ORUMEELAKA ekaruma eniihaniwa tela de radar, meteorologista onniweha elatarato enooniherya etthu enrowa okhumelela. Eyo ennooniherya wira onookhumelela munamukhaya muulupale onrowa ovira muttetthe ahireere atthu. Okhala wira onnixanka mwaha wa ikumi sa atthu awo, owo onniimananiha waalopola vahinatthi.

Ntoko meteorologista ole, olelo-va Yehova onnaalopola atthu voohimya sa “ehasara” enrowa okhumelela, eyo ti yootepexa otakhala ovikana ihasara sinilavuliwa ni mameteorologista. Yehova onaalopola sai atthu? Ninsuwela sai wira onnaavaha atthu okathi wooreerela wira yiiwelele nlopolo nawe? Wira naakhule makoho awo, wanipacerya nihaana othokorerya malopolo Yehova aavanhe awe khalai.

Khalai, Yehova aahaalopola atthu voohimya sa ‘ihasara’ wala waaphukela atthu ale moolakelela yaarowa ohiiwelela malamulo awe. (Mir. 10:25; Yer. 30:23) Masi okathi wotheene Yehova aanaalopola vahinatthi wira akhalane okathi wooreerela opaka marukunuxo ni wooniherya wira yaari atthu oowiiwelela. (2 Mam. 17:12-15; Neh. 9:29, 30) Wira aakhaliherye opaka marukunuxo, Yehova aanaaruma arumeyi awe oororomeleya a valaponi wira ahimye ophukela wawe. Eyo yaanaakhaliherya atthu ale woona wira yaahaana opaka marukunuxo moowaakuveya.​—Am. 3:7.

Nowe, ntakiheryo na atthu Yehova aarumme awe wira ahimye ophukela wawe. Mwa iyaakha sinceene, moolipa murima Nowe aahaalopola atthu ale ootakhala wira yaamukhumelela Epula ya Mutaaseke. (Maph. 6:9-13, 17) Nave Nowe aahaaleela etthu yaareerela aya opaka wira yoopowe. Okhala wira aanaalaleerya, muhoolo mwaya Nowe aahisuweliwa okhala mutthu “alaleya exariya”.​—2 Ped. 2:5.

Hata Nowe aimananinhe vanceene, atthu ale yaakhala ohinatthi Mutaaseke khiyaiwelenle nlopolo na Muluku. Tthiri yaahooniherya wira khiyaarina waamini. Eyo yaahiwiiriha ohipaka etthu “mpakha ophiya epula ya mutáseke, khuwivakasa atthu othene”. (Math. 24:39; aHéb. 11:7) Atthu ale khiyaakhanle oohimya wira Muluku khaaloponle vahinatthi.

Okathi mukina, Yehova aahaalopola atthu ohalaka okathi vakhaani wira ekhumelele “ehasara” aahiiso waaphukela atthu. Hata vaari siiso, Yehova aanaavaha okathi ale aarowa awe waaphukela wira attharuwe mweettelo aya. Tthiri okathi aakumihenrye awe Ihukhumu Muloko wExiitu Yehova aahaalopola vahinatthi. Mwa ntakiheryo, Yehova aahimuruma Moise ni Aroni orowa omulopola Farawo ni arumeyi awe wira Ehukhumu 7 yaarowa okhumelela nihiku naattharelana, yaarowa okhala epula ya maralala ni yaamuhonona itthu sinceene. Nto niireke nihiku nimosa paahi namphiyerya wira aphwanye opuro wootthyawela? Biibiliya onihimya so: “Arumeyi yale a mwené yonve molumo Àpwiya, yaharuma atthu aya wira ehokolowele owani n’inama saya. Vano ale yahonenle vatthu molumo Àpwiya, yahahiyasa mmathalani atthu aya n’inama saya”. (Okhum. 9:18-21) Vannooneya wira Yehova aahaavaha okathi arumeyi a Farawo wira yiilokiherye. Nto ale yiiwelenle nlopolo khiyaahaawale vanceene ntoko ale yahiiwelenle.

Nave Farawo ni arumeyi awe yaahilopoliwa ehinatthi Ehukhumu ya namuloko (10). Masi okhala wira yaari alolo, awo khiyiiwelenle. (Okhum. 4:22, 23) Nto mwaha waivaavo, yaahikhwa anaaya aaxilopwana oopacerya oyariwa. Eyo yaari etthu yooriipiha murima! (Okhum. 11:4-10; 12:29) Niireke yaahikhalana okathi wira aturuke mweettelo aya? Aayo! Moohipisa Moise aahaalopola aIsarayeli wira yaamukhumelela ehukhumu ya namuloko ni  aahaaleela etthu yaakhanle aya oopaka wira yoopowe awo ni imusi saya. (Okhum. 12:21-28) Atthu akavi yaiwelenle nlopolo nle? Moovarihana ni Biibiliya, atthu yaavikana imilyau 3 waahela muhina ale yahaakhanle aIsarayeli yaahiiwelela nlopolo. Otheene awo yaahikhuma wExiitu, nto khiyaakhumelenle ehasara ele.​—Okhum. 12:38.

Matakiheryo ala annooniherya wira okathi wotheene Yehova onnaalopola atthu ni onnaavaha okathi wira yiiwelele nlopolo nawe. (Otum. 32:4) Exeeni enimwiiriha Muluku opaka eyo? Murummwa Pedru ohimmye wira Yehova “khantthuna wira mutthu apweteye, nnákhala mmosá. Ontthunexawe wira atthu othene erukunuxe murima”. (2 Ped. 3:9) Tthiri Muluku onnaathokorerya atthu. Owo oniphavela wira atthu attharuwe mweettelo aya ohinatthi ophiya okathi onrowa awe waaphukela.​—Yes. 48:17, 18; aRom. 2:4.

Olelo-va, atthu ahaana wiiwelela nlopolo ninlaleiwa olumwenku wotheene. Okathi aari awe valaponi, Yesu aahaalopola atthu wira olumwenku ola ninkhala ahu anookhumelela “maxakha malupale” anrowa ohonona itthu sinceene. (Math. 24:21) Owo aahihimya iprofesia sooniherya oratteene itthu saarowa okhumelela ohalaka okathi vakhaani ophiya maxakha maalupale. Itthu sinceene sa eprofesia Yesu aahimmye awe sinniiraneya olelo-va olumwenku wotheene.​—Math. 24:3-12; Luka 21:10-13.

Moovarihana ni eprofesia awe, Yehova onnaalopola atthu wira yiiweleleke. Owo oniphavela wira atthu otheene oowiiwelela akhalane okumi wooloka niinaano-va ni muhoolo anrowa okhalana mareeliho manceene elapo esya ya xariya. (2 Ped. 3:13) Yehova oniphavela waakhaliherya atthu waamini sooleiherya sawe. Tivonto, onnaakhaliherya aavahaka “ehapar’ila yorera y’Omwene”. Yesu aahimmye wira ihapari sooreera saamoopola ikumi sa atthu anceene ni saarowa olaleiwa “mulaponi mothene, wira maloko othene esuwele”. (Math. 24:14) Yehova onnaalakiherya arumeyi awe oororomeleya olaleya ihapari sooreera ilapo 240. Tthiri Yehova oniphavela wira atthu anceene yiiwelele nlopolo nawe wira yoopowe okathi wa “ehasara” ya ophukela wa Muluku onaattamela.​—Sof. 1:14, 15; 2:2, 3.

Etthu yootepa otthuneya, osuwela wira khahiyo paahi wira Yehova onaavaha okathi atthu wira yiiwelele nlopolo nawe. Ntoko niwenhe ahu, okathi wotheene Yehova onnaalopola atthu. Masi hata vari siiso, etthu yooreera wiikoha tiila: Niireke atthu animwiiwelela nlopolo na Muluku okathi wooreerela? Yehova oonivaha eparakha yoolaleya muhupi awe. Nto nvikanihe waakhaliherya atthu wira yoopowe okathi olumwenku ola wootakhala onrowa aya opwetexiwa.