1. Vaavo nnuupuwela ahu omoriwa ikharari, mutthu xeeni nimmuupuwela ahu?

OKATHI nimmuupuwela ahu mutthu oomooriwa ikharari, nimmuupuwela mutthu ooreera murima, oopatthaneya, oothunku ni oovaha. Mutthu ntoko owo, onninuupuxerya nlikanyiho Yesu aalavunle awe na musamariya ooreera murima. Mulopwana ole khahiyo aari muyuda, masi hata vaari siiso, “aahimmorela ikharari” muyuda ole, yoowo iiyeriwe ni aamaniwe ni alatarau. (Luka 10:29-37) Nlikanyiho nne ninnittittimiherya oratteene mukhalelo wooreera wa Muluku ahu, eyo piiyo, omoriwa ikharari. Khula nihiku, Yehova onninooniherya wira onninimorela ikharari mwa inamuna soovirikana. Nto eyo enooniherya wira onniniphenta.

2. Omoriwa ikharari onihela muhina exeeni?

² Okathi nniiwa ahu nuulumo noowi omoriwa ikharari, woonasa wene ninnuupuwela etthu ekina. Maana omoriwa ikharari onihela muhina ohimuhukhumu mutthu opanke etthu yoohiloka akhala wira vannireerela. Okhala wira ti siiso, Yehova toomoriwa ikharari vanceene. Esalimo 103:10, enihimya wira owo ‘khonnirela hiyo siso simphwanelahu: khannilivela sotakhala’. Okathi mukina, Yehova onnimuhukhumu wala omuttaruxa mutthu opanke etampi.

3. Mwaha ola, ninrowa waakhula makoho xeeni?

³ Mwaha ola, ninrowa woona moota Biibiliya onaakhula awe makoho 3. Makoho ene taala: (1) Xeeni Yehova ori awe oomoriwa ikharari? (2) niireke wookhala ovarihana eriyari ya ompwapwela mutthu ni omoriwa ikharari ni (3) etthu xeeni enrowa onikhaliherya okhala mutthu oomoriwa ikharari?

4. Xeeni Yehova ori awe oomoriwa ikharari?

⁴ Yehova omusivela omoriwa ikharari. Murummwa Paulo ohimmye wira Muluku “toomoriwa ikharari vanceene”. Etthu yaamwiirinhe olepa siiso, okhala wira Yehova ohaamorela ikharari apinaatamu oohimalela ni ohaavaha nlipelelo na orowa okhalaka wiirimu. (aEef. 2:4-7) Masi khahiyo wira Yehova onaamorela ikharari paahi makristau  oothanliwa. Nasalimo Davidi aalempe so: “Apwiya annarerela murima atthu othene: annamorela ikharari atthu othene apattunxaya”. (Esal. 145:9) Yehova onnaaphenta atthu otheene, nto okathi wotheene vanireerela aya ommorela ikharari mutthu, owo onnimmorela.

5. Yesu iixuntte sai omoriwa ikharari wa Yehova?

⁵ Khuuvo mutthu mukina onisuwela oratteene wira Yehova onnimusivela vanceene omoriwa ikharari onvikana Yesu. Ohinatthi orwa valaponi, Yesu aakhala wiirimu ni Tiithi awe mwa okathi munceene. (Mir. 8:30, 31) Ikwaha sinceene Yesu aanimoona Yehova aamoorelaka ikharari apinaatamu oohimalela. (Esal. 78:37-42) Nto vaavo aawiixuttiha awe atthu, Yesu aanittittimiherya omoriwa ikharari wa Tiithi awe.

6. Yesu onikhalihenrye sai osuwela oratteene omoriwa ikharari wa Yehova?

⁶ Ntoko niwenhe ahu mwaha ovinre, Yesu aahilavula nlikanyiho na mwaana aakhumme etthoko ya paapa awe wira onooniherye moota Yehova onimusivela aya omoriwa ikharari. Mwaana ole, aahikhuma etthoko ya paapa awe ni “aahihonona mireerelo sawe sotheene, ottharaka mweettelo woohiloka”. (Luka 15:13) Nuuvira okathi, owo aahittharuwa itthu soohiloka aapanke awe ni aahihokolowela owaani. Masi paapa awe aamwaakhenle sai? Moohipisa, mwaana ole aahisuwela. Yesu aahimmye so: “Nlelo ori ene ottaiwene, paapa awe aahinweha, ommorela ikharari, onamutthimakela, omukhupaarela, onanvaha epeexo”. Paapa ole khaamulihinhe muru mwanawe. Ohiya-vo, owo aahimulevelela, aahimmorela ikharari ni aahimwaakhela ni murima wotheene. Itthu mwaana ole aapanke saari sootakhala, masi aahittharuwa ni murima wotheene. Nto paapa awe aahimulevelela. Paapa oomoriwa ikharari a nlikanyiho na Yesu onithoonyerya Yehova. Etthu yaamwiirinhe Yesu opaka nlikanyiho nne, aaphavela onooniherya wira Yehova onniphavela vanceene waalevelela ale anipaka itampi anattharuwa ni murima wotheene.—Luka 15:17-24.

7. Ovarihana xeeni okhanle eriyari ya ankhili ni omoriwa ikharari wa Yehova?

⁷ Yehova toomoriwa ikharari mwaha woowi ookhalana ankhili anceene. Ankhili a Yehova tooloka ni khahiyo osuwela waapinaatamu. Nto eyo ennimwiiriha wuupuwela itthu sinaaphwanyiha mireerelo atthu otheene. Biibiliya onihimya wira “ankhili anikhuma wiirimu . . . toosareya othunku ni miteko sooloka”. (Yak. 3:17) Okhala wira Tiithi oophenta, Yehova onnisuwela wira omoriwa wawe ikharari onnaaphwanyiha mireerelo anaawe otheene. (Esal. 103:13; Yes. 49:15) Tthiri, mwaha wa omoriwa ikharari wa Yehova, arumeyi awe aakhalana nlipelelo nooloka na muhoolo nnaamwi ari ene anatampi. Nave mwaha wookhalana ankhili anceene, Yehova onnisuwela okathi onireerela awe ommorela ikharari mutthu akhala wira vannireerela.  Nave-tho onnisuwela okathi onireerela awe ohimmorela ikharari mutthu. Tthiri vannooneya wira Yehova tankhili. Owo onnisuwela ovirikana okhanle eriyari ya omoriwa ikharari ni ohimuhukhumu mutthu opanke etthu yoohiloka.

8. Okathi mukina etthu xeeni enireerela opakiwa ni mwaha wa xeeni?

⁸ Nkahaya mmuupuwele murumeyi a Yehova onikhalana mweettelo woohiloka mpakha opaka etampi. Nto eyo yiiraneya, etthu xeeni ninreerela ahu opaka? “Muhiye weetta” ni mutthu owo. Ala malakiheryo Yehova aamurumme awe Paulo ovaha miloko sotheene. (1 aKor. 5:11) Nto ale anipaka etampi ahinattharuwa ahaana okumihiwa mmulokoni. Awo ahaana okumihiwa wira anna ni arokora oororomeleya ahihiye okhala oowaarya ntoko Yehova ori awe oowaarya. Masi atthu akina anoona wira mutthu okumihiwe mmulokoni khomoreliwe ikharari ni Muluku. Masi niireke eyo ekeekhai? Nrowe niwehe.

9-10. Moovarihana ni aHeeberi 12:5, 6, xeeni ninhimya ahu wira okumihiwa mmulokoni onooniherya omoreliwa ikharari? Nvahe nlikanyiho.

⁹ Ninniriipiwa murima vanceene vaavo nniiwa ahu okathi wa mithukumano wira mutthu naamusuwela ahu wala namphenta ahu “khahiyo-tho Namoona a Yehova”. Woonasa wene, ninniikoha akhala wira vaanireerela tthiri mutthu owo okumihiwa mmulokoni. Niireke okumihiwa mmulokoni onooniherya omoreliwa ikharari? Aayo. Ohimuttaruxa mutthu onireerela omuttaruxa khahiyo ommorela ikharari nnakhala omphenta ni khahiyo etthu ya miruku. (Mir. 13:24) Niireke okumihiwa mutthu mmulokoni onnimukhaliherya ottharuwa ni orukunuxa mweettelo awe? Aayo. Atthu anceene yaapanke etampi yuulupale akumihiwa mmulokoni ahoona wira ele axitokweene yaapanke aya ehaakhaliherya wiisuupuwela, oturuka mweettelo aya ni ohokolowela wa Yehova.—Mmusome aHeeberi 12:5, 6.

¹⁰ Nkahaya muupuwele nlikanyiho nna: Makampusi onnoona wira epwittipwitthi awe emosa enoowereiwa. Owo onnisuwela moota okhanle awe ooloola epwittipwitthi eyo ni onnisuwela wira vanitthuneya ovalaanya epwittipwitthi eyo ni ipwittipwitthi sikina. Masi musuweleke wira ipwittipwitthi soopattuxiwa soopatthaneya, iyo sinnisiveliwa okhala hoothe ni ipwittipwitthi sikina. Nto epwittipwitthi ennixanka vaavo enivalaanyiwa aya ni sikina ni enihiiwa aya mekhaya. Nto niireke mwaha woovalaanya epwittipwitthi eyo eniwereiwa, enooniherya wira makampusi owo khonikhapelela saana wala tootakhala murima? Nnaari. Owo onnisuwela wira aahivalaanye epwittipwitthi eyo eniwereiwa pooti oraviha eretta eyo ipwittipwitthi sikina. Masi avalaanya epwittipwitthi eyo eniwereiwa onookhapelela ipwittipwitthi sotheene.—Mulikanyihe ni Onamukuttho 13:3, 4.

11. (a) Mwa inamuna xeeni mutthu okumihiwe mmulokoni onlikana awe ni epwittipwitthi eniwereiwa? (b) Itthu xeeni atthu ale akumihiwe mmulokoni akhanle aya oopaka ni anikhaliheriwa sai?

¹¹ Vaavo mukristau onikumihiwa awe mmulokoni, owo ori ntoko epwittipwitthi eniwereiwa. Masi eretta awe ti yomunepani. (Yak. 5:14) Ntoko iretta sikina hiyo ninsuwela ahu, iretta sikina sa omunepani sinniravihaniwa. Nto okathi mukina vannireerela ovalaanyiwa epwittipwitthi eyo eniwereiwa mmulokoni. Ottaruxiwa iwo onooniherya wira Yehova onniphenta ipwittipwitthi soororomeleya ni oniphavela omukhaliherya ottharuwa mutthu ole okumihiwe mmulokoni. Mutthu okumihiwe mmulokoni pooti opaka itthu sikina. Mwa ntakiheryo, owo pooti orowela mithukumano sa mmulokoni okhanle awe oovahiwa malakiheryo anikhuma mBiibiliyani wira olipihe waamini wawe. Nave pooti ovahiwa iliivuru sinimutthokiherya Biibiliya wira osomeke ni oweha iprokrama sa JW Broadcasting^®. Okathi axitokweene anoona aya wira mutthu owo onnipaka marukunuxo, awo anninvaha malakiheryo anrowa omukhaliherya otthikela okhalana waataana wooloka ni Yehova. Nto, malakiheryo awo woonasa wene pooti omukhaliherya otthikela mmulokoni wira okhale Namoona a Yehova. *

12. Enamuna xeeni yooloka axitokweene anooniherya aya wira anniphenta ni ommorela ikharari mutthu opanke etampi yuulupale?

 ¹² Ti vooloka osuwela wira anikumihiwa mmulokoni atthu yaale paahi anipaka etampi yuulupale ahinattharuwa. Axitokweene annisuwela wira ahaana wuupuwela oratteene ahinatthi omukumiha mmulokoni mutthu opanke etampi. Awo annisuwela wira ahaana onvaha ottaruxa wa Yehova “n’ixariya”. (Yer. 30:11) Musuweleke wira axitokweene annaaphenta vanceene anna ni arokora ni khaniphavela opaka etthu yaarowa ohonona waataana waya ni Yehova. Masi okathi mukina annoona wira etthu yooloka akhanle aya oopaka wira yooniherye ophenta ni omoriwa ikharari wa Yehova, ori omukumiha mmulokoni mutthu owo opanke etampi yuulupale.

13. Xeeni mulopwana mmosa a oKorinto aareerela awe okumihiwa mmulokoni?

¹³ Nwehe etthu Paulo aahimmye awe sa mulopwana aapanke etampi ohinattharuwa okathi wa arummwa. Mukristau mmosa a muloko wa oKorinto, aanirupihana voohiloka ni mwaara a paapa awe. Tthiri eyo yaari etthu yoowuuliha muru. Voohimya sa mwaha owo, Yehova aahaaleela aIsarayeli a khalai wira: “Mulopwana mmosa araruwá ni mwara a tithi awe, onninveha siso tithi awe: ówanli aya, mulopwana ni muthiyana, yiviwe”. (Onam. 20:11) Ekeekhai wira Paulo anwerya ohimya wira mulopwana ole aahaana wiiviwa, masi aahimmye wira aahaana okumihiwa mmulokoni. Mweettelo woohiloka wa mulopwana ole, waahipacerya waahapuxa atthu akina a mmulokoni. Atthu akina yoona wira etthu aapanke awe khahiyo yaari yoowuuliha muru ni khiyaatempe otakhala!—1 aKor. 5:1, 2, 13.

14. Paulo oonihenrye sai wira aanimmorela ikharari mulopwana aakumihiwe mmulokoni oKorinto, ni mwaha wa xeeni? (2 aKorinto 2:5-8, 11)

¹⁴ Muhoolo mwaya, Paulo aahisuwela wira mulopwana ole aahipaka marukunuxo mookumini mwawe ni aahittharuwa ni murima wotheene. Nnaamwi mulopwana ole uulihinhe muru muloko, Paulo aahaaleela axitokweene wira ahimakeleke ‘olavulasa vanceene mwaha ole’. Nave aalenle so: “Muhaana omulevelela mulopwana owo ni murima wotheene ni ommaaliha”. Nwehe etthu yaamwiirinhe Paulo waaleela axitokweene opaka eyo. Owo aahimmye so: “Wira ohitepe oriipiwa murima mpakha okhulumuwa”. Murummwa Paulo aahimoonela othunku mulopwana ole aattharunwe ni murima wotheene. Nave khaaphavela wira mulopwana ole otepeke oriipiwa murima mpakha okhulumuwa wala ohiya ophavela oleveleliwa ni Muluku.—Mmusome 2 aKorinto 2:5-8, 11.

15. Axitokweene anrowa owerya sai omuttaruxa ni ommorela ikharari mutthu opanke etampi?

¹⁵ Attharaka ntakiheryo na Yehova, axitokweene waasivela waamorela ikharari atthu akina. Vaareerelaka  awo annimmorela ikharari mutthu opanke etampi yuulupale, masi khanihiya omoriwa ikharari. Akhala wira axitokweene khanimuttaruxa mutthu opanke etampi yuulupale, awo khanooniherya omoriwa ikharari. Ohiya-vo, annikhaliherya etampi mutthu owo opanke awe. Masi niireke axitokweene paahi tanireerela omoriwa ikharari?

16. Moovarihana ni Miruku 21:13, etthu xeeni Yehova onipaka awe akhala wira mutthu khonimoriwa ikharari?

¹⁶ Makristau otheene ahaana okhala oomoriwa ikharari amutakihaka Yehova. Mwaha wa xeeni? Mwaha woowi, Yehova khoniwiriyana mavekelo aatthu ahinimoriwa ikharari. (Musome Miruku 21:13.) Khuuvo mutthu oniphavela wira Yehova ohiye owiriyana mavekelo awe. Nto nihaana wiimananiha waathokorerya saana anna ni arokora anihaawa ni okathi wotheene waareerela murima “amasikhini”. Nave nihaana weettela malakiheryo ala anihimya wira: “Ole ohinaamorela ikharari akina, onrowa ophukeliwa voohimoreliwa ikharari”. (Yak. 2:13) Vaavo ninsuwela ahu wira nihaana omoreliwa ikharari ni atthu akina ninniwerya waamorela ikharari atthu akina. Enamuna emosa nikhanle ahu oowooniherya wira ninnaamorela ikharari atthu akina, ori omulevelela mutthu aapanke etampi yuulupale ottikiheriwa mmulokoni.

17. Mwene Davidi oonihenrye sai wira aari mutthu oomoriwa ikharari?

¹⁷ Biibiliya ookhalana matakiheryo manceene anrowa onikhaliherya okhala atthu oomoriwa ikharari. Nwehe yowiiraneya ya mwene Davidi, owo aahooniherya ikwaha sinceene wira aari mutthu oomoriwa ikharari. Mwa ntakiheryo, mwene Sawuli aaphavela omwiiva Davidi, masi Davidi aahimmorela ikharari mwene ole aathanliwe ni Yehova ni khaaphavela omunlela ikuhu nnakhala omukumiherya mixankiho.—1 Sam. 24:9-12, 18, 19.

18-19. Okathi xeeni Davidi oonihenrye awe wira aahihiya omoriwa ikharari?

¹⁸ Waahikhala okathi Davidi aahiyale awe okhala mutthu oomoriwa ikharari. Mwa ntakiheryo, mulopwana mmosa iihaniwa Nabali aari ootakhala murima ni khaamuttittimihale Davidi. Nave aahikhootta onvaha yoolya Davidi ni atthu awe. Nto Davidi aahinanariwa vanceene ni aaphavela omwiiva Nabali ni atthu otheene a etthoko awe. Masi mwaarawe Nabali iihaniwa Abigayili aari ooreera murima ni oopixa murima. Nto moohipisa aahikuxa yoolya wira anvahe Davidi. Eyo yaahimwiiriha Davidi ohimwiiva Nabali ni atthu otheene a etthoko awe.—1 Sam. 25:9-22, 32-35.

¹⁹ Okathi omosa, profeta Natani aahimuleela Davidi wira mulopwana mmosa thaaciri aahiiya epwittipwitthi emosa ya namwaattamanani awe. Nto Davidi aahinanariwa vanceene mpakha ohimya wira: “Ntoko ekhweli wira Muluku òkhala, mulopwan’ole inre siso onniphwanela wiviwa”. (2 Sam. 12:1-6) Davidi aanisuwela oratteene Nlamulo na Moise. Moovarihana ni Nlamulo, akhala wira mutthu aaniiya epwittipwitthi emosa, owo aahaana omuliva mwaneene epwittipwitthi eyo ipwittipwitthi 4. (Okhum. 22:1) Nto xeeni Davidi ohalaka ohimya wira mulopwana ole aahaana wiiviwa? Tthiri yaari etthu yootakhala ohimya wira mulopwana ole aahaana wiiviwa. Masi Natani aahilavula yowiiraneya ele wira omukhaliherye Davidi osuwela wira aahipaka etthu yootepexa otakhala! Nto Yehova aahooniherya wira aahimmorela ikharari vanceene Davidi ovikana moota Davidi aarowa awe ommorela ikharari mulopwana  ole aiyale epwittipwitthi emosa aalavuliwe ni Natani!—2 Sam. 12:7-13.

20. Yowiiraneya ya Davidi, enniixuttiha exeeni?

²⁰ Okathi Davidi aahaareere awe onanariwa, aahimmye wira Nabali ni atthu otheene a etthoko awe yaaphwanela wiiviwa. Nave muhoolo mwaya, Davidi aahimmye wira mulopwana ole thaaciri aalavuliwe ni Natani, aaphwanela wiiviwa mwaha wa etthu aapanke awe. Vaavo ninsoma ahu yowiiraneya ela ya nenli, woonasa wene ninniikoha so: “Vaniweryaneya sai mutthu ooreera murima, omphukela mutthu mukina mwa enamuna yoohiloka?” Nkahaya muupuwele itthu siiraneyale. Okathi ole, murima wa Davidi waanimphukela. Musuweleke wira vaavo mutthu onaaphukela awe atthu akina mwa enamuna yoohiloka, waataana wawe ni Yehova kholonke. Yesu aahaalopola atthareli awe oriki: “Muhiye waaphukela akina, wira Muluku ohoophukeleni. Okhala wira enamuna munaaphukela anyu akina, ni nyuwo munrowa ophukeliwa siiso”. (Math. 7:1, 2) Nto otheene ahu nihaana okhalana ephoole wira nihaaphukeleke atthu akina mwa enamuna yoohiloka, masi nihaana “waamorela ikharari vanceene” nimutakihaka Muluku ahu.

21-22. Mwa inamuna xeeni nikhanle ahu oowaamorela ikharari atthu akina?

²¹ Mutthu oomoriwa ikharari khahiyo paahi oniwoonela othunku atthu akina, masi-tho onnipaka etthu wira aakhaliherye. Otheene ahu nihaana waaweha atthu aniphavela okhaliheriwa vatthokoni vahu, muloko ahu wala muttetthe ninkhala ahu. Niira siiso, nnoowerya waamorela ikharari atthu akina. Niireke ookhala mutthu onireerela omaalihiwa? Woonasa wene, nyuwo pooti omukhaliherya mutthu owo mwaapeyaka yoolya awe wala ovara miteko sawe sikina. Niireke ookhala mutthu a muloko anyu ottikiheriwe niinaano mmulokoni onireerela omaalihiwa? Niireke munoowerya waaleela ihapari sooreera ni soomaaliha atthu anikhala muttetthe anyu? Eyo enamuna emosa nikhanle ahu owooniherya wira ninnaamorela ikharari atthu akina.—Yobi 29:12, 13; aRom. 10:14, 15; Yak. 1:27.

²² Vaavo ninsuwela ahu itthu sinaathowa atthu akina, nnoowerya oweha inamuna nikhanle ahu oowaamorela ikharari. Nave okathi nimmoriwa ahu ikharari, ninnimuhakalaliha vanceene Tiithi ihu a wiirimu, yoowo ori Muluku “oomoriwa ikharari vanceene”!