ETXIPO yannavareliwa muteko vantxipale mpuwa mwa sookhovelela wIsraeli a khalayi. Biblya onnuuluma woohima sa itxipo seepiwa sivareliwaka muteko ikaruma ni seepiwa vayanoni. Veekhaikhai, mBiblyani ninnaphwanya itxipo sintxipale. Nookhalano matakihero a iliivuru ntoko, Masalmu, Etxipo ya Itxipo, ni Wikhupanyera. Eliivuru Música na vida bíblica ehimme weera Biblya “onnoonihera weera itxipo sannavareliwa muteko mwa mikhalelo soovirikana wIsraeli a khalayi.”

Etxipo nihiku ti nihiku. Ana a Israeli yanneepa itxipo weera yoonihere moota yiisoonelaaya. (Yes. 30:29) Asithiyana yanneepa itxipo moohakalala ni ikoma, vaavo aathanliwaawe mwene, ofestani, ni vaavo yaawinaaya amwiittani aya. (Aph. 11:34; 1 Sam. 18:6, 7; 1 Mam. 1:39, 40) Ana a Israeli-tho yanneepa itxipo soowiikhupanyera vaavo yaakweliwaaya. (2 Sow. 35:25) McClintock ni Strong’s Cyclopedia, ennaakhulela weera “Aheberi yaari atthu waasivela weepa.”

Mamwene a wIsraeli sannaasivela itxipo. Mamwene a wIsraeli yannahakalala vaavo seepiwaaya itxipo. Mwene Sawuli aamwiitthana Davidi opalaciyuni wawe weera amweepeleke itxipo. (1 Sam. 16:18, 23) Muhoolo mwaya Davidi akhalakaru mwene, aapaka ikaruma sooweepano itxipo, aalepa itxipo sooreera, ni aapaka ikaruma weera seepiwekeno itxipo mutemplu mwa Yehova. (2 Sow. 7:6; Am. 6:5) Mwene Salomoni aakhalano alopwana ni athiyana yaawo yeepa itxipo epalacio awe. — Koh. 2:8.

Ana a Israeli yanneepa itxipo weera emukokhorele Yehova. Etthu yootepa otthuneya ti yooweera ana a Israeli yanneepa itxipo weera emukokhorele Yehova. Mweekhaikhai etemplu ya oYerusalemu yaakhala atthu ooweepa itxipo ookwanelaka 4.000. (1 Sow. 23:5) Awo yannavarihela muteko ikaruma sintxipale weera emweepele Yehova. (2 Sow. 5:12) Mene awo khaiyene yaari meekhaaya yaamukokhorela Yehova evarelaka muteko itxipo. Ana a Israeli antxipale, yanneepa itxipo vaavo yeettaaya erowaka opaka efesta ya vayaakhani oYerusalemu. (Nsal. 120-134) Ni moovarihana ni soolepa sa aYuda, ana a Israeli yanneepa itxipo sa Masalmu a nivekelo a vaavo yaamutxaaya mpasika.

Nlelo itxipo ti sootthuneya wa atthu a Yehova. (Yak. 5:13) Hiyo ninneepa itxipo weera ninvuwihe Yehova. (Aef. 5:19) Vaavo nneepaahu vamoha ni asinna ninniiraana. (Akol. 3:16) Ni eyo ennanlipiha vaavo ninvirihaahu maxupo. (Mit. 16:25) Weepa itxipo mukhalelo mmoha wooreera nnooniheraahu omuroromela wahu Yehova ni nsivelo nraahuno nuuwo.