1, 2. (a) Moota xeeni Nabothi ni anaawe yaathokoreriwa aya moohixariya? (b) Mikhalelo xeeni miili ninrowa ahu othokorerya mwaha ola?

ATTHU anli ootakhala murima annimootherya mulopwana wira oopaka ekrime. Masi atthu ale anoomotherya paahi. Nto mwaha wa wootheriwa mulopwana ole, oovahiwa mulattu ni onrowa wiiviwa. Nkahaya muupuwele moonelo wa atthu ale yaaphenta exariya okathi yanweha aya mulopwana ole ni anaawe arowaka ovonyakasiwa maluku mpakha okhwa! Ela khahiyo ehantisi. Maana etthu yaamwiiranenle Nabothi, murumeyi oororomeleya a Yehova, yoowo aakhanle, okathi Mwene Akhabi aalamulela awe wIsarayeli.​—1 Mamwene 21:11-13; 2 Mamwene 9:26.

² Mwaha ola, ninrowa othokorerya ele yaamwiiranenle Nabothi. Nave-tho, ninrowa othokorerya yoovonya yuulupale aapanke awe mutokweene oororomeleya a muloko wa eseekulu yoopacerya. Matakiheryo ala manli, anrowa onooniherya moota wiiyeviha ni olevelela, ori aya wootthuneya  akhala wira ninniphavela otakiha exariya ya Yehova.

3, 4. Nabothi aari mutthu a mukhalelo xeeni, ni exeeni yaamwiirinhe okhootta omutumiherya ematta awe Mwene Akhabi?

³ Nabothi aari mulopwana aamuroromela Yehova, okathi yoole aIsarayeli anceene yaatthara aya ntakiheryo noohiloka na Mwene Akhabi ni mwaarawe, yoowo aari Pwiyamwene ootakhala, Yezabeli. Atthu awo yaamukokhorela Bayali, muluku eethiru, ni khiyaamuttittimiha Yehova ni malamulo awe. Masi Nabothi aanivaha efaita wataana wawe ni Yehova ovikana okumi awe.

⁴ Mmusome 1 Mamwene 21:1-3. Okathi Akhabi aaphavela awe othuma ematta ya evidera ya Nabothi ohimyaka wira aamunvaha ematta ekina yooreera, Nabothi aahikhootta. Nthowa xeeni? Mwa nttittimiho, aatthokihenrye so: “Mwaha w’Apwiya, nkinwerya wotumiheryani ematta ehiyeriwaka n’axitithi aka: ikano s’Apwiya ti sinkikhottiherya”. Nabothi aahikhootta yooveka ya Mwene Akhabi, okhala wira nlamulo na Yehova khinaaweemererya aIsarayeli otumiha mathala yaahiyeriwe aya wa mahiku otheene. (Onamukuttho 25:23; Mothakoni 36:7) Mwekeekhai, Nabothi aahimwiiwelela Yehova.

5. Exeeni Yezabeli aapanke awe wira okuxe ematta ya Nabothi?

⁵ Okathi Nabothi aakhoottale awe omutumiherya ematta Mwene Akhabi, nto mwaarawe Akhabi aahipaka itthu sootakhala. Wira okuxe ematta ya evidera, Pwiyamwene Yesabeli aahaavekela alopwana anli, wira yamootherye Nabothi wira oopaka ekrime. Mwaha wa Nabothi okhootta otumiha ematta awe, owo ni anaawe yaahiiviwa. Exeeni Yehova aapanke awe mwaha wa yowiiraneya ela yootakhala?

6, 7. Yehova oonihenrye sai wira onniphenta exariya, ni nthowa xeeni yowiiraneya ele yaamaalinhe aya amusi ni apatthani a Nabothi?

⁶ Moohipisa, Yehova aahimuruma Eliya orowa ompwapwela Akhabi. Eliya aahimuleela Akhabi wira aari nawiive ni natarawu. Exeeni Yehova aapanke awe? Yehova aahilamula wira Akhabi, amwaarawe ni anaawe, yaarowa wiiviwa, ntoko iiviwe awe Nabothi ni anaawe.​—1 Mamwene 21:17-25.

⁷ Amusi ni apatthani a Nabothi yaahiriipiwa murima mwaha wa itthu sootakhala saapakiwe ni Akhabi. Masi Yehova aahoona ele Akhabi aapanke awe, nto moohipisa aahiphuka mwaha ole. Eyo yahaamaaliha amusi ni apatthani a Nabothi. Masi, woonasa wene etthu yiiraneyale moottharelana yaheehererya wiiyeviha ni omuroromela waya Yehova.

8. Akhabi aapanke exeeni nuumala wiiwa muhupi wa Yehova, ni exeeni yaamwiiranenle?

⁸ Okathi Akhabi iiwale awe wira Yehova aahilamula wira iiviwe, “Akhabi ahikherasa  ikuwo sawe voripiwa murima, ahiwara mattapwatta, khutthuka; ahirupa aìkhunenlene ni mattapwatta, anetta ùramihaka muru”. Akhabi aahiiyeviha! Exeeni yaamwiiranenle? Yehova aahimuleela Eliya wira: “Tivó miyo nkinrowa omuruhela ehasara onari mukumi. Kinoruhela sotakhala etthoko awe okathi w’omweme wa mwan’awe”. (1 Mamwene 21:27-29; 2 Mamwene 10:10, 11, 17) Yehova yoowo ‘onitokosa murima wa mutthu’, aahoona ele yaari vamurimani wa Akhabi ni ommorela ikharari.​—Miruku 24:12.

9. Moota xeeni wiiyeviha waakhalihenrye aya amusi ni apatthani a Nabothi okhapelela waamini waya?

⁹ Okathi amusi ni apatthani a Nabothi yaiwale aya wira Akhabi ni emusi awe khiyaarowa ohukhummwa mpakha Akhabi okhwa, eyo yaheehererya omwaamini waya Muluku. Masi wiiyeviha waahaakhaliherya okhapelela waamini waya. Nthowa xeeni? Nthowa noowi, wiiyeviha waamwaakhaliherya ovikaniha omukokhorela Yehova akupaliki wira Muluku khonikhala-khala opakaka itthu moohixariya.  (Mmusome Otumererya 32:3, 4.) Muhoolo, Nabothi, anaawe ni amusi awe anrowa oweha exariya yoomalela vaavo Yehova onrowa awe waahihimuxa anaxariya. (Yobi 14:14, 15; Yohani 5:28, 29) Mutthu oowiiyeviha onnisuwela wira “Muluku onolamula miteko sahu sothene, hatá iye sivanryahu mwitiho, miteko sorera ni miteko sotakhala”. (Musuweli 12:14) Yehova onnithokorerya itthu hiyo nihinsuwela ahu. Tivonto, wiiyeviha onninikhaliherya wira nihihiye omwaamini Yehova.

10, 11. (a) Mikhalelo xeeni siniwerya weehererya moota onoonela ahu exariya? (b) Mwa enamuna xeeni wiiyeviha onrowa aya onikhapelela?

¹⁰ Munrowa opaka exeeni akhala wira axitokweene aapaka yoothanla ehiniiwexexa anyu aahiiso muhineemererya anyu? Mwa ntakiheryo, munrowa opaka exeeni akhala wira nyuwo aahiiso mutthu onimphenta anyu oohiihiwa miritti sawe mmuteko wa Yehova? Ankhi akhala wira ole othelanne anyu, mwaninyu mwaamulopwana wala mwaamuthiyana aahiiso mpatthani anyu, onnikumihiwa mmulokoni, nto nyuwo khihineemererya yoothanla ya axitokweene? Munrowa opaka exeeni akhala wira munnikupali wira axitokweene aavonya mwaha wommorela ikharari mutthu opanke etampi? Mikhalelo iya pooti weehererya omwaamini wahu Yehova ni moota otthokinhe awe muloko awe olelo-va. Moota xeeni wiiyeviha onrowa aya wookhapelelani akhala wira myaha iya sinneehererya waamini wanyu? Nrowe nthokorerye inamuna piili.

¹¹ Enamuna yoopacerya. Akhala wira ninniiyeviha, ninrowa weemereryaka wira khaninsuwela itthu sotheene sa mwaha owo. Hata nuupuwelaka wira ninnisuwela itthu sotheene sa mwaha owo, Yehova paahi tonisuwela ele eri vamurimani va mutthu. (1 Samuweli 16:7) Wuupuwelela eyo, onoonikhaliherya mowiiyeviha weemererya wira khaninsuwela itthu sotheene ni nihaana olokiherya muupuwelo ahu. Enamuna ya nenli. Akhala wira ninnithokoreriwa moohixariya, wiiyeviha onoonikhaliherya wiiwelela ni opixa murima nlipelelaka wira Yehova onoolokiherya mwaha owo. Biibiliya onihimya so: “Ale animuttittimiha Muluku anoreriwa mwaha w’omova Muluku”. Nave onihimya wira “Alipa-òtakhala khanreriwa. Ekumi y’atakhali enovira ntoko eruku”. (Musuweli 8:12, 13) Nakhala oowiiyeviha, ninrowa waakhela mareeliho ni atthu otheene oowiiyeviha.​—Mmusome 1 Pedru 5:5.

12. Yowiiraneya xeeni ninrowa ahu othokorerya vano, ni nthowa xeeni?

¹² MaKristau a eseekulu yoopacerya a wAntiyokiya oSiria, yaahikumana mwaha weeherenrye wiiyeviha ni olevelela waya. Nrowe nthokorerye yowiiraneya eyo, wira noone moota nnoonela ahu waalevelela akina. Eyo enoonikhaliherya woona moota Yehova onaarumeela awe atthu oohimalela ohihononaka malamulo awe.

13, 14. Muritti xeeni murummwa Pedru aarina awe, nto moota xeeni Pedru oonihenrye awe olipa murima?

 ¹³ Murummwa Pedru aari mutokweene aasuweliwa vanceene ni maKristau a eseekulu yoopacerya. Owo aari mpatthani a Yesu, ni aahivahiwa miritti suulupale. (Matheyo 16:19) Mwa ntakiheryo, mwaakha wa 36, Pedru aahirummwa orowa omulaleerya Kornelio ni ale a vatthokoni vawe. Xeeni yaari aya etthu ya vameekhaaya? Mwaha woowi Kornelio khahiyo aari muYuda, masi aari mMalapo oohinnuwihiwa. Vaavo Kornelio ni ale a vatthokoni vawe, yaakhenle aya munepa wootteela, Pedru aahoona wira atthu ale yaahaana obatiziwa wira akhale maKristau. Pedru aahimmye so: “Ninwerya sai wakhottiherya obatiziwa ni màsi atthu ala yaakhenle eroho yowarya [“munepa wootteela”, Tradução do Novo Mundo] ntoko hiyo nakhenlyahu?”​—Miteko 10:47.

¹⁴ Mwaakha wa 49, arummwa ni axitokweene a oYerusalemu, yaahithukumana wira yoone akhala wira maKristau yahaakhanle aYuda yaahaana wunnuwihiwa. Muthukumano ole, moolipa murima, Pedru aahiwuupuxerya anna ale wira aahaaweha Amalapo oohinnuwihiwa yaakhelaka munepa wootteela. Yowiiraneya aalavunle Pedru, yaahikhaliherya nikhuuru noolamulela opaka yoothanla. (Miteko 15:6-11, 13, 14, 28, 29) MaKristau aYuda ni ale yahaakhanle aYuda, yaahimuxukhuru Pedru maana moolipa murima aahilavula itthu sotheene siiraneyale. Tthiri eyo yaahiwiiriha maKristau ale a eseekulu yoopacerya, omuroromela ni omwaamini munna ole oolipa momunepani!—aHéberi 13:7.

15. Yoovonya xeeni Pedru aapanke awe okathi aari awe wAntiyokiya oSiria? (Nwehe elatarato yoopacerya.)

¹⁵ Moohipisa, nuumala muthukumano oYerusalemu, Pedru aahaaxukurya maKristau a wAntiyokiya oSiria. Ori ene elapo ele, aahiviriha okathi munceene okhalaka ni annawe yahaakhanle aYuda. Mwekeekhai, awo yaanisiveliwa wiixuttihiwa ni Pedru ni owiriyana sookumanana sawe. Masi moohipisa awo yaahitikinihiwa ni oriipiwa murima vaavo Pedru aahiyale awe olya hoothe. Pedru aahimwiiriha Baarnaba ni maKristau akina aYuda opaka etthu emosaru. Xeeni mutokweene oolipa momunepani ohalaka opaka yoovonya ele yuulupale, yaarowa okawanya muloko? Etthu xeeni yuulupale eniixutta ahu ni yoovonya ya Pedru, enrowa onikhaliherya akhala wira mutokweene onnilavula aahiiso opaka etthu enniwereya?

16. Pedru aakhaliheriwe sai, ni makoho xeeni anikhumelela?

¹⁶ Mmusome aGalasia 2:11-14. Pedru aawoova atthu. (Miruku 29:25) Pedru aanisuwela moota Yehova aawoonela awe Amalapo. Hata vari siiso, owo aaniwoova maKristau oowunnuwihiwa aYuda, yaawo yaaxukurya oYerusalemu wira khiyaarowa omoonaka saana, mwaha wa weetta  ni maKristau yahaakhanle aYuda. Murummwa Paulo aahimuleela Pedru wira aamwiipaka. Nthowa xeeni? Nthowa noowi Paulo aahimwiiwa Pedru owaakiheryaka Amalapo okathi wa muthukumano oYerusalemu mwaakha wa 49. (Miteko 15:12; aGalasia 2:13) Nuumala Pedru ohiya weetta ni maKristau ale yahaakhanle aYuda, awo yoonenle sai? Niireke yaahikhumuwa? Niireke Pedru aahihiihiwa miritti sawe mwaha wa yoovonya awe?

17. Pedru aattottenle sai mureerelo olevelela wa Yehova?

¹⁷ Pedru aahiiyeviha ni aaheemererya nikhaliheryo na Paulo. Soolempwa khasinihimya akhala wira Pedru aahihiihiwa miritti sawe. Tthiri, muhoolo mwaya aahuupuxeriwa olepa ipaphelo piili seiyo siniirela mpantta iliivuru sa Biibiliya. Nto epaphelo awe ya nenli, Pedru aahimuhimya Paulo okhala “munn’ihu òphenteya”. (2 Pedru 3:15) Yoovonya ya Pedru yahaawereya maKristau yahaakhanle aYuda. Masi, Yesu yoowo ori muru wa muloko, aahivikaniha omurumeela Pedru. (aÉfeso 1:22) Anna ni arokora a mmulokoni yaahikhalana eparakha ya omutakiha Yesu ni Tiithi awe, amulevelelaka Pedru. Ninnilipelela wira khuuvo munna aahiiso murokora onrowa ohiya soovonya sa akina simukhumulaka.

18. Okathi xeeni onitthuneya ahu otakiha exariya ya Yehova?

¹⁸ Muloko wa eseekulu yoopacerya, khuuvo mutokweene aari oomalela, nave olelo-va khakhanle axitokweene oomalela mmulokoni. Biibiliya onihimya wira: “Othene ahu ninnittheka n’inamuna sinjene”. (Yakobo 3:2) Ti vookhweya weemererya eyo, masi ninrowa opaka exeeni akhala wira ninnixanka mwaha wa soovonya sa munna aahiiso murokora? Niireke nnootakiha exariya ya Yehova? Mwa ntakiheryo, munrowa woonela sai akhala wira mutokweene onnivaha ekomentaario enoohomani? Niireke munookhumuwa akhala wira moohilakela onihimya etthu enoonyoonyani aahiiso woowereyani? Ohiya waakuvela omphukela wira khoniphwanela okhala mutokweene, niireke munoopixa murima mulipelelaka wira Yesu muru a muloko, onoolokiherya mwaha owo? Ohiya owehexexa paahi soovonya sawe, niireke munrowa wuupuwelaka iyaakha sivinre omurumeelaka Yehova moororomeleya? Akhala wira munna ootthekenleni onnivikaniha okhala mutokweene aahiiso wuncereriwa miritti, munoohakalalaka ni yena? Akhala wira munoomulevelela, munimooniherya wira muntakiha exariya ya Yehova.​—Mmusome Matheyo 6:14, 15.

19. Tiivi enreerela okhala yoolakela ahu?

¹⁹ Okhala wira ninnisiveliwa exariya, ninnilipelela nihiku Yehova onrowa awe omaliha moomalela ohixariya okumiheriwe ni Satana ni olumwenku awe wootakhala. (Yesaya 65:17) Niwehereryaka okathi owo, vaavo ninthokoreriwa ahu moohixariya, nrowe moowiiyeviha nuupuweleke wira khaninsuwela itthu sotheene sa mwaha owo ni waalevelela ale annitthekela. Akhala wira nnoopaka eyo, ninrowa otakihaka moota Yehova onoonela awe exariya.