1-2. Okathi atthu akina anipatisiwa aya, exeeni nimmakela ahu oweha? Nave exeeni ninreerela ahu wuupuwelelaka?

 NIIREKE mootoko waaweha atthu anrowa opatisiwa, okathi wa kongresu aahiiso asembeleya? Ahinatthi opatisiwa, moowiilipiha awo annaakhula makoho manli. Nto, amusi aya ni apatthani aya annihakalala vanceene. Nave okathi anikhuma aya mmaasini, awo annitheya nave atthu anniwoopela makuphi. Moolikanasa, khula esumana atthu anceene anniivahererya ni annipatisiwa khukhala Anamoona a Yehova.

² Ankhi nyuwo? Niireke munnuupuwela opatisiwa? Akhala wiira ti siiso, muhiliyale wiira nyuwo mwa mutthu a vameekhaaya vamaithoni va Yehova, hata mukhalaka olumwenku ola wootakhala. Ti voohakalaliha oweha wiira nyuwo mwa mutthu “munimphavela” Yehova Muluku. (Esal. 14:1, 2, Piipiliya Emakhuwa.) Nto mwaha ola, mpakeliwe nyuwo hata muri ene mmiravo aahiiso oowuuluvala. Nave hata mpatisiwe ene, mwaha ola onimookhaliheryani olipiha yoolakela anyu ya ohihiya omurumeela Yehova mahiku ootheene. Nto mwaha ola nnoothokorerya mathowa mararu anniiriha omurumeelaka Yehova.

3. Exeeni eniwiiriha arumeyi a Yehova ophentaka itthu sa ekeekhai ni sa xariya? (Esalimo 119:128, 163.)

³ Yehova aahaaleela arumeyi awe wiira yaahaana ‘ophentaka ekeekhai’. (Zak. 8:19) Nave Yesu aahaaleela awiixutti awe wiira yaahaana ophavelaka vanceene exariya. (Math. 5:6) Eyo enooniherya wiira nihaana opakaka itthu Yehova onoona awe okhala sooloka ni sa xariya. Nto niireke nyuwo munniphenta itthu sa ekeekhai ni sa xariya? Moohaanyiherya nyuwo munniphenta. Mwa ntakiheryo, nyuwo munninyokha wootha ni itthu sikina soohiloka. (Musome Esalimo 119:128, 163.) Mutthu owootha onitakiha mukhalelo wa Satana, namalamulela a olumwenku ola. (Yoh. 8:44; 12:31) Yoolakela  ya Satana ori oveehiha nsina noowaarya na Yehova. Okhuma okathi Satana aamoothenrye awe Muluku itthu soohiloka oxardim ya weedeni, mpakha olelo-va, owo onnimootherya. Maana Satana onimananiha owiiriha atthu wuupuwelaka wiira Yehova, Namalamulela oowiitthuna, oohiroromeleya ni ohimphavela waaweha apinaatamu ahakalalaka. (Maph. 3:1, 4, 5) Itthu Satana onimootherya awe Yehova, sinnihonona muupuwelo ni murima wa atthu anceene. Nave okathi atthu awo anithanla aya ‘ohiphenta ekeekhai’, Satana onniwiiriha opaka itthu sootakhala ni soohixariya sa inamuna sootheene. — aRom. 1:25-31.

4. Etthu xeeni Yehova onipaka awe enooniherya wiira yena “Muluku a ekeekhai”? (Nwehe eteseenyo.)

⁴ Yehova, “Muluku a ekeekhai”. Nto ti nthowa naya moophenta oniwiixuttiha awe ekeekhai arumeyi awe ootheene animphenta. (Esal. 31:5, Piipiliya Emakhuwa.) Mwaha woopaka eyo, Yehova onnaakhaliherya arumeyi awe awo, ohootothiwa ni Satana. Nave Yehova onniwiixuttiha arumeyi awe okhala oororomeleya ni axariya. Nto eyo ennaakhaliherya ale animphenta Yehova okhala oowiiyeviha ni okhala a murettele. (Mir. 13:5, 6) Niireke nyuwo mwaanoona wiira Yehova aanookhaliheryani okhalana mikhalelo iyo, okathi mwaasomihiwa anyu Biibiliya? Nyuwo muhiixutta wiira enamuna Yehova onipaka awe itthu, ennaakumiherya mireerelo atthu anceene woohelani muhina nyuwo. (Esal. 77:14) Tivo nyuwo munnipaka itthu Muluku onoona awe okhala sa xariya. (Math. 6:33) Nyuwo munniphavela waakiherya ekeekhai ni wooniherya wiira Satana nawoothe, ohiya Yehova. Nto munrowa owerya sai opaka eyo?

5. Munrowa wooniherya sai wiira munnikhaliherya ekeekhai ni exariya?

⁵ Mweettelo ahu onimooniherya vakhala wiira ninnikhootta soowootha sa Satana aahiiso akhala wiira ninnikhaliherya ekeekhai. Nave nyuwo munoowerya wooniherya wiira muniphavela olamuleliwaka ni Yehova mpakaka ele onihimya awe wiira etthu yooloka. Munrowa owerya sai opaka eyo? Munoowerya opaka eyo, mpakaka nivekelo ni omuleiherya Yehova wiira munrowa omurumeelaka mahiku ootheene. Nuumala-vo, munoowerya owooniherya atthu ootheene wiira muhiivahererya, mpatisiwaka. Ophenta itthu sa ekeekhai ni sa xariya ti itthu sinrowa oniiriha opatisiwa.

6. Nthowa xeeni ninniiriha omphentaka Yesu Kristu ninromoliwa Esalimo 45:5?

⁶ Exeeni enniiriha omphentaka Yesu Kristu? Esalimo 45:5, ninniphwanya mathowa anniiriha omphentaka. (Musome.) Moohaanyiherya nave nyuwo munnimphenta Yesu Kristu. Maana owo  moolipa murima aahaakiherya ekeekhai ni exariya. (Yoh. 18:37) Masi, ntakiheryo xeeni Yesu ovanhe awe nookhala oowiiyeviha?

7. Wiiyeviha wa Yesu oowiirihekeni opaka exeeni?

⁷ Ntakiheryo na Yesu, ninnooniherya wiira nave hiyo nnoowerya okhala atthu oowiiyeviha. Maana owo khula okathi, onninvuwiha Tiithi awe ohiya wiivuwiha mmansawe. (Mar. 10:17, 18; Yoh. 5:19) Niireke ntakiheryo nawe ninnoosivelani? Moohaanyiherya ti etthu ewiirinheni omphenta Yesu ni omutthara. Masi exeeni enimwiiriha Yesu okhala mutthu oowiiyeviha? Okhala wiira Yehova, Muluku oowiiyeviha. Nto Yesu onnimphenta Tiithi awe ni onnimutakiha. (Esal. 18:36; aHeeb. 1:3) Niireke eyo kheniwiirihani ophavela omusuwela vanceene Yesu, yoowo onitakiha mikhalelo sa Yehova?

8. Xeeni ninsiveliwa ahu okhalana Yesu ntoko Mwene ahu?

⁸ Ninnisiveliwa okhalana Yesu ntoko Mwene ahu, maana owo namalamulela ooloka. Nave Yehova tomwiixuttinhe Mwanawe ni tomuthanlale wiira okhale namalamulela. (Yes. 50:4, 5) Ohiya-vo, Yesu aahileva itthu sinceene mwaha wooniphenta. (Yoh. 13:1) Okhala wiira Yesu Mwene ahu, hiyo ninnireerela omphentaka. Nave Yesu onniwoona okhala apatthani awe atthu yaale animphenta. Nave-tho, aahihimya wiira apatthani awe yaamooniheryaka wiira annimphenta yiiwelelaka sooruma sawe. (Yoh. 14:15; 15:14, 15) Tthiri eparakha yuulupale okhala mpatthani a Mwaana a Muluku!

9. Opatisiwa wahu onlikana sai ni wa Yesu?

⁹ Yesu aahaaleela atthareli awe wiira ale aniphavela okhala mwiixutti awe ahaana opatisiwa. (Math. 28:19, 20) Nave owo aahipatisiwa. Ekeekhai wiira opatisiwa wa Yesu woovirikana vakhaani ni wawihu. (Nwehe ekaaxa eni: “ Opatisiwa wa Yesu Ovirikanne Sai ni Wawihu?”) Hata vari siiso, sookhala itthu sikina sinlikana aya. Mwa ntakiheryo, nuumala Yesu opatisiwa, owo aahooniherya wiira aarowa opakaka itthu sinimusivela Tiithi awe. (aHeeb. 10:7) Mwa enamuna emosaru, okathi nimpatisiwa ahu ninnooniherya wiira noovahererya okumi ahu wa Yehova. Okhuma nihiku nlo, ninnooniherya wiira okumi ahu wootheene ninrowa opakaka itthu sinimusivela Muluku ohiya itthu sinnisivela. Opaka eyo nnimooniherya wiira ninnitthara ntakiheryo na Yesu.

10. Etthu xeeni ekhanle oowiirihani opatisiwa?

¹⁰ Niireke munuupuwela itthu mwiixuttihiwa anyu voohimya sa Yesu? Nyuwo muhiixuttihiwa wiira Yesu, Mwaana mmosa ene a Muluku, ni wiira owo oothanliwa wiira olamuleleke valaponi. Nave nyuwo muhiixutta wiira Yesu onnitakiha wiiyeviha wa Tiithi awe. Nave-tho muhiixutta wiira Yesu aanaavaha yoolya atthu yaavoliwa etala, aahaamaaliha atthu yaariipiwe murima ni aahaapenuxa aretta. (Math. 14:14-21) Nyuwo munniwerya woona moota Yesu oneettiha awe miloko sawe olelo-va. (Math. 23:10) Nave okhala wiira Mwene a Omwene wa Muluku, owo onoopaka itthu sooloka muhoolo. Nto nuumala nyuwo wuupuwelela itthu iyo sootheene, munrowa wooniherya sai wiira munnimphenta Yesu? Munimooniherya muttharaka ntakiheryo nawe. (Yoh. 14:21) Etthu yoopacerya mukhanle anyu oopaka ori wiivahererya wa Yehova ni opatisiwa.

11. Etthu xeeni yuulupale enniiriha opatisiwa, ni mwaha wa xeeni?

¹¹ Nthowa xeeni nuulupale ninwiirihani opatisiwa? Yesu aahaakhula nikoho nla okathi aalavula awe sa yooruma yuulupale Muluku onivanhe awe. Owo aahimmye so: “Mumphenteke Yehova Muluku anyu ni murima anyu wotheene, ni okumi anyu wotheene, ni muupuwelo anyu wotheene, ni ikuru sanyu sotheene”. (Mar. 12:30) Niireke munnimphenta Yehova mwa enamuna eyo?

12. Exeeni eniwiirihani omphenta aka Yehova? (Nwehe elatarato.)

¹² Aakhala mathowa manceene anniiriha omphentaka Yehova. Mwa ntakiheryo, muhiixutta wiira Yehova, tori “maphattuwelo èkumi” ni wiira “soovaha sotheene sooreera ni soomalela,  sinikhuma” wa yena. (Esal. 36:10; Yak. 1:17) Nave itthu sootheene sooreera ni sooloka nivahiwe ni Yehova yoowo ori Muluku oovaha ni oophenta.

13. Xeeni yowoopola eri aya yoovaha ya efaita yinceene?

¹³ Mukuttho wowoopola wa Yesu, yoovaha yooloka enikhuma wa Yehova. Exeeni enniiriha ohimya siiso? Mwa ntakiheryo, Yesu ookhalana waataana wooloka ni Yehova. Ti nthowa naya Yesu aahimmye awe wiira: “Tiithi onnikiphenta” ni “miyo kinnaaphenta Atiithi”. (Yoh. 10:17; 14:31) Okhala wiira Yehova ni Yesu yaahiviriha iyaakha sinceene ari ene hoothe, nto waataana waya ti woolipa. (Mir. 8:22, 23, 30) Nkahaya muupuwele owereya Yehova oonale awe okathi eemerenrye awe wiira Mwanawe ohaaxiwe ni wiiviwe. Yehova aaheemererya wiira Mwanawe amphentexa awe, ovahe okumi awe ntoko mukuttho, wiira nikhalane okumi woohimala muhoolo. Nto eyo enooniherya wiira Yehova, onnaaphenta apinaatamu woohelani muhina nyuwo. (Yoh. 3:16; aGal. 2:20) Yowoopola ti nthowa nuulupale ninniiriha omphentaka Yehova.

14. Yoothanla xeeni yuulupale mukhanle anyu oopaka mookumini mwanyu?

¹⁴ Omphenta wanyu Yehova waanincerereya, okathi mwiixutta anyu voohimya sa yena. Moohaanyiherya nyuwo khamuniphavela ohiya olipiha ompatthani anyu ni Yehova. Opaka eyo vanniweryaneya, okhala wiira Yehova onnivekela wiira nihakalaliheke murima awe. (Mir. 23:15, 16) Nyuwo munoowerya omuhakalaliha Yehova ohiya paahi ni moolumo anyu masi-tho ni miteko  sanyu. Nave mweettelo anyu onimooniherya akhala wiira tthiri munnimphenta Yehova. (1 Yoh. 5:3) Eyo yoothanla yuulupale mukhanle anyu oopaka mookumini mwanyu.

15. Munrowa wooniherya sai wiira munnimphenta Yehova?

¹⁵ Munrowa wooniherya sai wiira munnimphenta Yehova? Mpakeke nivekelo mmuleelaka wiira munrowa omurumeelaka okumi anyu wootheene. (Esal. 40:9) Nuumala-vo, nwooniheryeke atthu akina yoothanla anyu mpatisiwaka. Ntoko niwenhe ahu mwaha ola, opatisiwa etthu ya efaita yinceene mookumini mwanyu. Nuumala opatisiwa, nyuwo munrowa wooniheryaka wiira munrowa opakaka itthu sinimusivela Yehova ohiya itthu sinoosivelani. (aRom. 14:8; 1 Ped. 4:1, 2) Opaka eyo yoothanla yooloka ni yuulupale. Maana yoothanla eyo, enimookhaliheryani okhalana okumi woohakalaliha. Moota xeeni?

16. Moovarihana ni Esalimo 41:13, Yehova onrowa waatthuvela sai ale anivahererya okumi aya wiira amurumeeleke yena?

¹⁶ Yehova, Muluku oovaha. Nto hata mulenve ene itthu sinceene wiira mmurumeele, Yehova onimoovahani itthu sinceene ovikana iye mulevale anyu. (Mar. 10:29, 30) Yehova onimookhaliheryani okhalana okumi woohakalaliha nnaamwi mukhalaka olumwenku ola wootakhala ohanle vakhaani omala. Nno wanipacerya paahi. Maana okumi munrowa anyu okhalana muhoolo ti woohimala. Nto muhihiye omurumeela Yehova okumi anyu wootheene. Mwapaka eyo omphenta wanyu Yehova, onrowa wuncerereyaka ni munrowa okhalaka mahiku ootheene valaponi. — Musome Esalimo 41:13.

17. Itthu xeeni munreerela anyu onvaha Yehova sihirina awe?

¹⁷ Okathi munivahererya anyu okumi anyu wa Muluku ni opatisiwa, munninvaha Yehova etthu ya faita yinceene. Maana itthu sootheene sooreera ni okathi woohakalaliha mwaarina anyu, mwaavahiwe ni Yehova. Nto munoowerya omuxukhurela Yehova munvahaka itthu sihirina awe. Itthu sene tiiya: Ororomeleya wanyu ni omurumeela wanyu ni murima wootheene. (Yob. 1:8; 41:11; Mir. 27:11) Moohaanyiherya mwapaka eyo, munoorumeela saana okumi anyu. Tthiri omphenta wanyu Yehova tonrowa owiirihani opatisiwa.

18. Makoho xeeni ninreerela ahu wiikohaka?

¹⁸ Niireke munniphavela opatisiwa? Nyuwo paahi munisuwela waakhula nikoho nna. Masi vaamureerela wiikoha so: ‘Kiireke kihiilokiherya wiira kipatisiwe?’ (Mit. 8:36) Nkahaya muupuwele mathowa mararu nithokorenrye ahu mwaha ola. Noopacerya, nyuwo munniphenta itthu sa ekeekhai ni sa xariya. Nto mwiikoheke so: ‘Kiireke kinniphavela okhala olumwenku atthu ootheene anrowa aya olavulaka ekeekhai ni opaka itthu sa xariya?’ Na nenli, nyuwo munnimphenta Yesu Kristu. Nave mwiikoheke so: ‘Kiireke kinniphavela wiira Mwaana a Muluku okhaleke Mwene aka ni kitthareke ntakiheryo nawe?’ Na neeraru, nyuwo munnimphenta Yehova. Nave-tho mwiikoheke so: ‘Kiireke kinniphavela omuhakalaliha Yehova ni omurumeela?’ Nto akhala wiira munaakhula wiira aayo makoho ala ootheene, nto exeeni enookhoottiheryani opatisiwa? Enoopisihani exeeni? — Mit. 16:33.

19. Xeeni muhinreerela anyu woovelela opatisiwa? Mutthokiherye. (Yohani 4:34.)

¹⁹ Niireke munnoovelela opatisiwa? Akhala wiira ti siiso, muupuweleke nlikanyiho Yesu aavanhe awe. (Mmusome Yohani 4:34.) Yesu aahilikanyiha opaka itthu sinimusivela Muluku, ni eyoolya. Mwaha wa xeeni? Okhala wiira eyoolya enninikhaliha saana, Yesu aanisuwela wiira itthu sootheene Yehova onnivekela awe wiira nipakeke, sinniniphwanyiha mureerelo. Nave Yehova khonniruma opaka etthu yaarowa onikumiherya mixankiho. Masi niireke opatisiwa oniirela mpantta itthu Yehova onnivekela awe opaka? Aayo, oniirela mpantta. (Mit. 2:38) Ntoko siisaale mwahaarowa anyu woovelela olya eyoolya yoosiva, mukupaliki wiira mwapatisiwa, munoophwanya mareeliho. Nto xeeni munoovelela anyu opatisiwa?

20. Mwaha onittharelana ninrowa othokorerya exeeni?

²⁰ Niireke muhiilokiherya wiira mpatisiwe? Anamunceene anaakhula so nikoho nna: “Miyo nlelo nkiilokihenrye”. Wiivahererya wa Yehova ni opatisiwa, yoothanla yuulupale munreerela anyu opaka mookumini mwanyu. Nto muhinatthi wiivahererya ni opatisiwa, tthiri muhaana wuupuwela toko saana. Woonasa wene, nyuwo pooti olipelelaka ovira okathi, wuupuwela saana ni wiimananiha vanceene wiira mphwanelele opatisiwa. Nto akhala wiira munniphavela opatisiwa, muhaana opakaka exeeni wiira mwiilokiherye? Mwaha onittharelana nnimwaakhula nikoho nna.