Kiyariwe mwaakha wa 1955 ni kaari mwaana a neeraru. Kinnunwe muttetthe wa oSul wa oFinlândia, nenna-va onisuweliwa okhala epooma ya oVantaa.

Maama aka opatisiwe ntoko Namoona a Yehova miyo kihinatthi oyariwa. Masi paapa aka khaasiveliwe ni yoothanla ya maama aka, nave kheemererya wiira miyo ni axuulupale aka nisomihiweke Biibiliya ni orowela mithukumano. Nto eyo yaanimwiiriha maama ahu onisomihaka Biibiliya nuumala apaapa okhuma.

Okhuma enamwane aka kaahilakela ohipaka etthu yaarowa omuriipiha murima Yehova. Mwa ntakiheryo, okathi omosa kirina ene iyaakha 7, prusoora aka aahinanariwa ni miyo mwaha wookhootta eyoolya eniitthaniwa verilãttyjã, eyo piiyo, eyoolya enitakaiheriwa ni ephome. Ntata nawe nimosa, aahikivara malaku ni ikuru ophavelaka okaathamiha nave ntata nawe nikina, aahikuxa ekulyeri ohenle ene eyoolya eyo okikhanyereraka wiira kilye. Kaahiwerya omutathiha, nuumala-vo ekulyeri eyo yaahimorela vathi.

Paapa aka okhwiiye kirina ene iyaakha 12. Nuumala-vo, kaaniwerya orowela mithukumano sa mmulokoni. Anna ni arokora a mmulokoni yaanikireerela murima, nto eyo yaanikiiriha okela vahoolo. Kaanimusoma Biibiliya khula nihiku ni kaanisoma ni ephoole iliivuru sinimutthokiherya Biibiliya. Vaavo kaimananihaka opaka eyo, yaahikiiriha  opatisiwa kirina ene iyaakha 14, nihiku 8 a Agosto a 1969.

Nuumala omaliha osoma oskola, kaahipacerya orumeela ntoko pioneero ookilaatheya. Nuuvira isumana vakhaani, miyo kaahithaama kirowaka muttetthe woothowa anamalaleerya oPielavesi, waattamela eriyari ya epooma ya oFinlândia.

OPielavesi, miyo kaahimusuwela muthiyana mmosa okisivela oniitthaniwa Sirkka. Owo aari oowiiyeviha, oowiisumaaliha ni aahikhalana waataana wooloka ni Yehova. Owo khaaphavela wiivuwiha ni aanixukhurela itthu vakhaani aakhalana awe. Nihinatthi othelana, oowanli ahu naahikhalana yoolakela ya omurumeela Yehova ni onvarela muteko moohicikha miritti naarina ahu. Nto naahithelana 23 a Março a 1974. Ohiya okhuma nirowaka opuro anitthekula aya atthu athelanne niinaano, hiyo naahithanla orowa oKarttula, muttetthe yoowo woothowa anamalaleerya a Omwene.

Okhuma vaavale nithelanne ahu, Yehova aaninooniherya wiira aamunivahaka itthu nimpirisari ahu, akhala wiira naamuhelaka nipuro noopacerya Omwene awe. (Math. 6:33) Mwa ntakiheryo, okathi naari ahu oKarttula, khinaarina ekaaro. Wanipacerya neetta ni pisikeleeta. Okathi enrupa aya epula, muttetthe ole onkhala wootepa oriirya. Wiira niwerye olaleerya mittetthe sootheene saarina aya muloko ole, hiyo naaprisari okhalana ekaaro. Masi khinaarina musurukhu wiira nithume.

Nihiku nimosa, muulupale aka aahirwa onixukurya nto aahinivaha ekaaro awe. Owo iira olivenrye ene itukumento sa ekaaro eyo nto etthu naareerela ahu opaka waari omuthuma kasolina paahi. Moohakalaliha naahiphwanya etthu naaprisari ahu okhuma khalai.

Yehova aahooniherya wiira aamunivahaka khula etthu nimprisari ahu. Hiyo naahaana ohela Omwene wa Muluku nipuro noopacerya.

Okathi naari ahu eskola ya mapioneero, mwaakha wa 1978, munna Raimo Kuokkanen a yoowo aari prusoore ahu, aahinitumererya wiira nipreyenxeri epetisawu ya orowela eskola ya oGileadi. Nto naahipacerya wiixutta Enkelexi wiira niphwanelele orowela eskola eyo. Masi mwaakha wa 1980, nihinatthi opreyenxeri epetisawu eyo, naahilattuliwa wiira narumeeleke eBeteli ya oFinlândia. Okathi ole mabetelita khiyeemereriwa opreyenxeri epetisawu wiira erowele eskola ya oGileadi.  Masi hiyo naaphavela orumeela paahi opuro Yehova aaphavela awe, ohiya nimphavela ahu. Nto eyo yaahiniiriha weemererya nlattulo nno. Hata vari siiso, khinaahinye wiixutta Enkelexi nave naanilipelela wiira nihiku nno, naamulattuliwa wiira nirowele eskola eyo.

Nuuvira iyaakha vakhaani, Nikhuuru Noolamulela naaheemererya wiira mabetelita aroweleke eskola ya oGileadi, nto eyo yaahiniiriha opreyenxeri epetisawu. Masi khahiyo naamuhisiveliwa orumeela oBeteli, masi moovirikana ni vo, naaphavela orumeela mapuro yaaphaveleya atthu. Nto naahilattuliwa orowela eskola ya oGileadi ya eturma 79 mweeri wa Setembro wa 1985. Nuumala-vo naahilattuliwa orowa oColômbia.

Nuumala ophiya oColômbia, naahilattuliwa wiira nirumeeleke oBeteli. Miyo kaaniimananiha vanceene wiira kilimalele yoothanleliwa aka, masi nuuvira mwaakha mmosa kirumeelaka oBeteli, kaahivekela wiira eturukiwe yoothanleliwa aka. Ele yaari ekwaha yoopacerya ni yookiserya kaavekenle aka oturukiwa yoothanleliwa aka. Nto naahithanleliwa orowa orumeela ntoko mamisionaario epooma ya oNeiva, muttetthe wa oHuila.

Okhala wene, okisivela muteko woolaleerya. Okathi kaarumeelaka ntoko pioneero oFinlândia, kihinatthi othela, miyo kaakhuma kirowaka olaleerya voosiisu ni kaatthika makaaripi. Nuumala othelana ni Sirkka, hiyo naanilaleerya nihiku ntero. Okathi naarowa ahu mittetthe soorakamela owaani, hiyo naarupa mukaaroni mwahu. Eyo yaaniniiriha ottottela mureerelo mukwaha ole nave yaaninikhaliherya opacerya voosiisu ene olaleerya.

Orumeela ntoko mamisionaario, yaahinikhaliherya otthikela osiveliwa ni muteko woolaleerya ntoko khalai. Muloko ahu wahinnuwa moowaakuveya nave nahoona wiira anna ni arokora a oColômbia, yaari atthu oottittimiha, oophenta ni ooxukhuru.

Waattamela muttetthe naathanleliwe ahu wa oNeiva, khaakhanle Namoona a Yehova nnakhala mmosa. Nto kaaniphavela vanceene olaleya ihapari sooreera mapuro ale. Masi mwaha wa anakhotto yaari omiyaakoni, mapuro ale khahiyo yaari oovareleleya para atthu yahaakhanle a elapo ele. Nto kaanivekela wiira Yehova omukhaliherye onakhalaka-ru mutthu mmosa a muttetthe ole wiira okhale Namoona a Yehova. Miyo kuupuwela wiira vanweryaneya mutthu wiixutta ekeekhai akhala wiira aamoorwa okhala oNeiva. Nave kaanivekela wiira nuumala opatisiwa aahaana olipiha waataana wawe ni Yehova, nuumala-vo otthikeleke elapo awe wiira alaleeryeke. Masi nkaasuwela wiira Yehova aahikhalana enamuna ekina ya moota woophuka muxankiho ole.

Nuuvira okathi vakhaani, kaahipacerya omusomiha Biibiliya mmiravo mmosa iitthaniwa Fernando González. Owo aakhala muttetthe wAlgeciras weiwo ahaakhanle Namoona a Yehova. Fernando aaneetta ikiloomo soowiiraka 50 orowaka ovara muteko oNeiva. Owo aanilokiherya oratteene eliivuru awe, nuuvira okathi vakhaani aahipacerya orowela mithukumano. Okhuma esumana aapacenrye awe osomihiwa Biibiliya, Fernando aaniimananiha waaleela atthu akina a muttetthe awe itthu iixutta awe mbiibiliyani.

Fernando opatisiwe Janeiro a 1990, nuuvira miyeeri 6 omusomaka Biibiliya. Nuumala-vo owo aahikhala pioneero ookilaatheya. Vano okhala wiira wAlgeciras, aahikhala Namoona a Yehova mmosa,  eBeteli yahuupuwela waaroiha mapioneero a vameekhaaya wiira yarumeeleke mapuro awo. Nto Fevereiro a 1992, muttetthe ole waahipakiwa muloko musya.

Niireke Fernando aalaleerya paahi muttetthe awe? Nnaari! Nuumala othela, yena ni mwaara awe yaahithaamela muttetthe wa oSan Vicente del Caguán, muttetthe yoowo ahaakhanle Namoona a Yehova. Muttetthe ole, awo yaahikhaliherya opakiwa muloko musya. Mwaakha wa 2002, Fernando aahithanliwa okhala mutokweene a esirkwiitu. Mpakha olelo-va, owo ni mwaara awe, Olga, anikhaliherya muteko wa esirkwitu.

Yoowiiraneya aka, yookiixuttiha wiira etthu ya faita opaka mavekelo ooluluwanya voohimya sa yoothanleliwa ahu ni itthu sinihela muhina yoothanleliwa eyo. Yehova onniwerya opaka itthu hiyo nihinwerya ahu. Tivonto muteko owo ti wawawe masi khahiyo ti wawihu. — Math. 9:38.

Mwaakha wa 1990, hiyo naahithanleliwa ovara muteko wa esirkwitu. Yoothanleliwa ahu yoopacerya ya esirkwiitu yaari ekapitaali ya epooma ya oBogotá. Hiyo naahixanka vanceene maana khinaalimalenle okhala epooma yuulupale ni yoowaatta atthu. Miyo ni mwaaraka naatthu pure okhala wiira khaninsuwela ovara itthu sinceene. Nave hiyo khinaatonko ovekeliwa wiira naarumeeleke opuro woowaatta atthu. Nto naahoona yiiraneyaka moolumo a Yehova ari aFilipi 2:13 ani: “Mwaha wa onireerela wawe murima, Muluku onnikumiherya mwa nyuwo ophavela ni owerya ovara muteko”.

Muhoolo mwaya, hiyo naahithanleliwa orowa ovara muteko wa esirkwiitu muttetthe wa oMedellín, yoowo kilavunle aka wanipacerya. Atthu a muttetthe ole yaari ootakhala ni khiyoona ehaaya ni itthu yaapaka aya. Mwa ntakiheryo, okathi omosa kiirihaka yoosoma ya Biibiliya, saahipacerya oruma ikapwitthi ophiryo wa empa kaari aka. Miyo kaahuupuwela wiipitha, masi ole kaamusomiha aka Biibiliya aahithipelela osoma ittima moohixankiheya. Okathi aamalinhe awe osoma ittima, aahikivekela wiira aaphavela okhuma vakhaani. Owo aahitthika aakunxe ene anamwane acikhaani, nave moomaaleleya owo aahikileela wiira “mukiswaamihe kaarowenle anamwane ala”.

Nave-tho saahiniphwanya mixankiho sikina soowoopiha. Okathi omosa naalaleerya ahu empa ni empa, mwaaraka aahirwa vaarya aka otthyawaka ni oxankale ene. Owo aahimmye wiira ookhala mutthu aaphavela omoopela. Nuumala wiiwa eyo nkaareere oxanka. Masi muhoolo mwaya, naahisuwela wiira mutthu ole khahiyo aaphavela omoopela Sirkka, owo aaphavela omoopela mutthu mukina aari mpantta mukina wa murokora ole.

Olipa murima anna a muttetthe ole yaarina aya, waahinikhaliherya ovilela okathi ole wooxankiha. Eyo yaaninikupaliha wiira okhala wiira, Yehova anaakhaliherya anna ale nave aamunikhaliherya. Ohiya-vo, khula okathi naaniiwelela malakiheryo axitokweene, naanikhalana ephoole nave naanihiya itthu sootheene mmatatani mwa Yehova.

Masi itthu sikina khahiyo saari soowoopiha ntoko hiyo nuupuwela ahu. Nihiku nimosa okathi kaamuxukuryaka muneene etthoko, vaakhala ntoko kaiwa onyakula wa athiyana anli yaari mpantta mukina wa empa kaari aka. Miyo nkaaphavela  waaweha atthu enyakulihanaka, masi muneene etthoko aahikilipiha okathi aaronwe awe oweha etthu yiiraneya. Masi “onyakula iwo” waari wa axipalame anli aniitthaniwa papagaios, yaawo anitakiha nsu na apinaatamu.

Mwaakha wa 1997, kaahithanliwa wiira kiixuttiheke eskola eniwiixuttiha arumeyi ookhaliherya. b Okhala wene okisivela orowela iskola sa Omwene. Masi nkaatonko wuupuwela wiira nihiku nno, kamukhala prusoore a emosa ya eskola eyo.

Nuuvira okathi, kaanirumeela ntoko mutokweene a eDistritu. Okathi yaamala-manle aya mareheryo ale, miyo kaahitthikela muteko wa esirkwiitu. Mwa iyaakha 30, miyo kinnihakalala okhala prusoore ni mutokweene a isirkwiitu. Soothanleliwa iya sootheene, sookivaha ikuru ni mareeliho. Masi khahiyo itthu sootheene seetta saana. Mwaha wa xeeni? Mukihiye kootthokiheryeni.

Miyo kookhalana ikuru sinceene. Nto eyo yookikhaliherya ovilela mixankiho. Ikwaha sikina kaaniimananiha olokiherya itthu mmulokoni masi mwa enamuna yoohiloka. Ekwaha emosa, miyo kaahaatumererya anna efaita erina aya okhala ooreera murima ni ophentana mukina ni mukhwaawe. Masi enamuna kaalavunle aka kaahoona wiira khahiyo yaari yookhalela ni nkoonihenrye ophenta. — aRom. 7:21-23.

Ikwaha sikina, miyo kinniriipiwa murima mwaha wa soovonya saka. (aRom. 7:24) Waahikhala okathi kanvekenle aka Yehova wiira kihiye muteko wa omisionaario ni kitthikele elapo ya oFinlândia. Nihiku nne, kaahirowela mithukumano sa mmulokoni. Etthu kaiwale aka, yaahikivaha ikuru wiira kihihiye yoothanleliwa aka ya omisionaario ni kiimananiheke oxintta soovonya saka. Okathi kinuupuwela aka nivekelo kaapanke aka ni moota Yehova aakhunle awe, miyo nkinoona yoohimya. Kinnimuxukhurela vanceene Yehova mwaha wookipixerya murima ni okikhaliherya oxintta soovonya saka.

Miyo ni mwaaraka Sirkka, ninnimuxukhurela ni murima ahu wootheene Yehova, mwaha woonivaha eparakha ela ya orumeela okumi ahu nivaraka muteko awe wa okathi wootheene. Nave miyo kinnimuxukhurela Yehova mwaha wookivaha muthiyana oophenta ni oowaamini iyaakha iya sootheene.

Moohipisa kinoophiyeriha iyaakha 70, mwaha waivaavo kinoohiya eparakha yookhala prusoore ni mutokweene a isirkwiitu. Masi eyo khenikiriipiha murima. Munnisuwela mwaha aya? Mwaha woowi kinnisuwela wiira etthu Yehova onivaha awe efaita ori omurumeela yena ni murima wooloka, woophenta ni wooxukhuru. Eyo teri etthu enimuhakalaliha Muluku. (Mik. 6:8; Mar. 12:32-34) Wiira ninvuwihe Yehova, khaninprisari okhalana miritti suulupale.

Okathi kinuupuwela aka soothanleliwa kaarina aka, nkinoona wiira kaavahiwe mwaha wookhala mutthu a faita waavikana atthu akina, aahiiso mwaha woosuwela saana ovara miteko. Moovirikana ni vo, Yehova aahikivaha soothanleliwa iye mwaha wa oreera wawe murima. Nave yena aaheemererya wiira kikhalane miritti iyo nnaamwi ikwaha sikina kaavonya. Miyo kinnisuwela wiira koowerya itthu iya sootheene kikhaliheriwaka ni Yehova. Eyo ti etthu ekiirinhe ohimya wiira okathi kaatteettheyaka ikuru sa Muluku saanitepa okikhaliherya. — 2 aKor. 12:9.