1-2. (a) Exeeni otheene ahu nimphavela ahu? (b) Exeeni nikhanle ahu ookupali?

OTHEENE AHU ninniphavela ophentiwa ni othokoreriwa mwa xariya. Vaavo nihimphentiwa ahu ni ninthokoreriwa ahu moohixariya, hiyo pooti ohikhalana nlipelelo ni wuupuwelaka wira khanrina efaita.

² Yehova onnisuwela wira ninniphavela ophentiwa ni othokoreriwa mwa xariya. (Esal. 33:5) Nikupaliki wira, Muluku ahu onniniphenta vanceene ni oniphavela wira nithokoreriweke mwa xariya. Eyo ennooneya vaavo ninthokorerya ahu saana Nlamulo Yehova aavanhe awe aIsarayeli omurumeelaka Moise. Akhala wira mooxanka mwaha woowi atthu akina khanoophentani ni anoothokoreryani moohixariya, xontte moone moota Nlamulo na Moise * nnooniherya aya wira Yehova onnaathokorerya atthu awe.

3. (a) Ntoko onihimya awe aRoma 13:8-10, exeeni nniixutta ahu vaavo ninsoma ahu Nlamulo na Moise? (b) Mwaha ola onrowa waakhula makoho xeeni?

³ Vaavo ninsoma ahu Nlamulo na Moise, ninnoona othokorerya wa Tiithi ihu oophenta, Yehova. (Mmusome aRoma 13:8-10.) Mwaha ola, ninrowa othokorerya malamulo vakhaani yaavahiwe aIsarayeli ni waakhula makoho ala: Xeeni nikhanle ahu oohimya wira Malamulo ale yeettihiwa ni ophenta? Xeeni nikhanle ahu oohimya wira Nlamulo naanaatumererya atthu weettela exariya? Moota xeeni ale yaarina okhulupale, yeettela aya Exariya? Atthu xeeni, Nlamulo naakhapelela aya? Waakhuliwa wa makoho awo, onoonimaaliha, onivaha nlipelelo ni onuuraanyiha  ni Tiithi ihu oophenta.​—Mit. 17:27; aRom. 15:4.

4. (a) Xeeni ninhimya ahu wira Nlamulo na Moise neettihiwa ni ophenta? (b) Moovarihana ni Matheyo 22:36-40, sooruma xeeni Yesu aattittimihenrye awe?

⁴ Nnoowerya ohimya wira Nlamulo na Moise neettihiwa ni ophenta, maana itthu sotheene Yehova ompaka awe, sineettihiwa ni ophenta. (1 Yoh. 4:8) Malamulo otheene Yehova anvanhe awe Moise yaavarihana ni sooruma iya piili: Omphenta Muluku ni omphenta mukhwiihu. (Onam. 19:18; Otum. 6:5; mmusome Matheyo 22:36-40.) Tthiri, vannooneya wira malamulo 600 ni malamulo makina Yehova aavanhe awe aIsarayeli, anooniherya ophenta wawe. Vano nrowe nthokorerye matakiheryo vakhaani.

5-6. Yehova oniphavela wira anamathelana apakeke exeeni? Etthu xeeni Yehova onsuwela awe? Nvahe ntakiheryo.

⁵ Muroromeleyeke ni ole muthelanne anyu, ni mwaakhapeleleke aniinyu. Yehova oniphavela wira ale athelanne aphentaneke vanceene okumi aya wotheene. (Maph. 2:24; Math. 19:3-6) Nto ole onraruwa, onnipaka etampi yuulupale. Tivonto Nlamulo na neethanu nenli ninkhoottiha aya oraruwa. (Otum. 5:18) Tthiri, ole onraruwa ‘oninveha Muluku’ ni onnooniherya ohimphenta ole othelanne awe. (Maph. 39:7-9) Vano ole oraruweliwe pooti oviriha iyaakha sinceene uupuwelaka.

⁶ Yehova onnisuwela enamuna anamathelana anithokoreryana aya mukina ni mukhwaawe. Owo aaphavela wira athiyana aIsarayeli athokoreriweke saana. Mulopwana aatthara Nlamulo, aanimphenta mwaarawe ni khaamwalana mwaha wa mixankiho saamukhaani. (Otum. 24:1-4; Math. 19:3, 8) Masi, akhala wira saanikhumelela mixankiho suulupale saamweemererya omwalana, mulopwana owo aahaana onvaha mwaarawe epaphelo yoomwalana. Epaphelo eyo, yaanimukhapelela muthiyana wira ohootheriwe okhala namararuwa. Ohiya-vo, ohinatthi mulopwana onvaha mwaarawe epaphelo ya omwalana, woonasa wene, wanipacerya ahaana orowa waakoha makhulupale a epooma. Nto makhulupale awo yaamukhalana eparakha ya waakhaliherya anamathelana awo ophuka muxankiho aya wira ahimwalane. Okathi mukina Yehova khaapaka etthu vaavo mulopwana mwIsarayeli aamwalana awe ni mwaarawe voohikhala mathowa ooloka. Hata vaari siiso, Yehova aaniweha owereya ni wunla wa muthiyana owo.​—Mal. 2:13-16.

7-8. (a) Yehova oniphavela wira anamuyari apakeke exeeni? (Nwehe efootu ya ekaapa.) (b) Etthu xeeni nniixutta ahu?

⁷ Nlamulo naanooniherya wira Yehova oniphavela wira anamwane akhapeleliweke saana. Nave, Yehova aahaaruma anamuyari wira yaavaheke anaaya ohiya paahi itthu sa werutthuni, masi-tho itthu somunepani. Anamuyari yaahaana ottottela mureerelo khula okathi wira yaakhaliherye anaaya wiiwexexa ni osiveliwa Malamulo ni omphenta Yehova. (Otum. 6:6-9; 7:13) Etthu ekina yaamwiirinhe Yehova waahukhumu aIsarayeli, mwaha woowi atthu akina yaanaahasula anaaya mwa enamuna yowooniha othunku, akina yaanaapaha yaavahaka amuluku eethiru. (Yer. 7:31, 33) Anamuyari yaahaana owoonaka anaaya ntoko yoovaha ya Yehova, yeeyo yaatthuneya ovahiwa efaita ni othokoreriwa saana.​—Esal. 127:3.

⁸ Etthu nniixutta ahu: Yehova onniweha ni onnivaha efaita enamuna anamathelana anthokoreryana aya. Owo oniphavela wira anamuyari yaaphenteke anaaya, nave Yehova onimwaakoha anamuyari mwaha wa enamuna anaathokorerya aya anaaya.

9-11. Exeeni yaamwiirinhe Yehova ovaha nlamulo naakhoottiha okhalela nrima itthu sa mutthu mukina?

 ⁹ Muhikhale nanrima. Nlamulo nookiserya na Malamulo Muloko, naanikhoottiha okhalela nrima itthu sa mutthu mukina aahiiso wunlela itthu sa mutthu mukina. (Otum. 5:21; aRom. 7:7) Yehova aahivaha nlamulo nla wira owiixuttihe atthu awe etthu yootthuneya, eyo piiyo, atthu awe yahaana okhapelela murima aya, muupuwelo aya ni moonelo aya. Maana Yehova aanisuwela wira itthu sootakhala simpacerya ni muupuwelo ni moonelo woohiloka. (Mir. 4:23) Akhala wira mwIsarayeli aaneemererya miyuupuwelo soohiloka sinnuwaka vamurimani vawe, owo ampacerya waathokorerya atthu akina moohiphenta. Mwa ntakiheryo, Mwene Davidi aahimorela muraakho owo. Okhala wene, owo aari mutthu ooreera murima. Masi okathi omosa, owo aahimukhalela nrima muthiyana a mulopwana mukina. Nto, nrima naahimwiiriha opaka etampi. (Yak. 1:14, 15) Vano Davidi aahiraruwa ni muthiyana ole, aaheererya onwoka iyawe ni wanikisa waya aahimwiiva.​—2 Sam. 11:2-4; 12:7-11.

¹⁰ Okhala wira Yehova onniwerya osoma murima wa mutthu, owo aanisuwela vaavo mwIsarayeli aheettela awe nlamulo naalavula sa nrima. (1 Wah. 28:9) Nlamulo naakhoottiha okhalela nrima itthu sa mutthu mukina, naaniwooniherya atthu a Muluku wira yaahaana osyaka muupuwelo waarowa owiiriha okhalana mweettelo woohiloka. Tthiri eyo ennooniherya wira Yehova ta miruku ni toophenta!

¹¹ Etthu nniixutta ahu: Yehova onniweha ohiya paahi mukhalelo ahu wa ota. Owo onniweha mukhalelo ahu wa muhina aahiiso murima ahu. (1 Sam. 16:7) Khuuvo muupuwelo, moonelo aahiiso etthu envitheya vamaithoni va Yehova. Nave onniweha ni olipiha itthu sooloka nrina ahu. Masi owo oniphavela wira nsuweleke ni osyaka miyuupuwelelo soohiloka sihinatthi oniiriha opaka etampi.​—2 Wah. 16:9; Math. 5:27-30.

12. Nlamulo na Moise nnooniherya exeeni?

¹² Nlamulo na Moise ninnooniherya wira Yehova onniphenta exariya. (Esal. 37:28; Yes. 61:8) Yehova oovaha ntakiheryo na waathokorerya atthu akina mwa xariya. Vaavo aIsarayeli yiiwelela aya malamulo a Yehova, owo aanaareeliha. Nto vaavo yahiiwelela aya malamulo a xariya a Yehova, awo yaaniphwanya mixankiho sinceene. Nrowe nithokorerye malamulo manli ari muhina mwa Malamulo Muloko.

13-14. Malamulo manli oopacerya a Malamulo Muloko yaavekela exeeni? AIsarayeli yaattottela sai mureerelo vaavo yiiwelela aya malamulo awo?

¹³ Omukokhorela Yehova paahi. Malamulo manli oopacerya a Malamulo Muloko, yaatumererya aIsarayeli omukokhorela Yehova paahi ni yaanikhoottiha okokhorela ilatarato. (Okhum. 20:3-6) Malamulo ale khahiyo yamphwanyiha mureerelo Yehova. Masi yaaphwanyiha mureerelo atthu awe. Maana vaavo atthu a Muluku yaavikaniha aya ororomeleya wa yena, awo yaanikhumela saana. Nto vaavo yaakokhorela aya amuluku eethiru a maloko makina, awo yaaniphwanya mixankiho sinceene.

¹⁴ Nkahaya nwuupuwele aKaanani. Awo yaanikokhorela ilatarato ohiya Muluku mukumi. Nto mwaha woopaka eyo, awo yaaniphwanya mixankiho sinceene. (Esal. 115:4-8) Okokhorela waya waahela muhiya orupihana woohiloka ni waapaha anamwane yaavahaka amuluku aya. Mwa enamuna emosa-ru, vaavo aIsarayeli yahaamwiiwelela aya Yehova anaakokhorela amuluku eethiru, awo ni imusi saya, yaaniphwanya mixankiho sinceene. (2 Wah. 28:1-4) Atthu ale yaarina okhulupale yaahihiya weettela malamulo a xariya a Yehova. Awo yaanipuherya  okhulupale aya ni yaanaahasula atthu akina. (Ezek. 34:1-4) Yehova aahihimya wira aarowa waahukhumu aIsarayeli ale yaahasula anamwane ni athiyana. (Otum. 10:17, 18; 27:19) Yehova aanaareeliha atthu awe vaavo yaavikaniha aya ororomeleya wa yena ni waathokorerya mwa xariya atthu akina.​—1 Mam. 10:4-9.

15. Itthu xeeni nniixutta ahu voohimya sa Yehova?

¹⁵ Etthu nniixutta ahu: Yehova khorina nthowa vaavo atthu ale aniihimya omurumeela ahiniiwelela aya malamulo awe ni anaahasula aya atthu awe. Masi, Yehova onniniphenta ni onnisuwela vaavo ninthokoreriwa ahu moohixariya. Owo onnoona owereya ovikana owereya maama onoona awe mwaha wa mwanawe. (Yes. 49:15) Nnaamwi Yehova ohaaphukelaka moowaakuveya, okathi wooreerela, Yehova onimwaahukhumu ale anaathokorerya voohixariya atthu akina.

16-18. Itthu xeeni Nlamulo na Moise naavariheleya aya muteko? Itthu xeeni nniixutta ahu?

¹⁶ Nlamulo na Moise naanihimya itthu sinceene sa mookumini, nto vaari vootthuneya makhulupale waaphukela mwa xariya atthu a Yehova. Awo yaahivahiwa muritti ohiya paahi ophuka myaha saavarihana ni okokhorela, masi-tho yahaana ophuka myaha saavarihana ni ohiiwanana ni ikrime. Nrowe niwehe matakiheryo anittharelana.

¹⁷ Vaavo mwIsarayeli aamwiiva awe mutthu, owo khiiviwa moowaakuveya. Axitokweene epooma eyo yaahaana otokosa saana mwaha owo wira asuwele akhala wira mutthu owo aahaana wiiviwa aahiiso nnaari. (Otum. 19:2-7, 11-13) Makhulupale awo yaahikhalana muritti woophuka myaha sa khula nihiku. Ohela muhina onyakulihana mwaha wa mireerelo aahiiso myaha sa vatthokoni. (Okhum. 21:35; Otum. 22:13-19) Vaavo makhulupale yaakhala aya a xariya ni aIsarayeli yiiwelela aya Nlamulo, atthu otheene yaanittottela mureerelo, nave nloko nne naaninvuwiha Yehova.​—Onam. 20:7, 8; Yes. 48:17, 18.

¹⁸ Etthu nniixutta ahu: Yehova onnivaha efaita myaha sotheene sa okumi wa khula nihiku. Owo oniphavela wira naathokoreryeke atthu akina moophenta ni mwa xariya. Onnoona itthu ninlavula ahu ni nimpaka ahu hata niri ene mekhihu.​—aHéb. 4:13.

19-21. (a) Makhulupale ni aphuki yaathokorerya sai atthu a Muluku? (b) Moota xeeni nlamulo na Muluku naakhapelela aya atthu? Itthu xeeni nniixutta ahu?

¹⁹ Yehova aaphavela wira atthu awe ahipahuliwe ni maloko yaattamanne aya. Nto aanaavekela makhulupale ni aphuki, otthara Nlamulo mwa xariya. Nave, Yehova aaphavela wira aphuki ale, yaaphukeleke atthu awe moohaahasula ni voohaahaaxa. Nave yaahaana okhala oophenta ni a xariya.​—Otum. 1:13-17; 16:18-20.

²⁰ Yehova onniwoonela othunku atthu awe, nto onnaakhapelela wira ahihasuliweke ni atthu ootakhala murima. Mwa ntakiheryo, Nlamulo naanimukhapelela mutthu ootheriwa  opaka ekrime. Owo aanikhalana ehakhi ya omusuwela mutthu omoothenrye. (Otum. 19:16-19; 25:1) Nto ohinatthi wiiviwa, yaahaana okhala anamoona anli ahimyaka etthu emosa-ru. (Otum. 17:6; 19:15) Ankhi akhala wira mwIsarayeli aanipaka ekrime yooniwa ni mutthu mmosa paahi? Mutthu owo opanke ekrime eyo khaatthuneya wuupuwela wira khaarowa ohukhummwa. Maana Yehova ohoona etthu opanke awe. Vatthokoni, tiithi aahivahiwa okhulupale, masi okhulupale awe waahikhalana mukano. Sakhumelela mixankiho vatthokoni, makhulupale a epooma yaahikhalana muritti woophuka mwaha owo mpakha omaliha.​—Otum. 21:18-21.

²¹ Etthu nniixutta ahu: Yehova oovaha ntakiheryo; khiivo etthu ompaka awe enooniherya ohixariya. (Esal. 9:8) Yehova onnaatthuvela ale anroromeleya wa yena ni anikhaliherya okhulupale ni malamulo awe. Masi onnaahukhumu otheene ale ampuherya okhulupale aya. (2 Sam. 22:21-23; Ezek. 9:9, 10) Atthu akina annipaka itthu sootakhala yuupuwelaka wira Yehova khonrowa waahukhumu, masi waphiya okathi aya owo onrowa waahukhumu wira okumiherye exariya. (Mir. 28:13) Akhala wira khanttharuwa, moohipisa anrowa woona wira “etthu yowopihexa oviruweliwa ni Muluku mukumi!”​—aHéb. 10:30, 31.

22-24. (a) Tani yaatepexa okhapeleliwa ni Nlamulo, exeeni nniixutta ahu voohimya sa Yehova? (b) Yoolopola xeeni eri Okhuma 22:22-24?

²² Nlamulo naanaakhapelela atthu yaale yahaawerya wiikhapelela, ntoko ikwaasuni, anaamukhweli ni anamurwa. Yehova aahaaleela makhulupale a wIsarayeli wira: “Muhapuheryé  anamurwa nnákhala axinamwane ikwasuni. Mwamukophiha muthiyana namukhweli, muhimukhanyereriheké wovahani nemexeryo”. (Otum. 24:17) Yehova aanaavaha efaita yinceene atthu yaale yahaawerya wiikhapelela mmuttettheni. Nave Yehova aanaahukhumu atthu yaale yaahasula atthu yahaawerya wiikhapelela.​—Mmusome Okhuma 22:22-24.

²³ Okhala wira Nlamulo naanikhoottiha orupihana amusiru, eyo yaanaakhapelela atthu a vatthokoni ohirupihana moohiloka. (Onam. 18:6-30) Moovirikana ni maloko yaakhala vakhiviru ni aIsarayeli, yaawo yaarupihana amusiru, atthu a Yehova yaanoona orupihana amusiru okhala etthu yoohiirya ntoko Yehova onoona awe.

²⁴ Etthu nniixutta ahu: Yehova oniphavela wira ale arina okhulupale yaaphenteke atthu anaahoolela aya. Owo onninyokha ikrime sa moorupihanani ni oniphavela wira atthu otheene otepexa wene ale ahiniwerya wiikhapelela, athokoreriweke mwa xariya.

25-26. (a) Xeeni ophenta ni exariya sinooniherya aya makhalelo a valaponi? (b) Mwaha onittharelana wa mpantta ola, ninrowa othokorerya exeeni?

²⁵ Ophenta ni exariya sinooniherya makhalelo a valaponi, khivaniweryaneya okhala ophenta khuhikhala exariya, maana mikhalelo iyo sineetta vamosa. Vaavo nnoona ahu wira Yehova onninthokorerya mwa xariya, omphenta wahu onninnuwa. Nave omphenta Muluku ni malamulo awe a xariya onniniiriha waaphenta atthu akina ni waathokorerya mwa xariya.

²⁶ Nivarihano na Nlamulo na Moise naanaakhaliherya aIsarayeli okhalana waataana wooloka ni Yehova. Masi, Nlamulo noohiya ovara muteko aya nuumala Yesu waakhwanyiherya Nlamulo. Nto Nlamulo nooranttelihiwa ni etthu yootepa oloka. (aRom. 10:4) Murummwa Paulo aahimmye wira Nlamulo naari “ntoko eruku pahi ya sorera sintthuna orwa”. (aHéb. 10:1) Mwaha onittharelana wa myaha iya ninthokorerya ahu ophenta ni exariya, ninrowa othokorerya moota ophenta ni exariya siri aya mikhalelo sootepa otthuneya mmulokoni mwa eKristau.