1-2. Xeeni ikwaha sikina nnoona ahu wiira Yehova khonaakhula mavekelo ahu?

 “MUTTEELIWEKE murima mwa APWIYA, nave awo animoovahani emphavela murima anyu”. (Esal. 37:4, Piipiliya Emakhuwa.) Tthiri moolumo ala toohakalaliha! Masi niireke nihaana olipelela wiira Yehova onoonivaha itthu sootheene nninvekela ahu? Exeeni enniiriha okoha siisa? Nkuupuwelani soowiiraneya iya sinittharelana: Murokora mmosa oohitheliwa onninvekela Yehova wiira orowele Eskola ya Anamalaleerya a Omwene. Masi sinnivira iyaakha sinceene ohilattuliwaka. Munna mmosa mmiravo oniwereyasiwa, onninvekela Yehova wiira omukhaliherye openuwa, wiira oweryeke ovara miteko sa mmulokoni ntoko oniphavela awe. Masi hata vari siiso, owo khonipenuwa. Anamuyari a mmiravo mmosa, anninvekela Yehova wiira mwanaya ohihiye omurumeela yena. Masi muhoolo mwaya mwaana owo onnithanla ohiya omurumeela Yehova.

² Pooti wiira ni nyuwo mootoko onvekela etthu Yehova masi ohoovahani. Mwaha waivaavo, woonasa wene munnuupuwela wiira Yehova onaakhula mavekelo a atthu akina, ohiya awinyu. Aahiiso pooti wuupuwelaka wiira mpanke etampi. Murokora oniitthaniwa Janice b uupuwela siiso. Owo ni iyawe yaaninvekela Yehova aphavelaka wiira yarumeeleke oBeteli. Janice onihimya so: “Miyo kaakupali wiira moohipisa naamulattuliwa orowa orumeela oBeteli”. Iyaakha sinceene saanivira, nave anamathelana ale khiyaalattuliwa. Janice onihimya so: “kaahiriipiwa murima ni oxanka. Kuupuwela wiira yookhala etthu kaapanke aka yaamuriipinhe murima Yehova. Kaanivekela  mooluluwanya voohimya sa mwaha ole. Nave kaaniikoha etthu yaamwiiriha Yehova ohaakhulaka mavekelo aka”.

3. Exeeni ninrowa ahu othokorerya mwaha ola?

³ Ikwaha sikina pooti wiira ninniikoha akhala wiira Yehova onniwiriyana mavekelo ahu. Hata alopwana oororomeleya a khalai yaaniikoha siiso. (Yoob. 30:20; Esal. 22:2; Hab. 1:2) Exeeni enrowa onikhaliherya okupali wiira Yehova onimwaakhula mavekelo ahu? (Esal. 65:2) Mwaha ola, ninrowa othokorerya makoho mararu anrowa onikhaliherya waakhula nikoho nna. Noopacerya, Yehova onrowa opaka exeeni? Na nenli, Yehova oniphavela wiira nipakeke exeeni? Na neeraru, Woonasa wene exeeni ninreerela ahu olokiherya okathi ninvekela ahu?

4. Moovarihana ni Yeremiya 29:12, exeeni Yehova oleihenrye awe opaka?

⁴ Yehova onnileiherya wiira onoowiriyanaka mavekelo ahu. (Mmusome Yeremiya 29:12.) Muluku ahu onnaaphenta arumeyi awe oororomeleya, nto owo onimwaakhula mavekelo aya. (Esal. 10:17; 37:28) Masi eyo khentaphulela wiira Yehova onoonivaha khula etthu nninvekela ahu. Woonasa wene itthu sikina nninvekela ahu, onrowa onivaha elapo esya.

5. Exeeni Yehova onuupuwela awe okathi oniwiriyana awe mavekelo ahu? Mutthokiherye.

⁵ Yehova onnuupuwela moota mavekelo ahu anivarihana aya ni ele oniphavela awe. (Yes. 55:8, 9) Itthu oniphavela awe sinihela muhina, elapo osareya atthu oowiiraana, oohakalala ni anilamuleliwa ni yena. Masi Satana aahootha ohimyaka wiira apinaatamu enaamuhakalala akhala wiira animwiilamulelaka. (Maph. 3:1-5) Ophavelaka wooniherya wiira etthu aahimmye awe Diabo khahiyo ekeekhai, Yehova ooweemererya apinaatamu wiira elamuleleke. Masi mixankiho sinceene sinikhumelela olelo-va, sinikumiheriwa ni ikuvernu sa apinaatamu. (Mus. 8:9) Hiyo noosuwela wiira Yehova khonrowa omaliha mixankiho sootheene, nenna-va. Okhala wiira opaka eyo, atthu akina yaarowa wuupuwelaka wiira ikuvernu sa apinaatamu ti sooloka, ni soowerya omaliha mixankiho.

6. Xeeni ninreerela ahu okupali wiira khula okathi Yehova onoopaka itthu moophenta ni mwa xariya?

⁶ Yehova pooti waakhula mavekelo oolikana, masi mwa inamuna soovirikana. Mwa ntakiheryo, okathi mwene Ezekiya aawereiwa awe vanceene, aahinvekela Yehova wiira ompenuxe. Nto Yehova aahimpenuxa. (2 Mam. 20:1-6) Masi murummwa Paulo aahinvekela Yehova wiira okumihe “miiwa” saari mweerutthuni mwawe, eyo piiyo, owereyasiwa. Masi Yehova khaapanke eyo. (2 aKor. 12:7-9) Vano nwehe-tho etthu yiiraneyale ni murummwa Yakobo ni Pedru. Mwene Herodi aaphavela owiivasa. Anna ni arokora a mmulokoni yaahivekela wiira Yehova omukhaliherye Pedru woonasa wene ni Yakobo. Masi Yakobo aahiiviwa, Pedru aahoopoliwa ni nlaikha mwa mwiiriirya. (Mit. 12:1-11) Waanyiheryasa, hiyo pooti wiikohaka so: ‘Xeeni Yehova aamooponle awe Pedru paahi omuhiya Yakobo?’ Biibiliya khonihimya mathowa ene. c Masi nikupaliki wiira Yehova Muluku ‘axariya’. (Otum. 32:4) Ninnisuwela wiira Yehova aanaaphenta oowanli aya. (Wiis. 21:14) Ikwaha sikina Yehova pooti waakhula mavekelo ahu mwa enamuna nahaalipelela ahu. Moohaanyiherya, ninnisuwela wiira Yehova onipaka itthu moophenta ni mwa xariya. Tivonto, khanikhanle omphukela sa moota onithanla awe waakhula mavekelo ahu. — Yoob. 33:13.

7. Exeeni nihinreerela ahu opaka ni mwaha wa xeeni?

 ⁷ Nihilikanyiheke mixankiho sahu ni sa atthu akina. Mwa ntakiheryo, hiyo pooti onvekela Yehova wiira onikhaliherye mwaha wa muxankiho nirina ahu, masi nnoona opisa waakhuliwa. Muhoolo mwaya, nyuwo pooti woonaka wiira mutthu mukina aahipaka nivekelo ntoko mwaapanke anyu, masi munoona wiira yena ohaakhuliwa. Murokora mmosa oniitthaniwa Anna, yaahimwiiraneela etthu emosa-ru. Owo aahinvekela Yehova wiira omukhaliherye iyawe, Matthew, wiira openuwe oretta wa kanser aarina awe. Nave okathi ole, yaahikhala arokora anli oowuuluvala yaarina oretta wa kanser. Murokora Anna aaninvekelela moohihiyererya iyawe vamosa ni arokora ale. Arokora ale aapenuwasa masi iyawe ohookhwa. Wanipacerya murokora Anna aaniikoha nthowa naya Yehova aakhalihenrye awe arokora ale openuwa. Akhala wiira aahaakhaliherya, xeeni ahaamukhalihenrye awe iyaka? Tthiri hiyo khaninsuwela moota arokora ale yaapenunwe aya. Masi ninnisuwela wiira Yehova onoomaliha mixankiho sootheene sinniphwanya ni onimwaahihimuxa ale akhwiiye. — Yoob. 14:15.

8. a) Moovarihana ni Yesaya 43:2, Yehova onnikhaliherya sai? b) Mavekelo annikhaliherya sai okathi sinniphwanya aya mixankiho? (Nwehe eviidiyu eni: Ovekela Onninikhaliherya Ovilela Mixankiho.)

⁸ Khula okathi Yehova onoonikhaliheryaka. Okhala wiira Tiithi ahu oophenta, owo khonisiveliwa vaavo onniweha awe nihaawaka. (Yes. 63:9) Hata vari siiso, owo khonikhoottiherya onikhumelela mixankiho, seiyo sinlikana ni miro aahiiso malumi a mooro. (Mmusome Yesaya 43:2.) Masi onnileinherya wiira onoonikhaliherya ovilela mixankiho nenla-va, nave muhoolo onoomaliha. Yehova onninivaha munepa awe woowaarya wiira onikhaliherye ovilela. (Luka 11:13; aFil. 4:13) Tthiri nikupaliki wiira khula okathi onoonivahaka itthu nimpirisari ahu wiira nivilele ni nihihiye omuroromela yena. d

9. Moovarihana ni Yakobo 1:6, 7, xeeni ninreerela ahu okupali wiira Yehova onoonikhaliheryaka?

⁹ Yehova oniphavela wiira nimuroromeleke. (aHeeb. 11:6) Ikwaha sikina, mixankiho sahu pooti okhalaka sinceene nnoona wiira khaninwerya oxintta. Nave nnapacerya ohoverya akhala wiira Yehova onoonikhaliherya. Biibiliya onihimya wiira ni ikuru sa Muluku pooti oniiriha ‘otupha ixiri’. (Esal. 18:29, Piipiliya Emakhuwa.) Ohiya ohoveryaka akhala wiira Yehova onoonikhaliherya, nihaana onvekela nikupaliki wiira onimwaakhula mavekelo ahu. — Mmusome Yakobo 1:6, 7.

10. Nvahe matakiheryo anooniherya moota nikhanle ahu ookhala moovarihana ni mavekelo ahu.

¹⁰ Yehova oniphavela wiira nikhaleke moovarihana ni mavekelo ahu. Mwa ntakiheryo, munna mosa pooti onvekela Yehova wiira onvahe ikuru wiira owerye olavula ni patarau awe, ovekelaka ifeeriya wiira anwehe konkresu. Yehova onrowa waakhula sai nivekelo nlo? Owo pooti waakhula onvahaka munna owo olipa murima, wiira owerye olavula ni patarau awe. Masi munna owo ohaana opaka etthu, orowa okumana ni patarau awe omuleelaka etthu eniphavela awe. Woonasa wene owo ohaana opaka eyo ikwaha sinceene. Aahiiso owo pooti olavulana mpatthani awe a omutekoni wiira aturukane mahiku. Vaaweryaneyaka, munna owo pooti weemererya akhala wiira patarau onihimya wiira kinoovukula esalaario anyu ya mweeri owo.

11. Xeeni ninreerela ahu ohihiyererya ovekela itthu nimpirisari ahu?

¹¹ Yehova oniphavela wiira nihihiye ovekela  itthu nimpirisari ahu. (1 aTes. 5:17) Yesu aahimmye wiira itthu sikina ninvekela ahu, khasinrowa waakhuliwa moowakuveya. (Luka 11:9) Nto muhikhulumuwe! Tivonto nvekeleke ikwaha sinceene ni murima anyu wootheene. (Luka 18:1-7) Vakhala wiira ninnithipelela onvekela Yehova, nnimooniherya wiira etthu ninvekela ahu yookhalana efaita. Ohiya-vo, ninnooniherya wiira nookhalana waamini wiira onoonikhaliherya.

12. a) Nikoho xeeni ninreerela ahu wiikoha moovarihana ni mavekelo ahu, ni mwaha wa xeeni? b) Ninrowa wooniherya sai wiira ninnimuttittimiha Yehova okathi ninvekela ahu? (Nwehe ekaaxa eni: “ Mavekelo Aka Anooniherya Sai Wiira Kinnimuttittimiha Yehova?”)

¹² Akhala wiira etthu ninvekenle ahu Yehova khiyiiraneyale, nihaana wiikoha makoho ala mararu: Noopacerya, ‘Kiireke etthu kinivekelaka ti yookhalela?’ Ikwaha sikina, nnoona wiira ninnisuwela itthu sirina efaita. Masi pooti wiira etthu ninvekela ahu khenrowa onikhaliherya okathi munceene. Nanvekelaka Yehova wiira onikhaliherye ovilela muxankiho, woonasa wene yookhala enamuna ekina ya ophuka muxankiho owo. Nave itthu sikina nninvekela ahu Yehova, pooti sihivarihanaka ni ele oniphavela awe. (1 Yoh. 5:14) Nkawuupuweleni anamathelana ale naalavunle ahu ittima sivinre. Awo yaaninvekela Yehova wiira mwaanaya ohihiye omurumeela yena. Yooveka ele khahiyo yaari yootthekeya. Masi Yehova khonimukhanyererya mutthu omurumeela. Owo oniphavela wiira ootheene ahu waahela muhina anamwane nithanleke omurumeela yena. (Otum. 10:12, 13; 30:19, 20) Nto ohiya anamuyari onvekelaka Yehova wiira aakhaliherye anaaya ohihiya omurumeela, ahaana onvekela wiira olipihe waamini waya wiira okhale apatthani aya. — Mir. 22:6; aEef. 6:4.

13. Moovarihana ni aHeeberi 4:16, okathi xeeni Yehova onrowa awe onikhaliherya? Mutthokiherye.

 ¹³ Nikoho na nenli ninreerela ahu wiikoha ti nla: ‘Kiireke ola okathi wooreerela wiira Yehova okivahe etthu kinivekela aka?’ Woonasa wene, nimphavela wiira nivekelo nahu naakhuliwe moowaakuveya. Ekeekhai wiira Yehova onnisuwela okathi wooreerela wiira onikhaliherye. (Mmusome aHeeberi 4:16.) Okathi mavekelo ahu ahinaakhuliwa aya, hiyo pooti wuupuwelaka wiira Yehova ‘ookhootta’. Masi waakhuliwa waya pooti okhala ‘mulipeleleke’. Mwa ntakiheryo, Nkamuupuweleni munna ole anvekela Yehova wiira omukhaliherye openuwa oretta awe. Vaakhanle wiira Yehova aahipaka miiriirya ompenuxa moowaakuveya, Satana aarowa wuupuwelaka wiira munna ole onimurumeela Yehova paahi mwaha woowi oopenuxiwa. (Yoob. 1:9-11; 2:4) Ohiya-vo, Yehova oonileiherya wiira muhoolo ootheene ahu nnoopenuxiwa. (Yes. 33:24; Wiis. 21:3, 4) Ohinatthi ophiya okathi owo, nihilipeleleke wiira nnoopenuxiwa mwa miiriirya. Etthu munna ole aakhanle oovekela, yaari ovahiwa ikuru ni murettele wa mmuupuweleloni wiira ohihiye omurumeela moororomeleya, nnaamwi owereiwaka. — Esal. 29:11.

14. Exeeni mwiixuntte anyu ni yoowiiraneya ya Janice?

¹⁴ Munnimuupuwela Janice, yoowo aavekela ophavelaka orumeela oBeteli? Nuuvira iyaakha 5, owo aahoona moota Yehova aakhunle awe mavekelo awe, masi mwa enamuna aahuupuwela awe. Owo onihimya so: “Okathi ole wootheene, Yehova ookiixuttiha ni okikhaliherya okhala mukristau oororomeleya. Etthu yaareerela aka opaka yaari omuroromela. Nave kaahaana olokiherya yoosoma aka ya omwaneene. Kaahoona wiira ohakalala waka, khonikhuma mapuro kinimurumeela aka Yehova”. Muhoolo mwaya, iyawe Janice vamosa ni yena yaahilattuliwa wiira yarumeeleke  ntoko mutokweene a esirkwiitu. Uupuwelaka itthu sivinre, Janice onihimya so: “Yehova aahaakhula mavekelo aka, masi mwa enamuna kahaalipelelaka. Kaahoona wiira moota Yehova aakhunle awe mavekelo aka yaari enamuna yooloka. Kinnimuxukhurela Yehova mwaha wa niphento nawe ni okireerela murima”.

15. Xeeni ikwaha sikina vahinreerela aya oluluwanyexa itthu ninvekela ahu? (Nwehe ifootu.)

¹⁵ Nikoho na neeraru ninreerela ahu wiikoha ti nla: ‘Kiireke kihaana ovekela etthu ekina?’ Ekeekhai wiira ti vooloka okhalana mavekelo ooluluwanya. Masi ikwaha sikina, hiyo pooti woona wiira Yehova onninaakhula hata nihiluluwannye etthu ene ninvekela ahu. Nkuupuwelani ntakiheryo na murokora yoole oohitheliwa, aavekela wiira orowele Eskola ya Anamalaleerya a Omwene. Owo aaphavela orowela eskola ele wiira muhoolo mwaya, arumeeleke mapuro oothowa anamalaleerya. Nnaamwi aavekela wiira Yehova omukhaliherye orowela eskola ele, owo aahaana onvekela Yehova wiira omukhaliherye oweha inamuna sikina okhanle awe oowuncererya muteko awe woolaleerya. (Mit. 16:9, 10) Owo aahaana okhala moovarihana ni mavekelo awe aahiiso onvekela mutokweene a esirkwiitu wiira omukhaliherye osuwela vakhala wiira wookhala muloko wookhuveela onipirisari mapioneero. Aahiiso owo aahaana olepa ekarta oroihaka oBeteli wiira osuwele yaakhanle ene mapuro makina oothowa anamalaleerya a Omwene. e

16. Exeeni ninreerela ahu okupali?

¹⁶ Ntoko niixuntte ahu, nikupaliki wiira Yehova onimwaakhula mavekelo ahu moophenta ni mwa xariya. (Esal. 4:3; Yes. 30:18) Ikwaha sikina Yehova pooti onaakhula mwa enamuna nahaalipelela ahu. Masi owo khonikhala-khala okhoottaka mavekelo ahu, okhala wiira onniniphenta vanceene. Nave khonikhala-khala oninyanyalaka. (Esal. 9:10) Tivonto, “mmuroromeleke Muluku, okathi wootheene” mmutthukulelaka murima anyu okathi munivekela anyu. — Esal. 62:8, Piipiliya Emakhuwa.