• “Vaakhala ntoko wiira iyaka aamakela okiraruwela”.

• “Miyo kaanuuliwa muru, kaaixoona okhala oonanara ni kihirina efaita”.

• “Nkaamulenle mutthu mukina mwaha ole kaahaawa mekhaka paahi”.

• “Kuupuwela wiira Yehova khaakithokorerya”.

Ikomentaario iya sinnooniherya moota muthiyana onihaawa awe vakhala wiira iyawe onniweha epornokrafia. Muthiyana pooti ohimuroromelaka iyawe akhala wiira mulopwana owo ooviriha okathi munceene owehaka epornokrafia ohooniwaka, pooti okhala miyeeri aahiiso iyaakha. Muthiyana mmosa ohimmye so: “Koona wiira nkaamusuwela saana iyaka. Maana sookhala itthu sikina iipithiha awe”.

Mwaha ola, opakeliwe athiyana yaale axiiyaya aniweha epornokrafia. a Nnooweha malakiheryo a mbiibiliyani anrowa waakhaliherya ni owooniherya wiira Yehova onnaavaha efaita axithiyana. Nave animwaakhaliherya axithiyana awo okhalana murettele ni ohihiya omwaattamela Yehova. b

Nnaamwi muhiweryaka owehaweha khula etthu iyanyu onipaka awe, masi sookhala itthu mukhanle anyu oopaka wiira mukhalane murettele. Nwehe matakiheryo anittharelana:

Muhiivaheke nthowa. Muthiyana pooti wuupuwelaka wiira ookhalana nthowa mwaha wa iyawe owehaka epornokrafia. Alice c uupuwela wiira iyawe khaasiveliwa vanceene ni yena. Owo aaniikoha so: “Xeeni iyaka onisiveliwa awe waaweha athiyana akina ohiya okiweha miyo?” Atyiyana akina anniivaha nthowa, yuupuwelaka wiira moota anipaka aya itthu anniiriha muxankiho ole otepaka. Danielle ohimmye so: “Kaahinanariwa vanceene ni kaaniivaha nthowa, koona wiira ti miyo kaatepiha mwaha ole”.

Akhala wiira munuupuwela siiso, muhiliyale wiira Yehova khonoovahani nthowa mwaha wa itthu iyanyu onipaka awe. Yakobo 1:14 onihimya so: “Khula mutthu onneehereriwa ni ophavela wawe sootakhala, weiwo onimoototha, onamuhapuxa”. (aRom. 14:12; aFil. 2:12) Ohiya woovahani nthowa, Yehova onnivaha efaita mwaha wa omuroromela wanyu. — 2 Wah. 16:9.

 Vakhala wiira mulopwana onniweha epornokrafia, eyo khentaphulela wiira muthiyana omuthenle awe khorenre. Alipa-anitokosa mwaha ola, anihimya wiira oweha epornokrafia onnimwiiriha mulopwana ophavela orupihana mwa enamuna muthiyana ohiniwerya awe omuhakalaliha iyawe.

Muhixankeke mootepana. Catherine onihimya wiira aaniriipiwa murima vanceene okathi anweha awe iyawe owehaka epornokrafia. Frances onihimya so: “Miyo kinnixanka vanceene okathi kihinsuwelaka iyaka opuro ori awe. Kinniriipiwa murima nihiku nootheene”. Athiyana akina anihimya wiira annuuliwa muru okathi anikhala aya ni anna ani arokora yaawo anisuwela muxankiho wa iyaya. Nave athiyana akina aniixoona wiira ari mekhaya yuupuwelaka wiira khaavo mutthu mukina oniiwexexa moonelo aya.

Wuupuwela siisa khivantthekeya. Masi khula okathi wuupuwelaka mwaha owo, onoowiirihani nyuwo oriipiwaka murima ikwaha sinceene. Ohiya wuupuwela itthu iyo, mmananiheke olipiha ompatthani murina anyu ni Yehova. Mwiira siiso, eyo enimookhaliheryani otthikela ohakalala. — Esal. 62:2; aEef. 6:10.

Etthu enrowa wookhaliheryani ori osoma ni wuupuwelela matakiheryo a mbiibiliyani a athiyana yaariipiwe murima masi enanvekela Yehova wiira aakhaliherye. Yehova khaaphunke muxankiho wa athiyana awo ootheene, masi aahaavaha murettele yaapirisari aya. Mwa ntakiheryo, Ana aahiriipiwa murima mwaha wa muxankiho awe. Masi nuumala Ana “oviriha okathi munceene onvekelaka Yehova” owo aahikhalana murettele, nnaamwi ahaasuwela etthu yaarowa wiiraneya muhoolo. — 1 Sam. 1:10, 12, 18; 2 aKor. 1:3, 4.

Mwaavekeleke axitokweene a mmulokoni wiira yookhaliheryeni. Awo “onolikana ni ntthyawelo okathi onòpaya epheyo yorirya, okathi onrupaya epula ya mwanamukhaya”. (Yes. 32:2.) Woonasa wene axitokweene pooti woohimeeryani murokora mukhanle anyu oomuleela mixankiho sanyu sootheene ni woolipihani. — Mir. 17:17.

Niireke yookhala etthu mukhanle anyu oopaka wiira mmukhaliherye iyanyu oxintta yoolema ya oweha epornokrafia? Woonasa wene. Mbiibiliyani aakhala moolumo anrowa wookhaliheryani hata woophwanyakani muxankiho owo, yaawo ani: “Halali okhala atthu anli ovikana okhala mmosa pahi”. (Mus. 4:9-12) Anamatokosa ahoona wiira okathi  anamathelana anivara aya muteko hoothe, anixintta yoolema ya oweha epornokrafia ni muthiyana onnitthikela omuroromela iyawe.

Ekeekhai wiira, wiira eyo yiiraneye vanrowa opirisari iyanyu wiimananiha oxintta yoolema eyo ya oweha epornokrafia. Niireke atthu annivekela Yehova wiira aavahe ikuru aahiiso ovekela nikhaliheryo wa axitokweene? (2 aKor. 4:7; Yak. 5:14, 15) Niireke iyanyu onnipaka palano wiira oxintte yoolema ya oweha epornokrafia? Mwa ntakiheryo, niireke onnithanla saana okathi wiira onwehe telefoni awe aahiiso onniimananiha ohiya oweha itthu sikina sikhanle oomwiiriha oweha epornokrafia? (Mir. 27:12) Niireke iyanyu onneemererya nikhaliheryo nanyu ni onnooleelani ikeekhai? Akhala wiira yena onoopaka itthu iya, munoowerya omukhaliherya.

Munrowa owerya sai? Nwehe ntakiheryo nna. Felicia otheliwe ni Ethan, yoowo okhuma enamwane awe aarina yoolema ya oweha epornokrafia. Felicia onninvaha okathi Ethan wiira ovaanele ni yena mootaphuwa khula okathi onikhalana awe yoophavela ya oweha epornokrafia. Ethan onihimya so: “Miyo kinnimuleela ekeekhai mwaaraka. Nave khula okathi onnikikhaliherya oxintta yoolema ele okikohaka akhala wiira yookhala eniturukeya. Yena onnikikhaliherya ohiviriha okathi munceene kimurumeelaka Internet”. Ekeekhai wiira khahiyo vookhweya Felicia onweha iyawe owananaka muxankiho ole wa oweha epornokrafia. Felicia onihimya so: “onanariwa ni oriipiwa murima khenrowa omukhaliherya iyaka oxintta muxankiho ole. Khula okathi ninvaanela ahu mwaha ole, yena onnikimaaliha”.

Ovaanela siisa onoomukhaliherya amulopwana ohiya oweha epornokrafia, nave onoomukhaliherya amuthiyana omuroromela iyawe. Akhala wiira mulopwana onneemererya ovaanela ni mwaarawe omuleelaka itthu sa ekeekhai, opuro onirowa awe ni etthu onrowa awe opaka, eyo enoomukhaliherya muthiyana osuwela wiira khiyaavo etthu enimukhuwa awe.

Niireke munoowerya omukhaliherya iyanyu mwa enamuna ela? Woonasa wene, nyuwo pooti osoma mwaha ola ni othokorerya hoothe ni iyanyu. Nto yoolakela awe ohaana okhala ohiya oweha epornokrafia ni otthikela ororomelana. Akhala wiira iyanyu onniriipiwa murima, nyuwo munaphavela omukhaliherya owo ohaana oweha wiira nave-tho nyuwo mwaha owo onnooxankihani. Yoolakela anyu okhale omukhaliherya iyanyu wiira ohiye oweha epornokrafia ni mutthikele omuroromela. Etthu yooloka ori osuwela etthu enimwiiriha iyanyu wala mwaarinyu oweha epornokrafia ni moota mukhanle anyu ooxintta yoolema eyo yoohiloka. d

 Moona wiira okathi munivaanela anyu munrowa waakhulanaka, nyuwo pooti omwiitthana mutokweene onookweelani wiira oowiriyanekeni. Muhiliyale wiira hata iyanyu oxinttaka muxankiho wa oweha epornokrafia, pooti ovira okathi wiira mutthikele omuroromela. Masi muhikhulumuwe. Mpixeke murima, mukupaliki wiira vakhaani-vakhaani ekasamento anyu enootthikela okhala yoolipa. — Mus. 7:8; 1 aKor. 13:4.

Ankhi vakhala wiira iyanyu onnitthikela oweha epornokrafia, niireke yena khaattharunwe aahiiso khamanera? Nnaari khahiyo siiso. Otepexa wene, akhala wiira yaari yoolema awe iyanyu oweha epornokrafia, yena pooti owananaka muxankiho owo okumi awe wootheene. Hata ovirinhe ene iyaakha sinceene ohiwehaka epornokrafia owo pooti otthikela. Wiira owerye ohiya, owo ohaana wiimananiha wiira opake khula etthu oniwerya awe wiira ohitthikele-tho hata uupuwelaka wiira yena oohiya. (Mir. 28:14; Math. 5:29; 1 aKor. 10:12) Owo ohaana wiimananiha ohihiya “okhalihiwa musya ni ikuru sineettiha muupuwelo” awe. Nave ohaana wiixutta ‘othanya  itthu sootakhala’, ohiya paahi oweha epornokrafia, masi ohaana osyaka yoolema ya wiikeha. (aEef. 4:23; Esal. 97:10; aRom. 12:9) Niireke tthiri onniphavela ohiya yoolema eyo? Akhala wiira onoopaka itthu iya, woonasa wene onooxintta moomalela. e

Ankhi vakhala wiira iyanyu khonooniherya wiira onniphavela ohiya yoolema eyo ya oweha epornokrafia? Tthiri munooxanka, onanariwa ni onyoonyiheya. Akhala wiira eyo enimwiiraneya mmuhiyeryeke Yehova muxankiho owo, eyo enimookhaliheryani okhala oomaaleleya. (1 Ped. 5:7) Muhihiye olipiha ompatthani anyu ni Yehova munvekelaka, omusoma Biibiliya ni wuupuwelela. Mwapaka eyo mukupaliki wiira Yehova onoowaattamelani. Ntoko onihimya awe Yesaya 57:15, owo onikhala ni atthu “òrukunuxa murima n’owiyeviha” ni aniphavela otthikela okhala oohakalala. Muhihiye Omuroromela Yehova. Mwaavekeleke nikhaliheryo axitokweene ni mukupaliki wiira nihiku nno, iyanyu onoopaka marukunuxo ooloka. — aRom. 2:4; 2 Ped. 3:9.