1-2. Exeeni enrowa wiiriha okokhorela wahu weemereriwa ni Muluku?

 EXEENI munuupuwela anyu, okathi muniiwa anyu nuulumo noowi “okokhorela”? Woonasa wene munimuupuwela munna okokhonre ene onavekela olavula ni Yehova owanle ene maitho. Aahiiso woonasa munuupuwela emusi yoohakalala emusomaka Biibiliya.

² Itthu iyo sootheene, siniirela mpantta okokhorela. Niireke Yehova onimweemererya okokhorela waya? Aayo, masi eyo enrowa wiiraneya vakhala wira animwiimananiha ovara itthu simmusivela, omphenta, ni omuttittimiha. Okhala wene hiyo ninnimphenta vanceene Yehova. Noosuwela wira onniphwanela okokhoreliwa, nave nimphavela opaka eyo mwa enamuna yooloka.

3. Exeeni ninrowa ahu othokorerya mwaha ola?

³ Mwaha ola, nnooweha okokhoreliwa Yehova eemererya awe khalai, ni inamuna 8 Yehova omphavela awe wira nimukokhoreleke. Okathi ninrowa ahu opakaka eyo, nivaheke ephoole wira niwehe moota woolokiherya inamuna sahu soomulompa. Nave nnooweha moota omukokhorela Yehova mwa enamuna yooloka onnimphwanyiha aya ohakalala.

4. Arumeyi a khalai a Yehova, yoonihenrye sai wira yaanimuttittimiha ni omphenta Yehova?

⁴ Ohinatthi Kristu orwa, alopwana oororomeleya ntoko Abeli, Nowe, Abrahamu ni Yobi, yaahooniherya wira yaanimuttittimiha ni omphenta Yehova. Moota xeeni? Amwiiwelelaka, omwaamini, ni wiivahererya wa Yena. Masi Biibiliya khonihimya  itthu sootheene yaapanke aya wira amukokhorele. Vanooneya wira yaahipaka sootheene yaawerya aya wira anvuwihe, nto Yehova aahisiveliwa ni moota yaamukokhorela aya. Muhoolo mwaya, Yehova aahaavaha aisarayeli nlamulo na Moise. Nlamulo nlo yaanihimya saana moota atthu yaakhanle aya omukokhorelaka Yehova, mwa enamuna eemererya awe.

5. Yehova oniphavela wira atthareli a Yesu amukokhoreleke sai?

⁵ Nuumala Yesu okhwa ni ohihimuwa, Yehova aahittharuwa waatumererya atthu wiiwelela nlamulo na Moise. (aRom. 10:4) Okhuma okathi ole, makristau yaahaana wiiwelela “nlamulo na Kristu”. (aGal. 6:2) Awo yaawerya wiiwelela ‘nlamulo nlo’, ahihelaka mmuruni wala otthara elista yinceene ya itthu yaakhanle aya oopaka aahiiso nnaari. Masi yaahaana opaka eyo attharaka ntakiheryo na Yesu ni soowiixuttiha sawe. Nave olelo-va, makristau annikhalela nthiti otthara yooruma ya Kristu ya omuhakalaliha Yehova, nto ‘annilipihiwa’.—Math. 11:29.

6. Mwaha ola onrowa onikhaliherya sai?

⁶ Okathi ninrowa ahu othokoreryaka khula etthu eniirela mpantta okokhorela wahu, mwiikoheke so: ‘Kiireke miyo kinnipaka saana etthu ela? Kinoowerya olokiherya moota kinimukokhorela aka Muluku?’ Ekeekhai wira nyuwo pooti ohakalala ni itthu munwerya opaka nenna-va. Hata vari siiso, munvekeleke Yehova wira ookhaliheryeni oweha etthu munreerela anyu olokiherya.

7. Yehova onoonela sai mavekelo ahu anikhuma vamurimani?

⁷ Ninnimukokhorela Yehova okathi ninvekela ahu. Biibiliya onnilikanyiha mavekelo ni nsenso aahiiso erupani yeeyo yaalokiheriwa ni ephoole wira ovahiwe Yehova mutabernaakulu, ni muhoolo mwaya mutemplo. (Esal. 141:2) Wunkhela wa nsenso nno waanimusivela Muluku. Mwa enamuna emosaru, mavekelo ahu a vamurimani, ‘annimusivela’ Muluku, hata nirumeelaka moolumo ookhweya. (Mir. 15:8; Otum. 33:10) Ninnikupali wira Yehova vannimusivela okathi onniweha awe nooniheryaka omphenta wahu, ni omuxukhurela. Omphavela wira nimuleeleke itthu sinnixankiha, ninlipelela ahu wiiraneya, ni soophavela sahu. Muhinatthi olavula ni Yehova murumeelaka nivekelo, vannireerela wuupuwelela saana etthu munrowa ohimya. Mwiira siiso, munoowerya onvaha ‘mukuttho’ wootepa oreera.

8. Eparakha xeeni yuulupale nirina ahu ya omuttottopela Muluku?

⁸ Ninnimukokhorela Yehova okathi nimmuttottopela ahu. (Esal. 34:1) Ninnimuttottopela okathi nnaaleela ahu atthu akina moota nnimphenta ahu, ni otikinihiwa wahu ni miteko sawe. Akhala wira ninnimuxukhurela Yehova, nnookhalana itthu sinceene soowaaleela waaleela atthu akina. Nave nnookhalana mathowa manceene oomuttottopela nuupuwelaka itthu sootheene sooreera onipakenle awe. Muteko woolaleerya, onninivaha eparakha ya ‘onvaha mukuttho Muluku nirumeelaka iyano sahu’. (aHeeb. 13:15) Ntoko siisaale ninreerela ahu wuupuwelela saana nihinatthi ovaanela ni Yehova, nave nihaana otthokelelela saana itthu ninrowa ahu owiixuttiha atthu nnaaphwanya ahu okathi woolaleerya. Nimphavela wira ‘mikuttho sahu’ sa omuttottopela Muluku sikhaleke sooreera. Tivonto nihaana olavula ni murima wootheene okathi ninlaleya ahu Nuulumo na Muluku.

9. Moolikanasa ni aisarayeli a khalai, nimphwanya sai mureerelo okathi ninthukumana ahu? Nvahe ntakiheryo na moota mithukumano sookhalihenryaayani.

 ⁹ Ninnimukokhorela Yehova, okathi ninrowela ahu mithukumano. Aisarayeli a khalai yaaleeliwe so: “Siso, imara iyo ttharu khula eyakha, axilopwan’anyu othene ahana orowa wattittimihaka Apwiya Muluku anyu, nipuro Apwiya yawo anrowaya othanla”. (Otum. 16:16) Aisarayeli yaahaana ohiya imatta saya ni ipa saya ohikhanle kwaarta. Masi Yehova aalenle so: “Khavo onrowa otuphela elapo anyu, okathi onrowanyu wakokhorela Apwiya Muluku anyu”. (Okhum. 34:24) Okhala wira aisarayeli yaanimwaamini vanceene Yehova, yaanirowela ifesta iyo. Mwaha woopaka eyo, yaaniixutta nlamulo na Muluku, otthokelela oreera wawe murima, nave yaanilipihana. (Otum. 16:15) Olelo-va, ninniphwanya mireerelo simosaru okathi ninleva ahu itthu sikina wira nirowele mithukumano sa ekristau. Nave Yehova onnihakalala okathi ninrowa ahu omuthukumanoni niilokihenrye ene wira nivahe ikomentaario sookhuveya ni soolipiha.

10. Wiipa oniirela sai mpantta okokhorela wahu?

¹⁰ Ninnimukokhorela Yehova, okathi nniipa ahu ni anna. (Esal. 28:7) Aisarayeli yaanithokorerya wiipa ntoko mpantta wa okokhorela waya. Mwene Davidi aahaathanla alevi 288, wira yiipeke mutemplo. (1 Wah. 25:1, 6-8) Nave olelo-va, ninnooniherya omphenta wahu Muluku niipaka isipo soottottopela. Khivanitthuneya okhala mutthu oorattela wiipa. Mwa ntakiheryo: Ekeekhai wira okathi ninlavula ahu, “otheene ahu ninnittheka ikwaha sinceene”, masi eyo khennikhoottiherya olavula okathi wa mithukumano sa mmulokoni ni okathi woolaleerya. (Yak. 3:2) Moolikanasa, nihaana omuttottopela Yehova niipaka isipo, hata nuupuwelaka wira khaninsuwela wiipa saana.

11. Ntoko enooniherya aya Esalimo 48:13, xeeni vanreerela aya wiivaha okathi woopaka yoosoma ya Biibiliya ya emusi?

¹¹ Ninnimukokhorela Yehova, nisomaka Nuulumo nawe, ni owiixuttiha aniihu. Khalai, nihiku na esaabadu aisarayeli khiyavara muteko. Yaanirumeela okathi wira elipihe opatthani aya ni Yehova. (Okhum. 31:16, 17) Aisarayeli oororomeleya yaanaakhaliherya anaaya omusuwela Yehova ni oreera wawe murima. Nave-tho olelo-va, nihaana wiivaha okathi wira nisomeke Nuulumo na Muluku. Omusoma Biibiliya oniirela mpantta okokhorela wahu, nave onninikhaliherya omwaattamela Muluku. (Esal. 73:28) Nave okathi ninsoma ahu hoothe ntoko emusi, ninnaakhaliherya aniihu olipiha ompatthani aya ni Tiithi ahu oophenta a wiirimu.—Musome Esalimo 48:13.

12. Exeeni nniixutta ahu ni moota Yehova oonela awe muteko woopaka itthu saarumeeliwa mutabernaakulu?

¹² Ninnimukokhorela Yehova, okathi ninteka ahu ni olokiherya Inupa sa Omwene ni inupa sikina. Biibiliya onihimya wira muteko wooteka etabernaakulu ni itthu sikina saarumeeliwa-mo, waari muteko woowaarya. (Okhum. 36:1, 4) Nave olelo-va, Yehova onnoona muteko wooteka Inupa sa Omwene ni inupa sikina sa mutthenkeso ahu, ntoko muteko woowaarya. Anna akina ni arokora, annirumeela okathi aya munceene akhaliheryaka miteko iyo. Ninnixukhurela vanceene okhaliherya waya miteko sa Omwene. Nave anna awo annilaleerya. Akina, ikwaha sikina anniphavela okhala mapioneero. Tivonto, axitokweene animooniherya okhaliherya waya miteko sooteka, ahoovelelaka oweemererya anna awo ni arokora okhala mapioneero, vakhala wira anniphwanelela. Hata nisuwelaka oteka wala nnaari, ootheene  ahu nnoowerya okhaliherya wira inupa iyo sikhaleke sooratteleya ni sooreera.

13. Nooneleke sai musurukhu ninvaha ahu wira nikhaliherye miteko sa Omwene?

¹³ Ninnimukokhorela Yehova, okathi ninkhaliherya ahu miteko sa Omwene, nivahaka musurukhu ahu. Okathi aisarayeli yaarowela aya mithukumano tthaaru sa vamwaakhani, yaahaana okuxa etthu wira yanvahe Yehova. (Otum. 16:16) Khula mutthu aanivaha moovarihana ni ele aawerya awe. Mwa enamuna eyo, aisarayeli yaanooniherya wira yaanixukhurela itthu sootheene Yehova aapakenle awe. Ankhi hiyo, ninrowa wooniherya sai wira ninnimphenta Yehova ni omuxukhurela mwaha wa itthu sootheene onnipakela awe? Enamuna emosa, ovaha musurukhu ahu wira nikhaliherye muloko ahu, ni muteko wa Muluku wa olumwenku wootheene, moovarihana ni makhalelo ahu. Murummwa Paulo aahimmye so: “Muluku onnisiveliwa vanceene naavahaka ni murima wotheene, maana onilipelela wira mutthu ovaheke ele eniwerya awe, ohiya ele ehiniwerya awe”. (2 aKor. 8:4, 12) Yehova onnivaha efaita khula etthu ninvaha ahu ni murima wootheene, hata eryeene vakhaani.—Mar. 12:42-44; 2 aKor. 9:7.

14. Moovarihana ni Miruku 19:17, Yehova onnoonela sai okathi nnaakhaliherya ahu axinnihu axankale?

¹⁴ Ninnimukokhorela Yehova, okathi nnaakhaliherya ahu axinnihu axankale. Yehova aahileiherya wira aamwaareerela murima aisarayeli yaakhaliherya atthu oohaawa. (Otum. 15:7, 10) Khula okathi nnaakhaliherya ahu anna ni arokora axankale, mwa moonelo wa Yehova, nnivaha Yena. (Musome Miruku 19:17.) Mwa ntakiheryo, okathi murummwa Paulo aari awe mukhatteya, makristau a oFilipi yaahinvaha itthu saamuthowa. Paulo aahihimya itthu iyo okhala “yoovaha yoowunkhela ni mukuttho wooloka onimusivela Muluku”. (aFil. 4:18) Nkahaya muupuwele muloko anyu, nuumala-vo mwiikoheke so: ‘Kiireke ookhala mutthu kikhanle aka oomukhaliherya?’ Yehova onnihakalala aaniwehaka nirumeelaka okathi ahu, ikuru, itthu sinsuwela ahu opaka, ni mireerelo sahu wira naakhaliherye atthu axankale. Sootheene iyo siniirela mpantta okokhorela wahu.—Yak. 1:27.

15. Xeeni okokhorela weekeekhai ohinixankiha aya nnaamwi ovekela okathi ni wiimananiha?

¹⁵ Okokhorela weekeekhai onivekela okathi ni wiimananiha. Masi khahiyo etthu yooxankiha. (1 Yoh. 5:3) Mwaha wa xeeni? Mwaha woowi hiyo nimmukokhorela Yehova mwaha womphenta. Nkahaya mmuupuwele mwaana omphavela waavaha etthu apaapa awe. Owo pooti oviriha okathi munceene opakaka edesenyo wira aavahe. Masi hata vari siiso, khonihiya ohimalinhe. Okhala wira onnaaphenta apaapa awe, onnihakalala waavaha etthu. Mwa enamuna emosaru, mwaha woophenta Yehova, ninnihakalala orumeela okathi ahu ni ikuru sahu wira nimukokhorele.

16. Ntoko onihimya awe aHeeberi 6:10, Yehova onoonela sai wiimananiha wahu wira nimuhakalalihe?

¹⁶ Anamuyari oophenta khanlipelela ovahiwa etthu emosaru ni khula mwanaya. Awo annisuwela wira khula mwaana toovirikana ni mukhwaawe. Moolikanasa, Tiithi ihu a wiirimu onnisuwela makhalelo ahu. Woonasa wene nyuwo pooti osuwelaka opaka itthu sinceene, waavikana atthu anceene munaaphenta anyu ni munaasuwela anyu. Aahiiso pooti ohiweryaka ovara itthu sinceene ntoko atthu akina, waanyiheryasa mwaha wa iyaakha murina anyu, okumi anyu aahiiso miritti sa vatthokoni.  Masi muhikhulumuwe. (aGal. 6:4) Yehova khonrowa oliyala muteko anyu. Akhala wira munonvaha ele muniwerya anyu ni mathowa ooloka, Yena onoohakalala. (Mmusome aHeeberi 6:10.) Yehova onniwerya osuwela etthu eri vamurimani vahu. Nave omphavela wira nitteeliweke murima ni itthu ninwerya ahu opaka wira ninvahe.

17. (a) Akhala wira sookhala itthu sinivarihana ni okokhorela wahu sinnixankiha, exeeni ninreerela ahu opaka? (b) Niireke yookhala etthu yoolipinheni eniromoliwa ekaaxa eni: “ Muncererye Ohakalala Wanyu”?

¹⁷ Exeeni nikhanle ahu oopaka akhala wira khaninwerya ovara itthu sikina siniirela mpantta okokhorela wahu, ntoko omusoma Biibiliya aahiiso olaleerya? Okathi ninrowa ahu otepaka okhalela nthiti itthu iyo, nave sinootepaka onisivela ni sinooniphwanyihaka mureerelo. Hiyo pooti olikanyihaka miteko iyo ni otthimaka aahiiso omwiipa viola. Akhala wira nnooviriha okathi munceene nihitthimakaka wala nihimoopaka viola owo, khaninrowa olimalela. Masi exeeni enrowa okhumelela vakhala wira ninnitthimaka aahiiso omoopa mahiku ootheene? Ekeekhai wira woopaceryani, ninrowa opakaka eyo vakhaani-vakhaani, nuumala-vo nnoovirihaka okathi munceene. Akhala wira nnimoona wira wiimananiha wahu onnikumiherya mireerelo, woonasa wene nnootepaka ohakalala ni ophavela ovara itthu iyo. Eyo enoolikana ni miteko ninvara ahu wira nimukokhorele Yehova.

18. Etthu xeeni yuulupalexa ninreerela ahu opaka? Nave mireerelo xeeni sinrowa okhumelela?

¹⁸ Hiyo nipattuxiwe wira nimukokhoreleke Yehova. Tivonto, okathi nimpaka ahu eyo ninniphwanya ohakalala. Nave ninnikhalana nlipelelo na omurumeela Yehova mahiku ootheene. (Mir. 10:22) Ohiya-vo, ninnikhalana murettele mmuupuweloni, maana ninnisuwela wira, Yehova onnaakhaliherya arumeyi awe okathi wa mixankiho. (Yes. 41:9, 10) Mwekeekhai, ninnikhalana mathowa anniiriha ohakalala okathi nimmukokhorela ahu Tiithi ahu oophenta, yoowo ‘oniphwanela ovuwihiwa ni ottittimihiwa’ ni itthu sootheene opattunxe awe!—Wiis. 4:11.