1. Okathi xeeni vanixankiha aya omurumeela Yehova?

OKATHI xeeni munoona anyu wira ti voovila omurumeela Yehova? Niireke okathi muniwanana anyu muxankiho wala okathi munikhalana anyu murettele? Ti vookhweya omuroromela Yehova okathi wa mixankiho. Masi etthu xeeni munipaka anyu okathi muhinkhalana anyu mixankiho? Niireke okathi mukina munniliyala wira omurumeela Yehova etthu yootepa otthuneya? Yehova aahaaleela aIsarayeli wira eyo yanwiiraneela.—Otum. 6:10-12.

2. Ntakiheryo xeeni Mwene Asa onivanhe awe?

² Mwene Asa ntakiheryo nooloka na mutthu aarina ankhili. Okathi wotheene owo animuroromela ni animukokhorela Yehova ohiya paahi okathi wooxankiha masi-tho okathi wa murettele. Okhuma wanipacerya, murima wa Mwene Asa “wahasiveliha Apwiya mahiku othene èkumi awe”. (1 Mam. 15:14) Asa aahooniherya wira aamukokhorela Yehova paahi vaavo aamala-malinhe awe okokhorela woohiloka oYuda. Biibiliya onihimya wira: “Owo ahapwexakasa altari àmalapo ni mapuro òttukhuwa: ahipwexakasa-tho maluku ni miri sokokhoreliwa”. (2 Wah. 14:2, 4) Nave Asa aahimwaakha piipi awe iihaniwa Maaka opwiyamwene. Mwaha wa xeeni? Mwaha woowi Maaka aanaatumererya atthu waakokhorela amuluku a ethiru.—1 Mam. 15:11-13.

3. Mwaha ola, exeeni ninrowa ahu othokorerya?

³ Asa aahipaka itthu sikina ohiya paahi opwexakasa itthu saakokhoreliwa oYuda. Owo aahittikiherya okokhorela wekeekhai ni aahaatumererya atthu a oYuda omuhokolowela Yehova. Mwaha woopaka eyo, Yehova aahimureeliha Asa ni aIsarayeli yaahikhalana murettele. Nto olamulelo wa iyaakha 10 sa Asa, elapo awe yaahikhalana murettele. (2 Wah. 13:23, 14:3, 5) Mwaha ola, ninrowa woona wanipacerya moota Asa aattottenle awe mureerelo  okathi owo wa murettele. Nuumala-vo ninrowa othokorerya ntakiheryo na maKristau a eseekulu yoopacerya yaawo ntoko Asa yaattottenle mureerelo okathi wa murettele. Wanikisa waya, ninrowa waakhula nikoho nla: Vakhala wira munkhala elapo muteko ahu ohinkhoottihiwa aya, munrowa ottottela sai mureerelo okathi owo wa murettele?

4. Moovarihana ni 2 Wahala 14:1, 5, 6, moota xeeni Asa aattottenle awe mureerelo okathi wa murettele?

⁴ Mmusome 2 Wahala 14:1, 5, 6. Asa aahaaleela atthu wira Yehova ‘ahavaha murettele mulaponi mwaya mothene’. Asa khuupuwela wira okathi ole wa murettele waari woowiikhuraana. Ohiya-vo, Asa aahittottela mureerelo okathi ole wira opake ipooma, miyuuru, ipa soolipihiwa ni mikhora soolipihiwa. Asa aahaaleela atthu a oYuda wira: “Elapo ahu yophwanya murettele”. Eyo entaphulela exeeni? Eyo entaphulela wira yaarowa weettaka mootaphuwa elapo aya ni oteka ipa saya ahilupatthiwaka. Nave Asa aahaatumererya atthu ottottela mureerelo okathi ole wa murettele.

5. Exeeni yaamwiirinhe Asa waalipiha anakhotto awe?

⁵ Nave Asa aahittottela mureerelo okathi wa murettele wira aalipihe anakhotto awe. (2 Wah. 14:7) Niireke eyo enooniherya wira Asa khaamwaamini Yehova? Nnaari. Asa aanisuwela wira waari muritti awe waalokiherya atthu ale wira awerye owanana mixankiho, woonasa wene saarowa waakhumelela muhoolo. Nave Asa aanisuwela wira murettele ole waakhanle oYuda khiwaarowa okhala wa mahiku otheene. Tthiri eyo ti etthu yiiraneyale muhoolo mwaya.

6. MaKristau a eseekulu yoopacerya, yaattottenle sai mureerelo okathi wa murettele?

⁶ Nnaamwi maKristau a eseekulu yoopacerya yaalupatthiwa, okathi mukina yaanikhalana murettele. Nto okathi owo, awiixutti yaapaka  exeeni? Awo yaanittottela mureerelo okathi owo wa murettele wira alaleye ihapari sooreera. Eliivuru ya Miteko enihimya wira alopwana ni athiyana ale oororomeleya ‘yanattittimiha Apwiya’. Nave, yaanivikaniha olaleya ihapari sooreera. Nto yaakhumelenle exeeni? Biibiliya onihimya wira awo “yantepa wunjerereya”. Moohaanyiherya Yehova aanireeliha oluttuweliwa wa maKristau ale okathi wa murettele.—Mit. 9:26-31

7-8. Okathi Paulo ni maKristau makina yaakhalana aya eparakha yaapaka exeeni? Mutthokiherye.

⁷ MaKristau a eseekulu yoopacerya yaanittottela mureerelo khula okathi wira alaleye ihapari sooreera. Mwa ntakiheryo, okathi murummwa Paulo aasuwenle awe wira yaahikhala atthu anceene yaaphavela ihapari sooreera wEefeso, owo aahittottela mureerelo eparakha eyo wira aapake awiixutti epooma ele.—1 aKor. 16:8, 9.

⁸ Mwaakha 49, Paulo ni maKristau makina yaahikhalana eparakha ya waalaleerya atthu anceene vaavo arummwa ni axitokweene oYerusalemu yaaphunke aya mwaha wa winnuwihiwa. (Mit. 15:23-29) Nuumala miloko osuwela wira mwaha ole waahiphukiwa, awiixutti yaaniluttuweliwa “elaleyaka masu Àpwiya”. (Mit. 15:30-35) Nto exeeni yaakhumelenle? Biibiliya onihimya wira miloko “sanlipiherya wamini: atthu òwamini yaninjerereya nihiku ti níhiku”.—Mit. 16:4, 5.

9. Olelo-va, ilapo sinceene sirina mukhalelo xeeni, ni nikoho xeeni ninreerela ahu wiikoha?

⁹ Olelo-va, vanniweryaneya olaleerya mootaphuwa ilapo sinceene. Niireke elapo anyu munnimukokhorela Yehova mootaphuwa? Akhala wira ti siiso, mwiikoheke so: ‘Kinttottela sai mureerelo okathi ola wootaphuwa?’ Mahiku ala ookiserya mutthenkeso wa Yehova onniimananiha opaka ikampaanya soolaleerya ni owiixuttiha atthu olumwenku wotheene. (Mar. 13:10) Tthiri arumeyi a Yehova aakhalana iparakha sinceene wira akhaliherye muteko owo woolaleerya.

10. 2 Timótheyo 4:2, onnitumererya opaka exeeni?

¹⁰ Munrowa ottottela sai mureerelo okathi wa murettele? (Mmusome 2 Timótheyo 4:2.) Munoonela sai othokorerya mikhalelo sanyu? Niireke nyuwo wala mutthu mukina a mweemusini mwanyu onoowerya wuncererya muteko awe woolaleerya, woonasa wene okhalaka pioneero? Ola khahiyo okathi woowiithukumanyerya mihakhu seiyo sihinrowa woopowa okathi wa maxakha maalupale.—Mir. 11:4; Math. 6:31-33; 1 Yoh. 2:15-17.

11. Anamalaleerya anceene olelo-va, anipaka exeeni wira yaalaleerye atthu anceene?

¹¹ Olelo-va, anamalaleerya anceene anniixutta mattaava makina wira yaalaleeryeke ni owiixuttiha ihapari sooreera atthu akina. Nave mutthenkeso wa Yehova onnaakhaliherya anna awo okumiheryaka iliivuru sinimutthokiherya Biibiliya mattaava manceene. Mwa ntakiheryo, mwaakha wa 2010, naahikhalana iliivuru sahu mattaava 500. Nave olelo-va, ninnipaka iliivuru mattaava anivikana 1.000!

12. Xeeni vari aya vooloka atthu wiiwa ihapari sooreera sa Omwene ni nttaava naya? Nvahe ntakiheryo.

¹² Atthu anceene anoonela sai vaavo aniiwa aya ekeekhai ya Nuulumo na Muluku ni nttaava naya? Nwehe yowiiraneya ya murokora yoowo aaronwe onweha Konkresu oMemphis, Tennessee, wEstados Unidos. Nttaava nawe murokora ole eQuiniaruanda, nttaava nenno ninlavuliwa oRepública Democrática do Congo ni Uganda. Eprokrama ya Konkresu ole, yaahikumiheriwa ni nttaava na eQuiniaruanda. Nuumala Konkresu murokora ole, aahimmye so: “Soovira iyaakha 17 kikhalaka wEstados Unidos. Masi ela ekwaha yoopacerya kaawenrye  aka wiiwexexa eprokrama yotheene”. Tthiri murokora ole aahihakalala vanceene wiiwa eprokrama ele ekumiheriwaka ni nttaava nawe. Akhala wira makhalelo anyu anniweemereryani, niireke munoowerya wiixutta nttaava nikina wira mwaalaleeryeke atthu anlavula nttaava nno muttetthe anyu? Woonasa wene, muttetthe muloko anyu onilaleerya awe atthu waasivela ovaanela ni nttaava naya. Niireke eyo kheniwiirihani wiixutta nttaava nsya? Ekeekhai wira muhaana wiimananiha wira mpake eyo. Masi musuweleke wira eyo enimoopwanyihani ohakalala vanceene.

13. Annihu a oRússia yaattottenle sai mureerelo okathi wa murettele?

¹³ Khahiyo wira anna otheene anlaleerya mootaphuwa. Ilapo sikina ikuvernu sinnaakhoottiha annihu olaleerya mootaphuwa. Mwa ntakiheryo, nkahaya nwuupuwele annihu a oRússia. Março a mwaakha wa 1991 awo yaahihiiwa wira amukokhoreleke Yehova mootaphuwa. Okathi ole yaahikhala anamalaleerya 16.000 oRússia. Iyaakha 20 muhoolo mwaya, nummuru na anamalaleerya naahincerereya mpakha ophiya 160.000! Tthiri vannooneya wira anna ale ni arokora yaahirumeela mwa miruku ni yaahittottela mureerelo okathi ule wa murettele wira alaleeryeke mootaphuwa. Mooriipiha murima okathi ole wa murettele yaarina aya khiwaapinse. Hata makhalelo aya yaaturukeyale, awo khiyaahiyale olaleerya ni okokhorela wa ekeekhai. Maana awo annivikaniha omurumeela Yehova ni annirumeela inamuna soovirikana wira alaleerye.

14-15. Yehova aarumenle sai ikuru sawe wira omukhaliherya Mwene Asa?

¹⁴ Mahiku a Mwene Asa okathi wa murettele waahimala. Muttitthi muulupale wa anakhotto  yaavikana emilyau emosa yaahirwa akhumaka wEthiyopia. Awo yaahooleliwa ni Zerahi. Nto Zerahi aanikupali wira anakhotto awe yanwerya opwetexa muttetthe wa oYuda. Masi Mwene Asa khaaroromenle nummuru na anakhotto awe. Masi aamuroromenle Muluku awe, Yehova. Asa avekenle oriki: “Nyuwo Apwiya Muluku ahu, munikhaliherye! Tthiri ti nyuwo ninlipanahu: ni nsina nanyu ti nirwiyahu womola muttitthi ula w’atthu”.—2 Wah. 14:10.

¹⁵ Nnaamwi anakhotto a wEthiyopia yaahaareere, Mwene Asa aanisuwela wira Yehova aamurumeela ikuru sawe wira aakhaliherye atthu awe. Tthiri Yehova ahaakhaliherya atthu awe. Maana ahaakhaliherya waapwetexa anakhotto a wEthiyopia.—2 Wah. 14:7-12.

16. Ninsuwela sai wira murettele nrina ahu khonrowa okhala wa mahiku otheene?

¹⁶ Khaninsuwela itthu sotheene sinrowa onikhumelela muhoolo. Masi ninnisuwela wira murettele arumeyi a Muluku arina aya olelo-va, khonrowa okhala wa mahiku otheene. Maana Yesu aahaaleela awiixutti awe wira: “Maloko othene animonyokhani”. (Math. 24:9) Nave murummwa Paulo aahimmye so: “Othene ale antthuna omutthara Muluku mwa Yesu Kristu anophwanya olupatthiwa”. (2 Tim. 3:12) Satana khoreere onanariwa, nto vaarowa okhala voohiloka wuupuwela wira khaninrowa oviriha mixankiho sinikumiheriwa ni Satana owo.—Wis. 12:12.

17. Mwa enamuna xeeni woonasa wene waamini wahu onrowa aya weehereriwa?

¹⁷ Moohipisa, otheene ahu nnimweehereriwa waamini wahu. Maana “okathi yowo, anokhala maxakha malupale, ehinákhumelele okhuma wopajeryani w’olumwenku mpakha vano”. (Math. 24:21) Okathi owo, woonasa wene amusi ahu anrowa onilupatthaka ni muteko ahu onookhoottihiwa. (Math. 10:35, 36) Okathi uwo waphiya, munrowa opaka exeeni? Niireke munrowa omutakiha Asa mmuroromelaka Yehova ni mukupaliki wira onimookhapelelani?

18. Moovarihana ni aHéberi 10:38, 39, exeeni enrowa onikhaliherya wamala okathi wa murettele?

¹⁸ Yehova onninikhaliherya niinaano-va olipiha waamini wahu wira niwerye ovilela itthu sinrowa onikhumelela muhoolo. Omurumeelaka “murumeyi òroromeleya ni ànkhili”, Yehova onninivaha yoolya ya omunepani “okathi aya”  wira nihihiye omukokhorela. (Math. 24:45) Nto nihiikhuraane, otheene ahu nihaana opaka ele ninwerya ahu wira nilipihe omwaamini wahu Yehova.—Mmusome aHéberi 10:38, 39.

19-20. Moovarihana ni 1 Wahala 28:9, makoho xeeni ninreerela ahu wiikoha ni mwaha wa exeeni?

¹⁹ Ntoko Asa, hiyo nave nihaana ‘omphavela’ Yehova. (2 Wah. 14:3; 15:1, 2) Enamuna yoopacerya nnooniherya ahu wira ninnimphavela Yehova, ori omusuwela ni opatisiwa. Nto nihaana opaka itthu sotheene ninwerya ahu wira nlipihe omphenta wahu Yehova. Wira niwehe akhala wira ninnipaka eyo, nihaana wiikoha so: ‘Kiireke kinnirowela mithukumano sotheene?’ Musuweleke wira omuthukumanoni ninniphwanya ikuru ni olipihiwa ni anna ni arokora wira nihihiye omurumeela Yehova. (Math. 11:28) Makoho makina ninreerela ahu wiikoha taala: ‘Kiireke kinnimusoma Biibiliya khula nihiku? Akhala wira mookhalana emusi, niireke munnikhalana omulompa Muluku vatthokoni khula esumana? Akhala wira munikhala mekhinyu, niireke munnipaka yoosoma anyu khula esumana? Ohiya-vo, niireke munniirela mpantta muteko woolaleerya ni waapaka awiixutti?’

²⁰ Xeeni vari aya vooloka osuwela moota nnaakhula ahu makoho awo? Biibiliya onihimya wira Yehova onnitokosa murima ni muupuwelo ahu, nto vaamuloka hiyo nave otokosa ele eri vamurimani vahu ni nnuupuwela ahu. (Mmusome 1 Wahala 28:9.) Nto akhala wira nnoona wira nihaana oturuka soolukama sahu, moonelo ahu ni muupuwelo ahu nihaana onvekela Yehova wira onikhaliherye opaka eyo. Nihaana ottottela mureerelo okathi ola wira niilokiherye mwaha wa itthu sinrowa onikhumelela muhoolo. Nto muhihiye nnakhala etthu emosa yoohiihakani okhalana ankhili okathi wa murettele.