“Okathi kinriipiwaka murima, Yehova onnikimaaliha orumeelaka isipo sa JW Broadcasting^®”. — Lorraine, wEstados Unidos.

“Isipo sa Omwene” siniirela mpantta omukokhorela wahu Muluku. (aKol. 3:16) Vakhala wiira munimwiixutta isipo iyo ni ohela vamurimani, sinimookhaliheryani hata okathi muhirina anyu eliivuru ya isipo aahiiso telefoni. Vano mweererye inamuna sinittharelana wiira nwerye ohela vamurimani ni wuupuwelela isipo iyo:

• Musomeke ni ephoole moolumo a nsipo nno wiira mwiiwexexe etthu enitaphulela aya. Vakhala wiira munimwiiwexexa, vanimookhweelakani wuupuwelela itthu sinoovarani murima. Ileetera sa isipo iyo ohela muhina iviidiyu sa isipo ni isipo sa anamwane, sinniphwanyaneya musaitini jw.org. Mulepe so muusika epantte eni ebiibilioteka.

• Mukopiyaariki ileetera iyo. Opaka eyo, munoowerya ohela vamurimani ni mmuupuweloni ipantte sinoovarani murima. — Otum. 17:18.

• Mwiipeke voowiiwanyeya. Musomeke aahiiso mwiipeke isipo iyo ikwaha sinceene.

• Mweereryeke vakhala wiira moohela mmuruni. Mmananiheke wuupuwela moolumo awo muhiwenhe eleetera aya, moottharelana nweheke vakhala wiira muhiipa saana.