miruku sahu. Mwa yoosomaanyu mwaasaaseke ipontu sa moota Yehova ommusivelaawe mukhalelo woowiiyeviha ni wiitta wiisunnuwiha, owali ni wiikuxerera. Nave-tho mwiikosoopeke weera nvirelele okhala oowiiyeviha emaara munaakhelaanyu miritti soothanleya.

MOOTA WOOVAREXEXA EKHAIKHAI

10. Yehova anvarihenle muteko taani weera aavaheke miruku atthu awe?

¹⁰ Muroromeleke miruku munvahiwaanyu mmarehereroni mwa Yehova. Wa ana a Israeli a khalayi, Yehova aahinvarihela muteko Mose avinyaka Yehoxuwa weera aavahe miruku atthu awe. (Yeh. 1:16, 17) Ana a Israeli yannareelihiwa vaavo yaawiiwelelaaya alopwana ale yaathanlinwe ni Yehova Muluku. Iyaakha soottharelana vaavo muloko wa ekristu waapatxenraaya opakiwa, arummwa 12 yannavaha miruku. (Mit. 8:14, 15) Moottharelana muloko ole wannavirelela wunnuwa waahelaka mpuwa asitokweene a mmulokoni oYerusalemu.  Ettharaka miruku yaavahiwaaya ni alopwana ale oororomeleya, “[miloko] sànalipa mowiwelelani, muloko aya wànatepa wantxerereya nihiku ti nihiku.” (Mit. 16:4, 5) Mahiku ahu ala hiyo-tho ninnareelihiwa vaavo ninttharaahu miruku ninvahiwaahu ni mareherero a Yehova. Mene Yehova aakela woonela moota heeni, waakhanle weera ninnakhoota wiiwelela miruku sa alopwana aathanliyaawe? Nnoowera waakhula nikoho nna niphimelelaka ele yeereñye vaavo ana a Israeli yaakelaaya elapo yoolaiheriwa.

11. Eheeni yeereñye ni atthu ale a wIsraeli akhalayi yaamuuluma moohireerela Mose yoowo aathanlinwe ni Muluku weera aahooleleke? (Nwehe efootu.)

¹¹ Emaara ana a Israeli yeettaaya eyaaka elapo yoolaiheriwa, asilopwana oowiisunnuwiha yannamuuluma Mose moohireerela ni muritti Yehova anvanhaawe. Awosa yanneera: “Muthukumano wothene [ohiya paahi Mose], anyi, atthu othene ari òttela ni Yahvé ori variyari vaya.” (Nam. 16:1-3) Nnaamweera yaari ekhaikhai weera vamaithoni va Yehova “muthukumano wothene” waari wootteela, Yehova aamuthanla Mose weera aahooleleke atthu awe. (Nam. 16:28) Emaara yaamuulumaaya Mose moohireerela, atthu ale yaamuuluma Yehova. Awosa khiyaawehexexa etthu Yehova aatthunaawe, awo yaawehexexa etthu yaatthunaaya, okhala oowera ni amiruku. Yehova aahaanyaanya atthu ale yaamurukunuwela vamoha ni atthu antxipale yaawo yaakhavihera. (Nam. 16:30-35, 41, 49) Olelo hiyo pooti ororomelaka weera Yehova khonwaakhulela ale ehinttittimiha mareherero awe.

12. Mwaha wa heeni nintthuneyaahu ororomelaka mareherero a Yehova?

¹² Hiyo nintthuneya ovirelela ororomela mareherero a Yehova. Ekhaikhai weera vaavo enkhumelelaaya matxentxo woohima sa ikhaikhai sa mBiblyani naari moota muteko woolaleera ompakiwaaya, ale enhoolela khenoovelela opaka matxentxo ootthuneya. (Mir. 4:18) Awo ennapaka eyo mwaha  wooweera entthuna omuhakalaliha Yehova. Awo-tho ennapaka soothanla moovarihana ni masu a Muluku yaawo atthu ootheene a Yehova entthuneyaaya ottharaka.

13. Teevi eri “ethonyero ya phama” ni eheeni nintthuneyaahu opaka ni ethoonyero eyo?

¹³ “Osunke ntoko ethonyero ya phama”. (2 Tim. 1:13) “Ethonyero ya phama” sinhimmwa sooxuttiha sa mBiblyani. (Yoh. 17:17) Sooxuttiha iyo ti soopatxera wa itthu sootheene ninroromelaahu. Mareherero a Yehova ennanxuttiha otthara sooxuttiha iyo, emaara nimpakaahu eyo, hiyo ninnareelihiwa.

14. Moota heeni akristu akina yahaawenraaya owehexexa “ethonyero ya phama”?

¹⁴ Eheeni yaarowa okhumelela wakhala weera naamukhootta “ethonyero ya phama”? Moone ntakihero nna. Eseekulu yoopatxera, soohimmwa soowootha, saahiphiya wa akristu seiyo saahima weera nihiku na Yehova noophiya. Pooti weeraka yaari ekaarta yaakhala ntoko yaalempwale ni murummwa Paulo. Ohiya opatxera owehexexa ekaarta ele, asinna akina a wAtesalonika yaahaakhulela soohimmwa iye ni yaapatxera olaleya. Awo khiyaarowa owokeya waakhanle weera yaamuupuwela itthu murummwa Paulo aaxuttinhaawe areene naawo. (2 Ates. 2:1-5) Paulo aahaaleela asinna ale weera ehaakhuleleke itthu sootheene yeeraaya yiiweke. Nave weera aakhavihere muhoolo, ekaarta awe yanaaveeli ya wAtesalonika, Paulo aamaliha ni masu ala: “Eyulumihanelo ela eri ethonyero enasuweliha ikaratta saka sothene, ti ya ntata naka miyo, Paulo: ti siso kinlepaka.” — 2 Ates. 3:17.

15. Ninrowa wiikosoopa hayi ni soohimmwa soowootha sinkhala ntoko ti seekhaikhai? Nvahe ntakihero. (Nwehe efootu.)

¹⁵ Eheeni ninxutteraahu ni masu murummwa Paulo aalepenlaawe Atesalonika? Emaara nniiwaahu etthu ehinvarihana ni etthu nixuttenraahu mBiblyani, naari wiiwa soohimmwa soowootha, hiyo nintthuneya okhala a miruku. União Soviética akhalayi, amwiittani ahu yaakumihera ekaarta yeeyo yaakhala ntoko yaakhuma oSede Mundial. Ekaarta eyo yaawooperera asinna weera epake  muloko wookawanyeya weera yiihooleleke. Ekaarta ele yaakhala ntoko yeekhaikhai, mene asinna ale oororomeleya khiyaawokeñye. Asinna ale yaahoonelela weera itthu ekaarta ele yaahimaaya, khiyaavarihana ni etthu asinna ale yaaxuttihinwaaya. Olelo amwiittani ahu enniilipihera weera envariheleke tecnologia weera enihoveliheke naari onikawanya. Ohiya okhala atthu ‘oowaakuva otutuxiwa mmurimani mwahu’ hiyo ontthuneya wiikosoopa niwehexexaka wakhala weera etthu niiwalaahu naari nisommaahu ennavarihanna ni ikhaikhai nixuttenraahu. — 2 Ates. 2:2; 1 Yoh. 4:1.

16. Moovarihana ni Aroma 16:17, 18, nintthuneya opaka eheeni wakhala weera atthu akina ennahiya ekhaikhai?

¹⁶ Nivirelele wiiraana ni atthu yaale eri oororomeleya wa Yehova. Muluku ontthuna weera nikhaleke oowiiraana vaavo nimmukokhorelaahu. Nnoovirelela okhala oowiiraana naavarexexaka vale ekhaikhai. Wakhala weera mutthu ori poothe oohiya weettela ekhaikhai, onnakumihera okawanyeya mmulokoni, nto Muluku onnanleela weera nintthuneya ‘waasepa atthu awo.’ Wakhala weera khanimpaka eyo, hiyo-tho nnoohiya weettela ekhaikhai. — Mmusome Aroma 16:17, 18.

17. Mareeliho heeni nimphwanyaahu mwaha woosuwela ekhaikhai ni ovarexexa ekhaikhai eyo?

¹⁷ Vaavo nnaakhulelaahu ekhaikhai ni ovarexexa, nnoovirelela okhala nnene ni oovareleleya moomunepani. (Aef. 4:15, 16) Hiyo nnimwiikosoopa ni sooxuttiha soowootha, nave nnoovirelela okhala oovareleleya nikosoopiwaka ni Yehova mpuwa mwa maxupo matokweene. Nvirelele olipa ni ele eri yeekhaikhai, “ni Muluku a murettele anakhale ni nyuwo.” — Afil. 4:8, 9.