WAATTAMELA eyaakha ya 1960, epooma yaamukhaani ya oGujarat wIndia, aahikhala Namoona a Yehova mmosa aabatiziwe niinaano. Namoona owo aahikhalana mwanawe aitthaniwa John. Masi John, axinnawe athanu axilopwana ni axithiyana, ni amamawe yeettela ekerexa Katoolika ya oRoma, ni yaanikhalela nthiti weettela ekerexa Katoolika. Nto awosa yaanaanyokha apapaya mwaha wookhala a etiini ekina.

Nihiku nimosa apapawe John yaahinvekela John oroiha epaphelo owannyawe munna mmosa a mmulokoni. Masi voosiisu ole, John aahivulala ekatha okathi aahula awe elaata. Wira omwiiwelele paapa awe John aahitthukwa ekatha ele ni aahiroiha epaphelo ele.

Okathi aaphiyale awe, aahinvahererya epaphelo mwaarawe munna ole. Owo aari Namoona a Yehova. Murokora ole aahiweha wira John aahivulala ekatha, nto aahimukhaliherya. Owo aahikumiha ikaruma sawe sa oloola, aahirapiha nikhwatta nle ni aahitthukwa-tho ekatha ele. Nuumala-vo aahinvaha John exa. Okathi owo wotheene murokora ole aanivaanela ni John voohimya sa myaha sa mBiibiliyani.

Mwaha wa oreera murima iwe, John aahipacerya orukunuxa moonelo awe voohimya sa moota aathokorerya awe Anamoona. Nto aahimukoha murokora ole makoho manli voohimya sa sookupali sa Anamoona a Yehova seiyo saavirikana ni sa Ekerexa Katoolika. Nuumala-vo aahikoha akhala wira Yesu Muluku, ni akhala wira maKristau ahaana omukokhorela Maria. Murokora ole aanisuwela olavula nttaava Gujarati ni aahaakhula makoho ale orumeelaka nttaava na John, eGujarati. Owo aahaakhula makoho awo omurumeelaka Biibiliya ni aahinvaha efolyeeto yaarina muru waahimya so: “This Good News of the Kingdom” (Ehapar’ila yorera y’omwene).

Muhoolo mwaya, vaavo John aasommye awe efolyeeto ele aahoona wira aahiphwanya ekeekhai. Owo aahirowa omukoha paatiri makoho ale manli. Paatiri owo ahinanariwa ni aahinvonyerya Biibiliya onanariwe ene, ohimyaka so: “Nyuwo moothatuwa Satana! Haya mukhunule mBiibiliyani opuro olempwale aya wira Yesu khahiyo Muluku. Mukooniherye opuro olempwale aya wira muhimukokhoreleke Maria. Haya mukooniherye!” John aahinyonyiheya mwaha wa etthu aapanke awe paatiri ole. Nuumala-vo aahimuleela Paatiri ole wira okhuma nihiku nenle aamuhiya weettela ekerexa Katoolika. Tthiri khaatthikenle-tho.

John aahipacerya omusoma Biibiliya ni Anamoona a Yehova, aahivarexexa ekeekhai, ni aahipacerya omurumeela Yehova. Nuuvira okathi amusi awe anceene yaahipaka etthu emosaru. Hata sivinre ene iyaakha sowiiraka 60, murala wa ekatha ya John nlelo onnimuupuxerya oreera murima wa muKristau ole, weiwo omwiirinhe aamwiirinhe omurumeelaka Yehova okumi wothene.—2 aKorinto 6:4, 6.