1. Xeeni Yehova oniphwanela awe okokhoreliwa?

YEHOVA tori mpattuxa ahu. Nto onniphwanela okokhoreliwa yena paahi mwaha woowi tonivanhe okumi. (Wis. 4:11) Hata nimphentaka ni omuttittimiha Yehova, sookhala itthu sikina sikhanle oonikhoottiherya omphenta ni omukokhorela Yehova paahi ntoko naaphavela ahu. Tthiri owo muxankiho muulupale. Nto nihaana osuwela nthowa naya eyo enikhumelela aya. Mwaha ola, wanipacerya ninrowa othokorerya ele entaphulela aya omukokhorela Yehova paahi.

2. Moovarihana ni Okhuma 34:14, akhala wira ninnimphenta vanceene Yehova, ninrowa opaka exeeni?

² MBiibiliyani, omphenta vanceene Yehova, onnivarihana ni omukokhorela yena paahi. Vaavo nimmukokhorela ahu Yehova paahi khanimmweemererya mutthu wala etthu ekina enihiihaka omurumeela Yehova.​—Mmusome Okhuma 34:14.

3. Xeeni ohimyaka wira nookhalana mathowa ooloka wira nimphenteke Yehova?

³ Hiyo nookhalana mathowa ooloka wira nimphenteke Yehova. Mwaha wa xeeni? Mwaha woowi, omukokhorela wahu onivarihana ni itthu niixuntte ahu voohimya sa yena. Nave ninnisuwela mikhalelo sawe sookuxa murima. Ohiya-vo, hiyo ninnisuwela itthu simmusivela Yehova ni sihimmusivela, nto ninnipaka iye sinimusivela. Ninnisuwela ni ninnikhaliherya yoolakela awe wa apinaatamu. Nave ninnihakalala mwaha wa okhala apatthani awe. (Esal. 25:14) Khula etthu nniixutta ahu voohimya sa mpattuxa ahu, enninikhaliherya okhalana waataana wooloka ni yena.​—Yak. 4:8.

4. (a) Diabo onipaka exeeni wira oniirihe ohiya omukokhorela Yehova paahi? (b) Mwaha ola ninrowa othokorerya exeeni?

⁴ Namalamulela olumwenku ola Satana Diabo, onnirumeela soophavela sa apinaatamu wira aahapuxe. (aÉf. 2:1-3; 1 Yoh. 5:19) Owo oniphavela wira niphenteke itthu sa werutthuni ohiya  omphenta ni omukokhorela Yehova paahi. Mwaha ola, ninrowa othokorerya inamuna piili Diabo onirumeela awe wira onihiihe omukokhorela Yehova paahi. Enamuna emosa onirumeela awe, eri oniiriha ophenta musurukhu. Vano enamuna ya nenli onirumeela awe, ori oniiriha othanla matthekulelo oohiloka.

5. Xeeni vanreerela aya wiivaha ephoole wira nisyake ophenta musurukhu?

⁵ Otheene ahu ninniphavela yoolya, ikuwo sooloka ni opuro wookhala. Masi hata vari siiso, nihaana osyaka ophenta musurukhu. Olelo-va, olumwenku ola wa Satana atthu anceene anniphenta musurukhu ni itthu musurukhu onthuma aya. (2 Tim. 3:2) Yesu aanisuwela wira atthareli awe yaarowa weehereriwaka ni ophenta musurukhu. Tivonto Yesu aahimmye awe wira: “Khavo onwerya warumela mamwene manli: mana onomunyokha mmosá, amphenteke mukina pahi; walá onomurumela mmosá, mukina amuthanyeke. Khamunwerya omurumela Muluku vamosá ni muhakhu”. (Math. 6:24) Mutthu onimukokhorela Yehova okathi omosaru oniimananiha ophavela othaaciri, owo onaarumeela mamwene manli. Nto mutthu siiso khonwerya omurumeela Yehova paahi.

6. Miruku Yesu aavanhe awe muloko wa oLawodiseya, sinniixuttiha exeeni?

⁶ Wanikisa wa eseekulu yoopacerya, anna akina a muloko wa epooma ya oLawodiseya yaaniikukumiha ahimyaka wira: “Hiyo n’àthajiri, nokhalana mihakhu sinjene, khivo etthu ennithowa”. Masi Yehova ni Yesu yaanoona wira yaari atthu “òtakhaliwa ni òthaleliwa: nyuwo mw’àmasikhini, mw’àlipa-òhòna ni khanwanre etthu”. Yesu khaavanhe miruku mwaha woowi yaari athaaciri, masi aavanhe mwaha woowi ophenta waya musurukhu waanihonona waataana waya ni Yehova. (Wis. 3:14-17) Akhala wira noopacerya ophenta musurukhu, nihaana waakuvela okumiha muupuwelo owo vamurimani  vahu. (1 Tim. 6:7, 8) Naahipake eyo, murima ahu onrowa okhala wookawanyeya ni Yehova khonrowa weemererya okokhorela wahu. Maana Yehova, “Muluku ohininvilela muluku mukina”. (Otum. 4:24) Nto vaniweryaneya sai mutthu opacerya ophenta vanceene musurukhu mookumini mwawe?

7-9. Ntakiheryo na mutokweene oniihaniwa David, niwiixuttinheni exeeni?

⁷ Nkahaya nwehe ntakiheryo na David, mutokweene oowiimananiha onikhala wEstados Unidos. Owo onihimya wira aari namuteko oovara saana ni oowiimananiha. Empresa aavara awe muteko, yaahinvaha muteko wootepexa oloka ni aaniliviwa musurukhu munceene. Nto atthu a elapo awe yaanimoona okhala namuteko ootepexa oloka a elapo ele. David onihimya so: “Okathi ole kuupuwela wira itthu iye sotheene sooniherya wira Yehova aanikireeliha”. Masi niireke tthiri yaari mareeliho a Yehova?

⁸ Nuuvira okathi, vakhaani-vakhaani David aahoona wira muteko awe waanihonona waataana wawe ni Yehova. David onivikaniha ohimyaka wira: “Okathi wa mithukumano sa mmulokoni ni okathi woolaleerya kaamakela wuupuwela paahi mixankiho sa omutekoni waka. Ekeekhai wira kaanaakhela musurukhu munceene, masi khula okathi kaanixanka ni ekasamento aka yaahikhalana mixankiho sinceene”.

⁹ David aahoona wira aahaana ovarerya itthu aahela awe nipuro noopacerya mookumini mwawe. Owo onihimya so: “Kaahilakela opaka marukunuxo”. Vano David aaphavela oturuka eprograma ya muteko awe ni aahaaleela mapatarau awe etthu aaphavela awe opaka. Nuumala opaka eyo, exeeni yaakhumelenle? David aahoomoliwa omutekoni wawe! Masi David oonenle sai? Owo onihimya so: “Nihiku naattharelana nuumala woomoliwa omutekoni, kaahivekela  okhala pioneero ookhaliherya a okathi wotheene”. Wira ophwanyeke yoolya, David ni mwaarawe yaahipacerya ovara muteko wookwesa. Nuuvira okathi aahikhala pioneero ookilaatheya vamosa ni mwaarawe. Anamathelana ale aathanla ovara muteko onithanyiwa ni anamunceene, masi muteko yaavara aya khalai khiyoona okhala wootepa otthuneya. Nnaamwi musurukhu anaakhela aya ori ene vakhaani nalikanyiha ni muteko yaavara aya khalai, khula mweeri annikhalana musurukhu oniphiyerya othuma mireerelo aniphavela aya. Tthiri vannooneya wira aniphavela omuhela Yehova nipuro noopacerya. Nave aahoona wira Yehova onnaakhapelela atthu otheene anihela nipuro noopacerya soophavela sa Omwene.​—Math. 6:31-33.

10. Ninrowa okhapelela sai murima ahu?

¹⁰ Hata nri ene athaaciri wala alipa oohaawa, nihaana wiivaha ephoole ni okhapelela murima ahu. Mwaha wa xeeni? Mwaha woowi naahiire siiso, nnoopacerya ophenta mihakhu. Nave muhikhala-khale mweemereryaka muteko anyu wa mulaponi okhalaka wootepa otthuneya ovikana omurumeela Yehova. Munrowa osuwela sai akhala wira eyo enniwiiraneelani? Nyuwo muhaana wiikoha so: ‘Kiireke okathi wa mithukumano sa mmulokoni ni muteko woolaleerya kimmakela wuupuwela muteko aka paahi? Kiireke kinnixanka akhala wira kinookhalana musurukhu munceene muhoolo wala kuuluvala? Kiireke musurukhu ni mihakhu sinnikikumiherya mixankiho miyo ni amwaaraka? Kiireke kanwerya ovara muteko ohinooneliwa vatthu wira kikhalane okathi munceene woomurumeela Yehova?’ (1 Tim. 6:9-12) Okathi munithokorerya anyu ni ovarerya makoho awo, muupuweleke wira Yehova onniniphenta vanceene. Nave onnaaleiherya ale aniimananiha omurumeela moomalela oriki: “Miyo nkinonyanyalani-tho: kinimojalani mahiku othene”. Eyo ti etthu yaamwiirinhe murummwa Paulo olepa wira: “Murim’anyu ohettihiweké ni” ophenta musurukhu.​—aHéb. 13:5, 6.

11. Itthu xeeni sinikhumelela mwaha wa matthekulelo atthu anceene anithanla aya?

¹¹ Yehova oniphavela wira nihakalaleke, nto otthekula onninikhaliherya okhala atthu oohakalala. Tthiri, Biibiliya onihimya wira “etthu yorera emuhalenle mutthu, olya n’uwurya n’upuha ni sorera siphwanyalyawe”. (Mus. 2:24) Masi matthekulelo manceene anikumiheriwa olumwenku ola, pooti onikumiherya mixankiho sinceene. Maana matthekulelo awo anniwiiriha atthu okhalana mweettelo woohiloka aahiiso  ophenta itthu seiye sinikhoottihiwa ni Nuulumo na Muluku.

12. Moovarihana ni 1 aKorinto 10:21, 22, xeeni vari aya vooloka othanla mwa miruku matthekulelo ahu?

¹² Okhala wira nimphavela omukokhorela Yehova paahi, nihaana osyaka “olya vamesa v’Apwiya ni vamesa va Satana”. (Mmusome 1 aKorinto 10:21, 22.) Olya vamosa ni mutthu mukina, onooniherya wira atthu awo apatthani. Akhala wira ninnithanla matthekulelo anitumererya otakhala murima, onammunepani, orupihana woohiloka ni anitumererya moonelo ni muupuwelo wa werutthuni, hiyo nnooniherya wira ninlya yoolya elokiheriwe ni awanani a Muluku. Akhala wira nnoopaka eyo, nnimwiikumiherya mixankiho ni nnoohonona waataana wahu ni Yehova.

13-14. Ntoko onihimya awe Yakobo 1:14, 15, xeeni vari aya vooloka othanla mwa miruku matthekulelo ahu? Nvahe ntakiheryo.

¹³ Nkahaya nwehe etthu enooniherya wira matthekulelo anoolikana ni yoolya. Vaavo ninlya ahu, ninnithanla etthu ninhela ahu mwaano mwahu. Maana ninnisuwela wira yoolya eyo enookhaliherya vanceene erutthu ahu. Nave noosuwela wira yoolya yooloka pooti okhaliherya erutthu ahu, masi yoolya yoohiloka pooti onikumiherya iretta. Ekeekhai wira eyo khenrowa wiiraneya niinaano-ru, masi nuuvira okathi eyo enimooneya.

¹⁴ Mwa enamuna emosaru, vaavo ninthanla ahu matthekulelo ahu, ninnithanla ele ninhela ahu mmuupuweloni mwahu. Masi nuuvira okathi, muupuwelo ni moonelo ahu onimooniherya enamuna ya matthekulelo ninthanla ahu. Musuweleke wira matthekulelo ooloka pooti onihakalaliha, masi matthekulelo oohiloka anoonikumiherya maxakha. (Mmusome Yakobo 1:14, 15.) Ekeekhai wira sookhumelela sa matthekulelo oohiloka khasinooneya niinaano-ru, masi muhoolo mwaya sinimooneya. Tivonto Biibiliya onnilopola awe oriki: “Muhisotothé: Muluku khanthwelihiwa. Vekekhai, eyo mutthu enàlawe, yeyo t’inhephawe. Àlá vale sinsiveliha makhalelo awe òtakhala, onohepha sa makhalelo yawo: eyo p’iyo, okhwá”. (aGal. 6:7, 8) Tthiri ti vooloka osyaka matthekulelo anitumererya itthu Yehova oninyokha awe!​—Esal. 97:10.

15. Eprograma xeeni Yehova onivanhe awe ni enookhaliheryani sai?

¹⁵ Anamoona a Yehova anceene onnaasivela oweha eprograma ya JW Broadcasting^® ekanaali ahu ya TV munternetini. Murokora oniihaniwa Marilyn ohimmye so: “TV JW ookikhaliherya okhala mutthu oohakalala, nto kinniweha iviidiyu sotheene sinikumiheriwa mwaha woowi sinnikikhaliherya vanceene. Vaavo kinkhulumuwa aka, kinniphavelasa mwaha woolipiha wa Omukokhorela Muluku Voosiisu wira kiwehe. Opaka eyo ennikikhaliherya omwaattamela Yehova ni mutthenkeso awe. Tthiri TV JW ookikhaliherya vanceene oturuka okumi aka”. Niireke nyuwo munnittottela mureerelo yoovaha eyo ya Yehova? Musuweleke wira khula mweeri enniheliwa eprograma esya va TV JW, isipo ni iviidiyu, isipo soolipiha mukhanle anyu ooweha wala owiriyana.

16-17. Xeeni vari aya vooloka ophima okathi ninviriha ahu nitthekulaka, ni ninrowa owerya sai opaka eyo?

¹⁶ Nihaana ovaha ephoole ohiya paahi enamuna ya matthekulelo ninthanla ahu masi-tho, okathi ninviriha ahu nitthekulaka. Akhala wira khanniivaha ephoole, nnoovirihaka okathi munceene ntthekulaka ohiya oviriha okathi owo nimurumeelaka Yehova. Anna ni arokora anceene onnaavila ophima okathi anviriha aya atthekulaka. Murokora oniihaniwa Abigail orina iyaakha 18, onihimya so: “Onweha TV onnikikhaliherya ophumurya nuumala oviriha nihiku notheene kivaraka muteko. Masi hata vari siiso, nkinwerya ophima okathi kinviriha aka kinwehaka TV”. Munna oniihaniwa Samuel  orina iyaakha 21 onihimya so: “Kihoona wira kinniviriha okathi munceene kiwehaka iviidiyu saamukhaani munternetini. Kimpacerya oweha eviidiyu emosa, nuumala-vo kinniweha sikina moohisuwela kinniviriha iwoora 3 wala 4 kiwehaka iviidiyu iyo”.

¹⁷ Munrowa owerya sai ophima okathi munviriha anyu mutthekulaka? Etthu yoopacerya mukhanle anyu oopaka tiila: Muhaana oweha okathi munviriha anyu mutthekulaka. Malakiheryo anittharelana animookhaliheryani oweha moota woopaka eyo. Muhaana olepa okathi muniviriha anyu munwehaka TV, nwehaka itthu munternetini ni nweettaka axooku muselulaarini mwanyu. Moona wira munniviriha okathi munceene, mwiimananihe opaka eprograma ekina. Nuumala-vo, wanipacerya mumpakeke palano oovara itthu sootepa otthuneya, wahala okathi mutthekuleke. Moottharelana, munvekeleke Yehova wira ookhaliheryeni ovara itthu siri vaprogramani vanyu. Mwiira siiso, nyuwo munookhalana okathi woopaka yoosoma anyu ya Biibiliya, omulompa Muluku vatthokoni, olokiherya mithukumano sa mmulokoni ni omurumeela Yehova mwaalaleeryaka ni owiixuttiha atthu ekeekhai. Ohiya-vo, munoosiveliwaka otthekula mwaha woowi munnimuhela Yehova nipuro noopacerya.

18-19. Ninrowa wooniherya sai wira nimmukokhorela Yehova paahi?

¹⁸ Nuumala ohimya omala wa olumwenku wa Satana ni orwa wa elapo esya, murummwa Pedru aalempe so: “Apatthani aka òphentiwa, nalittaka sisa itthu iya, mphaveleke wira Muluku òphwanyeni ni murima worera ni wohittheka ni wa murettele”. (2 Ped. 3:14) Vaavo nniimananiha ahu otthara miruku sa murummwa Pedru ni omukokhorela Yehova mwa enamuna oniphavela awe, ninnooniherya wira nimmukokhorela Yehova paahi.

¹⁹ Satana ni olumwenku awe onoovikaniha weererya oniiriha opweha nipuro noopacerya itthu soohiloka mookumini mwahu ohiya omurumeela Yehova. (Luka 4:13) Hata nikumanaka mixankiho, nihikhala-khale nimweemereryaka mutthu wala etthu eniirihaka omuhiya omurumeela Yehova ni murima wotheene. Tthiri noolakela onvaha Yehova ele oniphwanela awe waakhela, eyo piiyo, omukokhorela Yehova paahi!