Niireke munniwerya waakhula makoho ala athokoreriwe erevista Owehaweha ya 2019?

Entaphulela exeeni yooleiherya ya Yehova yoowi: “Iyuma sothene” sipakeliwe onlupattha “khasinvara-tho muteko”? (Yes. 54:17)

Nikupaliki wira Yehova onoonikhapelela okathi ninrowa ahu otupheliwa ni “ikuru sa mamwene” ootakhala. (Yes. 25:4, 5) Awanani ahu khanwerya onikumiherya muxankiho okhanle oonihiiha omurumeela Yehova.​—w19.01, ipaax. 6-7.

Enamuna Yehova aathokorenrye awe aKaanani ni aIsarayeli oohiiwelela enooniherya sai exariya awe?

Muluku aamwaahukhumu atthu otheene yaarupihana moohiloka ni yaathokorerya moohiloka athiyana ni anamwane. Masi owo aanaareeliha ale yaari oowiiwelela ni yaathokorerya saana atthu akina.​—w19.02, ipaax. 22-23.

Nihaana opaka exeeni vaavo atthu akina ahikhanle Anamoona anipaka aya nivekelo?

Nihaana omaala ni omuttittimiha mutthu owo, khivanreerela wira “amen”, nnakhala ovenxa matata okathi ampaka aya nivekelo nno. Nihaana opaka nivekelo nahu moohiiwanyeya.​—w19.03, epaax. 31.

Xeeni waarupiha anamwane eri aya etampi yuulupale?

Mutthu onimurupiha mwaana onnimutthekela mwaana owo, muloko, makhulupale a mulaponi ni Muluku. Ilapo sikina guvernu oopaka malamulo anihimya wira ale anaarupiha anamwane aahaana okaxariwa, nto axitokweene anniiwelela malamulo awo.​—w19.05, ipaax. 9-10.

Ninrowa oturuka sai muupuwelo ahu?

Muhaana opaka itthu iya: Muhaana ovaanela ni Yehova munvekelaka, wuupuwelela, wiitokosa ni waathanla apatthani ooloka.​—w19.06, epaax. 11.

Nihaana opaka exeeni niinaano-va wira niilokiherye mwaha wa olupatthiwa muhoolo?

Nihaana olipiha waataana wahu ni Yehova. Mukupaliki wira onniniphenta ni khonikhala-khala oninyanyalaka. Mmusomeke Biibiliya khula nihiku ni nvekeleke ikwaha sinceene. Mukupaliki wira sooleiherya sa Omwene sinimwiiraneya. Muheleke mmuru soolepa ni isipo sa Omwene.​—w19.07, ipaax. 2-4.

Nihaana opaka exeeni wira naakhaliherye amusi ahu woopowa?

Nihaana owoonela othunku, mweettelo ahu wooloka ohaana waavaha ntakiheryo nooloka, waapixerya murima ni waareerela murima.​—w19.08, ipaax. 15-17.

Ntoko Yesu aaleihenrye awe Matheyo 11:28, ninrowa okurunuxiwa sai murima?

Nookhalana axitokweene oophenta, apatthani ooloka ni muteko woolokexa.​—w19.09, epaax. 23.

Yehova onrowa onivaha sai otthuna ni omaliherya ovara muteko awe? (aFil. 2:13)

Vaavo ninsoma ahu Nuulumo na Muluku ni wuupuwelela ele ninsoma ahu, Muluku pooti onivaha ikuru ni ophavela wira nipake yootthuna awe ni muteko awe. Munepa awe wootteela, onoonivaha mikhalelo sinrowa onikhaliherya.​—w19.10, epaax. 21.

Itthu xeeni ninreerela ahu opaka nihinatthi opaka yoothanla yuulupale?

Itthu 5 nikhanle ahu oopaka tiiya: otokosa mwaha owo, waavekela ankhili, mutokoseke mathowa aniwiirihani opaka yoothanla eyo, mukhalaneke soolukama sooluluwanya ni mweemereryeke makhalelo anyu.​—w19.11, ipaax. 27-29.

Okathi Satana aamulenle awe Eva niireke aapaceriha yowiixuttiha ehireere wuulaana olelo-va ya ohikhwa wa erooho?

Woonasa wene, nnaari. Mwaha woowi Diabo khaahimmye wira Eva alya vale muhokorokho wookhoottihiwa, aarowa okhalaka ntoko wira orimookhwa. Khiivo yowiixuttiha ya etiini yoowootha yaahanle nuumala Epula ya Mutaaseke. Vanikhala ntoko wira muupuwelo woowi yookhala eroho ehinikhwa waakhumelenle ohinatthi Muluku waamwarya-mwarya atthu ale yaapaka Epooma ya oBabeli.​—w19.12, epaax. 15.