AHEEBERI yaakhala Elapo yooleiheriwa, mwaakha waapacerya eriyari ya Setembro ni Outubro. Okathi yoowo, yaalima aya aya ni waala.

Atthu yaanikontarela mweeri ntero attharaka moota mweeri weetta awe, yoowo okhala wene waakhala mahiku 29 aahiiso 30. Nave yaanikontarela mwaakha attharaka makhalelo a nsuwa. Masi mwaakha yaakontarela aya attharaka moota mweeri weetta aya, waakhala wookhuveya moovirikana ni mwaakha yaatthara aya makhalelo a nsuwa. Nto yaahaana ophwanya enamuna yooloka ya okontarela okathi arumeelaka inamuna iyo piili. Woonasa wene, yaanipaka eyo yincereryaka mahiku aahiiso okathi mukina wuncererya mweeri mmosa ohinatthi opacerya mwaakha musya. Nto mwaakha owo waanivarihana ni okathi wa waala ni ohepha.

Okathi wa Moise, Muluku aahaaleela arumeyi awe wira mwaakha waahaana opacerya mweeri wa Abibi aahiiso Nisani, niire so, okathi wa primavera. (Okhum. 12:2; 13:4) Mweeri owo yaanikhala efesta yaavarihana ni ohemphwa esevada. — Okhum. 23:15, 16.

Musomi mmosa ohimmye wira vaanikhweya osuwela akhala wira vaanireerela wuncererya mweeri mmosa. Nave owo ohimmye so: “Vaanikhweya osuwela akhala wira vaanireerela wuncererya mahiku aahiiso mweeri. Efesta ya Paasikha yaapakiwa mweeri osanrye ene 14 a Nisani, eyo yiiraneya okathi wa primavera, niire so, okathi othana ni ohiyu waalikana aya. Masi akhala wira yaanoona wira Paasikha aattharelana aarowa okhala ehinatthi equinócio, nto awo yaanincererya mweeri mmosa ohinatthi opacerya mwaakha musya”.

Anamoona a Yehova annivarerya eyo okathi anithanla aya nihiku na Yoolya ya Ohiyu ya Apwiya, eyo eniiraneya 14 a Nisani eyiita ni ennivarihana ni kalentaario a eheeberi. Miloko sa olumwenku wootheene sinnileeliwa nihinatthi ophiya nihiku nlo. a

Masi aisarayeli yaasuwela sai okathi waamala aya mweeri ni waapacerya aya mweeri mukina? Olelo-va, vannikhweya osuwela eyo, maana nyuwo pooti onweha kalentaario aahiiso telefoni anyu. Masi okathi wa Biibiliya khivaakhweya.

Okathi wa Mutaaseke, miyeeri sootheene saakhalana mahiku 30. (Maph. 7:11, 24; 8:3, 4) Muhoolo mwaha, okathi wa aisarayeli, khahiyo wira miyeeri sootheene saakhalana mahiku 30. Kalentaario a aheeberi, mweeri waapacerya okathi vaaweryaneya aya oweha mweeri musya. Nto khula mweeri waakhalana mahiku 29 aahiiso 30.

Okathi omosa Davidi ni Yonathani yaahihimya wanipacerya wa mweeri musya ni moolumo oowi: “Melo nìra na mweri woneya”. (1 Sam. 20:5, 18) Nto vanikhala ntoko wira okathi wa Davidi, miyeeri saanikontareliwa khalai ene. Masi aisarayeli yaasuwela sai okathi waarowa aya opacerya mweeri musya? Nnoowerya osuwela eyo ni Mishnah, eyo piiyo, iliivuru, malamulo, soolema ni itthu yaahimya aya ayuda. Eyo ennooniherya wira nuumala ayuda otthika weepotthani oBabilonia, eSineedrio, niire so, makhulupale a ayuda, yaanikontarela nihiku mweeri waarowa aya omala ni opacerya mweeri musya. Miyeeri iye 7 saakhala aya ifesta, eSineedrio yaanithukumana nihiku 30. Nto alopwana awo yaanikontarela ni othanla nihiku waarowa aya opacerya mweeri waattharelana. Masi, etthu xeeni yaatthara aya wira apake yoothanla eyo?

Alopwana akina yaanikhala vasulu va makokoro aahiiso mapuro oottukhuwa a oYerusalemu wira aweheke wiirimu. Nto okathi yaakhumelela aya esinaale ya mweeri musya, moohipisa yaanaaleela makhulupale ale, niire so, eSineedrio. Okathi yaasuwela oratteene wira mweeri musya waahooneya, awo yaanilaleya wira woopacerya mweeri musya. Ankhi akhala wira wiirimu yaahisareya meeku vahinaweryaneya woona akhala wira mweeri musya woophattuwa? Awo yaanihimya  wira mweeri yaari aya waarina mahiku 30, nuumala-vo, mweeri musya wanipacerya.

Mishnah onihimya wira, para esineedrio ohimya wira mweeri musya woopacerya, awo yaanipattiha mooro Omwaako olivera, yoowo waattamenle oYerusalemu. Nto oYerusalemu wootheene waanipattihiwa moorowa wira oleleiwe mweeri owo musya. Okathi mukina yaanirummwa atthu wira yalaleye. Nto atthu ootheene oYerusalemu, wisarayeli ni mittetthe sikina yaanisuwela wira woopacerya mweeri musya. Eyo yaanikhaliherya wira atthu ootheene apake ifesta sa vamwaakhani okathi omosaru.

Woonasa ene, etabela ya mwaha ola enimookhaliheryani osuwela miyeeri sa kalentaario a aheeberi, ifesta ni osuwela okathi ni moota itthu iyo sootheene sinivarihana aya.