Vakhala wira Muluku khahiyo tonikumiherya ohaawa, nto xeeni onitepa aya okhumelela osikhini, ikhotto, iretta soorakaliha, ni ihasara sa ephattu? Biibiliya onnihimya mathowa mararu aniwiiriha apinaatamu ohaawa:

1. Wiisoona, Milili, ni Onyokhana. “Àkhala akina arina owerya, àkhala-tho akina anihawa epuheriwaka n’awo”. (Musuweli 8:9) Okhalawene oohimalela, wiisoona, ni otakhala wa atthu onnikumiherya ohaawa.

2. Okathi Woohireerela ni Ihasara Sootutuxerya. Ikwaha sinceene atthu anihaawa mwaha woowi “oreriwa n’utakhaliwa khunimuthanla mutthu”. (Musuweli 9:11) Nto ihasara sinnaakhumelela atthu mwaha wookhala opuro ni okathi woohireerela, aahiiso okathi ahinivaha aya ephoole wala opaka saana itthu.

3. Namalamulela Ootakhala a Olumwenku. Biibiliya onnihimya nthowa nuulupale ninwiiriha apinaatamu ohaawa. Owo onihimya so: “Elapo yothene enniweriwa ni Mutakhali”. (1 Yohani 5:19) “Mutakhali” owo, ti Satana Diabo, yoopattuxiwa ya omunepani yeeyo woopaceryani yaari nlaikha na Muluku masi ehivikaniha okhala “n’ikekhai”. (Yohani 8:44) Malaikha makina yaahimutthara Satana ni yaahimurukunuwela Muluku mwaha wa soophavela saya soohiloka, ni yaahiipaka malaikha ootakhala. (Maphattuwelo 6:1-5) Okhuma okathi owo, Satana ni malaikha awo ootakhala, annikumiherya mixankiho sinceene moolumwenkuni, vanceenexa mahiku ahu ala. Vano, Diabo oonanariwa vanceene, ‘onniwototha atthu othene’, ni onnikumiherya mixankiho olumwenku wotheene. (Wisupulula 12:9, 12) Tthiri, Satana tootakhala vanceene. Owo omusivela waaweha apinaatamu ehaawaka. Veekeekhai Satana toniwiiriha atthu ohaawa ohiya Muluku.

MUTHOKORERYE ELA: Paahi mutthu ootakhala murima wala onuupuwelela itthu sa osatana tokhanle oowaakumiherya atthu oohittheka mixankiho. Masi moovirikana ni vo, Biibiliya onihimya wira: “Muluku ophentá”. (1 Yohani 4:8) Nto mwaha wa mukhalelo owo wa ophenta, “Muluku khivo yotakhala enìrawe: Nanwerya sothene khanttheka”.​—Yobi 34:10.

Nyuwo pooti wiikoha so: ‘Mpakha silini Muluku Owerya sotheene onrowa awe omuhiya Satana olamulelaka mootakhala?’ Sintoko niwenhe ahu, Muluku onninyokha otakhala, ni vanninwereya aaniwehaka nihaawaka. Nuulumo nawe ninhimya so: “Muhelé mmatatani mwawe ovelavela wanyu wothene, okhala wira owo onnokhapelelani”. (1 Pedru 5:7) Muluku onniniphenta ni ookhalana owerya woomaliha ohaawa ni ohixariya, sintoko onitthokiherya aya mwaha onittharelana. *