1. Eprofesia xeeni ya Yesaya yaamuhimya Yesu? Xeeni eyo eri aya yoolipiha?

EPROFESIA ya Yesaya voohimya sa Yesu enninlipiha ni onivaha nlipelelo. Yesaya aahihimya vahinatthi wira Yesu khaarowa ‘walamula atthu ntoko sinòneyaya: khaphuka milattu mwaha wo wiwa pahi. Masi onowirela exariya amasikhini’. (Yesaya 11:3, 4) Xeeni eyo eri aya yoolipiha? Mwaha woowi, ninkhala olumwenku woosareya ohixariya, ni atthu aniphukelana aya attharaka ele anoona aya paahi. Tivonto ninnimphavela Yesu, yoowo ori Mulipa-oophuka a xariya ni ohinrowa oniphukela ottharaka itthu onoona awe paahi!

2. Yesu onrumme opaka exeeni ni ninrowa othokorerya exeeni mwaha ola?

² Khula nihiku, ninnaaphukela atthu mwaha wa itthu sinoona ahu. Masi okhala wira na atthu oohimalela, khaninwerya ophuka mwa xariya ntoko Yesu. Maana nnaakuvela otthara ele enoona ahu paahi. Tivonto, Yesu onloponle awe oriki: “Muhimuthorihé mutthu muttharaka itthu sinòneya pahi: mwixutte olamula muttharaka exariya”. (Yohani 7:24) Yesu oniphavela wira nimutakiheke nihaaphukelaka  atthu nittharaka ele enoona ahu paahi. Mwaha ola, ninrowa othokorerya itthu tthaaru sikhanle ooniiriha waaphukela atthu nittharaka itthu sinoona ahu, eyo piiyo, nikhuli ni elapo ya mutthu owo, aari thaaciri aahiiso mulipa-oohaawa ni iyaakha sawe. Nave ninrowa oweha moota woomwiiwelela Yesu nisyakaka waaphukela atthu nittharaka ele enoona ahu paahi.

3, 4. (a) Exeeni yaamwiirinhe Pedru oturuka moota aawoonela awe Amalapo? (Nwehe elatarato yoopacerya.) (b) Pedru iixuntte exeeni ni yowoonihiwa ele?

³ Nkahaya muupuwele moota murummwa Pedru oonenle awe vaavo aaleeliwa awe orowa oKesareya, etthoko ya Mmalapo iihaniwa Kornelio! (Miteko 10:17-29) Okhuma enamwane awe, Pedru aakupali wira Amalapo yaari atthu oothanyeya. Masi yookhala etthu yaakhumelenle yaamwiirinhe oturuka muupuwelo awe. Etthu xeeni? (Miteko 10:9-16) Pedru aahoonihiwa etthu yaakhala ntoko ekuwo yaarina inama sa mwiikho ekhuruwaka wiirimu. Moottharelana, Pedru aahiiwa nsu nihimyaka wira: “Haya, Pedru!, mukhureke!” Nto Pedru aahikhootta ikwaha tthaaru. Khula ekwaha aakhootta awe, nsu nle naahimuleela wira: “Muhìreleké ti sa mwikho itthu sirerihiwe ni Muluku!” Nuumala yowoonihiwa ele, Pedru khaasuwela ele nsu nne naaphavela aya omwiixuttiha. Moohipisa, yaahirwa anamuhupi yaarummwale ni Kornelio. Vano olakiheriwaka ni munepa wootteela, Pedru aahaatthara anamuhupi ale etthoko ya Kornelio.

⁴ Vaakhanle wira Pedru aahaaphukela ‘ottharaka itthu sinòneya pahi’, khaarowa etthoko ya Kornelio. AYuda khiyaarowa itthoko sa Amalapo. Nto xeeni Pedru ohalaka orowa? Nnaamwi aathanya Amalapo, yowoonihiwa ni malakiheryo a munepa wootteela yaahimwiiriha oturuka muupuwelo awe. Nuumala Pedru onwiriyana Kornelio, owo aahimmye wira: “Vano kosuwela orattene wira Muluku khanathanla atthu. Tthiri Muluku onnaphenta atthu a nloko ti nloko, yale animuttittimiha, enettela exariya”. (Miteko 10:34, 35) Wiiwexexa nno wa niinaano waahimutikiniha Pedru, nave waarowa waatikiniha maKristau otheene. Moota xeeni?

5. (a) Yehova oniphavela wira maKristau asuwele exeeni? (b) Hata nisuwelaka ekeekhai, moonelo xeeni woonasa wene orina ahu?

⁵ Omurumeelaka Pedru, Yehova aahaakhaliherya maKristau otheene woona wira Muluku khorina nthalu. Yehova khoniweha nikhuli, elapo, nloko aahiiso nttaava na mutthu. Masi Muluku onnimweemererya khula mutthu onimoova ni oneettela exariya. (aGalasia 3:26-28; Wisupulula 7:9, 10) Waaniheryasa, nyuwo munnisuwela ekeekhai ela. Nto sai akhala wira munnuwale elapo aahiiso emusi enaathanla atthu? Hata muupuwelaka wira khamunaathanla atthu, pooti wira mookhalana nthalu vamurimani vanyu. Nnaamwi Pedru aakhalihenrye  atthu akina woona wira Muluku khorina nthalu, masi Pedru aanathanla atthu akina. (aGalasia 2:11-14) Nto, ninrowa owerya sai omwiiwelela Yesu ni osyaka waaphukela akina nittharaka ele enoona ahu paahi?

6. (a) Exeeni enrowa onikhaliherya oxintta nthalu? (b) Ele mutokweene aalempe awe enooniherya exeeni sa yena?

⁶ Naaphavelaka osuwela akhala wira nookhalana nthalu, nihaana otokosa moonelo ahu nirumeelaka Nuulumo na Muluku. (Esalimo 119:105) Nave ovila woona wira nookhalana nthalu, nto nihaana omukoha mpatthani wira onileele akhala wira nookhalana nthalu. (aGalasia 2:11, 14) Mwaha woohimalela, hiyo pooti woonaka wira khanrina nthalu! Eyo ti etthu yaamwiiranenle mutokweene mmosa. Mutokweene ole, aahilepela ofiliyaali olavulaka sa anamathelana amosa yaari ooluttuweliwa muteko wa Muluku wa okathi wotheene. Owo aahimmye wira, amulopwana aari a nloko na atthu yahooneliwa vatthu. Woonasa wene mutokweene ole khaasuwela wira aanaakhalela nthalu atthu a nloko nne. Eyo ennooneya ni moolumo awe ani: “Hata ori ene a [nloko nle], mweettelo awe ohaakhaliherya akina woona wira [okhala a nloko nne] khontaphulela wira orina soolema soohiloka, toohifai ntoko atthu anceene a nloko [nle]”. Exeeni nniixutta ahu? Nniixutta wira, hata nrina ene miritti sinceene mmutthenkesoni mwa Yehova, nihaana wiitokosa ni weemererya naleeliwa wira nookhalana nthalu. Etthu xeeni ekina ekhanle ahu oopaka?

7. Ninrowa wooniherya sai wira ‘ninnatthukulela’ atthu murima ahu?

⁷ Vakhala wira ‘ninnatthukulela’ atthu murima ahu, nnoowerya orantteliha nthalu ni ophenta. (2 aKorinto 6:11-13) Niireke munaataana paahi ni atthu a nikhuli nanyu, elapo anyu, nloko nanyu aahiiso nttaava nanyu? Akhala wira ti siiso, mweererye wataana ni atthu akina. Nave nyuwo pooti waalattula anna ni arokora a mikhalelo soovirikana wira mwalaleerye hoothe. Aahiiso pooti waalattula owannyu wira mulye hoothe wala otthekula. (Miteko 16:14, 15) Nuuvira okathi, murima anyu onoosareya ophenta, nto nthalu nnoolakaseya. Vano, nrowe nthokorerye enamuna ekina nikhanle ahu oosyaka waaphukela atthu ‘nittharaka itthu sinòneya pahi’.

8. Moota xeeni Onamukuttho 19:15, onnikhaliherya awe waathokorerya atthu mwa xariya?

⁸ Hiyo pooti waathokorerya atthu nittharaka makhalelo aya, niire so, othaaciri aahiiso ohaawa waya. Onamukuttho 19:15, onihimya wira: “Mwaphukaka milattu, mphukeke n’ixariya: muhimuthanlé mutthu masikhini, walá muhimoveké mulipa-òwerya [thaaciri]: mphukeke n’ixariya pahi”.

9. Moolumo xeeni ooriipiha murima Salomoni aalempe awe? Nto nniixutta exeeni ni moolumo awe?

⁹ Niireke vanniweryaneya omuthokorerya  mutthu nittharaka othaaciri aahiiso ohaawa wawe? Salomoni aahuupuxeriwa olepa moolumo ooriipiha murima, ani: “Masikhini t’othanyiwa hatá n’amusi awe: thajiri wattana apatthani”. (Miruku 14:20) Exeeni eniixutta ahu ni moolumo ala? Nniixutta wira, naahiivahe ephoole nnimwaapakaka apatthani anna yaale arina muhakhu paahi. Xeeni vari aya vootakhala waathokorerya atthu nittharaka mireerelo saya?

10. Mwaha xeeni Yakobo aaloponle awe maKristau?

¹⁰ Waathokorerya annihu nittharaka makhalelo aya, niire so, othaaciri aahiiso ohaawa waya, onookumiherya okawanyeya mmulokoni. Eyo yaahiiraneya miloko sikina sa eseekulu yoopacerya, nto Yakobo aahaalopola maKristau ale voohimya sa mwaha ole. (Mmusome Yakobo 2:1-4.) Niheemererye mukhalelo owo okawanyaka muloko ahu. Nto ninrowa osyaka sai waathokorerya atthu nittharaka makhalelo aya?

11. Niireke mireerelo sinnimwiiriha mutthu wataana ni Yehova? Mutthokiherye.

¹¹ Nihaana waathokorerya anna ntoko Yehova onaathokorerya awe. Yehova khonimuthokorerya mutthu okhala a faita mwaha woothaaciri aahiiso ohaawa. Wataana wahu ni Yehova khonlipa ni mwaattelo wa musurukhu aahiiso mireerelo sahu. Yesu aahimmye wira “orikarika tthiri athajiri okela Momweneni wa wirimu”, masi  eyo khenitaphulela wira khivaniweryaneya. (Matheyo 19:23) Nave Yesu aahimmye wira: “Moreriwa nyuwo, alipa-òhawa, okhala wira Omwene wa Muluku ti wawinyu”. (Luka 6:20) Masi eyo khiyaataphulela wira atthu otheene oohaawa yaaninwiriyana Yesu wira yaakhele mareeliho a vameekhaaya. Maana yaahikhala anamuhaawi anceene yahaamutthara Yesu. Eyo enooniherya wira, wataana ni Yehova khonlipa ni mireerelo nrina ahu.

12. Exeeni Biibiliya onaalopola awe athaaciri ni oohaawa?

¹² Mmutthenkesoni mwa Yehova aakhala anna ni arokora oothaaciri ni oohaawa. Masi awo annimurumeela Yehova ni murima wotheene. Biibiliya onnaalakiherya athaaciri wira “ehiroromeleké mihakhu seiyo sihinlekela. Nto emuroromeleke Muluku”. (Mmusome 1 Timótheyo 6:17-19.) Nave Biibiliya onnaalopola arumeyi otheene a Yehova, athaaciri ni oohaawa, wira ti vootakhala ophenta musurukhu. (1 Timótheyo 6:9, 10) Vaavo nnaathokorerya ahu annihu nimutakihaka Yehova, khaninrowa waaphukela mwaha wa mireerelo saya. Niireke nihaana omphukela mutthu nittharaka iyaakha sawe? Niireke vannireerela opaka eyo?

13. Biibiliya onihimya exeeni sa waattittimiha atthu oowuuluvala?

¹³ Ikwaha sinceene, Biibiliya onnihimya wira nihaana waattittimiha atthu oowuuluvala. Onamukuttho 19:32, onihimya so: “Nvenyeke oholo wa nakhulu, mmuttittimiheke ni wuluvala wawe: siso munnithonyerya omuttittimiha wanyu Muluku”. Miruku 16:31, ninsoma wira: “Ipwí nthonyeryo nottittimiheya: naxariya onnitthuveliwa n’ikumi yinjene”. Paulo aahimutumererya Timootheyo wira ohaanyemeleke atthu oowuuluvala, masi aathokoreryeke ntoko axitiithi. (1 Timótheyo 5:1, 2) Nnaamwi Timootheyo aarina miritti waavikana axitokweene akina, okathi wotheene aahaana owoonela othunku ni waattittimiha.

14. Okathi xeeni onitthuneya aya ompwapwela mutthu oowuuluvala?

¹⁴ Ankhi akhala wira moolakelela, mutthu oowuuluvala onnipaka etampi aahiiso okhaliherya etthu ehinimusivela Yehova? Yehova khonrowa ohiya omphukela mutthu owo mwaha wa wuuluvala aahiiso nttittimiho orina awe. Nrowe niwehe malakiheryo ari Yesaya 65:20, Biblya Exirima, ani: “[Hata ophiyerihaka] iyakha milokó mulokó [100], onimùlumeliwa” aahiiso opwapweliwa. Nave yowoonihiwa ya Ezekiyeli, ninniphwanya malakiheryo ntoko awo. (Ezekiyeli 9:5-7) Etthu yootepa otthuneya ori omuttittimiha Yehova, Humu Muulupale. (Daniyeli 7:9, 10, 13, 14) Omuttittimiha wahu Yehova onooniiriha ompwapwela ole onitthuneya okhaliheriwa, hata uuluvanle ene.—aGalasia 6:1.

15. Murummwa Paulo onniixuttiha exeeni voohimya sa waattittimiha amiravo?

¹⁵ Ankhi amiravo? Nave awo anniphwanelela ottittimihiwa. Paulo aahimulepela Timootheyo wira: “Ahikhalé onothanyani mwaha w’okhala mmiravo: tivó, mwakhalele aKristu nthonyeryo norera ni molumo anyu ni mwettelo woloka n’uphenta ni wamini ni wisumaliha wanyu”. (1 Timótheyo 4:12) Okathi Paulo aamulepenle awe Timootheyo masu ala, woonasa wene, Timootheyo aarina iyaakha 30. Hata vari  siiso, Paulo aahinvaha Timootheyo miritti sinceene. Exeeni eniixutta ahu? Nniixutta wira, nihaaphukeleke amiravo mwaha wa iyaakha saya. Nkahaya muupuwele itthu Yesu aapanke awe orina ene iyaakha 33!

16, 17. (a) Exeeni axitokweene anthokorerya aya wira amuthanle munna okhala murummwa aahiiso mutokweene? (b) Moonelo xeeni aahiiso soolema sihinivarihana ni Biibiliya?

¹⁶ Ilapo sikina, amiravo khanttittimihiwa. Tivonto, axitokweene akina khanaathanla amiravo wira akhale arummwa oorumeela aahiiso axitokweene, hata arina ene mikhalelo sinivekeliwa mBiibiliyani. Masi Biibiliya, khonihimya iyaakha sinitthuneya wira munna othanliwe okhala murummwa oorumeela aahiiso mutokweene. (1 Timótheyo 3:1-10, 12, 13; Tito 1:5-9) Akhala wira mutokweene onnihela nlamulo mwaha ola ottharaka soolema sa elapo awe, owo khonitthara Nuulumo na Muluku. Axitokweene ahaaphukeleke amiravo attharaka muupuwelo aya aahiiso soolema sa muttetthe aya, masi ahaana otthara Nuulumo na Muluku.​—2 Timótheyo 3:16, 17.

¹⁷ Akhala wira axitokweene khanitthara malamulo a Biibiliya voohimya sa waathanla arummwa oorumeela aahiiso axitokweene, animwaavololiha anna awo aniphwanela othanliwa. Elapo emosa, murummwa oorumeela aanivara miteko sinceene, nto axitokweene yaaneemererya wira ookhalana mikhalelo sinivekeliwa mBiibiliyani wira okhale mutokweene. Masi axitokweene akina oowuuluvala yaahimya wira khaaphwanela okhala mutokweene mwaha woowi aahitepa okhala mmiravo. Mooriipiha murima, munna ole khaathanliwe mwaha wookhala mmiravo. Nave, moonelo owo ohuulaana ilapo sinceene. Ti vootthuneya ororomela miruku sa Biibiliya, ohiya moonelo ahu aahiiso soolema sa mapuro awo. Niira siiso, ninrowa omwiiwelela Yesu ni khaninrowa waaphukela atthu nittharaka itthu sinooneya paahi.

18, 19. Exeeni enrowa onikhaliherya waathokorerya anna nimutakihaka Yehova?

¹⁸ Hata nri ene atthu oohimalela, nnimwiixutta waathokorerya atthu akina nimutakihaka Yehova. (Miteko 10:34, 35) Tivonto, okathi wotheene nihaana othokorerya ele Nuulumo na Muluku ninhimya aya. Vaavo nintthara ahu Nuulumo na Muluku, ninniiwelela yooruma ya Yesu eni: “Muhimuthorihé mutthu muttharaka itthu sinòneya pahi”.​—Yohani 7:24.

¹⁹ Moohipisa, Mwene ahu Yesu Kristu onrowa waaphukela atthu othene. Owo onrowa waaphukela ottharaka malamulo a xariya a Muluku, ohiya ele onoona awe aahiiso wiiwa. (Yesaya 11:3, 4) Tthiri ninnilipelela okathi owo woohakalaliha!