WAAMINI wookhalana owerya wuulupale. Mwa ntakiheryo, nnaamwi Satana ophavelaka oniiva momunepani, waamini onninikhaliherya “ottipiha matthere a moro anvonyiwa ni mutakhali”. (aÉf. 6:16) Akhala wira nookhalana waamini, nnoowerya ovilela mixankiho sinlikana ni myaako. Yesu aahaaleela awiixutti awe wira: “Mwariná wamini ntoko enuku yamukhanixa, mwamwirelaka mwak’ola wira: ‘Okhumé vo, orowé iwe!’ Mwak’owo wamukhuma”. (Math. 17:20) Okhala wira waamini onnilipiha waataana wahu ni Yehova, nrowe niwehe waakhuliwa wa makoho ala: Waamini exeeni? Xeeni vanireerela aya ovaha efaita ekeekhai wira nikhalane waamini? Ninrowa olipiha sai waamini wahu? Tani ninreerela ahu omwaamini?​—aRom. 4:3.

Waamini onnivikana weemererya ni osuwela ekeekhai, mwaha woowi “hatá arumeyi a Satana annamini [wira Muluku ookhala], enathukumela yòvaka”. (Yak. 2:19) Nto waamini exeeni?

Biibiliya onnihimya ele ontaphulela aya waamini mwa inamuna piili. Yoopacerya, “wamini t’inamuna y’okhalana itthu sinlipelela ahu”. (aHéb. 11:1a) Tthiri waamini onninikhaliherya okupali wira itthu sotheene Yehova oleihenrye awe sinimwiiraneya. Mwa ntakiheryo, Yehova aahaaleela aIsarayeli wira: “Nyuwo mwaweryaka ohonona watàna opakalyaka n’uthana n’uhiyo, mpakha ohikhumelela-tho okathi aya, vano miyo-tho kinohonona watàna opakalyaka ni Davidi, murumeyi aka”. (Yer. 33:20, 21) Niireke munnoova nsuwa ohiya okhuma ni okela wiirimu, enakhumelela ewiriphi ehinimala? Akhala wira munnikupali malamulo a ephattu, yaawo aniiriha elapo weetta nipuro naya erukureryaka nsuwa, nto niireke khamunkupali wira Mpattuxa a malamulo awo onoowerya omaliherya sooleiherya sawe? Tthiri munnikupali wira owo khonoocela etthu!​—Yes. 55:10, 11; Math. 5:18.

Ya nenli, waamini “t’osuwelexa itthu sihinònahu”. Onihimmwa wira waamini “t’osuwelexa” aahiiso okupali itthu sihinooneya ni maitho ahu, masi sinrowa wiiraneya. (aHéb. 11:1b) Nwehe ntakiheryo ninnikhaliherya okupali itthu sihinooneya. Nkahaya mmuupuwele mwaana ookonheneni wira: ‘Munsuwela sai wira epheyo yookhala?’ Hata muhitonko woona epheyo, pooti wira mwaammukhaliherya mwaana owo osuwela wira epheyo yookhala mmooniheryaka itthu sinooniherya wira eyo yookhala ntoko otannyeya wa makukhu ni itthu sikina. Nto vaavo mwaana onkupali awe itthu iyo sinooniherya, owo onoowerya okupali etthu ohinwerya awe woona ni maitho awe. Moolikanasa, waamini toosuwelexa itthu sihinooneya masi siri sekeekhai.​—aRom. 1:20.

Okhala wira waamini onivarihana ni itthu sinooniherya, wanipacerya wira nikhalane waamini nihaana ‘osuwela ekekhai’. (1 Tim. 2:4) Masi opaka eyo paahi khemphiyerya. Murummwa Paulo olempe so: “Tthirí, mutthu onamini mmurimani mwawe”. (aRom. 10:10) Eyo enooniherya wira nihaana ovaha efaita ekeekhai ohiya osuwela paahi. Opaka eyo ennimukhaliherya mutthu waamini, eyo piiyo, okhala mwa enamuna enimusivela Muluku. (Yak. 2:20) Mutthu ohinvaha efaita ekeekhai, pooti osyaka oweha itthu sinooniherya aahiiso pooti othipelela ovarexexa moonelo awe  wira okhaliherye soophavela sawe soohiloka wala ohipaka marukunuxo mookumini mwawe. (2 Ped. 3:3, 4; Yuda 18) Ti nthowa naya okathi aalempwa awe Biibiliya, khahiyo wira atthu otheene yaawenhe miiriirya yaahaamini. (Moth. 14:11; Yoh. 12:37) Nto munepa wootteela wa Muluku onnaakhaliherya okhalana waamini atthu ale anivaha efaita ekeekhai.​—aGal. 5:22; 2 aTes. 2:10, 11.

Mwene Davidi aari mutthu aarina waamini woolipa. (aHéb. 11:32, 33) Masi hata vaari siiso, khahiyo wira atthu otheene a etthoko ya Davidi yaarina waamini woolipa ntoko yena. Mwa ntakiheryo, okathi omosa Eliyabi muulupale awe Davidi aahooniherya wira khaarina waamini okathi ampwapwenle awe Davidi vaavo aarowa awe owana ni Goliyathi. (1 Sam. 17:26-28) Khuuvo mutthu onaamwela mmapeleni waamini, tivonto waamini wa Davidi waakhumelenle mwaha wookhalana waataana wooloka ni Muluku.

Esalimo 27, Davidi onnihimya itthu saamukhalihenrye okhalana waamini woolipa. Eveersu 1, Davidi aanuupuwelela itthu saamukhumelenle khalai ni moota Yehova aamukhalihenrye awe waaxintta awanani awe. Iversiikulu  2, 3, Davidi aanivaha efaita nipuro aakokhoreliwa Yehova. Eveersu 4, Davidi aanimukokhorela Yehova mutabernaakulu ni atthu akina a Muluku. Eveersu 6, Davidi aanimphavela Yehova onvekelaka. Iversiikulu 7, 8, Davidi aaniphavela wiixuttihiwa iphiro sa Muluku. Eveersu 11, Davidi aanivaha efaita okhalana waamini woolipa. Tivonto wanikisa aakonhe awe wira: Kaarowa omalela vai kahaarina waamini?​—Eveersu 13.

Munoowerya okhalana waamini woolipa ntoko wa Davidi akhala wira munootakiha moonelo awe onilavuliwa Esalimo 27. Nto okhala wira waamini onnivarihana ni osuwela ekeekhai, muhaana ovikaniha osoma Nuulumo na Muluku ni iliivuru sinimutthokiherya Biibiliya, opaka eyo enimookhaliheryani okhalana yoowiima ya munepa wootteela wa Muluku. (Esal. 1:2, 3) Nave muupuweleleke ele munsoma anyu. Tthiri wuupuwelela onlikana ni mwiri waaliwe etthaya yooreera. Akhala wira munnimuxukhurela Yehova, eyo enimookhaliheryani omukokhorela muhicompelaka mithukumano ni olaleya nlipelelo nanyu na muhoolo. (aHéb. 10:23-25) Nave ninnooniherya wira nookhalana waamini vaavo ‘ninlompa ahu okathi wothene nihojeyaka’. (Luka 18:1-8) Nave nihaana onvekela Yehova “vohihiyererya” nikupaliki wira ‘onoonikhapelela’. (1 aTes. 5:17; 1 Ped. 5:7) Waamini onninikhaliherya opaka itthu sooloka, nto vaavo nimpaka ahu itthu sooloka, waamini wahu onootepa olipa.​—Yak. 2:22.

Ohiyu aarowa awe wiiviwa, Yesu aahaaleela awiixutti awe wira: “Mmwamini Muluku: mukamini miyo-tho”. (Yoh. 14:1) Tthiri ohiya paahi omwaamini Yehova nihaana-tho omwaamini Yesu. Munrowa  wooniherya sai wira munnimwaamini Yesu? Nrowe niwehe inamuna tthaaru.

Yoopacerya, muthokoreryeke mukuttho ntoko yoovaha ya Muluku. Murummwa Paulo aahimmye so: “Ekum’ila kirinaka vano mwerutthuni, miyo kokhalana mwaha w’omwamini Mwana a Muluku: Owo òkiphenta ni ohìvahererya wokhwani mwaha wa miyo”. (aGal. 2:20) Omwaamini Yesu onimookhaliheryani okupali ni murima wotheene wira mukuttho awe ti yoovaha wira muleveleliwe itampi sanyu. Nave onimookhaliheryani woona ophenta wuulupale Muluku oniirenle awe ni onninikhaliherya ophwanya ekumi yoohimala. (aRom. 8:32, 38, 39; aÉf. 1:7) Muhiliyale wira okupali mukuttho wa Yesu onimookhaliheryani ohiivaha nthowa mwaha wa itthu soohiloka mpanke anyu aahiiso ohiivaha efaita.​—2 aTes. 2:16, 17.

Ya nenli, mmwaattameleke Yehova murumeelaka mukuttho wowoopola wa Yesu. Yowoopola enninikhaliherya onvekela Yehova mootaphuwa “okhala wira Owo ti mwanene eparakha. Siso nnomoreliwa ikharari, nnophwanya eparakha ennikhaliherya okathi wophwanelela”. (aHéb. 4:15, 16; 10:19-22) Ovekela onninikhaliherya osyaka opaka etampi.​—Luka 22:40.

Ya neeraru, mmwiiweleleke Yesu. Murummwa Yohani aalempe so: “Ole onimwamini Mwana, òkhalana ekumi yohimala; vano ole onkhotta omwiwelela Mwana, khakhalanne ekum’iyo, nto onanariwa wa Muluku onokhala ni yowo”. (Yoh. 3:36) Moone wira murummwa Yohani onnilikanyiha waamini ni wiiwelela. Nto munnimwaamini Yesu vaavo munimwiiwelela anyu. Nave munnimwiiwelela Yesu vaavo muneettela anyu “ikano sa Kristu”, eyo piiyo, itthu sotheene iixuttinhe awe ni onrumme awe opaka. (aGal. 6:2) Nave-tho, ninnimwiiwelela Yesu vaavo nintthara ahu malakiheryo a “murumeyi òroromeleya ni ànkhili”. (Math. 24:45) Omwiiwelela Yesu, onoonikhaliherya ovilela mixankiho sinlikana ni munamukhaya otepa woopiha.​—Luka 6:47, 48.

Mulopwana mmosa aahimukhuwelela Yesu iiraka: “Miyo kinnamini . . . Mukikhaliherye ohamini waka!” (Mar. 9:24) Mulopwana ole aahikhalana waamini vakhaani, nto moowiiyeviha aahisuwela wira aahaana okhalana waamini wowaatta. Nimutakihaka mulopwana ole, okathi mukina pooti okhalana mixankiho ninreerela ahu okhalana waamini woolipa wira nixintte. Nave otheene ahu nnoowerya olipiha waamini wahu niinaano-va. Ntoko niwenhe ahu, nnoowerya olipiha waamini wahu nisomaka Nuulumo na Muluku ni wuupuwelela ele ninsoma ahu. Opaka eyo, enoonikhaliherya olipiha omuxukhurela wahu Yehova. Nave-tho, nnoowerya olipiha waamini wahu vaavo nihincompela ahu othukumana, olaleerya ni ovilela nivekelaka. Etthu yootepa otthuneya, okhala wira olipiha waamini wahu onooniphwanyiha etthuvo yuulupale. Biibiliya onnintumererya oriki: “Nyuwo, apatthani aka, mutepeke wunnuwa mowaminini mwanyu mowaryexa . . . Mukhaleke mophentani mwa Muluku”.​—Yuda 20, 21.