1-2. Mutthu abatiziwa vale, mareeliho heeni onaakhelaawe?

 ETTHU yootepa oreera vantxipale, obatiziwa ni weerela eparte emusi ya Yehova. Atthu epanke eyo ni erino onthamwene woolipa ni Yehova, ennaakhulela masu a Davidi eneera: “Òreriwa yowo mmuthanlenlanyu okhala vakhiviru vanyu, siso akhale vate vanyu.” — Nsal. 65:5 [65:4, NM].

² Yehova onnaathanla moomaaleleya atthu ale ontthunaawe weera yeereleke eparte emusi awe. Ntoko nonnaahu yoosoma evinre, Yehova onnaathanla ale entthuna okhalano onthamwene woolipa nuuwo. (Yak. 4:8) Vaavo nyuwo muniivahereraanyu wa Yehova ni obatiziwa, nyuwo munnakhalano onthamwene woothanleya ni Yehova. Mwabatiziwa vale, nyuwo muroromeleke weera Yehova onrowa “owìtthelelani nreliho nowatta.” — Mal. 3:10; Yer. 17:7, 8.

3. Muritti heeni wootepa otthuneya makristu aivaherenre ni obatiziwa eraayano? (Koheleti 5:4, 5)

³ Ekhaikhai weera, obatizo etthu yoopatxera. Nyuwo munootthuneya opaka ele munweraanyu weera nvirelele okhala oororomeleya wa Yehova naari nvirihaka maxupo ooweereriwa. (Mmusome Koheleti 5:4, 5.) Ntoko mutthareli a Yesu, nyuwo munoowera opaka ele munweraanyu weera mutthare ntakihero nawe mpakaka ele owo oxuttinhaawe. (Math. 28:19, 20; 1 Ped. 2:21) Yoosoma ela enimookhaviherani mwa mukhalelo ene yoowo.

‘NVIRELELE OMUTTHARA’ YESU NNAAMWEERA MUKUMANAKANO MAXUPO OOWEEREERIWA

4. Mwa mukhalelo heeni oohusera a Yesu entthuneyaaya oteexa ‘mwiri wa nihaaxero’? (Luka 9:23)

⁴ Muhuupuweleke weera mwabatiziwaru vale khamunrowa ovirihaka maxupo mweekumini mwanyu. Mweekhaikhai, Yesu  aahaaleela oohusera awe weera yaamurowa oteexa ‘mwiri wa nihaaxero.’ Ni awo yaamurowa opaka eyo “nihiku ti nihiku.” (Mmusome Luka 9:23.) Neereke ni masu ala, Yesu aatthuna ohima weera oohusera awe ikwaha sootheene yaaheereke oviriha maxupo? Hooye, khaiyene tiyeeyo. Mene Yesu aatthuna ohima weera, ohiya paahi waakhela mareeliho, oohusera awe yaaheereke oviriha maxupo. Ni weera maxupo makina yaakela okhala ooxupa. — 2 Tim. 3:12.

5. Mareeliho heeni Yesu olaihenraawe wa ale enrowa waapaka amakeya?

⁵ Pooti weeraka nyuwo mooviriha otthara-tthariwa ni mutthu a veemusini vanyu, naari apaale munnasepa waatteliwa ni itthu sa weerutthuni, mutthunaka ohela nipuro noopatxera mweekumini mwanyu yootthuna ya Omwene. (Math. 6:33) Mwa mukhalelo ene yoowo, muroromeleke weera Yehova ohoona itthu sootheerne nyuwo mpankaanyu. (Aheb. 6:10) Nave nyuwo munnaakhulela weera masu ala a Yesu teekhaikhai: “khavo ohiyale emp’awe nari asinn’awe nari asirokoriye nari amaye nari atithi nari anamwane awe nari imatta nthowa na miyo ni na Evanjelyu, ariki ahàkhele milokó sene milokó seiyo ohiyalaiye: vanano vava ehuhu ene yela impa ni asinna ni asirokora ni amaye ni anamwane ni imatta vamosá ni solupatthiwa; ni ehuhu enrwa, okumi wohimala.” (Mar. 10:29, 30) Moohihovela, mareeliho nyuwo mwaakhenlaanyu mantxipale opwaha itthu mpankaanyu. — Nsal. 37:4.

6. Mwaha wa heeni nyuwo muntthuneyaanyu ovirelela owanano “yowinlela ya erutthu” mwabatiziwa vale?

⁶ Mwabatiziwa vale, nyuwo onnatthuneya ovirelela owanano “yowinlela ya erutthu.” (1 Yoh. 2:16) Moohihovela, nyuwo mwa osuulu woohimalela wa Adamu. Pooti weera ikwaha ikina munniisoonela ntoko murummwa Paulo. Owo ohimme ha: “Niwoko sòkisivela ikano sa Muluku mpuwa mwa murim’aka. Nto kinnòna ikiano sikina mwa impari sa erutthu aka, siwanaka ekhotto ni ikano sa mmurimani mwaka ni sikikhalihaka kaporo a ikano sa sottheka sinakhala mwa impari sa erutthu aka.” (Arom. 7:22, 23) Ikwaha ikina nyuwo pooti okhulumuwa mwaha wa soottheka sanyu. Mene, muupuwelelaka yoolaihera mumpakenlaanyu Yehova vaavo mwaivaherenraanyu, enimoovahani ikuru weera nwaneno yooweerera eri poothe. Ekhaikhai ti yooweera, yoolaihera mumpakenlaanyu Yehova, enoorowa wookhaviherani nnaamweera nvirihaka weereriwa. Moota heeni?

7. Mwa mukhalelo heeni wiivaherera wanyu wa Yehova onrowaaya wookhaviherani okhala oororomeleya wa yoowo?

⁷ Vaavo nyuwo muniivahereraanyu wa Yehova, munniikhootta mwaneene anyu. Eyo entaphulela weera nyuwo muneereke okhootta etthu eri poothe emmunanara Yehova. (Math. 16:24) Mwa yeeyo, vaavo nyuwo munrowaanyu weereriwaka khontthuneya oyeleela etempu anyu muupuwelaka etthu yoopaka. Mwaha wooweera nyuwo munoorowa osuwela etthu yoopaka, ovirelela ororomeleya wa Yehova. Nyuwo onnatthuneya othanla omuhakalaliha Yehova, mwa mukhalelo ene yoowo, munookhala ntoko Yobi. Nnaamweera aavirinhe itthu sootepa oxupa, owo aahimme ha: “Mpaka okhwa waka kinnàkiha ohittheka waka!” — Yobi 27:5.

8. Moota heeni ophimelela nivekelo nanyu na wiivaherera onrowaaya wookhaviherani owina weereriwa?

⁸ Ophimelela nivekelo mwaapankaanyu mwiivahereraka wa Yehova, onimookhaviherani owera owina yooweerera eri poothe. Mwa ntakihero, neereke nyuwo mwaamuuluma masu oohireerela wa mutthu ootheliwa? Moohihovela, hooye! Nyuwo moomulaihera Yehova weera khamwaarowa opaka  etthu ntoko eyo. Wakhala weera khamunhiya nyuupuwelo soonanara sivolowaka vamurimani vanyu, nyuwo khamunrowa otthuneya owanano itthu iyo muhoolo. Mwa mukhalelo ene yoola, nyuwo munoorowa osepa “ephiro ya atakhali.” — Mir. 4:14, 15.

9. Moota heeni ophimelela nivekelo nanyu na wiivaherera onrowaaya wookhaviherani ohela nipuro noopatxera mweekumini mwanyu itthu soomunepani?

⁹ Nankha mwaphwanya muteko woowoosivelani mene onrowa owootxeelihakani woonela mithukumano? Nyuwo khontthuneya ohovela etthu yoopaka. Mwaha wooweera, nyuwo muhaakunveene ophwanya muteko, mwaalakela weera khamwaarowa ohiya etthu yeera ewootxeelihekeni woonela mithukumano. Nto nyuwo khamunrowa waakhulela muteko owo, ni muhoolo mwaya, nyuwo muneereke waasaasa paahi itthu soomunepani. Ophimelela ntakihero na Yesu onoorowa onikhavihera mwa mukhalelo ene yoola, owo aari oolikaneene ikwaha sootheene waahakalaliha Atiithi awe. Nave hiihaale ntoko Yesu, hiyo nintthuna ikwaha sootheene omuhakalaliha Tiithi ahu. — Math. 4:10; Yoh. 8:29.

10. Moota heeni Yehova onrowaawe wookhaviherani mwabatiziwa vale ‘ovirelela omutthara’ Yesu?

¹⁰ Ekhaikhai ti yooweera, weereriwa wohoovahani eparakha yoowoonihera weera muntthuna ‘ovirelela omutthara’ Yesu. Nyuwo muroromeleke weera Yehova onimookhaviherani opaka eyo. Biblya ohimme ha: “Muluku t’òroromeleya, ohinàkhulela wi mwèreriwe opwaha ikuru munaweranyu. Siso mowereriwani mwanyu Muluku onimovahani ntthawelo, wera nwerye ovilela.” — 1 Akor. 10:13.

MOOTA WOOVIRELELA OMUTTHARA YESU

11. Mukhalelo heeni wooreera onneeriha ovirelela omutthara Yesu? (Nwehe efootu.)

¹¹ Yesu annanvarela Yehova ni murima awe wootheene nave annapaka nivekelo wa yoowo. (Luka 6:12) Mwabatiziwa vale, mwaatthunaka omutthara Yesu, onnatthuneya opaka  itthu sinrowa owaattamelihakani veeli-veeli wa Yehova. Biblya oneera: “Yeyo niphiyenrahu’mo, mwemmo ene nètteleke’mo.” (Afil. 3:16) Ikwaha sintxipale nyuwo munoorowa wiiwa sooweereya sa mweekumini sa asinna ni asirokora yaawo yaathanliye opaka sintxipale mmutekoni mwa Yehova. Pooti weeraka asinna awo aasoma Exikola ya Anamalaleera a Omwene, othaamela mapuro oothowa anamalaleera. Wakhala weera ekumi anyu ennaweemererani, iya sooluluwanya nyuwo muntthuneyaanyu okhalano. Atthu a Yehova ennapaka ele enweraaya weera yaatxeerere muteko aya woolaleera. (Mit. 16:9) Nankha yakhala etthu enwootxeelihani okhalano itthu iyo? Muhuupuweleke weera nyuwo khamunvareleya muteko wa asinna ale enwera opaka itthu sintxipale. Etthu yootthuneya, ti yooweera nyuwo onnatthuneya ovirelela ovilela. (Math. 10:22) Muhittiwale weera Yehova onnahakalala ni itthu nyuwo munweraanyu opaka moovarihana ni makhalelo anyu. Ti yeeyo enrowa wookhaviherani ovirelela omutthara Yesu mwabatiziwa vale. — Nsal. 26:1.

12-13. Etthu heeni nyuwo muntthuneyaanyu opaka moonelela weera wiilipihera wanyu onnavukuwa? (1 Akorinto 9:16, 17) (Nwehe ekwaadru “ Nvirelele otthimaka.”)

¹² Nankha mwaawuupuwelaka weera mavekelo anyu khenaakhuliwa ni muteko anyu woolaleera khonkhumela nnene? Pooti weeraka nyuwo khenoosivelani yoosoma anyu ya Biblya ntoko khalayi. Wakhala weera enimweereya eyo mwabatiziwa vale, muhuupuweleke weera khamwaanoono munepa wootteela wa Yehova. Nyuwo ti mutthu oohimalela, nto miyuupuwelo sanyu pooti ohikhala sooreera. Wakhala weera wiilipihera wanyu onnavukuwa, muupuweleke ntakihero na murummwa Paulo. Owo anniilipihera weera amutakihe Yesu, nave-tho Paulo annasuwela weera ikwaha ikina khiwaarowaka  omusivela opaka itthu owo aatthuneyaawe opaka. (Mmusome 1 Akorinto 9:16, 17.) Paulo enre: “Nto kavará miyo kihitthunaka, enahima wi kòlamuliwa.” Ni masu makina, ti yooweera Paulo aari oolikaneene weera avare muteko awe woolaleera ahipwatthaka moota owo aisoonelaawe.

¹³ Moolikana ni eyo, muhipakeke soothanla moovarihana ni moota nyuwo muniisoonelaanyu. Mukhaleke oolikaneene weera mpakeke itthu sooreera, nnaamweera muhitthunaka opaka eyo. Wakhala weera nyuwo munoovirelela opaka itthu sooreera, moovira etempu nyuupuwelo sanyu sinoorowa okhala sooreera. Opwaha mwa yeeyo, okhalano itthu sooreera sa omunepani ntoko, yoosoma ya Biblya, mavekelo, woonela mithukumano ni muteko woolaleera, ti etthu enrowa wookhaviherani ovirelela omutthara Yesu mwabatiziwa vale. Opwaha mwa yeeyo, vaavo asinna enrowaaya woona wiilipihera wanyu weera munvarele Yehova, awo-tho enoorowa okhala oolipa. — 1 Ates. 5:11.

“MWÌKOHEKE MEKHINYU . . . MÒNEKE ASINEN’ANYU”

14. Eheeni nintthuneyaahu wiiwehexexa emaara eri yootheene, ni mwaha wa heeni? (2 Akorinto 13:5)

¹⁴ Etthu ekina enrowa wookhaviherani mwabatiziwa vale, ori wiiweha-weha etempu eri yootheene mwaneene anyu. (Mmusome 2 Akorinto 13:5.) Onnatthuneya wiihiyera etempu weera nwehexexe sookhovelela sanyu. Mwa ntakihero, wakhala weera munnavekela mahiku ootheene, munnapaka yoosoma anyu ya Biblya, munnoonela mithukumano ni orowela muteko woolaleera. Moone moota munrowaanyu ottottelaka mureerelo itthu iya. Mwa ntakihero, mwiikoheke ha: ‘Keereke kinnawera waaxuttiha ikhaikhai sa mBiblyani atthu akina? Keereke yookhala etthu kintthuneyaaka opaka weera kisiveliweke ni muteko woolaleera? Keereke mavekelo aka ennoonihera weera kinnamuroromela Yehova? Keereke miyo kinnoonela mithukumano sootheene? Vano kinrowa wiireherera hayi wa itthu sene seiya?’

15-16. Eheeni nyuwo muxuttenraanyu ni Robert woohima sa osepa sooweerera?

¹⁵ Etthu ekina yootepa otthuneya, ori osuwela itthu sinookhulumulani. Munna mmoha oneeriwa Robert aahihima yooweereya emoha eniiwanyeiha nnene sene eyo. Owo ohimme ha: “Emaara miyo kaaraakano iyaakha 20, kaakhalano muteko kaavaraaka iwoora vakhaaneene. Nihiku nimoha, koleega aka aakiwopa weera nrowe owannyawe naworowa vale omutekoni. Owo aahimme weera naarowa okhala atthu eeli paahi ni naamurowa  ‘otthekula vantxipale.’ Woopatxerani miyo kanneerera wiisaakiha, mene kaahimuleela weera nkaarowa.” Robert aahiwera owina weereriwa, nto onnaphwanela ottottopeliwa. Menento muhoolo mwaya, uupuwelaka etthu yeereñye, Robert aahoonelela weera anwera opaka itthu mwa mukhalelo woovirikana. Owo ohimme ha: “Miyo kanwera okhootta nwopelo awe woopatxerani moolipa murima ntoko hiihaale Yosefe aapankaawe ni mwaarawe Potifari. (Eph. 39:7-9) Ohima ekhaikhai, miyo kaatikhiniheya vaavo koonelenlaaka weera waari wooxupa miyo okhootta nwopelo ole. Eyo yaahikeeriha woonelela weera kannatthuneya ovirelela olipiha nroromelo naka ni Yehova.”

¹⁶ Hiihaale ntoko Robert, onnatthuneya owehexexa nnene sene nyuupuwelo sanyu. Nnaamweera nyuwo nwenreene oviriha yooweerera, mwiikoheke ha, ‘Keereke miyo koopisa weera keere hooye?’ Moonelela weera yookhala muntthuneyaanyu oreherera, muhiivaheke mathowa. Nyuwo muhakalaleke okhala weera mohoonelela etthu enookhulumulani. Mpakeke mavekelo wa Yehova mmuleelaka etthu enookhulumulani, nave mpakeke itthu weera mulipihe ntthuno nanyu noomwiiwelela Yehova. — Nsal. 139:23, 24.

17. Moota heeni yooweereya ya Robert envuwihaaya nsina na Yehova?

¹⁷ Hiyo pooti oxuttera etthu ekina ni yooweereya ya Robert. Owo ohimme ha: “Emaara kaakhonttaaka nwopelo wa koleega aka, owo aahimme ha, ‘Mooreeriwa, nyuwo moowina weereriwa!’ Nto miyo kaahimukoha etthu aatthunaawe ohima. Owo aahikileela weera nthamwene awe aihima okhala namoona a Yehova, aahimuleela weera amiravo ootheene Anamoona a Yehova enkhalano mikhalelo miili sa ekumi, ni weera yaarinono eparakha ya opaka etthu yoonanara awo yampaka. Nto owo aahimuleela nthamwene awe owo weera aamurowa okeerera. Miyo kaahakalala vaavo kaasuwenlaaka weera kaavuwiha nsina na Yehova.”

18. Eheeni nyuwo mulakenlaanyu opaka mwabatiziwa vale? (Munwehe kwaadru “ Nyaha miili sinrowa woosivelani vantxipale.”)

¹⁸ Vaavo nyuwo mwaivahereraanyu wa Yehova ni obatiziwa, mwaahoonihera weera nyuwo mwaatthuna ovuwiha nsina nawe muhipwatthaka etthu yeera ekhumelele. Nto nyuwo muroromeleke weera Yehova oosuwela sooweerera sootheene munkumanaanyuno. Nave owo onoorowa oreeliha wiilipihera wanyu wootheene weera nyuwo nvirelele ororomeleya. Nave muroromeleke weera, avarihelaka muteko munepa awe wootteela, Yehova onoorowa woovahani ikuru seiyo munhaawelaanyu. (Luka 11:11-13) Nave mukhaviheriwaka ni Yehova, nyuwo munoowera ovirelela omutthara Yesu mwabatiziwa vale.