1. Mixankiho xeeni sinaaphwanya arumeyi a Yehova seiyo sinaariipiha murima?

OLUMWENKU wotheene, arumeyi a Yehova annikumanana mixankiho sooriipiha murima ni sookhulumula. Niireke munniweha eyo mmulokoni mwanyu? Anna akina anniriipiwa murima mwaha woowi anoowereyasiwa, akina mwaha wa okhwa ole yamphenta aya. Anna akina anniriipiwa murima mwaha woowi mmusi wala mpatthani aya oohiya omurumeela Yehova. Nave akina, annihaawa mwaha wa ihasara sa ephattu. Anna ni arokora awo otheene ahaana olipihiwa ni omaalihiwa. Ninrowa waakhaliherya sai?

2. Xeeni okathi mukina murummwa Paulo aaphavela awe olipihiwa?

² Murummwa Paulo aahikumana mixankiho soovirikana. (2 aKor. 11:23-28) Nave aahaana ovilela “ohawa mwerutthuni”, woonasa wene waari oretta wanwereya. (2 aKor. 12:7) Nave Paulo aahiriipiwa murima vaavo Dema aahiyale awe weetta ni yena “mwaha w’osiveliwa n’itthu sa vathí”. (2 Tim. 4:10) Paulo aari muKristau oothanliwa ni oolipa murima, yoowo aakhaliherya ni waalipiha atthu akina, hata vari siiso okathi mukina owo aanikhulumuwa.​—aRom. 9:1, 2.

3. Tani yaamukhalihenrye ni omulipiha Paulo?

³ Paulo aahilipihiwa ni okhaliheriwa. Moota xeeni? Orumeelaka munepa awe wootteela, Yehova aahimulipiha Paulo. (2 aKor. 4:7; aFil. 4:13) Nave Yehova aahaaruma maKristau makina wira amukhaliherye ni omulipiha Paulo. Tthiri murummwa Paulo aahimmye wira maKristau awo ‘yàhimuhakalaliha vanjene’. (aKol. 4:11) Eriyari ya atthu awo, owo onnaahimya masina aya ntoko Aristarko, Tikhiko ni Marko. Awo yaahimulipiha Paulo amukhaliheryaka ovilela. Mikhalelo xeeni saakhalihenrye maKristau awo waalipiha atthu akina? Ninrowa otthara sai ntakiheryo naya vaavo nnaamaaliha ahu ni waalipiha atthu akina?

4. Aristarko oonihenrye sai okhala mpatthani oororomeleya a Paulo?

⁴ Aristarko aari muKristau aakhumme oTesalonika muttetthe wa oMasedonia, owo aari mpatthani oororomeleya a Paulo. Ekwaha yoopacerya ninsoma ahu mBiibiliyani voohimya sa Aristarko okathi yoole Paulo aaxukunrye awe muloko wa wEefeso ekwaha awe ya neeraru ya omisionaario. Okathi aamuhoola awe Paulo, Aristarko aahivariwa ni muttitthi wa atthu. (Mit. 19:29) Nuumala otaphuliwa, owo khaamuhiyale wira oopole okumi awe, masi moororomeleya, Aristarko aahikhala ni Paulo. Myeeri vakhaani muhoolo mwaya, Aristarko aahikhala ni Paulo oGresia, hata awanani awe yaaphavela omwiiva Paulo. (Mit. 20:2-4) Mwaakha 58 nuumala Kristu orwa, vaavo Paulo aaroihiwe awe oRoma ntoko pereso, Aristarko aahimuhoola Paulo, nto yeettaka mphironi ekalawa yaahisama. (Miteko 27:1, 2, 41) Nave vanikhala ntoko wira okathi yaari aya oRoma, Aristarko aahiviriha okathi vakhaani ori ene mukhatteya ni Paulo. (aKol. 4:10) Moohaanyiherya Paulo aahilipa vanceene omaalihiwa ni mpatthani awe ole oororomeleya!

5. Moovarihana ni Miruku 17:17, ninrowa okhala sai apatthani oororomeleya?

⁵ Ntoko Aristarko, nihaana okhala apatthani oororomeleya a anna ni arokora ohiya paahi okathi itthu sineetta aya saana, masi-tho “okathi w’oxanka”. (Musome Miruku 17:17.) Nihaana ovikaniha waalipiha ni waamaaliha anna ni arokora hata mixankiho saya sivinre ene. Murokora Lucia, * yoowo okhweliwe anamuyari awe, wanipacerya aakhwiiye paapa awe, nto nuuvira myeeri miraru onakhwa maama awe mwaha wa kanser, owo onihimya so: “Kinoona wira mixankiho sinninriipiha murima mwa okathi munceene. Miyo kinnaaxukhurela vanceene apatthani aka oororomeleya yaawo anisuwela wira kinniriipiwa murima hata ovinre ene okathi munceene nuumala anamuyari aka okhwa.

6. Akhala wira ninniroromeleya ni apatthani ahu, nihaana opaka exeeni?

⁶ Apatthani oororomeleya annipaka sotheene aniwerya aya wira yaakhaliherye annaya ni arokoraya. Mwa ntakiheryo, munna Pedru aahileeliwa ni meediku awe wira aahikhalana oretta  waarowa wunnuwa naananoru ni wammwiiva. Mwaarawe oniihaniwa Katarina, onihimya so: “Anamathelana amosa a muloko ahu yaahiniroiha oxiripitali, weiwo noonale ahu wira Pedru aaniwereiwa. Awo yaahikhala ni hiyo okathi ole wooxankiha ni yaahinikhaliherya ovilela okathi wotheene naaphavela ahu nikhaliheryo”. Tthiri eparakha yuulupale ni ti voomaaliha okhala ni apatthani oororomeleya okathi wa mixankiho!

7-8. Moovarihana ni aKolosi 4:7-9, Tikhiko oonihenrye sai okhala mpatthani oororomeleya?

⁷ Tikhiko aari muKristau a oRoma edistritu ya wÁsia, owo aari mpatthani oororomeleya a murummwa Paulo. (Mit. 20:4) Mwaakha 55 nuumala Kristu orwa, Paulo aahipacerya okuxa musurukhu waasonkheriwe wira akhaliheriwe maKristau a oYudeya. Nto aahinvekela Tikhiko wira omukhaliherye ovara muteko ole wootepa otthuneya. (2 aKor. 8:18-20) Muhoolo mwaya, okathi murummwa Paulo aatthukweliwe awe oRoma ekwaha yoopacerya, Tikhiko aari ntoko namuhupi a Paulo. Owo aaniroiha mmilokoni sa wÁsia mihupi ni iwarakha soolipiha sa murummwa Paulo.—aKol. 4:7-9.

⁸ Tthiri Tikhiko aahivikaniha okhala mpatthani oororomeleya a Paulo. (Tito 3:12) Khahiyo wira maKristau otheene yaari oororomeleya ntoko Tikhiko. Mwaakha 56 nuumala Kristu orwa, okathi Paulo aatthukweliwe awe ekwaha ya nenli, Paulo aahilepa wira maKristau makina a wÁsia khiyaaphavela okhala ni murummwa Paulo. Woonasa wene, yaanipaka eyo yoovaka olupatthiwa. (2 Tim. 1:15) Masi Paulo aanimuroromela Tikhiko ni aahinvaha miritti sikina. (2 Tim. 4:12) Tthiri Paulo aanixukhurela okhalana mpatthani ooloka ntoko Tikhiko.

9. Ninrowa omutakiha sai Tikhiko?

⁹ Nnoowerya omutakiha Tikhiko nikhalaka mpatthani oororomeleya. Mwa ntakiheryo, ohiya ohimya paahi wira nnimwaakhaliherya anna ni arokora oothoiwa, nihaana opaka etthu wira naakhaliherye. (Math. 5:37; Luka 16:10) Vaavo ale athoiwale ansuwela aya wira nnimwaakhaliherya, awo annihakalala vanceene. Murokora mmosa onnitthokiherya nthowa naya, oriki: “Mutthu khontepa oxanka mwaha woowi onnisuwela wira ookhala mutthu onrowa omukhaliherya ntoko oleihenrye awe”.

10. Ntoko onihimya awe Miruku 18:24, tani akhanle oowaalipiha ni waamaaliha ale anyoonyiheyale?

 ¹⁰ Atthu ale ariipiwe murima aahiiso anyoonyihiwe, okhala wene waasivela omuleela mixankiho saya mpatthani aya oororomeleya. (Musome Miruku 18:24.) Bijay aahinyoonyiheya nuumala wiiwa wira mwanawe oopacerya aahikumihiwa mmulokoni, owo aahimmye so: “Miyo kaaphavela omuleela muxankiho aka mutthu kaamuroromela aka”. Okhala wira Carlos aahivonya, owo aahiyeleela iparakha sawe sotheene mmulokoni. Owo onihimya so: “Miyo kaahiphavelasa ‘opuro woomaaleleya’ kaarowa aka omuleela moonelo aka kihoovaka wira kamphukeliwa”. Carlos aahoona wira opuro owo woomaaleleya yaari axitokweene, yaawo yaamukhalihenrye oxintta muxankiho awe. Nave Carlos aahilipa mwaha woowi aahisuwela wira axitokweene khiyaarowa omuleela mutthu mukina itthu aalenle awe.

11. Ninrowa okhala sai mpatthani oororomeleya?

¹¹ Wira nikhale mpatthani oororomeleya ni onleeliwa isiiri, nihaana okhala mutthu oopixa murima. Nuumala Zhanna ohiiwa ni iyawe, owo aahilipa mwaha woomuleela moonelo awe mpatthani awe muulupale ni oororomeleya. Zhanna onihimya so: “Owo aahikiwiriyana moopixa murima, hata okathi mukina kaamakela omuleela itthu simosaru”. Nyuwo nawe munoowerya okhala mpatthani ooloka, akhala wira munoosuwela waawiriyana oratteene atthu akina.

12. Marko aari aani ni oonihenrye sai wira aanaakhaliherya atthu akina?

¹² Marko aari muKristau muYuda aayariwe oYerusalemu. Munnawe iihaniwa Baarnaba, yoowo aari misionaario oosuweliwa oratteene. (aKol. 4:10) Vanikhala ntoko wira emusi ya Marko yaahikhalana mihakhu sinceene, masi Marko khoona mihakhu ni mireerelo okhala sootepa otthuneya mookumini mwawe. Okumi awe wotheene, Marko aahikhalana munepa wowiivahererya, eyo piiyo, owo aanaakhaliherya atthu akina nto eyo yaanimuhakalaliha vanceene. Mwa ntakiheryo, ikwaha sinceene Marko aahivara ni murummwa Paulo okathi mukina ni murummwa Pedru. Vanikhala ntoko wira Marko taathuma yoolya, ophavelasa opuro woomaka ni opaka itthu sikina. (Mit. 13:2-5; 1 Ped. 5:13) Paulo aahimuhimya Marko okhala mutthu ‘avarana awe muteko, ovarelaka Omwene wa Muluku’ ni aari mutthu ‘àmuhakalaliha vanjene’ murummwa Paulo.​—aKol. 4:10, 11.

13. 2 Timótheyo 4:11, onooniherya sai wira Paulo aanixukhurela muteko woororomeleya wa Marko?

¹³ Marko aahikhala mpatthani muulupale a murummwa Paulo. Mwa ntakiheryo, mwaakha 65 nuumala Kristu orwa, okathi Paulo aatthukweliwe awe ekwaha yookiserya oRoma, owo aahilepa epaphelo ya nenli ya Timootheyo. Epaphelo ele, Paulo aahinvekela Timootheyo wira orowe oRoma vamosa ni Marko. (2 Tim. 4:11) Moohaanyiherya, Paulo aanixukhurela vanceene muteko woororomeleya wa Marko ni aahinvekela Marko okhala ni yena okathi ole wootepa otthuneya ni wooxankiha. Tthiri Marko aahimukhaliherya Paulo mwa inamuna sowooneya, woonasa wene onvahaka yoolya ni ikaruma wira olepe iroolu wala iwarakha. Tthiri okhaliheriwa ni olipihiwa, waahimwiiriha Paulo ovilela mahiku ale oxankiha ni ookiserya vaavo aarowa awe wiiviwa.

14-15. Matheyo 7:12 onniixuttiha exeeni sa moota nikhanle ahu oowaakhaliherya atthu akina?

¹⁴ Mmusome Matheyo 7:12. Tthiri vaavo ninkhalana ahu mixankiho, ninnaaxukhurela vanceene atthu ale annikhaliherya! Ryan yoowo Paapa awe okhwiiye mootutuxerya mwaha wa ehasara ohimmye so: “Sookhala itthu sinceene ninvara ahu khula nihiku, seiyo sinikhala ntoko wira sookhalana efaita okathi ninkhalana  ahu mixankiho. Masi ti voolipiha okhaliheriwa mwa enamuna enooneya hata etthu eyo ekhalaka yaamukhaani”.

¹⁵ Akhala wira na atthu aniweha itthu sinaaxankiha atthu akina, woonasa wene nnimoona inamuna nikhanle ahu oowaakhaliherya. Mwa ntakiheryo, murokora mmosa aahimukhaliherya Pedru ni Katarina, yaawo naalavunle ahu wanipacerya orowa oxiripitali wira Pedru olooliwe. Nnaamwi Pedru ni Katarina yahaawerya weettiha ekaaro, murokora ole aahipaka eprograma wira anna ni arokora a muloko ole yaakuxeke mukaaroni mwaya. Niireke mareheryo awo yaahikhaliherya? Katarina onihimya so: “Vaakhala ntoko wira naaruliwe muritti woolemelexa”. Okathi wotheene, muhiliyale wira munoowerya waalipiha ni waamaaliha atthu akina hata mpakaka etthu yaamukhaani.

16. Ntakiheryo na Marko ninniixuttiha exeeni voohimya sa waalipiha ni waakhaliherya atthu akina?

¹⁶ Murummwa Marko yoowo aakhanle okathi wa Yesu, aari muKristau ooluttuweliwa. Saahikhala itthu sinceene sa faita anvarela awe Yehova, ohela muhina olepa Evangelyo erina nsina nawe. Tthiri Marko aahirumeela okathi awe wira omulipihe Paulo, nave Paulo khoovelela onvekela nikhaliheryo Marko. Okathi mmusi awe aakhwiiye awe, Angela aahixukhurela vanceene okhaliheriwa ni olipihiwa ni atthu akina. Owo onihimya so: “Vaavo apatthani annikhaliherya aya, hiyo ninniphavela ovaanelana. Kinnoona wira aniphavela okikhaliherya, khahiyo wira anookhanyereriwa”. Nto nihaana wiikoha so: ‘Kiireke onnikisivela waakhaliherya ni waalipiha anna ni arokora?’

17. Wuupuwelela yoolepa ya 2 aKorinto 1:3, 4 enrowa onikhaliherya sai waalipiha atthu akina?

¹⁷ Khivanivila waaphwanya anna ni arokora nikhanle ahu oowaakhaliherya ni waalipiha. Hiyo pooti waalipiha anna ni arokora awo mwa enamuna naalipihiwe ahu. Murokora oniihaniwa Nino, yoowo okhweliwe apiipi awe onihimya so: “Yehova pooti onirumeela wira naalipihe atthu akina akhala wira ninnimweemererya onirumeela”. (Mmusome 2 aKorinto 1:3, 4.) Makaariyo, yoowo nimulavunle ahu wanipacerya onihimya  so: “Tthiri moolumo ari 2 aKorinto 1:4 teekeekhai. Vaavo mutthu onnilipiha awe, woonasa wene onlepelaka mensaaxe wala onivarela etthu enooniherya oreera murima, nihaana orumeela moolumo ene yaawo wira naalipihe atthu akina”.

18. (a) Xeeni atthu akina anoovelela aya waalipiha atthu akina? (b) Ninrowa owerya sai waalipiha atthu akina? Nvahe ntakiheryo.

¹⁸ Nihaana opaceriha waavya inamuna nikhanle ahu oowaakhaliherya atthu akina hata noovaka. Mwa ntakiheryo, hiyo pooti ohisuwela yoopaka aahiiso yoohimya wira nimulipihe ni ommaaliha mutthu orina mixankiho. Mutokweene oniihaniwa Paulo onnuupuwela moota atthu akina yaimananinhe aya ommaaliha nuumala okhweliwa apapawe. Owo onihimya so: “Kinnikupali wira anna ale khivaakhweelale orwa ovaanela ni miyo. Awo khiyoona yoohimya. Hata vari siiso, kinnixukhurela vanceene wiimananiha waya okikhaliherya ni okilipiha”. Mwa enamuna emosaru, nuuvira etetere yuulupale, munna oniihaniwa Tajon ohimmye so: “Ohimya ekeekhai, nkinuupuwela khula muhupi atthu yaakinviyarenle aya nuuvira etetere ele, masi kinnuupuwela moota yiimananinhe aya okikhapelela”. Nnoowerya waalipiha atthu akina akhala wira ninnaakhapelela.

19. Xeeni mulakenle anyu ‘wàhakalaliha vanjene’ atthu akina?

¹⁹ Okhala wira ninnitepa waattamela wanikisa wa olumwenku ola, okumi ahu onrowa otepaka oxankiha ovikana khalai. (2 Tim. 3:13) Nave nihaana othipelela olipihana mwaha woowi naatthu oohimalela ni ninnivikaniha ovonya. Etthu yuulupale yaamukhalihenrye murummwa Paulo ovilela moororomeleya mpakha wanikisa mwaha woowi aanikhaliheriwa ni olipihiwa ni maKristau akhwaawe. Nto nihaana okhala oororomeleya ntoko Aristarko ni Tikhiko ni waarumeela atthu akina ntoko Marko. Niira siiso, nnoowerya waakhaliherya anna ni arokora ovikaniha omurumeela Yehova moororomeleya.​—1 aTes. 3:2, 3.