Munrowa Owerya Sai Oxintta Moonelo Woohiloka?

MUNOONELA sai itthu soohiloka sinookhumelelani? Asomi anceene annikupali wira waakhuliwa wa nikoho nno onlipa vanceene akhala wira mookhalana moonelo wooloka wala nnaari. Otheene ahu ninnikhalana mixankiho soovila ovilela, akina aakhalana mixankiho sinceene waavikana atthu akina. Nto xeeni atthu akina anikhumela aya saana okathi wa mixankiho ni aniimananiha aya owanana mixankiho sikina variki atthu akina annikhulumuwa okathi wa mixankiho hata siri ene saamukhaani?

Mwa ntakiheryo, muupuwele wira nyuwo muniphavela muteko. Masi okathi wa intervista, munaleeliwa wira khamuniphwanelela ovara muteko. Mwaarowa woonela sai? Nyuwo pooti wuupuwelaka wira murina muxankiho ni woonaka wira khamunikhala-khala nvaraka muteko muupuwelaka so: ‘Khuuvo aarowa omweemererya mutthu ntoko miyo ovara muteko awe. Nkinkhala-khala kiphwanyaka muteko’. Nave etthu yootepa otakhala, okhala wira onyoonyiheya iwo pooti owiirihani okhalana moonelo woohiloka voohimya sa mikhalelo sikina sa okumi anyu muupuwelaka wira: ‘Khiivo etthu kinwerya aka ovara. Tthiri nkirina efaita’. Mwa inamuna soopiili, mutthu owo orina moonelo woohiloka.

Moota Wooxintta Moonelo Woohiloka

Etthu xeeni mukhanle anyu oopaka? Etthu yoopacerya, muhaana osuwela miyuupuwelelo soohiloka murina anyu. Nuumala-vo, muhaana owanana. Muupuweleke etthu ekina mukhanle anyu oopaka. Mwa ntakiheryo, niireke tthiri khamweemereriwe ovara muteko mwaha woowi khuuvo mutthu onoophavelani? Wala, mwaneene amphavela mutthu onisuwela ovara saana muteko oniphavela awe?

Akhala wira munimuupuwela itthu sotheene, munimoona wira itthu sikina munootepiha. Niireke okhoottiwa ovara etthu onitaphulela wira khamurina efaita wala munnuupuwela itthu sikina sa mookumini mwanyu ntoko, miteko sanyu sa omunepani, amusi ni apatthani anyu inamuna seiyo nyuwo munikhumela anyu saana? Mwiixutte moota wookhootta muupuwelo woowi khiivo etthu muhoolo “enrowa okhumela saana”. Etthu xeeni enookupalihani wira khamunikhala-khala mphwanyaka muteko? Nyuwo pooti opaka itthu sikina wira muxintte moonelo woohiloka.

Moonelo Wooloka Onnikhaliherya Ophwanya Itthu Nimphavela Ahu

Iyaakha vakhaani sivinre, anamatokosa aamananiha otthokiherya oratteene ele entaphulela aya okhalana nlipelelo, nnaamwi ehikhanle yoomalela. Awo ahimmye wira nlipelelo nintaphulela okupali wira munoophwanya itthu muniphavela anyu. Ntoko ninrowa ahu oweha mwaha onittharelana, sookhala itthu sikina sinihela muhina okhalana nlipelelo. Owehexexa itthu iyo sikina sinihela muhina okhalana nlipelelo, pooti onikhaliherya okhalana moonelo wooloka ni ophwanya itthu nimphavela ahu.

Wira nikupali wira nnoowerya ophwanya itthu nimphavela ahu, nihaana wuupuwela itthu naaphavenle ahu nuumala-vo niwerya ophwanya. Moonaka wira eyo khenivarihana ni nyuwo, woonasa wene vaamuloka wuupuwela oratteene itthu muniphavela anyu. Wanipacerya, niireke sookhala itthu muniphavela anyu ophwanya? Vannikhweya omakela ovara etthu emosaru nihisuwelaka etthu yoopaka mookumini mwahu ni etthu yootepa otthuneya. Ti vooloka wuupuwela malakiheryo ala oovareleya muteko voohimya sa osuwela itthu sootepa otthuneya. Tthiri okhuma khalai Biibiliya aahihimya wira: “Musuweleke othanla itthu sootepa oreerela”.​—aFilipi 1:10.

Akhala wira ninnisuwela itthu sootepa otthuneya, vanoonikhweela oweha soolukama sahu mwa inamuna soovirikana, sikhale sa omunepani, mweemusini wala muteko wa mulaponi. Wanipacerya ti vooloka ohiphavela soolukama sinceene. Nave ti vooloka othanla soolukama sookhweya ophwanya. Akhala wira yoolukama eyo ti yoovila ophwanya, hiyo pooti okhulumuwa ni ohiya. Tivonto vari aya vooloka ohela wanikisa soolukama suulupale wala sa okathi munceene ohiya soolukama saamukhaani ni sa okathi vakhaani.

Muhapo mmosa onihimya so: “Akhala wira munniphavela, munoophwanya”. Vanikhala ntoko wira muhapo ola ti wekeekhai. Akhala wira hiyo ninniphavela etthu, nihaana wiimananiha wira niphwanye. Nihaana olipiha wiimananiha wahu nuupuwelaka efaita erina aya ele nimphavela ahu ni mireerelo sinrowa okhumelela naphwanya vale. Ekeekhai wira sinookhumela mixankiho, masi nihuupuweleke wira khaninrowa owerya oxintta.

Nave nihaana wuupuwela itthu ninreerela ahu opaka wira niphwanye itthu nimphavela ahu. Mulipa-oolepa mmosa oniihaniwa C. R. Snyder, yoowo ohireere otokosa efaita nlipelelo nrina aya, ohimmye wira nihaana wuupuwela inamuna soovirikana nikhanle ahu oophwanya ele nimphavela ahu. Nto akhala wira enamuna emosa khenikhumela saana, nihaana weererya enamuna ya nenli nuumala-vo ya neeraru ni weererya inamuna sikina.

Nave Snyder ohimye wira nihaana wiixutta okathi mukina orantteliha etthu emosa naaphavela ahu ni etthu ekina. Akhala wira enamuna emosa ninrumeela ahu wira niphwanye ele nimphavela ahu khenikhumela saana, omakela wuupuwela enamuna yeeyo paahi nnookhulumuwa. Ohiya-vo, oturuka etthu emosa nimphavela ahu ni etthu ekina enoonikhaliherya okhalana nlipelelo.

Biibiliya onnihimya ntakiheryo nimosa, voohimya sa mwaha owo. Mwene Davidi aaniphavela vanceene omutekela Yehova Muluku etemplo. Masi Yehova aahimmye wira Davidi khaarowa otepa, masi mwanawe Davidi iihaniwa Salomoni taarowa oteka. Ohiya oxanka ni okhulumuwa, Davidi aahituruka soolukama sawe. Owo aahiimananiha othukumanya ikaruma saarowa omukhaliherya mwanawe oteka etemplo.​—1 Mamwene 8:17-19; 1 Wahala 29:3-7.

Hata nilipihale ene nlipelelo nahu, nixinttale ene muupuwelo woohiloka, nrine ene muupuwelo wooloka wira niphwanye itthu nimphavela ahu, pooti wira vanninivila okhalana nlipelelo nuupuwela mwa inamuna soovirikana. Moota xeeni? Itthu sinceene sinniiriha ohikhalana nlipelelo sinikumiheriwa ni olumwenku ola okathi mukina khanaalipelela wira saamunikhumelela. Vaavo nnuupuwela ahu mixankiho sinaaphwanya apinaatamu ntoko ohaawa, ikhotto, ohixariya, owereiwa ni okhwa, ninrowa owerya sai okhalana nlipelelo?

[Ilatarato epaaxina 7]

Akhala wira khamuniphwanya muteko mwaaphavela anyu, niireke munuupuwela wira khamunikhala-khala mphwanyaka muteko?

 [Ilatarato epaaxina 8]

Mwene Davidi aanituruka mowaakuveya itthu aaphavela awe