Niireke nyuwo mootoko owereiwa? Waaniheryasa nuumala openuwa, moohipisa mwaahiliyala eretta eyo. Tthiri okhweliwa khonilikana ni owereiwa. Dr. Alan Wolfelt, mwa eliivuru awe eni: Healing a Spouse’s Grieving Heart [Omukhaliherya Mulopwana wala Muthiyana Oninla] aahimmye so: “Khiivo etthu enlikana ni okhweliwa. Masi nuuvira okathi vamosa ni okhaliheriwa ni akina, wunla wanyu onnivukuwa”.

Mwa ntakiheryo, moone ele aapanke awe muhavinre Abrahamu, nuumala okhwa mwaarawe. Biibiliya oni: “Abrahamu ahirowa-wo onvitha Sara n’umunlela”. Biibiliya mukina oni: “Abrahamu aahipacerya omunlela Sara”. Nuulumo noowi “aahipacerya omunlela”, nnooniherya wira aahiviriha okathi munceene oriipiwe ene murima. * Ntakiheryo nikina ti na Yakobe, yoowo aawokiwe wira mwanawe amphentexa awe, Yosefe, aahiiviwa ni mwaamunama owoopiha. Yakobe aahiviriha “mahiku manjene” omunlelaka Yosefe, nto amusi awe khiyaawerya ommaaliha. Nuuvira iyaakha sinceene, nlelo Yakobe khaaliyanle okhwa wa Yosefe.​—Maphattuwelo 23:2; 37:34, 35; 42:36; 45:28.

Eyo enniiraneya-tho olelo-va. Atthu anceene anninla mwaha wa okhwa ole yamphenta aya. Moone matakiheryo manli anittharelana.

• Gail, orina iyaakha 60, oni: “Iyaka Robert okhwiiye 9 a Julyo, 2008. Nihiku nle voosisu, naamulikana ni mahiku makina. Nuumala olya hoothe voosisu ntoko yoolema ahu, naahibexarana, okupaarelana , nave khula mutthu aahimuleela mukhwaawe wira: ‘kinnoophentani’. Soovira iyaakha 6 okhuma vaavale iyaka okhwiiye awe, masi nlelo kinnoona owereya. Nkisuwenle akhala wira kinooxintta muxankiho ola”.

• Etienne, orina iyaakha 84, onihimya so: “Nnaamwi sivinre ene iyaakha 18 nuumala okhwa mwaaraka, nlelo kinnimuupuwela ni omunlela. Khuta okathi kinoona aka etthu yooreera, kinimuupuwela mwaaraka, nto nkinwerya osyaka wuupuwela wira nuuwo nave aamusiveliwa woona ele enoona aka”.

Tthiri, khahiyo vootthekeya wunla ni oriipiwa murima. Khula mutthu onniriipiwa murima mwa inamuna soovirikana. Nto khahiyo vooloka omphukela mukhwiihu voohimya sa moota oniriipiwa awe murima nuumala okhweliwa. Masi-tho, nihaana osyaka wiivaha nthowa akhala wira oriipiwa wahu murima onniviriha mahiku manceene. Nto ninrowa ovilela sai oriipiwa murima?