Vaavo anamathelana anikhaliheryana aya, anilikana ni pilotu ni namakhaliherya awe aneettiha eviyau emosa. Okathi onikhumelela aya mixankiho, oowanli aya annivara vamosa wira aphuke muxankiho owo.

ELE BIIBILIYA ONIHIMYA AWE: “Siso awo khahiyó-tho atthu anli: ari mutthu mmosá pahi”.​—Matheyo 19:6.

“Ekasamento khahiyo ya mutthu mmosa. Nto anamathelana ahaana okhaliheryana wira alipihe ekasamento aya”.​—Christopher.

Okathi onikhumelela aya muxankiho, anamathelana ahinikhaliheryana animakela okakhelana, ohiya ophavela ophuka. Nto muxankiho mwaamukhaani onnikhala muulupale.

“Ekasamento enlipa ni anamathelana oowanli evaraka muteko hoothe. Okhaliheryana etthu yooloka mukasamentoni. Miyo ni iyaka nahaakhaliheryana, naarowa okhalaka paahi ntoko atthu anikhala ekwarto emosa, ohiya ntoko anamathelana. Naarowa olikanaka ni atthu anikhala hoothe, masi khula mutthu opakaka itthu sawe ni soothanla sawe”.​—Alexandra.

MWIIKOHEKE SO:

• Kiireke kinuupuwela wira musurukhu onaakhela aka ti wawaka mekhaka?

• Kiireke kinnisyaka okhala ni mwaaraka wala iyaka wira kiphumurye?

• Kiireke kinnaasyaka amusi a mwaaraka wala iyaka, nnaamwi mwaaraka wala iyaka osiveliwaka vanceene ni amusi awe?

MUTHOKORERYE MAKOHO ALA NI OLE OTHELANNE ANYU

• Itthu xeeni ninvara ahu oratteene wira nilipihe ekasamento ahu?

• Niireke yookhala enireerela ahu olokiherya?

• Wira ntepeke olipiherya ovara muteko hoothe, exeeni enireerela ahu opaka?

MIRUKU

• Muupuwele ela: Vaakhanle wira munimweetta xooku khula mutthu ori ene mpantta awe, exeeni mwaarowa anyu opaka wira nyuwo ni ole othelanne anyu mukhale ekiipa emosa?

• Ohiya wuupuwelaka wira ‘kinrowa olola sai’? muupuweleke so: ‘Ninrowa olola sai’?

“Ohiya omphavela ti pani otthenke, etthu yootepa otthuneya mukasamentoni okhalana murettele ni wiiraana”.—Ethan.

ELE BIIBILIYA ONIHIMYA AWE: “Khula mutthu ahiphavelé sinimurerela yowo pahi, nto àphaveleleke-tho oreriwa akhw’awe”​—aFilipi 2:3, 4.