1. Etthu xeeni enrowa onimaaliha vaavo nnoona ahu wira nri mekhihu ni ninniwanana ahu mixankiho? (Esalimo 118:5-7)

NIIREKE mootoko okhalana muxankiho munoona wira muri mekhinyu ni khuuvo mutthu okhanle oowookhaliheryani? Akhala wira ti siiso, nyuwo khamukhanle mekhinyu, atthu akina aatoko okhalana moonelo owo waahela muhina arumeyi oororomeleya a Yehova. (1 Mam. 19:14) Akhala wira eyo yootoko owiiraneelani, muupuweleke yooleiherya ya Yehova eni: “Miyo nkinonyanyalani-tho: kinimojalani mahiku othene”. Mwaha wa yooleiherya eyo ya Yehova, hiyo pooti ohimya ni murima wotheene wira: “Apwiya [Yehova] t’anikikhaliherya, tivó vahinòvaka etthu”. (aHéb. 13:5, 6) Murummwa Paulo aalepenle moolumo ala maKristau yaakhala oYudeya mwaakha 61 nuumala Kristu orwa. Nave moolumo ala anninuupuxerya moolumo nimphwanya ahu Esalimo 118:5-7.—Musome.

2. Mwaha ola, ninrowa othokorerya exeeni ni nthowa xeeni?

² Ntoko nasaalimo, murummwa Paulo aahisuwela wira aanikhaliheriwa ni Yehova, mwaha woowi Yehova aahimukhaliherya ikwaha sinceene khalai. Mwa ntakiheryo, iyaakha piili ohinatthi olepa ewarakha awe ya aHeberi, eettaka mukwaha aahikhumelela munamukhaya muulupale mphareya. (Mit. 27:4, 15, 20) Okathi eetta awe mukwaha ole ni ohinatthi mukwaha ole, Yehova aahooniherya wira aanimukhaliherya Paulo. Nrowe nthokorerye inamuna tthaaru. Yoopacerya, Yehova aahimukhaliherya Paulo omurumaka Yesu ni malaikha. Ya nenli, aarumeelaka apinaatamu arina akhulupale. Ya neeraru, aarumeelaka anna ni arokora. Othokorerya inamuna iyo Yehova aamukhalihenrye awe Paulo sinimuncererya  ni olipiha okupali wahu wira Yehova onoonikhaliherya.

3. Etthu xeeni Paulo aikoha awe ni nthowa xeeni?

³ Paulo aaniphavela okhaliheriwa. Mwakha 56 nuumala Kristu orwa, muttitthi waahimukumiha Paulo mutemplo oYerusalemu ni waaphavela omwiiva. Nihiku naattharelana vaavo Paulo aaroihiwe awe oSineedrio, aahaala vakhaani wiiviwa ni awanani awe. (Mit. 21:30-32; 22:30; 23:6-10) Okathi ole, woonasa wene Paulo aaniikoha so: ‘Mpakha silini kinrowa aka ovilela mixankiho iya?’

4. Yehova aamurumme sai Yesu wira omukhaliherye Paulo?

⁴ Paulo aakhaliheriwe sai? Ohiyu, Paulo ohinatthi ovariwa ni otthukweliwa, “Apwiya” Yesu yaahimukhumelela amuhimeerya wira: “Mulipihe murima! Nyuwo mokikhalela onamona oYerusalemu nno: siso muhana okikhalela-tho onamona oRoma”. (Mit. 23:11) Tthiri moolumo ale yaahimulipiha vanceene Paulo ni yaaphiyale okathi wooreerela! Maana Yesu aahimuttottopela Paulo mwaha woovaha onamoona oYerusalemu. Ohiya-vo, Yesu aahimuleiherya Paulo wira amphiya oRoma moovareleleya, weiwo aarowa awe ovaha onamoona. Nuumala wiiwa moolumo ale oolipiha Paulo khoova etthu ntoko mwaana ohinoova awe vaavo onikhala awe mmatatani mwa paapa awe.

5. Yehova aarumme sai nlaikha wira omukhaliherye Paulo? (Nwehe elatarato ya ekaapa.)

⁵ Mixankiho xeeni sikina Paulo aarina awe? Iyaakha piili muhoolo mwaya nuumala sowiiraneya iye oYerusalemu, Paulo aari mukalawani orowaka wItália. Nto yeettaka mukwaha ole aahikhumelela munamukhaya, yoowo atthu yeettiha ekalawa ele ni atthu akina yaawenle ekalawa ele yuupuwela aya wira yaamookhwa. Masi Paulo khoova etthu. Mwaha wa xeeni? Paulo aahaaleela atthu yaari mukalawani mme wira: “Ohiyu yola, nlaikha na Muluku kinimuttittimihaka n’umurumela, nokikhumelela, khukihimerya wira: ‘Nyuwo Paulo, muhòvé! Muhana orowa wa mwené mulupale òRoma: vano, mwaha wa nyuwo Muluku onimovahani ekumi y’atthu othene arinanyu mukalawani’”. Yehova aahiruma nlaikha wira nimulipiherye Paulo moolumo aaleeliwe awe ni Yesu. Nto Paulo aahiphiya oRoma ntoko Yehova aaleihenrye awe.—Mit. 27:20-25; 28:16.

6. Yooleiherya xeeni Yesu onivanhe awe ennilipiha ni nthowa xeeni?

⁶ Hiyo ninkhaliheriwa sai? Yesu onoonikhaliherya ntoko aamukhalihenrye awe Paulo. Mwa ntakiheryo, Yesu onnaaleiherya atthareli awe otheene wira: “Miyo kinokhala ni nyuwo mahiku othene, mpakha elapo omala”. (Math. 28:20) Moolumo ala a Yesu anninivaha ikuru. Mwaha  wa xeeni? Mwaha woowi, mahiku makina toovila ovilela. Mwa ntakiheryo, vaavo ninkhweliwa ahu mpatthani wala mmusi ahu, hiyo ninnoona owereya ni oriipiwa murima vanceene ohiya paahi mahiku vakhaani, masi owereya iwo pooti oviriha iyaakha sinceene. Atthu akina annikhalana mahiku ooxankiha mwaha wa mixankiho sinikumiheriwa ni wuuluvala. Nave atthu akina anniviriha mahiku ootepexa oxankiha mwaha woowi anriipiwa murima. Hata vari siiso, hiyo ninniphwanya ikuru wira nivilele mwaha woowi Yesu ori ni hiyo “mahiku othene” mookumini mwahu hata mahiku yaale ootepexa oxankiha.—Math. 11:28-30.

7. Moovarihana ni Wisupulula 14:6, olelo-va Yehova onnikhaliherya sai?

⁷ Biibiliya onninlipiherya wira Yehova onniruma malaikha wira anikhaliherye. (aHéb. 1:7, 14) Mwa ntakiheryo, malaikha anninikhaliherya ni onivaha malakiheryo vaavo nnaalaleerya ahu ihapari ‘sorera s’Omwene’ atthu “a maloko othene ni a mahimo othene ni a malavulelo othene ni a ilapo sothene”.—Math. 24:13, 14; mmusome Wisupulula 14:6.

8. Omurumaka mukhulupale aanakhotto, Yehova aamukhalihenrye sai Paulo?

⁸ Paulo aakhaliheriwe sai? Mwaakha 56 nuumala Kristu orwa, Yesu aahimulipiherya Paulo wira amphiya oRoma. Masi aYuda akina oYerusalemu yaaphavela omwiipithela Paulo wira amwiive. Nto vaavo mukhulupale aanakhotto oRoma iitthaniwa Klaudio Lisia aamusuwenle awe palano owo, aahimukhaliherya Paulo. Moohipisa, Klaudio aahiruma ekrupu ya anakhotto wira yamukhapelele Paulo ni omukuxa amuroihaka oKesareya, elapo yeeyo yaarakamelanne ni oYerusalemu ikiloomo 105. Nuumala Paulo ophiya oKesareya, kuvernatoro Feelexi aahiruma wira Paulo asukiweke “owannyawe Herodi”. Nto Paulo aari ottaiwene wa awanani awe ni khiyaarowa owerya omwiiva.—Mit. 23:12-35.

9. Kuvernatoro Festo aamukhalihenrye sai Paulo?

⁹ Iyaakha piili muhoolo mwaya, Paulo ori ene mukhatteya oKesareya, Feelexi aahirantteliwa ni kuvernatoro Festo. Nto aYuda yaahimuxonttela Festo wira omuruuhe Paulo oYerusalemu wira ophukeliwe. Masi Festo aahikhootta opaka eyo. Woonasa wene, kuvernatoro ole aanisuwela wira aYuda ale “yahilikanela omwipithela Paulo mphironi n’umwiva”.—Mit. 24:27–25:5.

10. Etthu xeeni kuvernatoro Festo aapanke awe vaavo Paulo anvekenle awe wira ophukeliwe ni mwene ooRoma?

¹⁰ Muhoolo mwaya, Paulo aahitthukweliwa oKesareya. Okhala wira Festo ‘aaphavela waasiveliha aYuda’ aahimukoha Paulo wira: “Munnitthuna orowa oYerusalemu wira mulattu anyu waphukiwe weiwo, oholo waka?” Paulo aanisuwela wira akhala wira aamurowa oYerusalemu, woonasa wene aYuda yaamwiiva. Nave aanisuwela etthu aakhanle awe oopaka wira oopole okumi awe, eyo piiyo, orowa oRoma ni ovikaniha muteko awe woolaleerya. Nto Paulo aahimwaakhula wira: “Kintthuna ophukiwa ni mwené òRoma!” Vano nuumala Festo waakoha anamiruku awe aahimuleela Paulo wira: “Nyuwo momutthyawelela mwené òRoma, tthiri munorowa wa yowo!” Yoothanla ya Festo ya omuroiha Paulo oRoma yaahimoopola Paulo wira ohiiviwe ni awanani awe. Moohipisa aarowa okhala oRoma ottaiwene wa aYuda, yaawo yaaphavela omwiiva.—Mit. 25:6-12.

11. Moolumo xeeni a profeta Yesaya, woonasa wene Paulo uupuwenle awe?

¹¹ Okathi Paulo aalipelela awe mukwaha awe woorowa wItália, woonasa wene owo aahuupuwela nlopolo profeta Yesaya aarummwale awe olepa voohimya sa awanani a Yehova oriki: “Mupuwelexe itthu sinrowanyu opaka: khasinìraneya. Tthiri Muluku ori ni hiyo”. (Yes. 8:10) Paulo aanisuwela wira aamukhaliheriwa ni Muluku.  Nto eyo yaahinvaha ikuru wira ovilele mixankiho saarowa omukhumelela muhoolo.

12. Julio aamuthokorenrye sai Paulo, ni woonasa wene etthu xeeni Paulo aasuwela awe?

¹² Mwakha 58 nuumala Kristu orwa, Paulo aahipacerya mukwaha awe woorowa wItália. Okhala wira Paulo aari pereso, oRoma owo aahivahereriwa wira okhapeleliweke ni mukhulupale aanakhotto iihaniwa Julio. Nto okhuma nihiku nne orowa ohoolo, Julio aahikhalana owerya wa omuhasula Paulo aahiiso omureerela murima omuthokoreryaka saana. Masi Julio aarumenle sai okhulupale awe? Nihiku naattharelana vaavo yaaphiyale aya nipuro noopacerya yeemenle aya, “Julio, amurerela murima Paulo, ahimuhiya orowa waxekurya apatthani awe”. Muhoolo mwaya, Julio aahimoopola Paulo. Moota xeeni? Anakhotto yaaphavela owiiva apereso otheene yaari mukalawani, masi Julio aahaakhoottiha. Mwaha wa xeeni? Mwaha woowi ‘atthuna omopola Paulo’. Woonasa wene, Paulo aahisuwela wira Yehova aahimuruma mukhulupale ole aanakhotto ooreera murima wira omukhaliherye ni omukhapelela.—Mit. 27:1-3, 42-44.

13. Mwa enamuna xeeni Yehova okhanle awe oowaarumeela makhulupale a mulaponi?

¹³ Hiyo ninkhaliheriwa sai? Yehova pooti orumeela owerya wa munepa wowaarya wira owiirihe makhulupale a mulaponi opaka yootthuna awe. Mwene Salomoni aalempe so: “Apwiya annettiha murima wa mwené, eroihaka ontthunaya, ntoko sinettihaya màsi anvira mmuró”. (Mir. 21:1) Moolumo ala anitaphulela exeeni? Apinaatamu pooti othipa muro wira maasi ahapuweleke opuro aniphavela aya. Mwa enamuna emosaru, Yehova pooti orumeela munepa awe wowaarya wira owiirihe anamalamulela opaka etthu enivarihana ni otthuna wawe. Nto vaavo eyo eniiraneya aya, anamalamulela annipaka soothanla sinaaphwanyiha mireerelo atthu a Muluku.—Mulikanyihe ni Ézira 7:21, 25, 26.

14. Moovarihana ni Miteko 12:5, tani ninreerela ahu waavekelela?

¹⁴ Nihaana opaka exeeni? Otheene ahu nihaana waavekelela “mamwene ni matokwene othene” vaavo anrowa aya opaka soothanla sinivarihana ni okumi ahu wala muteko ahu woolaleerya. (1 Tim. 2:1, 2; Neh. 1:11) Ntoko yaapanke aya maKristau a eseekulu yoopacerya, hiyo nave ninnaavekelela wa Muluku anna ni arokora yaawo atthukweliwe mukhatteya. (Musome Miteko 12:5; aHéb. 13:3) Nave hiyo pooti waavekelela mapoliisia yaawo anaakhapelela anna ni arokora ari mukhatteya. Nihaana omuxonttela Yehova wira owiirihe mapoliisia awo wira yaareereleke murima anna ni arokora awo atthukweliwe ntoko Julio aamureerenle awe murima Paulo.—Mit. 27:3.

15-16. Yehova aamukhalihenrye sai Paulo omurumaka Aristarko ni Luka?

¹⁵ Paulo aakhaliheriwe sai? Okathi Paulo aarowa awe oRoma, Yehova aahaaruma ikwaha sinceene anna wira amukhaliherye Paulo. Nrowe niwehe eyo, nthokoreryaka matakiheryo vakhaani.

¹⁶ Apatthani anli oororomeleya a Paulo Aristarko ni Luka, yaahimutthara Paulo vaavo aarowa awe oRoma. * Biibiliya khonihimya wira Yesu aahimuleiherya Aristarko ni Luka wira yamphiya moovareleleya oRoma. Hata vari siiso, awo yaahileva ikumi saya anamutthara Paulo. Awo yaahipaka eyo wira amukhaliherye Paulo. Masi okathi wa munamukhaya muulupale mphareya awo yaahisuwela wira yaamoopowa. Nto okathi Aristarko ni Luka yaawenle aya ekalawa oKesareya, woonasa wene Paulo aahipaka nivekelo omuxukhurelaka Yehova ni murima wotheene mwaha wa nikhaliheryo aavahiwa awe ni apatthani awe ale anli oolipa murima.—Mit. 27:1, 2, 20-25.

17. Yehova aamukhalihenrye sai Paulo aarumaka anna ni arokora?

¹⁷ Okathi wa mukwaha awe, Paulo aahikhaliheriwa ikwaha sinceene ni anna. Mwa ntakiheryo, nuumala ophiya epooma ya oSidoni “Julio, amurerela murima Paulo, ahimuhiya orowa waxekurya apatthani awe, wira avahiwe saphavelawe”. Muhoolo mwaya epooma ya oPotiyoli, Paulo ni apatthani awe ‘yahaphwanya weiwo axinna aKristu, khuwirela okhala ni yawo mahiku mathanu na manli’. Vaavo anna a mapuro awo yaamukhapelela aya Paulo ni apatthani awe, moohaanyiherya Paulo aanaahakalaliha anna awo aaleelaka sowiiraneya soovara murima. (Mulikanyihe ni Miteko 15:2, 3.) Nuumala olipihana vanceene, Paulo ni apatthani awe yaahivikaniha mukwaha aya.—Mit. 27:3; 28:13, 14.

18. Exeeni yaamwiirinhe Paulo omuxukhuru Muluku ni olipa murima?

¹⁸ Vaavo eetta awe orowaka oRoma, woonasa wene Paulo aanuupuwela moolumo aalepenle awe muloko ole iyaakha tthaaru saavinre oriki:  “Sovira iyakha sinjene kiphavelaka woxekuryani”. (aRom. 15:23) Masi Paulo khaasuwela wira amphiya oRoma ori ene pereso. Vano nkahaya muupuwele moota Paulo aahakalanle awe vaavo aasuwenle awe wira anna ooRoma yaanimulipelela mphironi wira amukhomase. “Paulo vawehalyawe atthu awo, ahimuxukhuru Muluku khulipihiwa murima”. (Mit. 28:15) Moone wira Paulo aahimuxukhuru Muluku mwaha wa axinnawe orowa okumana ni yena. Mwaha wa xeeni? Mwaha woowi, Paulo aahoona wira Yehova aanaarumeela anna wira amukhaliherye.

19. Moovarihana ni 1 Pedru 4:10, Yehova onrowa onirumeela sai wira naakhaliherye atthu akina?

¹⁹ Nihaana opaka exeeni? Niireke nyuwo munnimusuwela munna wala murokora a muloko anyu oniwereyasiwa wala orina mixankiho sikina? Woonasa wene, munna wala murokora owo ookhweliwa mmusi wala mpatthani awe. Nto akhala wira ninnisuwela wira ookhala munna wala murokora orina mixankiho ntoko iyo, nihaana onvekela Yehova wira onikhaliherye ohimya etthu wala opaka etthu enrowa omooniherya wira ninnimphenta vanceene. Moolumo ni miteko sahu pooti waalipiha vanceene anna ni arokora. (Mmusome 1 Pedru 4:10.) * Eyo pooti owiiriha okupali ni murima wotheene yooleiherya ya Yehova eni: “Miyo nkinonyanyalani-tho: kinimojalani mahiku othene”. Niireke eyo khenincererya ohakalala wanyu?

20. Xeeni ninhimya ahu ni murima wotheene wira ‘Apwiya [Yehova] t’anikhaliherya’?

²⁰ Ntoko yiiraneyale aya ni murummwa Paulo ni apatthani awe, okathi mukina pooti onikhumelela mixankiho sinceene mookumini mwahu. Masi okathi omosaru hiyo ninnilipa murima mwaha woowi Yehova ori ni hiyo. Owo onninikhaliherya omurumeelaka Yesu ni malaikha. Ohiya-vo, akhala wira etthu eyo ennivarihana ni otthuna wawe, Yehova pooti onikhaliherya aarumeelaka makhulupale a mulaponi. Anamunceene a hiyo aahoona wira Yehova oorumeela munepa awe wowaarya wira owiirihe anna ni arokora onikhaliherya. Tthiri ntoko Paulo hiyo nookhalana mathowa manceene anniiriha ohimya ni murima wotheene wira: “Apwiya [Yehova] t’anikikhaliherya, tivó vahinòvaka etthu. Atthu anwerya okìriha exeni?”—aHéb. 13:6.