Ontaphulela makhalelo anyu, ni sookupali sanyu. Omutthu anyu onihela muhina mikhalelo sanyu sotheene.

Mwakhalana omutthu wooloka, munoowerya ohimya sookupali sanyu ni khamunweemereya atthu akina oweettihani.

“Atthu anceene anlikana ni apuneka anipwehiwa mmontorani mwa ilooxa. Awo khaniwerya othanla ikuwo aniwara aya, masi anoothanleliwa”.​—Adrian.

“Kihiixutta moota wootthara ekeekhai, hata ikwaha sikina vahikhweyaka. Kinniwerya waasuwela apatthani ekeekhai, vaavo kinoona aka wira awo annittittimiha sookupali saka”.​—Courtney.

ELE BIIBILIYA ONIHIMYA AWE: “Muhitthareké mwettelo w’atthu a vathí, masi murukunuxe mukhalelo anyu, mùlule osuwela wanyu”.​—aRoma 12:2.

Munnuuheryeke mikhalelo sanyu vano ni ele eniphavela anyu okhala muhoolo, musuweleke itthu muniwerya anyu, sootteettheya sanyu ni osuwela wanyu. Makoho anittharelana animookhaliheryani opaka eyo.

Owerya wanyu: Itthu xeeni siniwerya aka ovara? Mikhalelo xeeni sooloka kirina aka? (Mwa ntakiheryo: Ka mutthu oopeherya? ootthokiheya? oovara muteko? oovaha?) Itthu xeeni sooloka sinivara aka?

MIRUKU: Niireke vannoovilani osuwela itthu sooloka sinivara anyu? Mwaakohe anamuyari anyu wala mpatthani onimuroromela anyu wira ooleeleni itthu onoona awe wira munniwerya ovara.

ELE BIIBILIYA ONIHIMYA AWE: “Khula mutthu athokoreryeke mweettelo awe. Òna vale wira onniwerya wittottopa, aittottopeke mekhaweru, nto ahìlikanyiheké n’atthu akina”.​—aGalasia 6:4.

Sootteettheya sanyu: Mikhalelo xeeni sinireerela aka olokiherya? Okathi xeeni kinoona aka wira vannikhweya weehereriwa? Itthu xeeni sinireerela aka okhalana ephoole yuulupale?

ELE BIIBILIYA ONIHIMYA AWE: “Nahimyaka wira: ‘Hiyo khanrina etampi’, nnisòtotha mmansihu”.​—1 Yohani 1:8.

Sookupali sanyu: Kirina mweettelo xeeni, ni nthowa xeeni? Kinnikupali wira Muluku ookhala? Exeeni enikikupaliha wira ookhala tthiri? Mweettelo xeeni onoonaka okhala woohiloka, ni nthowa xeeni? Exeeni enikupali aka sa muhoolo?

ELE BIIBILIYA ONIHIMYA AWE: “Otthokiha onimoholani ephiro y’ekekhai: ankhili animosukani”.​—Miruku 2:11.