1. Vaavo muthiyana oniphavela awe otheliwa, makoho xeeni onireerela awe wiikoha?

MAKRISTAU otheene ahaana wiiwelela okhulupale wa Yesu Kristu yoowo ori muhooleli oomalela. Masi vaavo muthiyana muKristau onitheliwa awe, owo ohaana wiiwelela okhulupale wa mulopwana oohimalela. Opaka eyo khivanikhweya. Nto vaavo murokora onuupuwela awe otheliwa, ohaana wiikoha so: ‘Exeeni enikikupaliha wira munna ola onoorowa okhala muhooleli a etthoko ooloka? Kiireke onniluttuweliwa ovara miteko sa Muluku? Akhala wira khoniluttuweliwa, etthu xeeni enikikupaliha wira nuumala othelana onoorowa okikhaliherya okhalana waataana wooloka ni Yehova?’ Nave, ti vooloka murokora owo wiikoha so: ‘Mikhalelo xeeni kirina aka sinrowa okhaliherya ekasamento ahu? Kiireke ka mutthu oopixa murima ni oovaha? Kiireke kookhalana waataana woolipa ni Yehova?’ (Mus. 4:9, 12) Akhala wira muthiyana onoopaka soothanla sooloka ohinatthi otheliwa, eyo enookhaliherya ekasamento awe okhumela saana ni ohakalala.

2. Mwaha ola, ninrowa othokorerya exeeni?

² Arokora anceene, annivaha ntakiheryo nooloka na owiiwelela axiiyeya. Nto ahaana ottottopeliwa! Tthiri, ninnihakalala vanceene omurumeela Yehova ni arokora awo oororomeleya! Mwaha ola, ninrowa waakhula makoho mararu. Makoho ene taala: (1) Mixankiho xeeni sinaaphwanya athiyana ootheliwa? (2) Xeeni vari aya vooloka muthiyana omwiiwelela iyawe? (3) Ntakiheryo na Yesu, Abigayili ni Maria maama awe Yesu, ninwiixuttiha exeeni alopwana oothela ni axithiyana ootheliwa voohimya sa wiiwelela ni ottittimiha okhulupale?

3. Xeeni anamathelana sinaaphwanya aya mixankiho?

³ Ekasamento yoovaha ya Muluku. Masi atthu anithelana toohimalela. (1 Yoh. 1:8) Tivonto Biibiliya onaaleela awe atthu  ale aniphavela othelana wira khahiyo okathi wotheene anrowa ohakalalaka, maana “anookhalana mixankiho mookumini mwaya”. (1 aKor. 7:28) Vano, nrowe nithokorerye mixankiho vakhaani sinaaphwanya athiyana ootheliwa.

4. Exeeni ekhanle omwiiriha muthiyana wuupuwela wira omwiiwelela iyawe etthu yoohiloka?

⁴ Woonasa wene, mwaha wa soolema ni enamuna muthiyana ohuuwale awe, pooti wuupuwelaka wira omwiiwelela iyawe, etthu yoohiloka. Murokora oniihaniwa Marisol onikhala wEstados Unidos onihimya so: “Opuro kiyariwe aka, athiyana animakela oleeliwa wira ahaana olikana ni alopwana mwa inamuna sotheene. Koosuwela wira Yehova onvaha okhulupale mulopwana ni oniphavela wira athiyana awiiweleleke axiiyeya, masi hata vari siiso, athiyana ootheliwa ahaana ottittimihiwa. Nave, ohimya ekeekhai, okathi mukina vannixankiha okhalana moonelo wooloka voohimya sa okhulupale”.

5. Moonelo xeeni atthu akina arina aya voohimya sa athiyana?

⁵ Nave aakhala alopwana akina oothela, anuupuwela wira mwaaraya khorina efaita yinceene. Murokora mmosa oniihaniwa Ivon onikhala wAmérica do Sul onihimya so: “Muttetthe kiyariwe aka, mulopwana tonipacerya olya nuumala-vo muthiyana. Aximwali muteko aya waapeya ni orattela empa. Vano amiravo ahaana ovareliwa miteko ni amaama aya ni axirokora aya, nave okhuma onamwane aya awo annileeliwa wira ‘mulopwana khoniyeva’”. Murokora mmosa oniihaniwa Yingling a wÁsia onihimya so: “Nttaava naka nookhala nuulumo ninrumeeliwa nintaphulela wira muthiyana khonisuwela itthu sinceene wala khoniwerya opaka itthu saana. Nave vanihimmwa wira muteko awe ovara miteko sa vatthokoni ni khoneemereriwa omuleela iyawe moonelo awe”. Nto mulopwana ohinimphenta mwaarawe ni ohinitthara miruku sa mBiibiliyani, onnimuxankiha vanceene mwaarawe ni khonimutakiha Yesu ni onnimuriipiha murima Yehova.—aEef. 5:28, 29; 1 Ped. 3:7.

6. Etthu xeeni athiyana ootheliwa anireerela aya opaka wira alipihe waataana waya ni Yehova?

⁶ Ntoko niwenhe ahu mwaha ovinre, Yehova oniphavela wira mulopwana oothela aakhapeleleke momunepani, mmuupuweloni ni waavaha itthu sinaathowa atthu a etthoko awe. (1 Tim. 5:8) Masi hata arokora ootheliwa yaatteliwaka miteko, khula nihiku ahaana omusoma Biibiliya ni wuupuwelela ele anisoma aya. Nave ahaana onvekela Yehova ni murima aya wotheene. Opaka eyo khivanikhweya. Mwaha wa xeeni? Mwaha woowi, athiyana ootheliwa waatteliwa miteko, nto awo pooti ohikhalana okathi wala ikuru wira avare itthu iyo. Masi hata vari siiso, wiimananiha opaka eyo enookhaliherya vanceene ekasamento aya. Mwaha wa xeeni? Mwaha woowi Yehova oniphavela wira khula mmosa a hiyo okhalane ni olipihe waataana wawe ni yena.—Mit. 17:27.

7. Etthu xeeni enrowa omukhaliherya muthiyana omwiiwelela iyawe?

⁷ Moohaanyiherya, athiyana ootheliwa ahaana wiimananiha vanceene wira awiiweleleke axiiyeya hata ari ene oohimalela. Vanimwaakhweela opaka eyo, akhala wira annisuwela ni anneemererya mathowa a mBiibiliyani anooniherya wira ahaana omuttittimiha ni omwiiwelela iyawe.

8. Moovarihana ni aEefeso 5:22-24, xeeni athiyana ootheliwa anireerela aya oowiiwelela axiiyeya?

⁸ Athiyana ootheliwa awiiweleleke axiiyeya ni murima wotheene. Mwaha wa xeeni? Mwaha woowi, eyo ti etthu Yehova onaavekela awe. (Mmusome aEefeso 5:22-24.) Awo annimuroromela Tiithi aya a wiirimu wira sotheene onipaka awe, onipaka moophenta. Ohiya-vo, awo annikupali wira malakiheryo onnivaha awe oniphavela mureerelo ahu.—Otum. 6:24; 1 Yoh. 5:3.

9. Itthu xeeni sinikhumelela vaavo muthiyana onimwiiwelela awe iyawe?

 ⁹ Olumwenku onnaatumererya athiyana ohiiwelela malamulo a Yehova ni ohittittimiha okhulupale wa axiiyeya. Tthiri, ninnisuwela wira atthu anikumiherya muupuwelo owo khanimusuwela Muluku ahu oophenta. Maana Yehova khonikhala-khala onvahaka mwanawe mwaamuthiyana malamulo oohiloka. Murokora oniimananiha vanceene ovara muteko ovahiwe awe ni Yehova, onnikumiherya murettele ni wiiraana vatthokoni vawe. (Esal. 119:165) Mwaha woowi yena onnittottela mureerelo hata aiyawe annittottela mureerelo, nave anaawe annittottela mureerelo.

10. Itthu ohimmye awe Carol sinniixuttiha exeeni?

¹⁰ Muthiyana onimwiiwelela ni onimuttittimiha iyawe hata ori ene oohimalela, onnooniherya wira onnimphenta ni onnimuttittimiha Yehova yoowo aavanhe okhulupale atthu akina. Murokora mmosa oniitthaniwa Carol a wAmérica do Sul onihimya so: “Kinnisuwela wira iyaka ikwaha sikina onnivonya. Masi moota kinimwaakhulaka ni omuthokorerya onnooniherya akhala wira kinnivaha efaita aahiiso nnaari waataana waka ni Yehova. Masi hata vari siiso, kinniimananiha vanceene omwiiwelela iyaka mwaha woowi kiniphavela omuhakalaliha Yehova”.

11. Etthu xeeni enimukhaliherya murokora oniitthaniwa Aneese omulevelela iyawe ni yowiiraneya awe enniixuttiha exeeni?

¹¹ Muthiyana ootheliwa onoomuxankiha vanceene omuttittimiha ni omwiiwelela iyawe akhala wira onoona wira iyawe khonimuthokorerya ni khonimucala. Masi nwehe ele ohimmye awe muthiyana ootheliwa oniihaniwa Aneese vaavo eyo enikhumelela aya. Owo onihimya so: “Kinniimananiha ohaakuva onyoonyiheya maana kinnuupuwela wira otheene ahu ninnivonya. Yoolakela aka, omulevelela ni murima wotheene ntoko Yehova onnilevelela awe. Vaavo kinimulevelela aka iyaka, kinnikhalana murettele ni kinnimaaleleya. (Esal. 86:5) Muthiyana oolevelela vannimukhweela omwiiwelela iyawe.

12. Matakiheryo xeeni Biibiliya orina awe?

¹² Atthu akina anuupuwela wira mutthu oowiiwelela mulolo. Masi eyo khahiyo ekeekhai. Mwaha wa xeeni? Mwaha woowi Biibiliya ookhalana matakiheryo manceene a atthu oowiiwelela yaawo yaari oolipa murima. Nrowe niwehe etthu  nniixutta ahu ni ntakiheryo na Yesu, Abigayili ni Maria.

13. Etthu xeeni enimwiiriha Yesu wiiwelela okhulupale wa Yehova? Mutthokiherye.

¹³ Yesu animwiiwelela Yehova. Nto niireke wiiwelela wawe wooniherya wira aari mulolo wala khaasuwela itthu sinceene? Nnaari. Mwaha woowi, enamuna Yesu iixuttiha awe ennooniherya wira ookhalana ankhili. (Yoh. 7:45, 46) Yehova aanisuwela wira Yesu onnisuwela ovara saana miteko. Tivonto aamweemerenrye awe ovara ni yena opattuxaka itthu sotheene siri wiirimu ni vathi. (Mir. 8:30; aHeeb. 1:2-4) Musuweleke wira nuumala Yehova omuhihimuxa Yesu onvaha “okhulupale wotheene wiirimu ni vathiva-va”. (Math. 28:18) Nnaamwi Yesu osuwelaka itthu sinceene, owo onnimuroromela Yehova ni onnitthara malakiheryo awe. Mwaha wa xeeni? Mwaha woowi Yesu onnimphenta Tiithi awe.—Yoh. 14:31.

14. Alopwana oothela aniixutta exeeni ni (a) enamuna Yehova onaathokorerya awe athiyana? (b) ni muupuwelo ori Miruku 31?

¹⁴ Itthu alopwana oothela aniixutta aya. Yehova khomurumme muthiyana omwiiwelela iyawe mwaha woowi onimoona ohikhalana efaita ntoko iyawe. Ninsuwela sai? Ninnisuwela eyo mwaha woowi Yehova ohaathanla alopwana ni athiyana wira yalamuleleke wiirimu ni Kristu. (aGal. 3:26-29) Okhala wira Yehova onvaha Mwanawe okhulupale, eyo enooniherya wira onnimuroromela ni murima wotheene. Mwa enamuna emosaru, mulopwana ankhili onninvaha okhulupale mwaarawe. Biibiliya onnooniherya itthu sooloka muthiyana ankhili okhanle awe oopaka. Mwa ntakiheryo, owo pooti owehaweha miteko sinivariwa vate vawe, othuma ni otumiha imatta ni omweetta nakoso. (Musome Miruku 31:15, 16, 18.) Muthiyana ootheliwa khahiyo epottha vahinreerela awe ovaha moonelo awe. Ohiya-vo, iyawe onnimuroromela ni onniwiriyana miruku sawe. (Musome Miruku 31:11, 26, 27) Akhala wira mulopwana onnimureerela murima ni onnimuttittimiha mwaarawe, onnimukhweiherya mwaarawe owo omwiiwelela.

15. Ntakiheryo na Yesu ninwiixuttiha exeeni athiyana ootheliwa?

¹⁵ Itthu athiyana ootheliwa aniixutta aya. Nnaamwi Yesu aapanke itthu sinceene ni sooloka, owo khuupuwenle wira vaari voohiloka wiiwelela okhulupale wa Yehova. (1 aKor. 15:28; aFil. 2:5, 6) Mwa enamuna emosaru, muthiyana ookhomaala ni onitthara ntakiheryo na Yesu, owo khonuupuwela wira etthu yoohiloka wiiwelela okhulupale wa iyawe. Owo onnimukhaliherya ni onnimwiiwelela iyawe ohiya mwaha womphenta yena paahi masi mwaha woowi onnimphenta ni omwiiwelela vanceene Yehova.

16. Moovarihana ni 1 Samuweli 25:3, 23-28, mixankiho xeeni Abigayili aarina awe? (Nwehe elatarato ya ekaapa.)

¹⁶ Abigayili aatheliwe ni mulopwana iitthaniwa Nabali. Owo aari oowiitthuna, oowiixinnuwiha ni oohixukhuru. Masi hata vaari siiso, Abigayili khootherenrye etthu wira omwalane ni Nabali. Vakhanle wira Abigayili aahiphavela omwalana ni iyawe, ammuhiya Davidi ni anakhotto awe orowa omwiiva Nabali. Ohiya-vo, aahipaka etthu wira omukhapelele Nabali ni atthu otheene a vatthokoni vawe. Nkahaya muupuwele moota aalimpe awe murima orowa nipuro yaari aya anakhotto 400 ni mwa nttittimiho omutthokiherya muxankiho awe mwene Davidi. Ohiya-vo, owo aahimuxonttela mwene Davidi wira omuswaamihe mwaha wa itthu soohiloka iyawe aapanke awe. (Mmusome 1 Samuweli 25:3, 23-28.) Moohaanyiherya, Davidi aahisuwela wira Yehova aahimuruma muthiyana ole oolipa murima wira onvahe miruku. Nto miruku sa Abigayili saahimukhaliherya Davidi ohipaka etthu yootakhala.

17. Ntakiheryo na Davidi ni Abigayili ninwiixuttiha exeeni alopwana oothela?

¹⁷ Itthu alopwana oothela aniixutta aya. Abigayili aari muthiyana ankhili. Nto okhala wira Davidi aari mutthu ankhili aahiwiriyana miruku aavahiwe awe. Tthiri eyo yaahimwiiriha  Davidi ohiwiiva atthu yahaarina nthowa. Mwa enamuna emosaru, mulopwana ankhili onnivarerya saana moonelo wa mwaarawe ohinatthi opaka yoothanla. Woonasa wene, moonelo wa mwaarawe onoomukhaliherya osyaka opaka soothanla soohiloka.

18. Ntakiheryo na Abigayili ninwiixuttiha exeeni athiyana ootheliwa?

¹⁸ Itthu athiyana ootheliwa aniixutta aya. Muthiyana onimphenta ni onimuttittimiha Yehova onookumiherya mireerelo vatthokoni vawe hata iyawe ohimurumeelaka Yehova ni ohiiwelelaka malakiheryo awe. Owo khonrowa woothererya itthu sihinivarihana ni malamulo a mBiibiliyani wira omwalane ni iyawe. Ohiya-vo, akhala wira owo onoomuttittimiha ni omwiiwelela iyawe, eyo enoomukhaliherya iyawe okhala Namoona a Yehova. (1 Ped. 3:1, 2) Nnaamwi mulopwana owo ohirowaka omurumeela Yehova, Yehova onoohakalala onweha murokora owo omwiiwelelaka iyawe ni ororomeleya wa Yehova.

19. Okathi xeeni muthiyana okhanle awe oohimwiiwelela iyawe?

¹⁹ Masi muthiyana ootheliwa khonrowa omwiiwelela iyawe akhala wira ononvekela opaka etthu ehinivarihana ni malamulo a mBiibiliyani. Mwa ntakiheryo mmuupuwele murokora otheliwe ni mulopwana ohinimurumeela Yehova yoowo oninvekela wootha, wiiya aahiiso opaka etthu ekina enimunanara Yehova. MaKristau otheene waahela muhina arokora ootheliwa, ahaana opacerya omwiiwelela Yehova ohiya atthu. Akhala wira murokora onnivekeliwa ni iyawe opaka etthu ehinivarihana ni malamulo a mBiibiliyani, ohaana okhootta ni omutthokiherya mooreera murima mathowa animwiiriha ohipaka eyo.—Mit. 5:29.

20. Ninsuwela sai wira Maria aahikhalana waataana wooloka ni Yehova?

²⁰ Maria aahikhalana waataana woolipa ni Yehova. Eyo ennooneya, mwaha woowi Maria aanisuwela saana Soolempwa. Okathi aavaanela awe ni Elizabeti maama awe Yohani Mpatisa, Maria aahiromola ireferensia 20 sa Soolempwa sa eHeeberi seiyo aasuwela awe. (Luka 1:46-55) Nnaamwi Maria aahanle vakhaani otheliwa ni Yosefe, nlaikha na Yehova khinaapacenrye omukhumelela Yosefe. Maana nlaikha naapacenrye olavula ni Maria nimuleelaka wira ammuyara Mwaana a Muluku. (Luka 1:26-33) Yehova aanimusuwela saana Maria nave aanikupali wira anwerya omphenta ni omukhapelela saana Mwanawe.  Moohaanyiherya Maria khaahiyale okhalana waataana wooloka ni Yehova hata nuumala Yesu wiiviwa, ohihimuxiwa ni orowa wiirimu.—Mit. 1:14.

21. Ntakiheryo na Maria ninwiixuttiha exeeni alopwana oothela?

²¹ Itthu alopwana oothela aniixutta aya. Mulopwana ankhili onnihakalala vaavo onoona awe wira mwaarawe onnimusuwela saana Biibiliya. Owo khonoova uupuwelaka wira mwaarawe onoomwaakha okhulupale awe vatthokoni. Ohiya-vo, onnisuwela wira akhala wira mwaarawe onnisuwela saana malakiheryo ari mBiibiliyani eyo pooti okhaliherya etthoko awe. Tthiri hata muthiyana osuwelaka itthu sinceene sa mBiibiliyani onvikana iyawe, mulopwana tonrowa ohoolelaka omulompa Muluku vatthokoni ni miteko sikina sa omunepani.—aEef. 6:4.

22. Ntakiheryo na Maria ninwiixuttiha exeeni athiyana ootheliwa?

²² Itthu athiyana ootheliwa aniixutta aya. Ekeekhai wira athiyana ahaana owiiwelela axiiyeya, masi ahaana osuwela wira muritti aya olipiha waamini waya. (aGal. 6:5) Nto wira apake eyo, ahaana wiivaha okathi wira amusome Biibiliya ni wuupuwelela itthu yiixuntte aya. Nto eyo enoomukhaliherya omphenta ni omuttittimiha Yehova ni ohakalala vaavo onimwiiwelela awe iyawe.

23. Mareeliho xeeni anikhumelela vaavo muthiyana oniiwelela awe?

²³ Muthiyana ohinihiya omwiiwelela iyawe mwaha womphenta Yehova onoohakalalaka waavikana athiyana anikhootta wiiwelela mareheryo awo a Yehova. Ohiya-vo, arokora awo animwaavaha ntakiheryo nooloka amiravo aximwali. Nto eyo, ennikhaliherya okumiherya murettele, ohiya paahi vatthokoni vaya masi-tho mmulokoni. (Tito 2:3-5) Olelo-va, mmutthenkesoni mwa Yehova khareere athiyana animurumeela Yehova moororomeleya. (Esal. 68:12) Akhale alopwana wala athiyana, otheene ahu nookhalana muritti woowiiriha muloko okhala woohakalala. Mwaha onittharelana, ninrowa woona moota otheene ahu nikhanle ahu oopaka eyo.