1. Arokora anceene anikhaliherya sai mutthenkeso, ni mixankiho xeeni sinaaphwanya arokora anceene? (Nwehe efootu ya ekaapa.)

NINNIHAKALALA vanceene okhalana arokora yaawo anikhaliherya miteko soovirikana mmulokoni! Mwa ntakiheryo awo anniirela mpantta mithukumano ni annikhaliherya muteko woolaleya ihapari sooreera sa Omwene. Arokora akina annikhaliherya oteka ni olokiherya Ipa sa Omwene ni annaakhaliherya anna ni arokora mmulokoni. Ekeekhai wira arokora awo annikumana mixankiho sinceene. Akina ahaana waakhapelela anamuyari aya oowuuluvala. Nave-tho akina annilupatthiwa ni amusi aya. Arokora akina toohitheliwa ni aakhalana anamwane, nto aahaana wiimananiha ovara muteko wira yaalyiheke anaaya.

2. Xeeni vanireerela aya waakhaliherya arokora?

² Xeeni vari aya vooloka waakhaliherya arokora a muloko ahu? Mwaha woowi atthu a mulaponi khanaattittimiha ni khanaathokorerya saana athiyana. Ohiya-vo, Biibiliya onnintumererya waakhaliherya athiyana. Mwa ntakiheryo murummwa Paulo aahaaleela anna a muloko wa oRoma wira yaahaana omwaakhela saana Febe ni ‘omukhaliherya mwa sothene sinimuthowa’. (aRom. 16:1, 2) Ntoko aFarisi, ohinatthi okhala muKristau, Paulo uupuwela wira athiyana khiyaarina efaita, nto khaathokorerya saana. Nuumala okhala muKristau, Paulo aahipacerya omutakiha Yesu aattittimihaka athiyana ni waareerela murima.—1 aKor. 11:1.

3. Yesu aathokorerya sai athiyana? Aawoonela sai ale yaapaka yootthuna ya Muluku?

³ Yesu aanaattittimiha vanceene athiyana otheene. (Yoh. 4:27) Owo khaathokorerya athiyana ntoko ahooleli a itiini a okathi awe yaathokorerya aya. Eliivuru emosa enimutthokiherya Biibiliya ehimmye so: “Yesu khaaveeha ni khaaramusa athiyana”. Tthiri Yesu aanaattittimiha vanceene athiyana yaapaka yootthuna ya Tiithi awe. Owo aanaathokorerya athiyana ntoko axirokorawe. Nave aanaathokorerya alopwana ni athiyana ntoko amusi awe.—Math. 12:50.

4. Mwaha ola, ninrowa oweha exeeni?

 ⁴ Okathi wotheene, Yesu waanimusivela waakhaliherya athiyana yaamurumeela Muluku. Owo aanipaka eyo, ovirihaka okathi otthekulaka ni athiyana awo, waavaha efaita ni waakhaliherya. Vano nrowe niwehe moota nikhanle ahu ootthara ntakiheryo na Yesu naathokoreryaka oratteene arokora.

5. Exeeni eniwiiriha arokora akina ohikhalana okathi wira atthekule ni atthu akina?

⁵ Otheene ahu, anna ni arokora ninniphavela otthekula ni atthu akina. Masi okathi mukina eyo ennaavila arokora akina. Mwaha wa xeeni? Nwehe ele ahimmye aya arokora akina. Murokora oniihaniwa Jordan * onihimya so: “Okhala wira nkitheliwe, onnikivila osuwela opuro aka mmulokoni, vanikhala ntoko wira nkirina opuro mmulokoni”. Kristen pioneera yoowo othaamenle muloko mukina wira incererye muteko awe woolaleerya, ohimmye so: “Vaavo munithaamela anyu muloko mukina, munkhala ntoko wira muri mekhinyu”. Ekeekhai wira anna akina aakhalana moonelo mmosaru ntoko wa arokora awo. Ale anikhala ni amusi aya ahikhanle Anamoona a Yehova onnaavila okhalana waataana wooloka ni amusi aya ni anoona wira aarakamelana ni anna ni arokora a mmulokoni. Arokora akina anoona wira ari mekhaya mwaha woowi anoowereiwa aahiiso khakhanle ookhuma owaani mwaha woowi anaakhapelela amusi aya aniwereiwa. Annette onihimya so: “Kaahaana omukhapelela maama aka, nto nkeemererya vaavo anna ni arokora yaakilattula aya wira natthekule”.

6. Moovarihana ni Luka 10:38-42, Yesu aamukhalihenrye sai Martha ni Maria?

⁶ Yesu aaniviriha okathi ori ene ni axirokorawe a omunepani, nto owo aari mpatthani a ekeekhai a arokora awo. Mwa ntakiheryo nkahaya muupuwele opatthani Yesu aarina awe ni Maria ni Martha. Woonasa wene, awo khiyaatheliwe. (Mmusome Luka 10:38-42.) Okathi wotheene Yesu aanaahiya ootaphuwa athiyana awo. Mwa ntakiheryo, Maria khoovelenle okilaathi aari Yesu ntoko awiixutti * akina yiira aya. Nave okathi Martha aanyoonyihenye awe mwaha woowi Maria khaamukhaliherya olokiherya eyoolya, Martha khoovelenle omuleela Yesu moonelo ni muupuwelo awe. Nto Yesu aahittottela mureerelo okathi ole wira omwiixuttihe itthu sa efaita Martha ni Maria. Nave Yesu aahooniherya wira aanaathokorerya ni aanaavaha efaita, aaxukuryaka ikwaha sinceene awo ni murokoraya iihaniwa Laazaro. (Yoh. 12:1-3) Nto okathi Laazaro ahaareere awe owereiwa, Maria ni Martha yaanikupali wira yaamukhaliheriwa ni Yesu.—Yoh. 11:3, 5.

7. Munrowa waalipiha sai arokora a mmulokoni?

⁷ Arokora akina mithukumano sinnaakhaliherya okhala vamosa ni anna ni arokora. Nto nihaana ottottela mureerelo okathi owo wira niwaakhele mooreerela murima, ovaanelana ni owooniherya wira ninnaavaha efaita. Jordan nimulavunle ahu wanipacerya, ohimmye so: “Kinnihakalala vanceene vaavo atthu akina ankittottopela aya mwaha wa ekomentaario kivanhe aka, ampaka aya mareheryo wira nalaleerye vamosa aahiiso ankooniherya aya wira annikikhapelela”. Nihaana owooniherya arokora otheene wira ninnaavaha efaita. Kia ohimmye so: “Okathi kihinrowela aka mithukumano, kinnisuwela wira anna ni arokora anookilikarela aahiiso anookivaha mensagem akikohaka akhala wira ka mukumi. Eyo ennikikupaliha wira anna ni arokora a mmulokoni annikithokorerya”.

8. Mwa inamuna xeeni sikina nikhanle ahu oomutakiha Yesu?

⁸ Nimutakihaka Yesu, nihaana waavya okathi wira nitthekule ni arokora. Mwa ntakiheryo, munoonela sai waalattula arokora akina wira mulye vamosa wala mutthekule? Okathi owo nyuwo pooti waalipiha vanceene. (aRom. 1:11, 12) Akhala wira mwa mutokweene, okathi wotheene muupuweleke ntakiheryo na  Yesu. Owo aanisuwela wira atthu akina vannaaxankiha okhala ahithenle wala ahitheliwe. Masi Yesu aahooniherya oratteene wira khivanitthuneya mutthu othela ni waayara anamwane wira ophwanye ohakalala wekeekhai. (Luka 11:27, 28) Tthiri, etthu eniphwanyiha ohakalala wekeekhai ori ohela nipuro noopacerya ovara miteko sa Yehova.—Math. 19:12.

9. Axitokweene ahaana opaka exeeni wira yaakhaliherye arokora?

⁹ Axitokweene ahaana waathokorerya athiyana a mmulokoni ntoko axirokoraya ni aximaama aya oomunepani. (1 Tim. 5:1, 2) Ti vooloka axitokweene ophavelasa okathi sihinatthi ni nuumala mithukumano wira avaanele ni arokora. Kristen ohimmye so: “Okhala wira kinnivara muteko wa mulaponi ni ka pioneera, kaanaatteliwa miteko. Nto mutokweene mmosa aahikikoha moota yaari aya eprokrama aka. Kaahihakalala vanceene woona wira mutokweene ole aanikithokorerya”. Vaavo axitokweene aniimananiha aya wira avaanele ni arokora anniwooniherya wira annaathokorerya. * Annette, nimulavunle ahu wanipacerya onnitthokiherya nthowa naya vari aya vooloka olavula ni axitokweene ikwaha sinceene. Owo onihimya so: “Ovaanela ni axitokweene ikwaha sinceene, onnikikhaliherya waasuwela oratteene ni axitokweene annikisuwela oratteene. Nto okathi kinikumanana aka mixankiho nkinoovelela waavekela nikhaliheryo”.

10. Ninrowa waakhaliherya sai arokora ophwanya ohakalala?

¹⁰ Otheene ahu akhale alopwana ni athiyana, ninnihakalala vaavo atthu akina ansuwela aya mikhalelo sahu ni anixukhurela aya muteko ninvara ahu. Masi, akhala wira atthu akina khanivaha efaita wiimananiha wahu ni ele ninvara ahu, hiyo pooti okhulumuwa. Pioneera oohitheliwa oniihaniwa Abigail ohimmye wira okathi mukina onuupuwela wira ooliyaliwa. Owo ohimmye so: “Atthu akina anaasuwela paahi axihimaaka ni axirokoraka aahiiso ankoona okhala mwaana aafulano. Nto okathi mukina kinuupuwela wira nkinooneya”. Vano nwehe yowiiraneya ya murokora Pam. Okathi ahaatheliwe awe aahiviriha iyaakha sinceene ori ene misionaaria. Nuumala-vo aahaana otthikela elapo awe wira aakhapeleleke anamuyari awe. Vano murokora Pam orina iyaakha sinivikana 70 ni pioneera. Pam onihimya so: “Etthu yaatepa okikhaliherya waari owiiwa atthu akina ahimyaka wira annixukhurela vanceene muteko kinivara aka”.

11. Yesu oonihenrye sai wira aanaavaha efaita athiyana ale yaamukhaliherya okathi wa muteko awe woolaleerya?

¹¹ Athiyana akina oororomeleya, yaanimukhaliherya Yesu ‘anvahaka mihakhu saya’, nto Yesu aanixukhurela vanceene. (Luka 8:1-3) Tthiri khahiyo paahi Yesu aaweemerenrye okhalana eparakha eyo ya omukhaliherya, masi aahiwiixuttiha ikeekhai sinceene sa omunepani. Mwa ntakiheryo, Yesu aahaaleela wira aamwiiviwa ni aarowa ohihimuxiwa. (Luka 24:5-8) Ntoko siisaale aakhalihenrye awe arummwa awe wira awerye ovilela mixankiho saarowa waakhumelela muhoolo, Yesu aahaakhaliherya athiyana awo. (Mar. 9:30-32; 10:32-34) Moone wira okathi Yesu aatthukiwe awe arummwa otheene yaahitthyawa, masi okathi aakhwa awe vamwirini va nihaaxeryo, athiyana akina yaamukhaliherya yaari vaavo.—Math. 26:56; Mar. 15:40, 41.

12. Muteko xeeni Yesu aavanhe awe athiyana?

¹² Yesu aahaavaha athiyana miritti sa faita. Mwa ntakiheryo, atthu yaapacenrye onweha Yesu nuumala ohihimuxiwa yaari athiyana oororomeleya. Nave Yesu aahaaruma athiyana ale orowa waaleela arummwa voohimya sa ohihimuxiwa wawe. (Math. 28:5, 9, 10) Ohiya-vo, vanikhala ntoko wira nihiku na Pentekoositi a 33, nuumala Kristu orwa, yaahikhala athiyana vaavo waamwarexiwe aya munepa wootteela. Akhala wira eyo yaahiiraneya, athiyana ale yaahikhalana eparakha ya vameekhaaya ya olavula mattaava a ilapo sikina. Nto eyo enooniherya wira athiyana ale yaahiirela mpantta muteko woolaleya “miteko sulupale sa Muluku”.—Mit. 1:14; 2:2-4, 11.

13. Itthu xeeni arokora akina anipaka aya olelo-va mmutthenkesoni mwa Yehova? Munrowa wooniherya sai wira munnixukhurela itthu sotheene anipaka aya?

¹³ Arokora ahaana ottottopeliwa mwaha wa itthu sotheene anivara aya mmutthenkesoni mwa Yehova. Miteko iyo sinihela muhina oteka ni olokiherya Ipa sa Omwene, okhaliherya ikrupu sinilavula nttaava na elapo ekina ni okhaliherya miteko sikina sa oBetheli. Arokora akina annikhaliherya ikrupu sinaakhaliherya anna sakhumelela ihasara, mapuro anitaphuleliwa iliivuru, orumeela ntoko mapioneera ni mamisionaaria. Ntoko anna, arokora annirowela Exikola ya Mapioneero, Exikola ya Anamalaleerya a Omwene ni Exikola ya oGileadi. Ohiya-vo, arokora ootheliwa annaakhaliherya axiiyeya ovara miteko sa mmulokoni ni mmutthenkesoni mwa Yehova. Tthiri anna awo anniwerya okhala “sovaha” sa Muluku mwaha woowi annikhaliheriwa ni axaaraya. (aÉf. 4:8) Niireke munniweha inamuna mukhanle anyu oowaakhaliherya ni waattottopela arokora mwaha wa itthu sotheene anipaka aya?

14. Moovarihana ni ele enihimya aya Esalimo 68:12, axitokweene a ankhili anipaka exeeni?

¹⁴ Axitokweene annisuwela wira athiyana aniirela mpantta muttitthi muulupale wa atthu anivara muteko wa Muluku moowiivahererya. Tthiri awo annikhaliherya vanceene muteko woolaleya ihapari sooreera. (Musome Esalimo 68:12.) Axitokweene a ankhili anniphavelasa inamuna sa wiixutta etthu ni sookumanana sa arokora awo. Abigail nimulavunle ahu ohimmye wira onnilipa vaavo anna animukoha aya inamuna sooloka sa opaceriha ovaanela ni atthu a muttetthe awe. Owo onihimya so: “Eyo ennikikhaliherya woona wira Yehova ookivaha opuro  mmutthenkesoni mwawe”. Nave, axitokweene annisuwela wira arokora oowuuluvala ni oororomeleya annikhumela saana vaavo anaakhaliherya aya arokora amiravo moota woophuka mixankiho saya. (Tito 2:3-5) Moohaanyiherya, arokora awo ahaana ottottopeliwa ni oxukhureliwa vanceene.

15. Okathi xeeni arokora akina aniphavela aya okhaliheriwa?

¹⁵ Okathi mukina arokora annikumanana mixankiho anamphavela mutthu wira owaakiheke. (Yes. 1:17) Mwa ntakiheryo, arokora anaamukhweli ni ale amwalaniwe woonasa wene annimphavela mutthu wira aakiheryeke ihakhi saya ni aakhaliheryeke ovara miteko sikina, seiyo saavariwa ni iyeya. Okathi mukina arokora oowuuluvala pooti ophavela okhaliheriwa wira yalavule ni meediku. Ohiya-vo, arokora mapioneera yaawo anikhaliherya miteko sikina sa mutthenkeso woonasa wene, anomphavela mutthu mukina wira owaakiherye vaavo anilavuliwa aya moohiloka mwaha woohikhaliherya vanceene muteko wa opioneero ntoko mapioneero makina. Etthu xeeni ekina ninreerela ahu opaka wira naakhaliherye arokora? Nrowe ntthikele oweha ntakiheryo na Yesu.

16. Moovarihana ni Marko 14:3-9, Yesu aamwaakinhe sai Maria?

¹⁶ Yesu aanaakuvela owaakiherya arokora awe oomunepani vaavo yaalavuliwa aya moohiloka. Mwa ntakiheryo, Yesu aahimwaakiherya Maria okathi Martha uupuwela awe wira Maria arookilathi paahi ohinamukhaliherya. (Luka 10:38-42) Nave Yesu aahimwaakiherya Maria ekwaha ya nenli vaavo atthu akina yaamulavula aya moohiloka ahimyaka wira Maria aahipaka yoothanla yoohiloka. (Mmusome Marko 14:3-9.) Yesu aanisuwela etthu yaamwiirinhe Maria opaka eyo, nto aahimuttottopela ohimyaka wira: “Ola okìrela etthu yorera . . . Ola iralé enweryawe”. Nave Yesu aahilavula eprofesia ohimyaka wira “mapuro othene anrowaya olaleiwa ehapari yorera, mulaponi mothene, yeyo-tho muthiyan’ola yiralyawe enrowa olaleiwa, ùpuweliwaka yola”. Tthiri eyo ti etthu mwaha ola ninthokorerya ahu onipaka awe. Tthiri moolumo a Yesu yaahimulipiha vanceene Maria nnaamwi aalavuliwe voohiloka. Ti voohakalaliha woona wira okathi Yesu aamuttottopenle awe Maria mwaha wa etthu ele aapanke awe, aahihimya wira ihapari sooreera saamulaleiwa olumwenku wotheene. Tthiri eyo yaahimmaaliha vanceene Maria.

17. Nvahe ntakiheryo na moota mukhanle anyu oomwaakiha murokora.

¹⁷ Niireke nyuwo munniwaakiha arokora oowaamini a muloko anyu? Mwa ntakiheryo, nkahaya muupuwele ela: Muupuwele wira muloko anyu ookhala murokora otheliwe ni mulopwana ohikhanle Namoona a Yehova. Anamalaleerya akina annoona wira murokora owo ommakela ophiya mithukumano sipacenrye ene ni onkhuma wiiriwakaru “Amem”. Ohiya-vo, okathi onrwa awe mithukumano, owo khonrwa ni anaawe. Nto anamalaleerya a mmulokoni annimulavula voohiloka murokora owo ahimyaka wira: “Xeeni ohinimukhanyererya awe iyawe omweemererya waakuxa anamwane aarwaaka mithukumano?” Masi anniliyala woona wira murokora owo onnipaka sotheene oniwerya awe wira orweele mithukumano. Nave okathi onipaka awe eprokrama khahiyo wira oneettela murima awe. Ohiya-vo, khahiyo owo tompaka soothanla sotheene voohimya sa anaaya. Nto etthu xeeni munrowa anyu opaka wira mmwaakihe murokora owo? Mmuttottopeleke mwaha wa wiimananiha onipaka awe ni mwaaleeleke atthu akina itthu sooloka onipaka awe khula nihiku. Mwiira siiso, nyuwo munimwaakhaliherya atthu akina ottharuwa omulavula voohiloka murokora owo.

18. Mwa inamuna xeeni sikina nikhanle ahu oowaakhaliherya arokora?

¹⁸ Nnimooniherya wira ninnaathokorerya arokora, naavahaka itthu sinrowa waakhaliherya. (1 Yoh. 3:18) Annette, murokora yoole aamukhapelela maama awe aawereiwa, ohimmye so: “Anna ni arokora akina yaanirwa owaani omukhapelela maama aka wira miyo kipakeke etthu ekina. Akina yaaniruuha yoolya. Eyo yaahikikhaliherya woona wira kinniphentiwa ni kinniirela mpantta muloko”. Nave Jordan ootoko okhaliheriwa. Munna mmosa a mmulokoni aahinvaha malakiheryo a moota woolokiha  ekaaro awe. Owo onihimya so: “Kinnihakalala woona wira anna annikithokorerya ni aniphavela wira kikhaleke oovareleleya okathi kineettiha aka ekaaro aka”.

19. Axitokweene anrowa waakhaliherya sai arokora?

¹⁹ Axitokweene nave ahaana waakhapelela ni waathokorerya arokora. Awo annisuwela wira Yehova oniphavela wira arokora akhapeleliweke saana. (Yak. 1:27) Axitokweene ahaana otakiha oreera murima wa Yesu, ahipakaka malamulo wira yaaxankihe atthu akina, vareerelaka waareerela murima ni osuwela etthu enaaxankiha. (Math. 15:22-28) Vaavo axitokweene aniimananiha aya waakhaliherya arokora, awo annoona wira annithokoreriwa ni Yehova vamosa ni mutthenkeso awe. Okathi muhooleli a ekrupu ya Kia aasuwenle awe wira Kia aamuthaamela empa ekina, moowaakuveya mutokweene ole aahipaka mareheryo wira okhaliheriwe. Kia onihimya so: “Eyo yaahivukula oxanka waka. Moolumo oolipiha a axitokweene ni nikhaliheryo naya naahikooniherya wira kookhalana efaita mmulokoni. Nto kinnoona wira hata kikumanaka mixankiho, miyo nkikhanle mekhaka”.

20-21. Munrowa wooniherya sai wira munnaavaha efaita arokora a muloko anyu?

²⁰ Khula muloko olelo-va, ninnaaphwanya arokora anceene ninreerela ahu waakhaliherya. Ntoko niixuntte ahu ni ntakiheryo na Yesu, nnoowerya waakhaliherya arokora nivirihaka okathi munceene nitthekulaka naawo ni waasuwela oratteene. Nave nihaana owooniherya wira ninnivaha efaita khula etthu anipaka aya mmutthenkesoni mwa Muluku. Etthu ekina ninreerela ahu opaka tiila: Nihaana owaakiha okathi wotheene vanireerela aya.

²¹ Wanikisa wa ewarakha aalepenle awe aRoma, murummwa Paulo onnihimya masina 9 a athiyana. (aRom. 16:1, 3, 6, 12, 13, 15) Tthiri arokora ale yaahilipa vanceene vaavo yiiwa aya masina aya asommwaka epaphelo ele ya Paulo, nave yiiwa aya makhomaso ni waattottopela wa Paulo. Nto mmutakihaka Paulo mwaakhaliheryeke arokora otheene a muloko anyu. Mwiira siiso, nyuwo munoowooniheyra wira munnaaphenta ni anniirela mpantta emusi ahu ya omunepani.