1. Exeeni Yesu aahimmye awe sa mihakhu sa wiirimu?

KHAHIYO wira itthu sotheene sa faita ninniwerya woona. Tthiri itthu sinceene sa faita khaninwerya woona. Okathi Yesu aalavula awe Mwaha awe Vamwaako, Yesu aahilavula mihakhu sinceene sa faita ovikana mihakhu sa werutthuni. Nuumala olavula mihakhu iyo, Yesu aahimmye so: “Vavo vari muhakhu anyu, vavo-tho t’uri murim’anyu”. (Math. 6:19-21) Vaavo nimphavela ahu etthu ya faita yinceene, hiyo ninniimananiha wira nikhalane. Hiyo nnoowerya wiithukumanyerya “mihakhu wirimu” vaavo nniimananiha ahu okhalana mweettelo wooloka aahiiso okhalana waataana wooloka ni Muluku. Ntoko Yesu aahimmye awe, mihakhu iyo khasinkhala-khala sipweteyaka nnakhala wiiyiwa.

2. (a) Moovarihana ni 2 aKorinto 4:17, 18, murummwa Paulo onitumerenrye exeeni? (b) Mwaha ola, ninrowa othokorerya exeeni?

² Murummwa Paulo oonitumererya owehexexa “itthu sihinòneya”. (Mmusome 2 aKorinto 4:17, 18.) Mihakhu iyo sihinooneya, sinihela muhina itthu sotheene ninrowa ahu okhalana elapo esya. Mwaha ola, ninrowa oweha mihakhu mixexe sihinooneya nrina ahu niinaano-va, eyo piiyo, waataana wahu ni Muluku, ovekela, okhaliheriwa ni ikuru sowaarya sa Muluku ni nikhaliheryo na Yehova, Yesu ni malaikha vaavo ninlaleerya ahu. Nave ninrowa woona moota nikhanle ahu oowooniherya wira ninnixukhurela vanceene mihakhu iyo sihinooneya.

3. Muhakhu xeeni muulupale nrina ahu ohinooneya, ni vaniweryaneya sai okhalana muhakhu owo?

³ Muhakhu muulupale nrina ahu ohinooneya ti waataana wahu  ni Yehova Muluku. (Esal. 25:14) Vaniweryaneya sai Muluku okhala apatthani a apinaatamu oohimalela, okathi omosaru onakhala oowaarya? Vanniweryaneya mwaha wa mukuttho wowoopola wa Yesu, yoowo “onttipiha yottheka y’elapo”, eyo piiyo, itampi sa apinaatamu otheene. (Yoh. 1:29) Nlelo Yesu ohinatthi ovaha okumi awe wira owoopole apinaatamu, Yehova aanisuwela wira Yesu aamuroromeleya mpakha wiiviwa wira owoopole apinaatamu otheene. Nto atthu ale yaakhanle Yesu ohinatthi ovaha okumi awe, vanniweryaneya okhala apatthani a Yehova.—aRom. 3:25.

4. Nvahe matakiheryo alopwana yaakhanle apatthani a Muluku, Yesu ohinatthi ovaha okumi awe.

⁴ Nkahaya mwaawehe alopwana yaakhanle apatthani a Muluku Yesu ohinatthi ovaha okumi awe wira owoopole apinaatamu. Abrahamu aari mulopwana aarina waamini wuulupale. Iyaakha 1.000 saavinre nuumala Abrahamu okhwa, Yehova aahimuhimya Abrahamu okhala “mpatthani aka”. (Yes. 41:8) Eyo enooniherya wira hata mutthu okhwaaka, nlelo Yehova onnimuthokorerya mutthu owo okhala mpatthani awe. Mpakha-va, Yehova khomuliyanle Abrahamu. (Luka 20:37, 38) Ntakiheryo nikina ti na Yobi. Ohinatthi muthukumano wa malaikha wiirimu, Yehova aahilavula itthu sooloka voohimya sa Yobi. Tthiri, Yehova aahimuhimya Yobi okhala “mutthu òrera murima ni naxariya, òmuttittimiha Muluku ni òkhotta sotakhala”. (Yobi 1:6-8) Mutthu mukina aari Daniyeli, yoowo aamurumeela Muluku moororomeleya elapo ekina mwa iyaakha 80. Nto Yehova aamoonela sai? Ikwaha tthaaru, malaikha yaahimuleela Daniyeli wira ‘aniphentiwa’ ni Muluku. (Dan. 9:23; 10:11, 19) Ninnikupali ni murima wotheene wira nnoophiya nihiku Yehova onrowa awe waahihimuxa apatthani awe akhwiiye khalai.—Yobi 14:15.

5. Nihaana opaka exeeni wira nikhalane waataana wooloka ni Yehova?

⁵ Niireke olelo-va, aakhala atthu anceene arina waataana wooloka ni Yehova? Aayo. Ninsuwela sai? Ninnisuwela eyo mwaha woowi alopwana, athiyana ni anamwane anceene olumwenku wotheene annooniherya ni miteko saya wira apatthani a Muluku. Musuweleke wira Yehova ‘onnipatthana n’atthu òloka’. (Mir. 3:32) Awo annikhalana waataana wooloka ni Muluku, mwaha woowi annaamini mukuttho wowoopola wa Yesu. Orumeelaka mukuttho wowoopola wa Yesu, Yehova onnineemererya wiivahererya wa yena ni opatisiwa. Nto vaavo nimpaka ahu eyo, ninnikhala mpantta wa maKristau manceene yaawo yiivaherenrye ni apatisiwe. Tthiri eparakha yuulupale okhalana waataana wooloka ni Yehova, Mukhulupale a olumwenku wotheene!

6. Ninrowa wooniherya sai wira ninnivaha efaita okhalana waataana wooloka ni Yehova?

⁶ Ninrowa wooniherya sai wira ninnivaha efaita okhalana waataana wooloka ni Yehova? Nimutakihaka Abrahamu ni Yobi, yaawo yahaahiyale ororomeleya wa Muluku mwa iyaakha sinceene, nihaana ovikaniha ororomeleya hata oviraka okathi munceene nimurumeelaka Yehova olumwenku ola wootakhala. Nave nimutakihaka Daniyeli, nihaana ovaha efaita waataana wahu ni Muluku ovikana itthu sikina nrina ahu. (Dan. 6:7, 10, 16, 22) Tthiri, nikhaliheriwaka ni Yehova nnoowerya ovilela khula muxankiho ni olipiha waataana wahu ni Yehova.—aFil. 4:13.

7. (a) Moovarihana ni Miruku 15:8, Yehova onoonela sai mavekelo ahu? (b) Yehova onaakhula sai mavekelo ahu?

⁷ Eparakha ya ovekela, muhakhu mukina ohinooneya. Apatthani aalupale onnaasivela ovaanela aleelanaka moonelo ni muupuwelo aya. Niireke etthu emosaru enniiraneya ni ompatthani ahu ni Yehova? Aayo! Maana orumeelaka Nuulumo nawe ori Biibiliya, Yehova onnilavula ni hiyo. Tthiri Biibiliya onninikhaliherya osuwela moonelo ni muupuwelo wa Muluku. Masi hiyo, ninnilavula ni Muluku vaavo ninvekela ahu. Okathi owo, hiyo pooti omuleela moonelo ahu, muupuwelo ni mixankiho sahu. Muhiliyale wira Yehova onniwiriyana  mavekelo ahu. (Musome Miruku 15:8.) Okhala wira Yehova mpatthani oophenta, ohiya paahi owiriyana mavekelo ahu, owo onnaakhula mavekelo awo. Okathi mukina, owo onnaakhula mavekelo ahu moowaakuveya. Masi, okathi mukina, hiyo pooti ovekela etthu emosa ikwaha sinceene. Hata vari siiso, nikupaliki ni murima wotheene wira owo onimwaakhula okathi wooreera ni mwa enamuna yooloka. Ekeekhai wira Muluku pooti waakhula mavekelo ahu mwa enamuna nahaalipelela ahu. Mwa ntakiheryo, ohiya okumiha muxankiho ahu, Yehova onninivaha ankhili ni ikuru wira niwerye “ovilela”.—1 aKor. 10:13.

8. Ninrowa wooniherya sai wira ninnixukhurela eparakha ya ovekela?

⁸ Ninrowa wooniherya sai wira ninnivaha efaita eparakha ya ovekela? Enamuna emosa ori wiiwelela malakiheryo a Yehova anihimya wira “mulompeke vohihiyererya”. (1 aTes. 5:17) Musuweleke wira Yehova, khonnikhanyererya onvekela. Ohiya-vo, Yehova onnittittimiha eparakha nrina ahu ya othanla mootaphuwa, masi hata vari siiso, owo onnitumererya wira ‘nilipiheryeke olompa’. (aRom. 12:12) Tthiri eyo enooniherya wira ninnixukhurela eparakha eyo, vaavo ninvekela ahu ikwaha sinceene vanihikuni. Xontte, okathi munivekela anyu muhiliyaleke omuxukhurela ni omuttottopela Yehova.—Esal. 145:2, 3.

9. Munna mmosa onoonela sai eparakha ya ovekela? Ankhi nyuwo munoonela sai eparakha eyo?

⁹ Okhuma okathi nipacenrye ahu omurumeela Yehova, nihoona moota Yehova onaakhula awe mavekelo ahu, nto vaavo nnuupuwela ahu ikwaha sotheene aakhunle awe mavekelo ahu, ninnitepa omuxukhurela. Nkahaya nwehe ntakiheryo na munna oniihaniwa Chris onivara muteko wa Muluku wa okathi wotheene mwa iyaakha 47. Owo ohimmye so: “Okisivela ovinya voosiisu wira kinvekele Yehova. Ti voohakalaliha ovinya voosiisu wira kilavule ni Yehova vaavo nsuwa ninkhuma aya! Eyo ennikiiriha omuxukhurela Yehova mwaha wa itthu sotheene onnivaha awe, ohela muhina eparakha ya ovekela. Nto nuumala ovekela kaarowaka orupa, kinnikhalana murima wooloka”.

10. Xeeni ninvaha ahu efaita ikuru sowaarya sa Muluku?

¹⁰ Ikuru sowaarya sa Muluku, muhakhu mukina  nivahiwe ahu ohinooneya. Yesu oonitumererya ohihiyererya ovekela ikuru sowaarya sa Muluku. (Luka 11:9, 13) Yehova onnirumeela ikuru sawe sowaarya wira onivahe “owerya . . . wulupalexa”. (2 aKor. 4:7; Mit. 1:8) Nikhaliheriwaka ni ikuru sowaarya sa Muluku, nnoowerya ovilela mixankiho sotheene ninkumana ahu.

11. Mwa inamuna xeeni ikuru sowaarya sa Muluku sinnikhaliherya aya?

¹¹ Ikuru sowaarya sa Muluku sinoonikhaliherya ovara miteko sotheene ninvahiwa ahu mmutthenkesoni mwa Muluku. Maana ikuru sa Muluku pooti onikhaliherya olokiherya itthu ninsuwela ahu. Nave sinoonikhaliherya ovara saana miritti sahu. Hiyo ninnisuwela wira itthu sooloka ninvara ahu mmutthenkesoni mwa Muluku ninkhaliheriwa ni ikuru sowaarya sa Muluku.

12. Moovarihana ni Esalimo 139:23, 24, nihaana ovekela ikuru sa Muluku wira sinikhaliherye opaka exeeni?

¹² Enamuna ekina nikhanle ahu oowooniherya wira ninnivaha efaita ikuru sowaarya sa Muluku ori ovekela wira sinikhaliherye oweha muupuwelo ni itthu soohiloka siri vamurimani vahu. (Musome Esalimo 139:23, 24.) Akhala wira ninnipaka mavekelo ntoko awo, orumeelaka ikuru sawe, Yehova pooti onikhaliherya osuwela moonelo ni muupuwelo woohiloka nrina ahu. Nto akhala wira ninnoona wira nookhalana muupuwelo ni soophavela soohiloka, nihaana ovekela ikuru sa Muluku wira sinikhaliherye oxintta moonelo ni soophavela iyo soohiloka. Akhala wira nnoopaka eyo, nnimooniherya wira ninniimananiha ohipaka nnakhala etthu emosa yaarowa omwiiriha Yehova ohiya onikhaliherya orumeelaka ikuru sawe.—aÉf. 4:30.

13. Ninrowa olipiha sai oxukhurela wahu ikuru sowaarya sa Muluku?

¹³ Nnoowerya wuncererya oxukhurela wahu ikuru sowaarya sa Muluku vaavo nnuupuwela ahu itthu ikuru sa Muluku sinivara aya mahiku ala. Ohinatthi Yesu orowa wiirimu, owo aahaaleela awiixutti awe wira: “Nyuwo munimwakhela ikuru s’eroho yowarya enrowa wokhuruwelani; siso munrowa okhala anamon’aka . . . mpakha omalenle elapo”. (Mit. 1:8) Moolumo ala a Yesu anniiraneya olelo-va. Ikuru sa Muluku, soowerya waathukumanya atthu imilyau 8.5 olumwenku wotheene wira akhale arumeyi a Yehova. Nave, arumeyi a Yehova aakhalana murettele mwaha woowi ikuru sa Muluku  sinnaakhaliherya okhalana mikhalelo sooloka ntoko ophenta, otteeliwa murima, murettele, ovilela, oreera murima, oloka, waamini, omaala ni wiihiiha. Mikhalelo iyo sotheene siniirela mpantta yoowiima ya ikuru sa Muluku. (aGal. 5:22, 23) Moohaanyiherya, ikuru sowaarya sa Muluku yoovaha yuulupale!

14. Naalaleeryaka tani annikhaliherya ovara muteko owo?

¹⁴ Nookhalana eparakha yuulupale ya ovara “muteko vamosá ni Muluku”, Yesu ni malaikha. (2 aKor. 6:1) Tthiri vaavo ninlaleerya ahu, ninnivara vamosa ni atthu awo. Olavulaka sa muteko awe ni ale aavarana awe muteko, murummwa Paulo aahimmye so: “Ninvara vamosá . . . [ni] Muluku”. (1 aKor. 3:9) Nave vaavo ninlaleerya ahu, ninvara muteko vamosa ni Yesu. Muupuweleke wira, nuumala Yesu waaruma atthareli awe waapaka awiixutti “atthu a maloko othene”, Yesu aalenle so: “Miyo kinokhala ni nyuwo”. (Math. 28:19, 20) Ankhi malaikha? Niireke anninikhaliherya naalaleeryaka? Aayo. Tthiri, hiyo ninnixukhurela vanceene okhaliheriwa ni malaikha waalaleerya atthu “èhapari yorera . . . atthu ankhala mulaponi-mu”!—Wis. 14:6.

15. Nvahe ntakiheryo na mBiibiliyani nnooniherya ele Yehova onipaka awe naalaleeryaka.

¹⁵ Exeeni ninwerya ahu opaka nikhaliheriwaka ni Yehova, Yesu ni malaikha? Vaavo nnaala ahu muhupi wa Omwene, sinnimela vamurimani va atthu akina ni sinninnuwa oratteene. (Math. 13:18, 23) Tani onikhaliherya ikeekhai iyo wunnuwa ni okumiherya mihokorokho? Yesu aahimmye wira khuuvo mutthu onwerya okhala mutthareli awe “ahithanliwe n’Atithi” awe. (Yoh. 6:44) Biibiliya onninivaha matakiheryo vakhaani a atthu ntoko awo. Woonasa wene, nyuwo munnuupuwela okathi Paulo aalalenrye awe ekrupu ya athiyana ota wa epooma ya oFilipi. Omuhimyaka muthiyana mmosa aari ekrupu ele, Biibiliya onihimya wira “Apwiya [Yehova] yahimutthukula murima [Lidia] wira aiwexexe itthu sahimyawe Paulo”. (Mit. 16:13-15) Ntoko Lidia, atthu imilyau sinceene annitthukuliwa murima ni Yehova wira yiiwexexe ihapari sooreera.

16. Tani onireerela ovuwihiwa akhala wira ninnikhumela saana naalaleeryaka?

¹⁶ Tani onireerela ovuwihiwa akhala wira ninnikhumela saana naalaleeryaka? Murummwa Paulo aahaakhula nikoho nno, vaavo aalepenle awe ewarakha muloko wa oKorinto. Owo aahimmye so: “Miyo kiphatteiye miri, Apolo khukhuwariki mir’iyo, nto Muluku t’ìmihale. Siso, mulipa-òphatteya khahi etthu, nnákhala mulipa-òkhuwari khahi etthu: mulupale ti Muluku, okhala wira t’onìmiha”. (1 aKor. 3:6, 7) Ntoko Paulo, okathi wotheene nihaana onvuwiha Yehova vaavo ninkhumela ahu saana naalaleeryaka.

17. Ninrowa wooniherya sai wira ninnixukhurela eparakha ya ovara “muteko vamosá ni Muluku”, Yesu ni malaikha?

¹⁷ Ninrowa wooniherya sai wira ninnixukhurela eparakha ya ovara “muteko vamosá ni Muluku”, Yesu ni malaikha? Nnoowerya opaka eyo, vaavo ninluttuweliwa ahu waalaleerya ihapari sooreera atthu akina. Musuweleke wira sookhala inamuna soovirikana nikhanle ahu oopaka eyo, ntoko olaleerya mapuro oowaatta atthu ni empa ni empa. (Mit. 20:20) Nave hiyo pooti olaleerya moohiilokiherya. Vaavo nnimphwanya ahu mutthu a elapo ekina, nihaana omukhomasa moopatthaneya ni weererya opaceriha ovaanela ni mutthu owo myaha sa mBiibiliyani. Akhala wira mutthu owo onniphavela, mooreerela murima nihaana omulaleerya ihapari sooreera sa Omwene.

18-19. (a) Ninkhuwari sai ipyo nnaala ahu? (b) Nvahe ntakiheryo nnooniherya moota Yehova aamukhalihenrye awe mutthu aasomihiwa Biibiliya.

¹⁸ Okhala wira ninvara “muteko vamosá ni Muluku”, nihihakalaleke paahi waala ipyo sa Omwene, masi nihaana okhuwari ipyo iyo. Akhala wira  ninnimphwanya mutthu onsiveliwa ihapari sooreera, nihaana wiimananiha otthikela olavula ni mutthu owo aahiiso onvekela namalaleerya mukina wira olavule ni mutthu owo wira opacerihe yoosoma ya Biibiliya. Nto okathi yoosoma eyo enikela aya vahoolo, ninnihakalala woona wira Yehova onnimukhaliherya mutthu owo nimmusomiha ahu opaka marukunuxo wira okhale mutthareli a Kristu.

¹⁹ Nkahaya nwehe ntakiheryo na Raphalalani yoowo orina iyaakha 60, mukhulukana a wÁfrica do Sul. Owo aahisiveliwa vanceene etthu iixutta awe mBiibiliyani. Masi vaaninvila vanceene weemererya ni ovarihela muteko ele Nuulumo na Muluku ninhimya aya sa olavula ni alipa-ookhwa. (Otum. 18:10-12) Masi, vakhaani-vakhaani, owo aaheemererya Nuulumo na Muluku orukunuxa muupuwelo awe. Nave aahihiya okhala mukhulukana, hata aarowa opweteiwa etthu yaamphwanyiha maakha. Vano Raphalalani, onihimya so: “Kinnaaxukhurela vanceene Anamoona a Yehova, yaawo akikhalihenrye mwa inamuna soovirikana, ntoko okikhaliherya ophwanya muteko. Masi kinnitepa omuxukhurela Yehova okikhalihenrye opaka marukunuxo mookumini mwaka, vano kinnilaleerya ni koopatisiwa”.

20. Exeeni mulakenle anyu opaka?

²⁰ Mwaha ola, noothokorerya itthu xexe nivahiwe ahu seiyo sihinooneya. Masi yoovaha yuulupale mwa soovahiwa iyo, eparakha nrina ahu ya okhala Apatthani a Yehova. Maana eparakha eyo, enninikhaliherya okhalana iparakha sikina, ntoko eparakha ya ovekela, okhaliheriwa ni ikuru sowaarya sa Muluku, ovara vamosa ni Yehova, Yesu ni malaikha naalaleeryaka. Tthiri otheene ahu nimphavela wuncererya oxukhurela wahu ovahiwa itthu iyo sotheene. Nave nihikhala-khale nihiyaka omuxukhurela Yehova mwaha wookhala Apatthani awe.