Okathi eyo eniiraneya aya, muloko ohaana weemererya wira ekasamento ya khalai yoomala, ni ohaana othokorerya ekasamento ele ya niinaano sintoko etthu yekeekhai moovarihana ni moonelo wa etribunaali. Wira niiwexexe saana mwaha ola, nrowe niwehe etthu Yesu aahimmye awe okathi aalavula awe sa omwalana ni othela aahiiso otheliwa vasya.

Matheyo 19:9, Yesu aahihimya nthowa nimosa paahi nikhanle oomwiiriha mutthu omwalana. Aahimmye so: “Ole onimwalana ni mwaarawe, ohikhanle mwaha wa orupihana woohiloka, onamuthela muthiyana mukina, mutthu owo onooraruwa”. Eyo enniniixuttiha wira, (1) paahi orupihana woohiloka tonimweemererya mutthu omwalana, nave (2) mutthu onimwalana nihikhanle nthowa na mBiibiliyani onathelana ni mutthu mukina, mutthu owo onooraruwa. *

Niireke moolumo a Yesu anitaphulela wira mulopwana onirupihana voohiloka ni onamwalana ni mwaarawe, Nuulumo na Muluku ninnimweemererya omuthela muthiyana mukina? Ikwaha sikina nnaari. Akhala wira mulopwana ooraruwa, amwaarawe araruwelinwe, pooti othanla omulevelela wala omwalana. Akhala wira muthiyana owo onoothanla ohilevelela ni enamwalanasa, khiivo etthu enaakhoottiherya othelana ni mutthu mukina, nuumala ophukiwa milattu soomwalana.

Masi ikwaha sikina muthiyana oraruweliwe pooti othanla ohimwalana ni iyawe ni omulevelela. Ankhi akhala wira iyawe owo khoniphavela oleveleliwa ni onamwalana? Okhala wira mwaarawe aahiivahererya omulevelela ni ohimwalana, Biibiliya khonimweemererya mulopwana owo omuthela muthiyana mukina. Akhala wira onoothela, hata oheemereriwaka opaka eyo ni nlamulo na Muluku, mulopwana owo nlelo onooraruwa. Axitokweene a mmulokoni ahaana opaka ekomisau ekina yoophukela wira ophukiwe mwaha owo.—1 aKor. 5:1, 2; 6:9, 10.

Nto okathi mulopwana onimuhiya awe mwaarawe ni onamuthela muthiyana mukina Biibiliya ohimweemereryaka opaka eyo, muloko ohaana woonelaka sai ekasamento awe ya khalai ni ya niinaano? Niireke moovarihana ni Nuulumo na Muluku nlelo ekasamento awe ya khalai yookhala? Muthiyana ole oraruweliwe nlelo pooti omulevelela aahiiso ohimphavela-tho iyawe ole a khalai? Niireke vaamureerela muloko othokoreryaka ekasamento awe ya niinaano sintoko mararuwo?

Khalai, naiwexexa wira okathi wotheene muthiyana ole oraruweliwe aarowa awe okhala mukumi, ni ohitheliwa ni mutthu mukina ni ohirupihana moohiloka, ekasamento ya niinano ya iyawe ole a khalai, yaathokoreriwa sintoko oraruwa. Masi Yesu khaamuromonle muthiyana oraruweliwe okathi aalavunle awe sa omwalana ni ekasamento ya niinaano. Ohiya-vo, aahimmye wira mulopwana onimwalana ni mwaarawe nihikhanle nthowa na Biibiliya ni onamuthela muthiyana mukina,  onooraruwa. Nto ekasamento aya yoopacerya emanle okhuma okathi amwalanne aya ni othelana vasya ni atthu akina.

Okathi mulopwana onimwalana awe ni mwaarawe ni onamuthela muthiyana mukina, khivaniweryaneya-tho mwaarawe a khalai omulevelela, aahiiso ohimphavela-tho. Nto muthiyana owo khonitthuneya oxankiheya akhala wira onoomulevelela aahiiso ohimphavela-tho iyawe ole a khalai. Ohiya-vo moota muloko onithokorerya aya ekasamento awe ya niinaano khonlipa akhala wira muthiyana ole oraruweliwe ohookhwa aahiiso nnaari, ootheliwa-tho wala ooraruwa. *

Ntakiheryo nithokorenrye ahu, mulopwana torarunwe nto anamathelana awo enamwalana. Masi ankhi akhala wira mulopwana khorarunwe masi hata vari siiso onamwalana ni mwaarawe ni onamuthela muthiyana mukina? Ankhi akhala wira iyawe khorarunwe ehinatthi omwalana, masi opanke eyo nuumala omwalana ni onamuthela muthiyana mukina, nnaamwi mwaarawe oopacerya aamulevelenle? Myaha iya soomiili, omwalana iyo ni ekasamento ya niinaano, onithokoreriwa sintoko oraruwa, nave onnimaliha ekasamento yoopacerya. Mwa moonelo wa malamulo a otribunaale ekasamento ele ya niinaano ti yekeekhai. A Sentinela a 1 a Feverero a 1980, epaaxina 32, olavulaka mwaha ola, aatthokihenrye so: “Mulopwana owo vano oothela vasya, nto khokhanle oomaliha ekasamento eyo ya niinano ni otthikela ya khalai. Ekasamento ya khalai emanle okathi omwalanne awe ni othela vasya”.

Marukunuxo ala a wiiwexexa wahu wa niinaano, khanitaphulela wira makristau ahaana ottharuwa othokorerya ekasamento sintoko etthu enikhuma wa Muluku, wira oraruwa khahiyo etampi yuulupale. Okathi mulopwana onimwalana awe ni mwaarawe ehikhanle mathowa a mBiibiliyani ni onathela vasya oheemereriwaka opaka eyo, axitokweene ahaana opaka ekomisau yoophukela wira ethokorerye mwaha owo wa mararuwo. (Akhala wira mwaarawe a niinaano nave mukristau, nuuwo-tho ohaana ophukeliwa ni ekomisau yoophukela, maana ooraruwa.) Nnaamwi ekasamento awe ya niinaano ehooniwaka ntoko oraruwa, mutthu owo khonitthara malamulo a Muluku anilavula sa othelana. Tivonto khonipwanelela ovahiwa iparakha sa vameekhaaya mmulokoni mpakha ovira iyaakha sinceene, wala mpakha anna ni arokora a mmulokoni otthikela omuttittimiha. Ohinatthi ovahiwa miritti, axitokweene ahaana ovarerya moota ari aya amwaarawe a khalai ni anaawe aahin’ye awe.— Mal. 2:14-16.

Yuupuwelelaka mixankiho suulupale sinikhumelela mwaha wa omwalana ni othela vasya, makristau ahaana okhala a miruku ni omutakiha Yehova ethokoreryaka mareheryo a ekasamento ntoko etthu yoowaarya.— Mus. 5:3, 4; aHeeb. 13:4.