1. Exeeni enooniherya wira Yehova toovaha?

WAAHIKHALA okathi Yehova aari awe mekhawe. Muhoolo mwaya, Yehova aahipattuxa malaikha wira akhaleke wiirimu ni apinaatamu wira akhaleke valaponi. Okhala wira Yehova ti Muluku oohakalala, owo onnisiveliwa ovaha itthu sooloka. (1 Timótheyo 1:11; Yakobo 1:17) Nave, okhala wira Yehova oniphavela wira nihakalaleke, onniniixuttiha okhala atthu oovaha.​—aRoma 1:20.

2, 3. (a) Xeeni ovaha onniphwanyiha aya ohakalala? (b) Mwaha ola, ninrowa othokorerya exeeni?

² Muluku ohaapattuxa apinaatamu ailikanyihaka mmansawe. (Maphattuwelo 1:27) Eyo enooniherya wira Yehova oonipattuxa khunivaha mikhalelo orina awe. Wira nihakalaleke ni waakhela mareeliho a Yehova, nihaana otthara ntakiheryo nawe. Nave nihaana waathokorerya saana atthu ni waavaha itthu sinaathowa. (aFilipi 2:3, 4; Yakobo 1:5) Nthowa xeeni?  Nthowa noowi, Yehova onipattunxe ni mukhalelo woovaha. Nnaamwi nri ene atthu oohimalela, nnoowerya omutakiha Yehova nikhalaka atthu oovaha.

³ Mwaha ola, ninrowa othokorerya itthu siniixutta ahu mBiibiliyani voohimya sa ovaha. Nto ninrowa woona nthowa naya Yehova onihakalala awe okathi ninvaha ahu. Nave, ninrowa wiixutta moota ovaha onnikhaliherya aya omaleliha muteko nivahiwe ahu ni Yehova, ni nthowa naya ninhakalala ahu vaavo ninvaha ahu. Wanikisa waya, ninrowa oweha nthowa ninniiriha ovikaniha okhala atthu oovaha.

4, 5. Moota xeeni Yehova ni Yesu ari aya oovaha? Xeeni nintthuneya ahu waatakiha?

⁴ Yehova oniphavela wira nimutakiheke ni onnihakalala vaavo ninvaha ahu. (aÉfeso 5:1) Nave Yehova oniphavela wira nihakalaleke. Maana oonipaka mwa enamuna enooniherya eyo, ni oopaka elapo yooreera khusariha itthu sinniphwanyiha ohakalala. (Esalimo 104:24; 139:13-16) Nto, ninninvuwiha Yehova vaavo nimmananiha ahu waahakalaliha atthu akina.

⁵ Nave-tho, ninnimutakiha Yesu, yoowo aavanhe apinaatamu ntakiheryo noomalela na ovaha. Owo aahimmye so: “Mwana a mutthu kharwenle orumeliwa: orwenlé warumela atthu n’uleva ekumi awe, wira awopole atthu othene”. (Matheyo 20:28) Murummwa Paulo ohaatumererya maKristau wira: “Mukhalaneke mupuwelo mmosaru, yowo orinawe Yesu Kristu . . . [owo] ahirula omuluk’uwo, ahìkhaliha epottha”. (aFilipi 2:5, 7) Tivonto, nihaana wiikoha so: ‘Kiireke kinnitthara vakhiviru vene ntakiheryo na Yesu?’​—Mmusome 1 Pedru 2:21.

6. Nlikanyiho na Yesu na muSamariya ooreera murima, ninniixuttiha exeeni? (Nwehe elatarato yoopacerya.)

⁶ Yehova onnihakalala vaavo nintthara ahu ntakiheryo nawe ni na Yesu. Hiyo ninnitthara ntakiheryo naya, vaavo nnaathokorerya ahu atthu ni ophavela waakhaliherya. Yesu aahooniherya otthuneya waya opaka eyo, vaavo aalavunle awe nlikanyiho na muSamariya ooreera murima. (Mmusome Luka 10:29-37.) Nto Yesu aahiwiixuttiha atthareli awe wira yaahaana waakhaliherya atthu ahiwehaka makhalelo ni elapo aya. Niireke munnuupuwela etthu yaamwiirinhe Yesu olavula nlikanyiho nne? Nthowa noowi muYuda mmosa aahimukoha wira: “Mukhw’aka t’ani?” Moota Yesu aakhunle awe, onniniixuttiha wira naaphavelaka omusiveliha Yehova, nihaana okhala oovaha ntoko muSamariya.

7. Ninrowa wooniherya sai wira Yehova tonipaka itthu moolokexa? Mutthokiherye.

⁷ Nthowa nikina ninniiriha okhala oovaha, ninvarihana ni ele yiiraneyale ejardim ya wEedeni. Satana aahimmye wira Adamu ni Eva yaamutepa ohakalala akhala wira yaamweettela murima aya ni ohimwiiwelela Yehova. Eva aari nanrima, mwaha woowi aaphavela okhala ntoko Muluku. Nave Adamu aari nanrima, maana aathanlale omuhakalaliha vanceene Eva ohiya Muluku. (Maphattuwelo 3:4-6) Nto eyo yaahaakumiherya maxakha. Okhala wene, ananrima khanihakalala. Masi akhala wira khanrina nrima ni na atthu oovaha, ninnooniherya okupali wahu wira moota Yehova onipaka awe itthu ti woolokexa.

8. Xeeni Adamu ni Eva yaatthuneya aya owuupuwela atthu akina?

⁸ Nnaamwi Adamu ni Eva yaari mekhaya ejardim ya wEedeni, awo yaahaana owuupuwela atthu akina. Atthu xeeni? Muupuweleke wira Yehova aahaavaha muritti, eyo piiyo, waayara anamwane wira asareye valaponi ni wiiriha elapo okhala eparayiisu. (Maphattuwelo 1:28) Adamu ni Eva yaaphavela wira anaaya ahakalaleke, ntoko Yehova aaphavela awe. Nto otheene aya yaarowa ovaraka muteko mowiiraana wira elapo yotheene ekhale eparayiisu. Tthiri owo waari muteko muulupale!

9. Apinaatamu yaarowa ophwanya exeeni mwaha wowiiriha elapo okhala eparayiisu?

⁹ Nave apinaatamu ale oomalela, yaahaana ovara vamosa ni Yehova wira yiirihe elapo okhala eparayiisu ni omaleliha yootthuna awe. Nto eyo yanwiiriha ophwanya omumula vamosa ni Muluku. (aHéberi 4:11) Tthiri awo yaamuhakalalaka ovara vamosa ni Yehova! Nave Yehova aamwaareeliha vanceene mwaha wookhala atthu oovaha ni waathokorerya akina.

10, 11. Exeeni enrowa onikhaliherya olaleerya ni waapaka awiixutti?

¹⁰ Olelo-va, Yehova oonivaha muteko wa vameekhaaya. Muteko xeeni? Olaleerya ni waapaka awiixutti. Nto nihaana wiimananiha waathokorerya saana  atthu. Mwekeekhai, nnoovikaniha ovara muteko owo akhala wira nookhalana mathowa ooloka, niire so, omphenta Yehova ni Atthu.

¹¹ Paulo aahimmye wira yena ni maKristau akina a eseekulu yoopacerya, ‘yavara vamosá . . . [ni] Muluku’, maana yanaalaleerya atthu ni owiixuttiha ekeekhai. (1 aKorinto 3:6, 9) Olelo-va, hiyo-tho nnoowerya ‘ovara vamosá . . . [ni] Muluku’, nirumeelaka okathi, ikuru ni mireerelo sahu wira nikhaliherye muteko woolaleerya nivahiwa ahu ni Muluku. Tthiri ela eparakha yuulupale!

12, 13. Mareeliho xeeni nimphwanya ahu mwaha wowaapaka awiixutti?

¹² Vaavo ninrumeela ahu okathi ni ikuru sahu, nilaleeryaka ni wiixuttiha ninnihakalala vanceene. Eyo ti etthu anna ni arokora anceene arina eparakha ya wiiriha soosoma sa Biibiliya anihimya aya. Tthiri ninnihakalala waaweha ale anaasomiha ahu Biibiliya atteeliwaka murima mwaha wowiiwexexa ele Biibiliya onniixuttiha awe. Nave vaavo waamini waya onlipa aya, apakaka marukunuxo ni waaleela atthu akina itthu siniixutta aya. Yesu aahihakalala vanceene waaweha awiixutti awe 70, yaawo ‘yahokolonwe n’utteliwa murima’, mwaha wa sookumanana saya sooloka.​—Luka 10:17-21.

¹³ Anna ni arokora olumwenku wotheene, annihakalala okathi anoona aya Nuulumo na Muluku naakhaliheryaka atthu mookumini mwaya. Mwa ntakiheryo, mwali mmosa oniihaniwa Anna, aaphavela wuncererya muteko oninvarela awe Yehova. * (Nwehe enoota.) Tivonto, aahithaamela muttetthe mmosa woothowa anamalaleerya wEuropa. Owo olempe so: “Muttetthe ola, kookhalana eparakha yoowiiriha soosoma sa Biibiliya sinceene, nto eyo ennikisivela. Tthiri kinnihakalala ovara muteko ola. Vaavo kintthikela aka owaani, nkinkhalana okathi wowuupuwela mixankiho saka. Masi kinuupuwela mixankiho sa atthu ale anaasomiha aka. Kinniphavelasa inamuna sa waalipiha ni waakhaliherya kaavahaka itthu sinaathowa. Nave kinnikupali wira ‘mulipa-òvaha onoreriwa [ohakalala] onvikana mulipa-òvahiwa’”.​—Miteko 20:35.

14. Munrowa osiveliwa sai olaleerya hata atthu ahiphavelaka owiriyana?

¹⁴ Hata atthu ahiniwiriyanaka okathi nnaalaleerya ahu, nnoohakalala okhala wira ninnaavaha eparakha wira yiiwe ihapari sooreera. Yehova oniphavela wira nipakeke etthu emosa-ru anvekenle awe Ezekiyeli, oriki: “Yaiwelelá walá yahìwelele, nyuwo mwahimerye sothene sinrowaka worumani walèla”. (Ezekiyeli 2:7; Yesaya 43:10) Tivonto, hata atthu ahiphavelaka owiriyana, Yehova onnivaha efaita wiimananiha wahu. (Mmusome aHéberi 6: 10.) Olavulaka sa muteko awe woolaleerya, munna mmosa ohimmye wira: “Hiyo ninniphatteya miri, okhuwari miri iyo, ni ovekela nlipelelaka wira Yehova onimunnuwiha”.​—1 aKorinto 3:6.

15. Niireke nihaana ovaha paahi akhala wira atthu anninixukhurela? Mutthokiherye.

¹⁵ Yesu oniphavela wira nivaheke, maana ovaha onninihakalaliha. Vaavo ninvaha ahu, nave atthu anceene anrowa otakihaka. Ti maana aya onnitumererya awe wira: “Mwavaheke akhw’inyu: siso Muluku onimovahani nyuwo. Munimwittheleliwa vakuwoni vanyu mphimo worera, wosarya, wokhitteliwa mpakha ovakareya. Mweryo onrowanyu waphimela akhw’inyu, Muluku onrowa wophimelani yowo”. (Luka 6:38) Masi eyo khentaphulela wira atthu otheene anrowa oxukhuruku. Hata vari siiso, nvikaniheke okhala oovaha. Mwekeekhai, ovaha wanyu pooti waakhaliherya atthu anceene.

16. Tani anitthuneya ahu waavaha ni nthowa xeeni?

¹⁶ Atthu anivaha ni murima wotheene, khanlipelela ottikiheriwa etthu. Yesu aahimmye so: “Mwalikanyihaka yolya, mwalattuleke alipa-òhawa n’atthu òrakala ni òtuthunya n’alipa-òhona. Siso munoreriwa, okhala wira awo kharina yo wotthikiheryani”. (Luka 14:13, 14) Nave Biibiliya onihimya wira: “Mutthu òmoriwa ikharari onoreriwa”, ni “Òreriwa t’ale anakhapelela alipa-òthoiwa”. (Miruku 22:9; Esalimo 41:2) Mwekeekhai, nihaana waakhaliherya atthu ni murima wotheene.

17. Itthu xeeni sikina nikhanle ahu oowaavaha atthu sinniphwanyiha ohakalala?

¹⁷ Vaavo Paulo aaromonle awe masu  a Yesu ani: “Mulipa-òvaha onoreriwa [ohakalala] onvikana mulipa-òvahiwa”, khahiyo aalavula paahi itthu sa werutthuni. Nave nnoowerya waalipiha atthu, waavaha miruku sa mBiibiliyani ni waavaha itthu sinaathowa. (Miteko 20:31-35) Ele Paulo aahimmye awe ni aapanke awe, enniniixuttiha wira nihaana waavaha atthu okathi ahu, ikuru sahu, waacalela ni waaphenta.

18. Exeeni asomi anceene anihimya aya sa ovaha?

¹⁸ Anamatokosa anisoma mikhalelo sa atthu, ahoona wira ovaha onnihakalaliha. Moovarihana ni yoohimmwa emosa, atthu anihimya wira annihakalala vanceene okathi aniwiirela aya itthu sooloka atthu akina. Anamatokosa akina anihimya wira, vaavo nnaakhaliherya ahu atthu, ninnitteeliwa murima. Tivonto, asomi akina anihimya wira atthu anivara muteko mowiivahererya, annikhalana ekumi yooloka ni annihakalala. Tthiri, khanintikhina eyo, okhala wira Mpattuxa ahu oophenta Yehova, oohimya wira ovaha onninihakalaliha.​—2 Timótheyo 3:16, 17.

19, 20. Xeeni muniphavela anyu okhala mutthu oovaha?

¹⁹ Okhala wira ninkhala elapo atthu anceene aniisuupuwela aya mmansaya paahi, eyo pooti onihapuwela, vanavila okhala atthu oovaha. Masi Yesu oonuupuxerya sooruma piili suulupale, niire so, omphenta Yehova ni murima ahu wotheene, okumi ahu wotheene, muupuwelo ahu wotheene, ni ikuru sahu sotheene ni omphenta namwaattamanani ahu ntoko siniiphenta ahu. (Marko 12:28-31) Nave mwaha ola, nihiixutta wira ale animphenta Yehova, annimutakiha yena. Yehova ni Yesu toovaha. Nto awo annintumererya otthara ntakiheryo naya, maana annisuwela wira nnoohakalala mwekeekhai. Tivonto, naimananiha okhala oovaha nivaraka muteko wa Muluku ni waakhaliherya anamwaattamanani ahu, ninrowa onvuwiha Yehova, ophwanya mureerelo ni waalipiha akina.

²⁰ Ninnikupali wira munnimananiha opaka eyo mwaakhaliheryaka atthu akina, vanceenexa anna ni arokora. (aGalasia 6:10) Akhala wira munoovikaniha opaka eyo, atthu anrowa wooxukhurelani ni woophentani, nto nyuwo munoohakalalaka. Biibiliya onihimya so: “Mulipa-òvaha onovahiwa vowatta: onakhaliherya akhw’awe, onokhaliheriwa”. (Miruku 11:25) Tthiri, sookhala inamuna sinceene nikhanle ahu waareerela murima atthu ni waavaha. Mwaha onittharelana, ninrowa oweha inamuna sikina.