1-2. (a) Xeeni nihintikinihiwa ahu akhala wira guvernu onninikhoottiherya omukokhorela Yehova? (b) Mwaha ola, ninrowa othokorerya exeeni?

ERELATOORIO ya olumwenku wotheene ya 2018, ehooniherya wira anamalaleerya anivikana 223.000 anikhala ilapo muteko ahu onikhoottihiwa aya ni guvernu. Tthiri eyo khennitikiniha. Ntoko niwenhe ahu mwaha ovinre, maKristau eekeekhai annilipelela olupatthiwa. (2 Tim. 3:12) Moohicikha opuro ninkhala ahu, pooti ophiya okathi makhulupale a guvernu anrowa aya onikhoottiherya omukokhorela Muluku ahu oophenta, Yehova.

² Akhala wira elapo munikhala anyu muteko ahu onnikhoottihiwa ni guvernu, woonasa wene nyuwo pooti wiikoha so: ‘Kiireke olupatthiwa nno onooniherya wira khaninreelihiwa ni Muluku? Kiireke okhoottiheriwa onoomaliha omukokhorela wahu Yehova? Kiireke kihaana othaamela elapo ekina wira kamukokhoreleke Yehova mootaphuwa?’ Mwaha ola, ninrowa waakhula makoho awo. Nuumala-vo, ninrowa oweha etthu nikhanle ahu oopaka wira nivikanihe omukokhorela Yehova hata nikhoottiheriwaka. Wanikisa ninrowa woona miraakho nikhanle ahu oosyaka.

3. (a) Moovarihana ni 2 aKorinto 11:23-27, mwa inamuna xeeni murummwa Paulo aalupatthiwe awe? (b) Ntakiheryo na murummwa Paulo, ninniixuttiha exeeni?

³ Akhala wira guvernu onnikhoottiha muteko ahu woolaleerya, woonasa wene hiyo pooti okhalana moonelo woohiloka nuupuwelaka wira Muluku oohiya onireeliha. Masi muupuweleke wira okhoottiheriwa iwo khontaphulela wira Yehova khonsiveliwa ni muteko nninvarela  ahu. Nwehe ntakiheryo na murummwa Paulo. Owo aanireelihiwa vanceene ni Muluku, mwa ntakiheryo, Paulo aahikhalana eparakha yoolepa iwarakha 14 siniirela mpantta Soolempwa sa eGriki ni aahithanliwa okhala murummwa a amalapo. Hata vaari siiso, murummwa Paulo aahilupatthiwa vanceene. (Mmusome 2 aKorinto 11:23-27.) Ntakiheryo na murummwa Paulo ninniniixuttiha wira Yehova pooti weemererya arumeyi awe oororomeleya olupatthiwa.

4. Xeeni ninlupatthiwa ahu ni olumwenku ola?

⁴ Yesu aahihimya nthowa naya ninlupatthiwa ahu. Owo aahimmye wira ninnilupatthiwa mwaha woowi khanniirela mpantta olumwenku ola. (Yoh. 15:18, 19) Olupatthiwa aahiiso onyokhiwa khontaphulela wira Yehova oohiya onireeliha. Masi onooniherya wira ninnipaka itthu sooloka!

5. Niireke apinaatamu anoowerya omaliha omukokhorela wahu Yehova? Mutthokiherye.

⁵ Apinaatamu khanrowa owerya omaliha moomalela omukokhorela wahu Muluku oowerya sotheene, Yehova. Anamunceene aheererya opaka eyo, masi khawenrye. Nkahaya nwehe ele yaakhumelenle okathi wa Ekhotto ya Nenli ya Olumwenku Wotheene. Iguvernu sa ilapo sinceene, saahaalupattha vootakhala Anamoona a Yehova. Okathi ole, muteko ahu khahiyo paahi waakhoottihiwa wAlemanha Nazista, masi-tho wAustrália, oCanadá ni ilapo sikina. Niireke eyo yaahimaliha muteko ahu woolaleerya? Nnaari, nwehe ele yaakhumelenle 1939, mwaakha yoowo yaapacenrye aya Ekhotto ya Nenli ya Olumwenku Wotheene yaahikhala anamalaleerya 72.475 olumwenku wotheene. Irelatoorio sinooniherya wira 1945, mwakha yaamanle aya ekhotto ele yaahikhala anamalaleerya 156.299. Nummuru na anamalaleerya naahincerereya ikwaha piili. Tthiri eyo enooniherya wira Yehova aahireeliha vanceene!

6. Itthu xeeni sooloka sikhanle ookhumelela okathi ninlupatthiwa ahu? Nvahe ntakiheryo.

⁶ Ohiya onoopopiha, olupatthiwa pooti onivaha eparakha yoovikaniha omukokhorela Yehova moomalela. Mwa ntakiheryo, anamathelana amosa yaarina mwaana mwaamukhaani, yaakhala elapo muteko ahu onikhoottihiwa aya ni guvernu. Ohiya oxinttiwa ni woova, anamathelana ale yaahipacerya orumeela ntoko mapioneero ookilaatheya. Amuthiyana aahihiya muteko aavara awe hata aaliviwa musurukhu munceene. Amulopwana ohimmye wira okhoottiheriwa iwe ohaakhaliherya atthu anceene ophavela waasuwela Anamoona a Yehova. Nto eyo yoomukhaliherya munna ole opaceriha soosoma sa Biibiliya.  Okhoottiheriwa pooti waaphwanyiha mareeliho atthu akina. Mwa ntakiheryo, mutokweene mmosa a elapo ele ohimmye wira atthu anceene yaahiyale olaleerya yaahitthikela orowela mithukumano ni olaleerya.

7. (a) Onamukuttho 26:36, 37, onniixuttiha exeeni? (b) Exeeni munrowa anyu opaka okathi ninkhoottiheriwa ahu omukokhorela Yehova?

⁷ Awanani ahu aniphavela wira nihiye omukokhorela Yehova. Nto ohiya paahi onikhoottiherya, awo anninootherya itthu sinceene soohiloka. Nave annaaruma mapoliisia owehaweha ipa sahu, oniroiha otribunaali ni waatthukwela mukhatteya anna akina. Awo anuupuwela wira, waaroiha anna akina mukhatteya anoowerya onoopopiha ni onihiiha ovara muteko wa Yehova. Akhala wira nnoopacerya owoova mwaha wa itthu anihimya aya aahiiso anniiriha aya hiyo pooti ovukula muteko nninvarela ahu Yehova aahiiso ohiya omukokhorela. Hiyo khanimphavela okhala ntoko atthu ale anilavuliwa Onamukuttho 26:36, 37. (Mmusome.) Tthiri khanimphavela wira owoova atthu oniirihe ohiya omurumeela Yehova aahiiso ovukula ovara miteko sahu sa eKristau. Omuroromela wahu Yehova moomalela onoonikhaliherya ohitepa oxanka. (Yes. 28:16) Okathi wotheene nihaana onvekelaka Yehova wira onivahe malakiheryo. Noosuwela wira Yehova ori ni hiyo, nto khiivo eguvernu aahiiso pinaatamu orina owerya onrowa onikhoottiherya omukokhorela moomalela Muluku ahu oophenta.​—aHéb. 13:6.

8-9. (a) Yoothanla xeeni khula mutthu aahiiso muhooleli a etthoko okhanle awe oopaka? (b) Exeeni enrowa omukhaliherya opaka yoothanla yooloka?

⁸ Akhala wira elapo munikhala anyu guvernu onnikhoottiha muteko ahu, woonasa wene nyuwo pooti wiikoha akhala wira pooti othaamela elapo ekina wira mwamukokhoreleke Yehova mootaphuwa. Nyuwo murina muritti woothanla othaama aahiiso nnaari. Atthu akina onnaasivela othokorerya ele maKristau a eseekulu yoopacerya yaapanke aya nuumala opacerya olupatthiwa. Nuumala awanani aya omwiiva Siteefano, arummwa yaari oYerusalemu yaahitthyawela ilapo sikina ntoko oYudeya ni oSamariya. Akina yaahithaamela ilapo sootepa orakamela oYerusalemu, ntoko oFenisia, oKipero ni wAntiyokiya. (Math. 10:23; Mit. 8:1; 11:19) Nave Biibiliya onihimya wira okathi mukina maKristau yahaareere aya olupatthiwa, murummwa Paulo aahithanla ohithaama mittetthe iye yaalupatthiwa aya. Owo aahileva okumi awe wira olaleye ihapari sooreera ni waalipiha anna ni arokora yaakhala mittetthe yaalupatthiwa aya.​—Mit. 14:19-23.

⁹ Yowiiraneya ela enniixuttiha exeeni? Enniixuttiha wira, othaama aahiiso nnaari yoothanla khula muhooleli a etthoko okhanle awe oopaka. Ohinatthi othaama muhooleli a etthoko ohaana ovekela, othokorerya makhalelo a etthoko awe ni oweha itthu sooloka ni soohiloka sinrowa okhumeelela mwaha woothaama. Myaha ntoko iyo khula muKristau onrowa ‘wìreya muritti awe’. (aGal. 6:5, Biblya Exirima) Nto nihaaphukeleke atthu akina mwaha wa yoothanla apanke aya voohimya sa mwaha owo.

10. Akhala wira muteko ahu onnikhoottihiwa, efiliyaali ni axitokweene anrowa opaka exeeni?

¹⁰ Ninrowa ovikaniha sai omukokhorela Yehova hata nikhoottiheriwaka? Efiliyaali ya elapo anyu, enimwaavaha malakiheryo axitokweene a muloko anyu a moota munrowa anyu waakhelaka yoolya ya omunepani, opaka mithukumano ni moota woolaleerya. Masi akhala wira efiliyaali kheniwerya olavula ni axitokweene a muloko anyu, nto axitokweene awo animookhaliheryani nyuwo ni anna otheene ovikaniha omukokhorela Yehova. Axitokweene anrowa woovahani malakiheryo amurumeelaka Biibiliya ni iliivuru sinikumiheriwa  ni mutthenkeso ahu.​—Math. 28:19, 20; Mit. 5:29; aHéb. 10:24, 25.

11. (a) Exeeni enookupalihani wira khamunikhala-khala nvoliwaka etala ya omunepani? (b) Muhaana opaka exeeni wira mmukhapelele Biibiliya anyu ni iliivuru sikina?

¹¹ Yehova ooleiherya wira arumeyi awe khanikhala-khala avoliwaka etala ya omunepani. (Yes. 65:13, 14; Luka 12:42-44) Nto mukupaliki wira mutthenkeso wa Yehova onoopaka itthu sotheene wira nvikanihe okhala ororomeleya wa Yehova, ni onimoolipihani. Masi yookhala etthu nyuwo mukhanle anyu oopaka. Etthu ene tiila: Muhaana ophavelasa opuro wooreerela wira munvithe Biibiliya anyu ni iliivuru sikina murina anyu. Mukhalaneke ephoole wira muhihiye ikaruma iyo sa faita yinceene sikhale soowimpirimiriwa aahiiso eletroniko nipuro atthu akina anrowa aya osuwela. Khula mmosa a hiyo ohaana opaka etthu wira ovikanihe olipa momunepani okathi ninkhoottiheriwa ahu omukokhorela Yehova.

12. Axitokweene anrowa olokiherya sai opuro wa mithukumano voohisuweliwa ni ale annilupattha?

¹² Ankhi mithukumano sa khula esumana? Axitokweene anoopaka mareheryo wira nwerye oweha mithukumano sotheene voohisuweliwa ni atthu annilupattha. Awo animoovahani malakiheryo wira muthukumaneke igrupu saamukhaani ni khula okathi anooturukaka opuro ni okathi wa mithukumano iyo. Wira muhaakumiherye mixankiho anna ni arokora, vaamureerela olavula moohirunya okathi muniphiya anyu aahiiso okhuma omuthukumanoni. Nave wira atthu akina ahisuwele vaamureerela orowa omithukumanoni nwanre ene ikuwo muniwara anyu mwaavaraka miteko sikina masi siri ene sooloka.

13. Ntakiheryo na anna ni arokora a União Soviética ninniixuttiha exeeni?

¹³ Ankhi muteko woolaleerya? Musuweleke wira khula opuro makhalelo annivirikana. Hata vari siiso, okhala wira ninnimphenta Yehova, nnoophwanya enamuna yooloka ya waalaleerya atthu ihapari sooreera. (Luka 8:1; Mit. 4:29) Eyo ti etthu anna ni arokora yaapanke aya okathi wa União Soviética. Nwehe ele mulipa-oolepa sowiiraneya ohimmye awe oriki: “Okathi guvernu aahimmye awe wira Anamoona a Yehova ahaalaleeryeke atthu akina, awo yaahipacerya olaleerya moohiilokiherya, yaalaleeryaka anamwaattamanani aya, ale yaavarana aya muteko ni apatthani aya. Okathi yaaroihiwe aya mapuro anvariwa muteko mookhanyereriwa, Anamoona yanaalaleerya apereso akhwaaya”. Nnaamwi yaakhoottihiwa olaleerya, anna ni arokora a wUnião Soviética khiyaahiyale olaleerya. Nto hata muteko ahu woolaleerya okhoottihiwaka elapo munikhala anyu mukhalane yoolakela emosaru yaarina aya anna ale, eyo piiyo, ohihiya olaleerya!

14. Esalimo 39:2, ennikhaliherya osyaka muraakho xeeni?

¹⁴ Nvaheke ephoole itthu munaaleela anyu atthu akina. Vaavo ninkhoottihiwa ahu, nihaana osuwela “okathi w’omàla”. (Mus. 3:7) Okathi owo nihaana osyaka olavula myaha sihinreerela  osuweliwa ni atthu akina, ntoko masina a anna ni arokora, mapuro nimpaka ahu mithukumano, moota ninlaleerya ahu ni moota nnaakhela ahu iliivuru sahu. Nihikhala-khale naaleelaka itthu iyo makhulupale a guvernu nnakhala apatthani ahu wala amusi ahu anikhala muttetthe mukina aahiiso elapo ekina. Akhala wira nnoomorela muraakho owo, pooti waakumiherya maxakha anna ni arokora.​—Musome Esalimo 39:2.

15. Exeeni Satana oneererya awe oniiriha, nto nihaana opaka exeeni wira nihimorele muraakho owo?

¹⁵ Niheemererye mixankiho saamukhaani sinivalaanyaka. Satana onnisuwela wira empa yookawanyeya enoomora. (Mar. 3:24, 25) Nto onniimananiha okumiherya ohiiwanana eriyari ya anna wira aakawanye. Owo oniphavela wira niwaneke yoohiru ohiya owana ni Satana owo.

16. Ntakiheryo xeeni nooloka murokora Gertrud onivanhe awe?

¹⁶ Hata anna ale oolipa momunepani, ahaana okhalana ephoole wira ahimorele muraakho owo. Nwehe ntakiheryo na arokora anli oowoottihiwa Gertrud Poetzinger ni Elfriede Löhr. Awo yaatthukiwe vamosa ni arokora akina nipuro naavariwa muteko wookhanyereriwa wa maNazista. Murokora Elfriede aanilavula myaha soolipiha. Nto Gertrud aahipacerya omukhalela nrima Elfriede. Muhoolo mwaya, Gertrud aahipacerya wuuliwa muru mwaha wa etthu aapaka awe, nto aahinvekela Yehova nikhaliheryo wira ohitthikele-tho omukhalela nrima Elfriede. Vano murokora Gertrud aalempe so: “Nihaana wiixutta weemererya [makhalelo ahu] akhala wira atthu akina annisuwela itthu sinceene aahiiso annivahiwa miritti sinceene onivikana hiyo”. Exeeni yaamukhalihenrye oxintta omukhalela nrima mukhwaawe? Gertrud aaniweha mikhalelo sooloka Elfriede aarina awe ntoko okhala mutthu oopatthaneya. Mwaha woopaka eyo yaahimukhaliherya otthikela okhalana waataana wooloka ni Elfriede. Oowanli aya yaahoopowa okathi ole yaalupatthiwa aya, ni yaahimurumeela Yehova moororomeleya mpakha wanikisa wa okumi aya valaponi. Ntakiheryo naya ninniixuttiha exeeni? Ninniixuttiha wira nihikhala-khale nivalaanaka ni anna, nto akhala wira sinnikhumelela mixankiho, nihaana wiimananiha ophuka wira nikhaleke ni murettele.​—aKol. 3:13, 14.

17. Xeeni okathi wotheene onireerela aya otthara malakiheryo?

¹⁷ Okathi wotheene mutthareke malakiheryo. Akhala wira nnootthara malakiheryo ninvahiwa ahu ni anna arina miritti mmutthenkesoni, nnoosyaka ophwanya maxakha. (1 Ped. 5:5) Mwa ntakiheryo, elapo emosa muteko ahu waakhoottihiwa aya, anna arina miritti mmulokoni yaahaaleela anamalaleerya wira ahaavaheke atthu iliivuru sahu soowimpirimiriwa okathi woolaleerya. Masi pioneero mmosa, uupuwela wira onnisuwela itthu waavikana akina, nto aahipacerya waavaha atthu iliivuru. Exeeni yaakhumelenle? Moohipisa nuumala okhuma muttetthe ole yaalaleerya aya  moohiilokiherya, awo yaahivariwa ni mapoliisia. Woonasa wene, mapoliisia ale yanaatthara anna ale ni yaahikuxa iliivuru sotheene yaakanwe aya. Yowiiraneya ela enniixuttiha exeeni? Enniixuttiha wira, okathi wotheene nihaana otthara malakiheryo ninvahiwa ahu ohiya wiixoona okhala atthu oosuwela waavikana atthu akina. Okhala wene, Yehova onninreeliha akhala wira ninniwiiwelela ale athanliwe wira anihooleleke.​—aHéb. 13:7, 17.

18. Xeeni vahinreerela aya opaka malamulo oohireerela?

¹⁸ Muhipakeke malamulo ahinireerela. Akhala wira axitokweene anoopaka malamulo oohikhalela, eyo pooti waaxankiha anna ni arokora. Munna Juraj Kaminský onnuupuwela etthu yaakhumelenle okathi muteko ahu waakhoottihiwa aya elapo ya oTchecoslováquia. Owo oni: “Nuumala anna akina yaarina miritti ni axitokweene otthukweliwa mukhatteya, atthu akina yaahoolela mmulokoni ni isirkwiitu iye, yaahipacerya opaka malamulo a mweettelo alepaka elista ya itthu soopaka ni soohipaka”. Yehova khonivanhe ehakhi yoopaka soothanla sa atthu akina. Ale animakela opaka malamulo oohireerela, khanaakhapelela anna ni arokora, masi anniikhaliha axineene waamini wa anna ni arokora.​—2 aKor. 1:24.

19. Moovarihana ni 2 Wahala 32:7, 8, xeeni vahinreerela aya woova olavilavi wa Satana?

¹⁹ Nwanani ahu muulupale Satana Diabo, khonikhala-khala ohiyaka waalupattha arumeyi oororomeleya a Yehova. (1 Ped. 5:8; Wis. 2:10) Satana ni ale animukhaliherya pooti weererya onikhoottiherya omukokhorela Yehova. Masi nihikhala-khale neemereryaka owoova atthu oniirihaka ohiya omurumeela Yehova! (Otum. 7:21) Maana Yehova ori ni hiyo, owo onoovikaniha onikhaliherya hata muteko ahu okhoottihiwaka.​—Mmusome 2 Wahala 32:7, 8.

20. Mulakenle opaka exeeni?

²⁰ Nihaana okhalana yoolakela emosaru yaarina aya annihu a eseekulu yoopacerya vaavo makhulupale yaakhoottiherya aya ovara muteko wa Yehova. Awo yaahimmye so: “Mutthokelele yenyu yari etthu yoloka oholo wa Muluku, ohiya omwiwelela yowo, wira niwiweleleni nyuwo! Hiyo khaninwerya ohiya olaleya itthu sònalyahu ni sìwalyahu!”​—Mit. 4:19, 20.