NLIPELELO etthu ya faita yinceene. Atthu akina annilipelela okhalana ekasamento yoohakalaliha, waayara anamwane arina ekumi yooloka aahiiso openuwa eretta yuulupale enaawereya. Ekeekhai wira hiyo maKristau ninniphavela okhalana itthu ntoko iyo. Masi nookhalana nlipelelo nuulupale ninvikana itthu iyo. Hiyo ninnilipelela okhala mahiku otheene ni okhala vamosa ni apatthani ni amusi ahu akhwiiye.

1-2. Nlipelelo xeeni noovara murima arumeyi a Yehova arina aya?

² Murummwa Paulo aahimmye so: “Miyo kinniroromela oholo wa Muluku . . . wira atthu othene, ale òrera murima n’ale òtakhala murima anohihimuwa mokhwani”. (Mit. 24:15) Paulo khahiyo topacenrye ohimya nlipelelo na ohihimuxiwa. Yobi aahikhalana nlipelelo na ohihimuxiwa. Owo aanikupali wira Muluku ammuupuwela ni ammuttikixerya okumi.—Yobi 14:7-10, 12-15.

3. Xeeni vari aya vooloka omusoma 1 aKorinto ekapiitulu 15?

³ Ohihimuwa wa alipa-ookhwa oniirela mpantta mathipelo aahiiso “mwixuttiho wopajerya” wa soowiixuttiha sotheene sa maKristau. (aHéb. 6:1, 2) Paulo onnilavula sa ohihimuxiwa 1 aKorinto ekapiitulu 15. Etthu aalempe awe yahaalipiha vanceene maKristau a okathi ole. Hata nyuwo mukhumme ene khalai okupali yooleiherya ya ohihimuxiwa, ekapiitulu eyo enimoolipihani ni enimookhaliheryani ohihiya nlipelelo nno.

4. Etthu xeeni ennikupaliha wira ale akhwiiye anoohihimuxiwa?

⁴ Ohihimuxiwa wa Yesu Kristu, onninikupaliha wira akhala wira mpatthani ahu, mmusi ahu, onimookhwa onoohihimuxiwa. Maana ohihimuxiwa wa Yesu, oniirela mpantta “ehapari yorera” Paulo aalalenrye awe aKorinto. (1 aKor. 15:1, 2) Nave Paulo aahimmye wira akhala wira muKristau khonaamini ohihimuxiwa, waamini  wawe khahiyo etthu. (1 aKor. 15:17) Tthiri ohihimuxiwa wa Yesu onninikupaliha wira atthu ale akhwiiye anoohihimuxiwa.

5-6. Moolumo ari 1 aKorinto 15:3, 4, antaphulela exeeni?

⁵ Wanipacerya ya ekapiitulu 15 ya 1 aKorinto, Paulo onnittittimiherya iponto tthaaru. Iponto sene tiiya: (1) “Kristu okhwenle itampi sahu”. (2) “Krist’uwo ahivithiwa”. (3) “Khuhihimuwa mokhwani mmurottoni mwaya, ntoko silempwaya”.—Mmusome 1 aKorinto 15:3, 4.

⁶ Ontaphulela exeeni okhwa, ovithiwa ni ohihimuxiwa wa Yesu Kristu? Profeta Yesaya aahihimya vahinatthi wira Mesiya aarowa “òkumihiwa mulaponi mw’atthu akumi” ni “òvithiwa poromosa n’atakhali”. Masi khahiyo seiyo paahi. Maana Yesaya aahihimya vahinatthi wira Mesiya amukuxa “sottheka s’atthu” anceene. Nto Yesu aahipaka eyo vaavo aavanhe awe ekumi awe ntoko mukuttho wira onoopole. (Yes. 53:8, 9, 12; Math. 20:28; aRom. 5:8) Tivonto okhwa, ovithiwa ni ohihimuxiwa wa Yesu Kristu onninikupaliha wira nnimoopoliwa etampi ni okhwa. Nave nnimwaaweha ahihimuxiwaka amusi ahu ni apatthani ahu akhwiiye.

7-8. Etthu xeeni enaakupaliha maKristau wira Yesu aahihihimuxiwa?

⁷ Wira nikupali wira onookhala ohihimuxiwa nihaana okupali wira Yesu aahihihimuxiwa. Etthu xeeni ennikupaliha wira Yesu aahihihimuxiwa tthiri?

⁸ Atthu anceene yaahinweha Yesu nuumala ohihimuxiwa. (1 aKor. 15:5-7) Mutthu oopacerya onweha Yesu onilavuliwa ni Paulo aari Pedru wala Simoni. Nuumala-vo ekrupu ya awiixutti yaahihimya wira Pedru aahimoona Yesu nuumala ohihimuxiwa. (Luka 24:33, 34) Moottharelana Paulo ohimmye wira nuumala Yesu ohihimuxiwa aahisooniherya wa arummwa “muloko nanli”, eyo piiyo, 12. Nuumala-vo Kristu “ahìsoniherya-tho okathi omosá w’atthu òwamini yavikanne miloko miloko mithanu [500]”. Woonasa wene waari okathi yoole Yesu aapanke awe muthukumano oGalileya onilavuliwa Matheyo 28:16-20. Nave Yesu “ahìsoniherya wa Yakobo” vanikhala ntoko wira Yakobo onihimmwa-va aari munna awe Yesu, yoowo wanipacerya ahaakupali wira Yesu aari Mesiya. (Yoh. 7:5) Nuumala Yakobo onweha Yesu ohihimuxiwe ene, owo aahimwaamini. Ti voohakalaliha woona wira mwaakha wa 55 vaavo Paulo aalempe awe ewarakha ela atthu anceene yanwenhe Yesu ohihimuxiwe ene, nlelo yaari akumi. Nto akhala wira mutthu aanaanyiherya, aahiiso khaakupali wira Yesu aahihihimuxiwa, owo aahaana olavula aahiiso waakoha atthu awo.

9. Ntoko ninsoma ahu Miteko 9:3-5, Paulo onooniherya sai wira Yesu aahihihimuxiwa?

⁹ Muhoolo mwaya Yesu ahiisooniherya wa Paulo. (1 aKor. 15:8) Okathi aarowa awe oDamaasiko Paulo wala Saulo aahiiwa nsu na Yesu ni aahoonihiwa Kristu ori ene wiirimu. (Musome Miteko 9:3-5.) Ele yaamwiiranenle Paulo, ennooniherya oratteene wira Yesu aahihihimuxiwa.—Mit. 26:12-15.

10. Mwaha wa Paulo okupali wira Yesu aahihimuxiwa, waamwiirinhe opaka exeeni?

¹⁰ Atthu akina anniwerya okupali ele Paulo aahimmye awe, mwaha woowi ohinatthi Yesu omukhumelela Paulo, owo aanaalupattha maKristau. Masi nuumala Paulo okupali wira Yesu aahihihimuxiwa, owo aahiimananiha vanceene waakupaliha atthu akina ekeekhai eyo. Nave Paulo aahivilela omaniwa, otthukweliwa mukhatteya ni osama mmaasini wira aalaleerye atthu akina wira Yesu aahikhwa ni aahihihimuxiwa. (1 aKor. 15:9-11; 2 aKor. 11:23-27) Paulo aanikupali ni murima awe wotheene wira Yesu aahihihimuxiwa mookhwaani ni aaniphavela oleva okumi awe wira aakupalihe atthu akina ekeekhai eyo. Moohaaniherya itthu sotheene maKristau a eseekulu yoopacerya yaawenhe aya, sinnilipiha okupali wahu  wira Yesu aahihimuxiwa ni sinnincererya waamini wahu nlipelelo na ohihimuxiwa.

11. Woonasa wene, etthu xeeni yaawiirinhe atthu akina a oKorinto okhalana moonelo woohiloka voohimya sa ohihimuxiwa?

¹¹ Atthu akina a epooma ya oKorinto, yaahikhalana moonelo woohiloka voohimya sa ohihimuxiwa. Akina yaahimya so: “Khuvo ohihimuwa w’alipa-òkhwa”. Mwaha wa xeeni? (1 aKor. 15:12) Mwaha woowi, mafiloosofu ni atthu akina a wAthena khiyaakupali muupuwelo woowi Yesu aahihihimuxiwa. Nto muupuwelo owo waahaahapuxa atthu akina oKorinto. (Mit. 17:18, 31, 32) Nave atthu akina yuupuwela wira ohihimuxiwa waari wa nthoonyeryo. Awo yaahimya wira mutthu ‘anikhwa’ mwaha wa etampi masi nuumala ‘okhala’ muKristau aanitthikela okhala mukumi. Moohicikha etthu yaawiiriha atthu awo ohikupali ohihimuxiwa, vannooneya wira waamini waya waari wa ethiru. Tthiri vakhanle wira Muluku khaamuhihimunxe Yesu yowoopola khiyaarowa oliveriwa ni atthu otheene yanvikaniha okhala anatampi. Nto vannooneya wira atthu otheene yahaakupali ohihimuxiwa khiyaarina nlipelelo.—1 aKor. 15:13-19; aHéb. 9:12, 14.

12. Moovarihana ni 1 Pedru 3:18, 22, xeeni ohihimuxiwa wa Yesu ovirikanne aya ni ohihimuxiwa waakhumelenle khalai?

¹² Paulo aanisuwela oratteene wira Kristu “ohihimuwa w’alipa-òkhwa”. Ohihimuxiwa wa Yesu waari wuulupale ovikana ohihimuxiwa waakhumelenle khalai, mwaha woowi atthu ale yaahihimuxiwe yaahitthikela-tho okhwa. Paulo ohimmye wira “Kristu ti mulipu” wala topacenrye ohihimuxiwa wa alipa-ookhwa. Mwa enamuna xeeni? Mwaha woowi Yesu pinaatamu oopacerya ohihimuxiwa khuvahiwa erutthu ya omunepani, nave topacenrye owela wiirimu.—1 aKor. 15:20; Mit. 26:23; mmusome 1 Pedru 3:18, 22.

13. Ovirikana xeeni Paulo aahimmye awe okhanle eriyari ya Adamu ni Yesu?

¹³ Mwa enamuna xeeni okhwa wa mutthu mmosa paahi onaaphwanyiha aya ekumi atthu imilyau sinceene? Paulo onnaakhula mwa enamuna yooloka nikoho nno. Owo aahitthokiherya ovirikana okhanle eriyari ya etthu Adamu onikumihenrye awe ni ele Yesu onipakenle awe. Omuhimyaka Adamu, Paulo aalempe so: ‘Okhwa orwiye mwaha wa mutthu mmosa’. Tthiri nuumala Adamu opaka etampi owo ohiiphwanyiha okhwa ni ohaaphwanyiha okhwa anaawe ni osuulu awe wotheene. Mpakha olelo-va, hiyo ninnookhwa mwaha wa ohiiwelela wa Adamu. Masi, vaavo Muluku aamuhihimunxe awe mwanawe, hiyo nookhalana nlipelelo na muhoolo noohakalaliha, Paulo aahimmye so: “Siso-tho ohihimuwa w’alipa-òkhwa orwiye mwaha wa mutthu mmosá” Yesu. Nave Paulo aahimmye so: “Ntoko atthu othene sinkhwaya mw’Adamu, siso-tho othene anokhalihiwa-tho akumi mwa Kristu”.—1 aKor. 15:21, 22.

14. Niireke Adamu onoohihimuxiwa? Mutthokiherye.

¹⁴ Paulo aaphavela ohimya exeeni vaavo aalempe awe wira “atthu othene sinkhwaya mw’Adamu”? Paulo uupuwela osuulu wa Adamu. Okhala wira osuulu wa Adamu woorava etampi ni ohimalela, awo annookhwa. (aRom. 5:12) Masi Adamu khonrowa wiirela mpantta ekrupu ya atthu anrowa ‘okhalihiwa-tho akumi’. Mwaha wa xeeni? Mwaha woowi mukuttho wowoopola Yesu ovanhe awe khoonttipiha etampi ya Adamu, maana Adamu ari mutthu oomalela ni aroolakelela ohimwiiwelela Muluku. Ele yaamwiiranenle Adamu, etthu emosaru enrowa owiiraneela atthu ale anlikanyihiwa “n’ipuri” vaavo “Mwana a mutthu” onrowa awe waaphukela, awo khanrowa ophwanya okumi woohimala.—Math. 25:31-33, 46; aHéb. 5:9.

15. Tani ari “othene” anrowa waakhela ekumi?

 ¹⁵ Moone wira Paulo aahimmye wira: “[Atthu] othene anokhalihiwa-tho akumi mwa Kristu”. (1 aKor. 15:22) Ekarta ela, Paulo aalepenle maKristau oothanliwa yaakhala oKorinto yaawo yaarowa ohihimuxiwa wira yakhaleke wiirimu. MaKristau ale ‘yahirerihiwa mwa Yesu Kristu [ni] yahihaneliwa okhala owarya’. Nave-tho Paulo onnaahimya “ale-tho akhwiye emwaminiki Kristu”. (1 aKor. 1:2; 15:18; 2 aKor. 5:17) Ekarta awe ekina uupuxeriwe awe olepa, Paulo aahilavula sa ale anrowa okhalihiwa “etthu emosaru ni [Yesu] yowo mokhwani” nave anrowa okhalihiwa “etthu emosaru ni yowo mohihimuwani, volikana n’uhihimuwa wawe”. (aRom. 6:3-5) Nuumala Yesu ohihimuxiwa, owo aahikhala mutthu oomunepani ni aahitthikela wiirimu. Eyo ti etthu enrowa wiiraneya ni atthu otheene ari “vamosá ni Kristu”, eyo piiyo, maKristau otheene athanliwe ni munepa wowaarya wa Muluku.

16. Etthu xeeni Paulo aphavela awe ohimya vaavo aamuhimmye awe Yesu okhala “mulipu” aahiiso oopacerya?

¹⁶ Paulo olempe wira Kristu taapacenrye oohihimuxiwa ntoko “mulipu” aahiiso topacenrye ohihimuwa wa alipa okhwa. Ekeekhai wira atthu akina yaahihihimuxiwa valaponi ntoko Laazaro. Masi Yesu topacenrye ohihimuxiwa ni munepa wowaarya wira aakhele okumi woohimala wiirimu, nto owo aalikanyihiwa ni mihokorokho soopacerya saahemphwa ni aIsarayeli wira anvahe Muluku. Ohiya-vo, okhala wira Yesu tori “mulipu” aahiiso topacenrye, Paulo aahooniherya oratteene wira atthu akina yaamuhihimuxiwa wira yakhaleke wiirimu. Nto arummwa ni atthu akina ari “vamosá ni Kristu” yaarowa ohihimuxiwa wira yakhaleke wiirimu ntoko yiiraneyale aya ni Yesu.

17. Okathi xeeni ale ari “vamosá ni Kristu” yaarowa aya ohihimuxiwa wira yakhaleke wiirimu?

¹⁷ Okathi Paulo aalepenle awe ekarta aKorinto, ohihimuxiwa wa atthu ale ari “vamosá ni Kristu’’ yaawo anrowa wiirimu, nlelo khiwaapacenrye. Paulo aahooniherya moota eyo yaarowa aya wiiraneya muhoolo. Owo aahimmye so: “Vano, atthu anohihimuwa khula mutthu ntoko simphwanelawe: òpajerya ti Kristu; ottuli waya, ehihimuweke ale ari a Kristu, nihiku ninrwawe”. (1 aKor. 15:23; 1 aTes. 4:15, 16) Olelo-va hiyo ninkhala okathi wa okhala-vo wa Kristu. Nto arummwa ni maKristau makina oothanliwa, yaahaana olipelela mpakha ophiya okathi wa okhala-vo wa Kristu wira ahihimuxiwe yakhaleke wiirimu. Nave wira akhalihiwe “etthu emosa ni yowo [Yesu] mohihimuwani, volikana n’uhihimuwa wawe”.

18. (a) Exeeni ennikupaliha wira yookhala enamuna ekina ya ohihimuxiwa? (b) Ntoko onooniherya awe 1 aKorinto 15:24-26, etthu xeeni enrowa wiiraneya wiirimu?

¹⁸ Ankhi maKristau otheene oororomeleya,  ahirina nlipelelo na orowa wiirimu? Awo nave annilipelela ohihimuxiwa. Biibiliya onihimya wira Paulo ni maKristau makina arina nlipelelo na orowa okhalaka wiirimu, aniirela mpantta “ohihimuwa woopacerya’’. (aFil. 3:11, Tradução do Novo Mundo.) Eversiikulu ela, ennooniherya wira yaamukhala enamuna ekina ya ohihimuxiwa yaarowa wiiraneya muhoolo. Eyo ennivarihana ni ele Yobi aahimmye awe voohimya sa etthu enrowa wiiraneya muhoolo. (Yobi 14:15) Nto ale ari vamosa ni Kristu okathi wa okhala-vo wawe anrowa wiiraka ari ene wiirimu vaavo Yesu onrowa awe opwetexa ikuvernu sotheene, okhulupale wotheene ni owerya wotheene. Nave “nwanani onrowa okiserya opwetexiwa, okhwá”. Ale anrowa ohihimuxiwa wira yakhaleke wiirimu, khanrowa-tho okhwa. Ankhi atthu akina?—Mmusome 1 aKorinto 15:24-26.

19. Nlipelelo xeeni arina aya ale anrowa okhalaka valaponi?

¹⁹ Nlipelelo xeeni arina aya ale anrowa okhalaka valaponi? Nlipelelo naya naahihimmwa ni murummwa Paulo oriki: “Miyo kinniroromela . . . wira atthu othene, ale òrera murima n’ale òtakhala murima, anohihimuwa mokhwani”. (Mit. 24:15) Okhala wira wiirimu khanrowa atthu oohixariya, moolumo ala anooniherya wira onookhala ohihimuwa valaponi.

20. Mwaha ola, olipinhe sai nlipelelo nanyu?

²⁰ Moohaanyiherya, onookhala ohihimuxiwa! Ale anrowa ohihimuxiwa wira akhaleke valaponi, anrowa okhalaka mahiku otheene. Nyuwo pooti ororomela yoolaiherya eyo. Nlipelelo nna ninninimaaliha vanceene ni ninniniiriha owuupuwela apatthani ni amusi ahu akhwiiye. Awo anrowa ohihimuxiwa okathi Kristu ni mamwene anrowa aya olamulelaka “mpakha iyakha iye ekonto emosá”. (Wis. 20:6) Nto mukupaliki ni murima wotheene wira akhala wira munimookhwa ohinatthi opacerya olamulela wa Iyaakha Ekonto Emosa nyuwo munrowa ohihimuxiwa. Maana ororomela wahu “khunnototha”. (aRom. 5:5) Tthiri ororomela wahu, onnincererya ohakalala wanyu vaavo munimurumeela anyu Muluku. Masi sookhala itthu sikina nniixutta ahu 1 aKorinto ekapiitulu 15. Itthu iyo ninrowa oweha mwaha onittharelana.