Emaara yeeyo hiyo nalaleeraahu vantxipale, nannahaawela tho iliivuru sintxipale. Asinna a eBetheli ya oBrooklyn yannimprimiri irevista, mene weera ewere wimprimiri iliivuru sa ekaapa ya mwiitti, yaavarihela muteko igrafika sa alipa anakoso. Ekwaha tiiyo igrafika iyo saapisiha onivaherera iliivuru sahu ni etthu eyo, yaatthikihera ottuli muteko ahu woolaleera, tivawoonto munna Rutherford amukonhaiye munna Robert Martin yoowo aari encaregado a ografika, voohima sa opaka iliivuru sahu.

Munna Martin enre: “Iye saari miruku sooreera, mwaha wooweera eyo yaataphulela ohuliha egrafika yookwanela envara miteko sootheene soowimprimiri, ntoko, galvanostegia, wimprimiri ni winkadernari.” Asinna yahaalukari nipuro nimoha eruuwa ya Concord, nummeru 18, oBrooklyn, ni yaathuma ikaruma saatthuneya.

Mene atthu akina khayaasivelinwe ni etthu ele hiyo napankaahu. Namahoolela a empresa nimprimiraahuwo iliivuru sahu ahoowa oxekura egrafika ahu. Owo ahimme masu ala: “Nyuwo mookhalano egrafika ya muttenko mmatatani mwanyu, ni khaavo onsuwela naari mano etthu yootekela. Mpuwa mwa myeri mithanu nnamosa itthu sootheene iya sinkela okhala ikokhola soowuukeliwa.”

Munna Martin enre: “Etthu ahimmaawe mulopwana ole yaakhala maakha, mene khuupuwenle weera Apwiya ari ni hiyo.” Munna Martin etthu ahimmaawe yaari ekhaikhai mwaha wooweera noovira ehuhu vakhaani maakina oowinkadernari yannapaka iliivuru 2.000 va nihiku.

Ohiya paahi wiimprimiri iliivuru sahu, atthu a Yehova yaapatxera ovarela muteko misoora sa radiyu—weera elaleere. Edomingu oxekuwa nihuku na 26 a fevereiro a eyaakha ya 1922, naari nihiku munna Rutherford apatxenraawe wuuluma  muradiyuni. Owo aapaka mwaha waarino muru oneera “Milhões que agora vivem jamais morrerão”, eyo yeereya misoora sa KOG, Los Angeles, oCalifórnia, wEstados Unidos.

Atthu okwanaka 25.000 yaawiriyana mwaha ola. Atthu akina ayaawo yaahinviyari ikarta emuxukhureka munna Rutherford. Mmoha a yaawo aalempe ekarta ele aari Willard Ashford, a oSanta Ana, oCalifórnia. Owo aamuttottopela munna Rutherford ni masu ala: “Waari woorera ni woohakalaliha wiiwa mwaha anyu.” Ahimakaru masu ala owo enre: “Wahakhanle weera mwaha ola khawaarumihinwe muradiyuni, naari waapakiwa waattamela owaani miyo nkhaarowa owiriyana, mwaha wooweera yaakhala atthu araru yaavoreiwa owaani.”

Nyaha sikina saakhumiheriwa isemana saattharelana muradiyuni. A Torre de Vigia (vano oneeriwa A Sentinela) ohimme weera okhwipi wa eyaakha ele, “atthu ookwanaka 300.000 yaahiiwa mitthenka sa Omwene moorweela muraadiyu.”

Mwaha wa atthu antxipale yaakhulenle mitthenka sa Omwene, anamasoma a Biblya yaathanla opaka misoora sa radiyu nipuro na oStaten Island, waattamela eBetheli ya oBrooklyn. Iyaakha ikina sattharelana emisoora ela WBBR ya radiyu, yanvareliwa muteko ni anamasoma aBiblya weera elaleeye mitthenka sa Omwene.

A Sentinela a 15 a junho a 1922 aahima weera aamukhala kongresu yoowo aakela opakiwa oCedar Point, Ohio nihiku na 5 a 13 a setembro a eyaakha ya 1922. Anamosoma aBiblya ephiyakaru nipuro nne yaatteeliwa murima vantxipale.

Mwaha wa munna Rutherford apatxenraawe wuuluma, owo ahaaleela atthu yaawiriyana mwaha ole weera: “Kinnaroromela weera Apwiya . . . Enoomureeliha kongresu ola ni onoohelela onamoona elapo yootheene.” Asinna yaapaka nyaha okongresuni iwe yaannawooperera asinna veeli-veeli weera yiilipihereke ovara muteko woolaleera.

Namathanu 8 a setembro, atthu okwana 8.000 yaasareya nipuro na kongresu, ni yootthuna yooweera yiiwe mwaha wa munna Rutherford. Atthu awo yannatthuna osuwela etthu entaphulelaaya ethonyero ya “ADV” yaawa vanwopeloni yaakhenlaaya. Emaara atthu awo yaakilaathaaya  akina ayaawo yannawera omoona loona oopinttiwa osulu wa altar. Arthur Claus yoowo akhumme oTulsa, Oklahoma aweenle omoonela kongresu, aaphwanya nipuru nooreera owiriyana nnenesene mwaha. Woona weera etempu ele khayaakhanle esistema ya esom.

Weera atthu ettottele mureerelo mwaha wa munna Rutherford presidente aahima weera khaavo eera aakhuleliwe ovolowa nipuro nne munna Rutherford apakaka mwaha awe. Weixelo ewoora ya 9:30 munna Rutherford aapatxenre wuuluma athalihaka masu a Yesu eri va Matheyo 4:17: “Omwene wa Mululuku wòkhuvela.” (Versão Rei Jaime) Uulumaka sa moota atthu yeeraya esuwele sa Omwene, owo enre: “Yesu mwanene enre orwawawe owo anvara muteko woohepha, mpuwa mwa ohepha iwo, owo amwaathukumanya ale ankokhorela mweekhaikhai ni moororomeleya.”

Munna Claus yoowo aari oohoolo aahima: “Nannareya maaru yuulumwaka masu eri poothe.” Arthur nnamweera ahatthuna okhuma, owo aakhuma mwaha woohoona nnene mweerutthuni mwawe, ahisuwelaka weera aamwitthika.

Moohilekela aapatxera woona nnene. Atthikelaka nipuru akilanthaawevo owo aaphwannye atthu yoopaka makuphi. Eyo yaamukuxa murima mpaka aalakela owela vasulu wa vasulu va empa, wakhala ntoko weera eyo yammweriha owera owiriyana nyaha saattharelana soovara murima. Munna Claus aarino iyaakha 23 ehuhu ele, owo aahaasa manera weera awele nipuro noowooneya na vasulu va empa. Awelakaru imeetru ixexe, owo aaphiya vaveresani, ni aahoona weera iveresa iye sannooneela, nto, “annawera wiiwa mwaha waapakiwa nnenesene”.

Mene khaiyene weera Arthur aari mekhaiye vasulu vale. Asinthamwene awe akina yaari vaavale. Mmoha asinthamwe awe awo eeriwa Frank Johnson aamwaattamela Arthur anamukoha: “Nyuwo mookhalano nwopelo?”

 Arthur waakhula enre: “kookhalano.”

Avinyaka vaavale Frank enre: “Nno waakhuliwa wa mavekelo ahu. Frank aamukoha Arthur neereke munnoona eroolu ela etokotoko? Eyo etthukeleliwe va iperekuni va. Mureyeke maaru vaavo mphuki. * Onkelaawe ohima masu ala: ‘Mulaleye!, Mulaleye!, ahima masu ala muthikile mikoyi mixexe iya va.”

Mene Arthur aakhala awehereraka esinal ni mwaalo awe mmatatani. Moohipisa munna Rutherford aaphiya empari yootepa otthuneya ya mwaha awe. Mootteeliwa murima, munna Rutherford apaale ahimme masu ala mookhuwela: “Anamoona ororomeleya aapwiya nvirelele ovara muteko mpaka onyanyiwa Babilonia. Mulaleye mitthenka elapo yootheene. Elapo etthuna weera esuwele weera Yehova Muluku ni weera Yesu mwene a mamwene ni pwiya a sipwiya! Etthwiila ennatthuneya osuweliwa ni atthu ootheene. Moone weera, mwene onnalamulela! Nyuwo anamalaleya. Ti vawonto mulaleye, mulaleye, mulaleye Omwene ni mwene awe!”

Arthur ohimme weera owo ni asinna akina yaathikila mikoyi, ni eroolu ele yaapinttinwe yaataphuruwa. Moovarihana ni iletera iya “ADV” (olaleya, nnuulumo na inglês) ni eroolu ele yaahima masu ala: “Mulaleye Omwene.”

Kongresu oCedar Point ahakhavihera asinna ovara muteko wootepa otthuneya, aani, muteko woolaleya mitthenka sa Omwene. Ni ale yaarino munepa wootthuna weerela eparte muteko ola yaakhala colportor (mahikwaano ensuweliwa okhala piyoneiru) Oklahoma, a wEstados Unidos, olempe ha: “Ninlaleya mapuro atthu antxipale anvara aya muteko wa okumiha makhala ni awo anamahaawa.” Munna ola enre, weera ikwaha sintxipale atthu yiiwaaya mitthenka sa erevista ya Idade de Ouro, “awo yannamoriha maithori eyo tiiyo winla”. Munna ola onnavirelela ohima: “mareeliho a Yehova waamaaliha atthu ala.”

Anamasoma ale aBiblya yaahoona otthuneya waya masu a Yesu eri va Luka 10:2 yaawo eneera: “Sohepha siri sintxipale, nto anamuteko vakhani.” Okhwipi wa eyaakha ya 1922 anamasoma ale aBiblya yahaatxeera vantxipale olaleya mitthenka sa Omwene elapo yootheene.