Munna oniihaniwa Paul onihimya so: “Okathi mwaana mwaamulopwana a piipi aka aapacenrye awe onyakulihana ni miyo, kaahinvara mmilo kinapacerya omphinyaka. Miyo kaaphavela omwiiva”.

Marco onihimya so: “Owaani kaamakela onanariwa ni onyakulihana hata ori ene mwaha mwaamukhaani. Kaanipwexakasa itthu sotheene koona aka”.

Woonasa wene, hiyo khanitonko opaka itthu ntoko aapanke awe Paul ni Marco. Hata vari siiso, okathi mukina vanninivila wiikasoopa. Eyo enniiraneya mwaha woowi noorava etampi ya mulopwana oopacerya Adamu. (aRom. 5:12) Atthu akina, ntoko Paul ni Marco, vannaavila okasoopa onanariwa waya. Masi atthu akina onaavila okasoopa muupuwelo aya. Mwa ntakiheryo, atthu ntoko awo animakela wuupuwela itthu anoova aya ni sinaariipiha murima. Nave atthu akina, khaniwerya ovilela vaavo aniphavela aya orupihana woohiloka, ohapaliwa ni olya mirette soohapala.

Atthu ale ahiniwerya okasoopa muupuwelo aya, soophavela saya ni itthu sikina soohiloka, awo pooti wiikumiherya maxakha. Masi hiyo nnoowerya osyaka mixankiho iyo. Moota xeeni? Nikhalaka atthu oowiiyeviha. Wira nipake eyo, ninrowa othokorerya makoho mararu. Makoho ene taala: (1) Wiihiiha onitaphulela exeeni? (2) Xeeni vari aya vooloka wiihiiha? (3) Ninrowa okhalana sai mukhalelo ola onikumiheriwa ni yoowiima ya ikuru sowaarya sa Muluku? (aGal. 5:22, 23) Nuumala-vo, ninrowa othokorerya etthu nikhanle ahu oopaka noonaka wira khanrina wiihiiha.

Mutthu oowiihiiha khonipaka itthu wira iihakalalihe. Ohiya-vo, enamuna onilavula awe ni onipaka awe itthu, oniphavela omuhakalaliha Muluku.

Yesu aahooniherya ele enitaphulela aya okhala mutthu oowiihiiha. Biibiliya onihimya so: “Aruwaniwaka, owo kharuwana; ahaxiwaka, owo khupuwenle wunla ikuhu; masi ahìvelela mmatatani mwawe Ole onlamula n’ixariya”. (1 Ped. 2:23) Yesu aahooniherya wira aari mutthu oowiihiiha okathi awanani awe yaamuruwana aya vaavo aakhomeliwe awe vamwirini va nihaaxeryo. (Math. 27:39-44) Nave, ahooniherya wiihiiha wuulupale okathi ahooleli a itiini yaamukoha aya itthu sinceene aphavelaka onvara ni moolumo awe. (Math. 22:15-22) Ohiya-vo, Yesu oovaha ntakiheryo na wiihiiha vaavo aYuda yanvonyakasa aya maluku! Ohiya owunlela ikuhu, Biibiliya onihimya wira “Yesu ahìpitha, khukhuma mpani mwa Muluku”.—Yoh. 8:57-59.

Niireke vanniweryaneya otthara ntakiheryo na Yesu? Aayo, vanniweryaneya. Murummwa Pedru olempe so: “Kristu ohohawelani-tho nyuwo, ni siso ohothonyeryani ephiro, wira mmutthareke yowo munvirawe”. (1 Ped. 2:21) Hata niri ene anatampi, nnoowerya otthara oratteene ntakiheryo na Yesu na wiihiiha. Xeeni vari aya vooloka opaka eyo?

Wira neemereriwe ni Yehova, nihaana okhala atthu oowiihiiha. Hata nikhumme ene khalai omukokhorela  Yehova moororomeleya, pooti oyeleela waataana wahu ni Yehova akhala wira khaninkasoopa ele nimpaka ahu ni ninlavula ahu.

Biibiliya onnimuhimya Moise okhala “mutthu omàla vanjene, ovikana atthu othene a mulaponi-mu”. (Moth. 12:3) Moopixa murima, Moise aahiviriha iyaakha sinceene aavilelaka ni aapixeryaka murima aIsarayeli. Masi nihiku nimosa, Moise aahihiya okhala mutthu oowiihiiha. Owo aahinanariwa vanceene mwaha woowi atthu ale yaaniixinliha mwaha wa ohikhala maasi yaaphiyerya. Owo aahaapwapwela atthu ale ohimya aka wira: “Nyuwo atthu ohìwelela, nwiriyane. Hiyo nnowerya ophutula màsi vamwala vava?”—Moth. 20:2-11.

Moise aahihiya okhala mutthu oowiihiiha. Owo khanvuwinhe Yehova, yoowo aakumiherya maasi mwa mwiiriirya. (Esal. 106:32, 33) Mwaha woopaka eyo, Yehova khaamuhiyale Moise okelaka Elapo Yooleiheriwa. (Moth. 20:12) Woonasa wene, Moise aahithanana okumi awe wotheene mwaha woohiya okhala oowiihiiha mwa okathi vakhaani.—Otum. 3:23-27.

Etthu xeeni nniixutta ahu? Hata niixuntte ene ekeekhai khalai, nihaana olavula ni owaakhula saana atthu ale annipaca aahiiso ale nnaavaha ahu miruku. (aÉf. 4:32; aKol. 3:12) Ekeekhai wira vaavo nninnuwa ahu, opixa wahu murima onnivukuwa. Hata vari siiso, mmuupuweleke Moise. Hiyo khanimphavela ohonona waataana wahu ni Yehova mwaha wa ohiya okhala mutthu oowiihiiha. Nihaana opaka exeeni wira nikhale atthu oowiihiiha?

Nvekeleke ikuru sowaarya sa Muluku. Mwaha wa xeeni? Mwaha woowi wiihiiha oniirela mpantta yoowiima ya ikuru sowaarya sa Muluku. Nto Yehova onnaavaha ikuru sawe sowaarya ale aninvekela. (Luka 11:13) Orumeelaka ikuru sawe, Yehova onninikhaliherya okhala mutthu oowiihiiha. (aFil. 4:13) Nave pooti onikhaliherya okhalana mikhalelo sikina sa ikuru sawe sowaarya, ntoko ophenta weiwo onrowa onikhaliherya olipiha wiihiiha wahu.—1 aKor. 13:5.

Musyakeke itthu saarowa ohonona wiihiiha wanyu. Mwa ntakiheryo, mwiimananiheke osyaka isaiti ni matthekulelo anitumererya itthu soohiloka. (aÉf. 5:3, 4) Tthiri nihaana osyaka itthu sotheene saarowa oniiriha opaka itthu soohiloka. (Mir. 22:3; 1 aKor. 6:12) Mwa ntakiheryo, mutthu pooti omorela ntapha na orupihana woohiloka akhala wira onniweha iliivuru ni iviidiyu sinitumererya orupihana woohiloka.

 Hiyo pooti onivila weemererya miruku ninvahiwa ahu. Masi, akhala wira ninniimananiha, Yehova onoonivaha ikuru wira niwerye okhala mutthu oowiihiiha. (2 Ped. 1:5-8) Nave onoonikhaliherya okasoopa muupuwelo, ilavulelo sahu ni itthu ninvara ahu. Eyo enooniherya wira Paul ni Marco naalavunle ahu wanipacerya, yaahiixutta okasoopa onanariwa waya. Nwehe ntakiheryo na munna yoowo ahaawenrye osyaka onyakulihana ni atthu akina mphironi vaavo eettiha awe ekaaro. Exeeni munna ole aapanke awe wira okhale mutthu oowiihiiha? Owo onihimya so: “Khula nihiku kaanivekela ikwaha sinceene. Kaahisoma myaha sinilavula wiihiiha ni kaahihela mmuru iversu sa mBiibiliyani sinilavula sa wiihiiha. Nnaamwi kaimananinhe mwa iyaakha sinceene, khula nihiku voosiisu kinnuupuwela wira kimphavela okhala mutthu oowiihiiha. Nto wira kisyake onyakulihana ni atthu, kaanipeherya vaavo kaarowa aka olavula ni meediku. Eyo yaanikikhaliherya osyaka onyakulihana mphironi ni atthu akina aneettiha ekaaro”.

Okathi mukina hiyo pooti ohiya okhala mutthu oowiihiiha. Akhala wira eyo enimwiiraneya, nihaana onvekela Yehova wira onikhaliherye. Vaareerelaka nyuwo pooti opaka eyo ikwaha sinceene. Nto mwaakuveleke onvekela Yehova. Nave munvekeleke wira ooleveleleni ni wookhaliheryani. Nave musyakeke opaka soovonya simosaru. (Esal. 51:11-13) Muhuupuweleke wira Yehova khonrowa waakhula mavekelo anyu ni khonrowa woomorelani ikharari. (Esal. 102:18) Murummwa Yohani ohimmye wira ephome ya Mwaana a Muluku ‘ennittipiha sottheka sahu sothene’. (1 Yoh. 1:7; 2:1; Esal. 86:5) Musuweleke wira Yehova onnaaleela arumeyi awe wira ahaana olevelelana ikwaha sotheene. Eyo enninikupaliha wira owo onoonilevelela ikwaha sotheene.—Math. 18:21, 22; aKol. 3:13.

Yehova khivaamusivenle vaavo Moise aahiyale awe okhala oowiihiiha mwa okathi vakhaani mothakoni. Hata vaari siiso, Yehova aahimulevelela. Nave Biibiliya onihimya wira Moise aari mulopwana owaamini ninreerela ahu omutakiha. (Otum. 34:10; aHéb. 11:24-28) Ekeekhai wira Yehova khamwemerenrye Moise okela Elapo Yooleiheriwa, masi owo onrowa ohihimuxiwa wira okhaleke mParayiisu valaponi. Tthiri okathi owo Moise onrowa okhalaka mahiku otheene. Hiyo nave nnoowerya okhalana nlipelelo nlo akhala wira nnimwiimananiha vanceene okhala atthu oowiihiiha.—1 aKor. 9:25.