Nrowe nuupuwele waataana wootepexa oreera oniiraneya ni atthu ayariwe maphapo anlikana moonelo ni muupuwelo. Maphapo awo annikhalana muupuwelo ni moonelo mmosaru. Muhooleli a nikhuuru na asomi anitokosa maphapo, (Twin Studies Center), Nancy Segal, ohimmye wira maphapo makina oolikana, “okathi anivaanela aya yaaworu, khula mmosa onnisuwela etthu mukhwaawe oniphavela awe ohimya moohitthuneya otthokiheriwa”. Muthiyana mmosa oyariwe maphapo oolikana, ohimmye so: “Miyo kinnisuwela khula etthu eniiraneya mookumini mwa muhima aka, nave owo onnisuwela khula etthu eniiraneya mookumini mwaka”.

Soohimmwa iya sa vameekhaaya sinooniherya exeeni? Sootokosa sinooniherya wira nnaamwi anamuyari ni mapuro anikhaliwa yiirelaka mpantta, vanikhala wira olattana makhalelo ooyaraniwa a mwerutthuni, onnikhaliherya okhumelela wiiwanana iwo.

MUTHOKORERYE ELA: Khuuvo onnisuwela saana onvikana Mpattuxa ahu. Nasalimo Davidi aahimmye so: “Ti nyuwo mùpale erutthu aka mmirimani mw’amama. Erutthu aka khiyòtikhinneni, okathi wupiwaya vowipitheya. . . . Maitho anyu yahikòna kihinatthi oyariwa. Mahiku othene yarowaka ovira yahilempwa mulivuruni mwanyu nlelo ehinatthi opajerya”. (Esalimo 139:13, 15, 16) Khahiyo paahi Muluku onisuwela makhalelo ahu ooyaraniwa, masi-tho onnisuwela itthu sotheene sinikhumelenle seiyo siniirinhe okhalana mweettelo nirina ahu. Okhala wira Muluku paahi tonisuwela makhalelo ahu ooyaraniwa, eyo enninlipiherya wira owo onninisuwela saana.

Davidi aavekenle so: “Apwiya! Nyuwo motokosa murim’aka, mokisuwela: mukhalaka ottaiwene, mosuwela mupuwelo aka; kakilathi walá kemelá, nyuwo munnisuwela. Miyo kihinatthi olavula, nyuwo Apwiya, munnisuwela enrowaka ohimya”. (Esalimo 139:1, 2, 4) Nave, Yehova onniweha itthu siri vamurimani vahu, maana owo onnitokosa “mupuwelo wothene”. (1 Wahala 28:9; 1 Samuweli 16:6, 7) Iversu iya sinooniherya exeeni voohimya sa Muluku?

Hata nihipakaka mowiiwanyeya mavekelo ahu otheene wala ohimya muupuwelo ahu, Mpattuxa ahu khahiyo paahi oniweha etthu enipaka ahu, masi onnisuwela nthowa naya nimpaka ahu etthu eyo. Owo onnisuwela itthu sooreera nimphavela ahu opaka, hata makhalelo ahu ehineemereryaka opaka ele murima ahu oniphavela aya. Nto okhala wira etthu yoopacerya Muluku aahenle awe vamurimani vahu naari niphento, owo onniweha ni onniiwexexa miyuupuwelo sahu soophenta.​—1 Yohani 4:7-10.

 Biibiliya onninlipiherya wira:

• “Maitho a Apwiya annaaweha anaxariya nave maaru aya aniwiriyana mavekelo”.​—1 PEDRU 3:​12, Waataana wa Naanaano.

• Muluku oleihenrye so: “Miyo kinimovahani miruku, kinimothonyeryani ephiro yorera, kinowixuttihani, kinimokhapelelani”.​—ESALIMO 32:⁠8.

Osuwela wira Muluku onnisuwela makhalelo ahu ni itthu nintthokelela ahu, onninikhaliherya ovilela mixankiho. Muthokorerye etthu yaamukhumelenle Ana, a oNigeria. Owo onihimya so: “Waahikhala okathi saakiphwannye aya mixankiho kinuupuwela wira okumi khorina efaita. Eyo yaakhumelenle nuumala aiyaka okhwa, ni ohala mekhaka kimukhapelelaka mwanihu mwaamuthiyana yoowo aapaxanri oxipitali mwaha wa oretta wa hidrocefalite (okhalana maasi manceene mottoopareni aniitthaniwa líquido cefalorraquidiano). Okathi omosaru kaahikhalana kanser ni kaahaana wooperariwa, ompaka quimioterapia, (enamuna ya olooliwa moophavela wiiva iseelula sininnuwa mowaakuveya mwerutthuni), ni ompaka radioterapia wala omwaleiwa. Vaakhala voovila weetta oxipitaali wira kilooliwe nave okathi omosaru omukhapelela mwanaka”.

Exeeni yaamukhalihenrye Ana? Owo onihimya so: “Kaanuupuwelela soolepa ntoko aFilipi 4:6, 7, yoowo onihimya wira ‘murettele wa Muluku onvikana osuwela wa mutthu onnisuka mirima sahu mwa Yesu Kristu’. Khula okathi kinuupuwelela aka yoolepa ela, kinnoona wira kinnimwaattamela Yehova, ni kinniweha wira owo onniiwexexa saana makhalelo aka okivikana miyo mmansaka. Nave kaahilipihiwa vanceene ni anna ni arokora a mmulokoni mwa eKristau”.

“Nnaamwi nlelo miyo ni mwanaka niwereiwaka, makhalelo ahu aaloka. Okhala wira Yehova ori ni hiyo, nihiixutta ohuupuwela itthu sooriipiha murima okathi wa mixankiho. Yakobo 5:11 onnilipiha so: ‘Hiyo nniwirela òreriwa ale anvilela ohawa. Nyuwo muhìwa ohimmwaka ovilela wa Yobi: nave mosuwela sorera Muluku sanvahalyawe wokiseryani. Tthiri Muluku t’òkhupanyerya ni t’òsareya othunku’”. Okhala wira Yehova aanisuwela saana mixankiho sa Yobi, nave nihaana okupali wira Owo onniweha khula etthu ennixankiha.