Vaakhanle wira mookhalana muxankiho, tthiri mwaamulipelelaka okhaliheriwa ni mpatthani anyu eekeekhai. Muupuwelo owo onniwiiriha akina woonaka wira Muluku khahiyo mpatthani ooloka, maana anoona wira owo khonaakhaliherya. Masi ohimya ekeekhai Muluku onnikhaliherya, ni onoopaka etthu wira omalihe mixankiho ni ohaawa wotheene onikhumela olelo. Nto Muluku onrowa opaka exeeni?

Muluku onoomaliha otakhala ompwetexaka ole onikumiherya. Biibiliya onnimuhimya ole onikumiherya oriki: “Elapo yothene enniweriwa ni mutakhali”. (1 Yohani 5:19) Mutakhali owo, ti yoole Yesu aamuhimmye awe okhala “ole onruma vathí-va”, ori Satana Diabo. (Yohani 12:31) Satana onnaawoka atthu mulaponi, tivonto vanihimmwa ya wira yena tonikumiherya ohaawa valaponi. Muluku onrowa opaka exeeni?

Voohipisa Yehova Muluku onrowa omuruma mwanawe, niire so, Yesu Kristu wira ‘ampwetexe Satana ole orina owerya w’okhwa’. (aHéberi 2:14; 1 Yohani 3:8) Tthiri Biibiliya onnooniherya wira Diabo “òsuwela wira orina okathi vakhani pahi”. (Wisupulula 12:12) Muluku onrowa-tho waapwetexa atthu anivara itthu sootakhala.​—Esalimo 37:9; Miruku 2:22.

Nuumala omala-maliha otakhala wotheene valaponi, Mpattuxa ahu, onoomaleliha yoolakela awe voohimya sa apinaatamu vamosa ni elapo. Nuumala-vo, exeeni-tho enrowa okhumelela?

Onookhala murettele ni omaaleleya. “Vano atthu òmala anoreriwa vathí-va, anokhala-mu ni murettele womalela”.​—Esalimo 37:11.

Enookhala eyoolya yinceene ni yooloka. ‘Mmatta mothene munoruwerya solya sinjene: mattumuxa anosareya iphyó’.​—Esalimo 72:16.

Inupa sooloka ni muteko woohakalaliha. “Anrowa otekaka ipa saya, ekhaleke memmo; anrowa ophatteyaka miri s’evidera elyeke mihokhorokho saya. . . . atthu aka animolyaka mihokhorokho sihawenle aya”.​—Yesaya 65:21, 22.

Niireke munniphavela oweha itthu iyo siiraneyaka? Moohipisa, itthu iyo sookuxa murima sinrowa owiiraneelaka atthu otheene.

Olelo-va otheene ahu ninniwereiwa ni okhwa, masi eyo khenrowa ovikaniha wiiraneya. Voohipisa Muluku onrowa ovarela muteko mukuttho wa yowoopola ya Yesu “wira othene ale animwamini yowo, ehirimelé masi ekhalane ekumi ehinimala”. (Yohani 3:16) Nto eyo enrowa okumiherya exeeni?

Iretta sinoomalihiwa. “Khavo-tho onkela ohimya wira: ‘miyo ki muretta’ atthu othene anoleveleliwa sottheka saya”.​—Yesaya 33:24.

Okhwa khunrowa waahaaxa-tho apinaatamu. “Apwiya anomaliha khuluwí okhwa. Apwiya Muluku animukuttha maithori owitho wothene”.​—Yesaya 25:8.

Atthu anrowa okhalaka mahiku otheene. “Vano eparakha Muluku ennivaha awe mahala enniphwanyiha ekumi ehinimala, mwa Yesu Kristu, Pwiya’ahu”.​—aRoma 6:23.

Atthu akhwiiye anootthikela okhala akumi. “Atthu othene, ale òrera murima n’ale òtakhala murima anohihimuwa mokhwani”. (Miteko 24:15) Awo anrowa ottottela mureerelo yoovaha ya Muluku, eyo piiyo, yowoopola.

Muluku onrowa opaka sai itthu iya sotheene?

Muluku ohaana eguvernu awe ya wiirimu, yeeyo Kristu Yesu oryaawe Namalamulela, nto eguvernu eyo tenrowa olokiherya itthu mwa mureerelo wa apinaatamu ni elapo. (Esalimo 110:1, 2) Eguvernu eyo, aahiiso omwene, ti yeeyo Yesu aawiixuttinhe awe atthareli awe ovekela oriki so: ‘Tith’ihu muri wirimu . . . Omwene anyu orwe’.​—Matheyo 6:9, 10.

Omwene wa Muluku onrowa olamulela elapo yotheene ni onoomaliha masooso ni ohaawa wotheene wa apinaatamu. Eguvernu eyo teri olamulelo wootepexa oloka wa apinaatamu otheene. Tivonto Yesu aamananinhe awe olaleya ‘ihapari sorera sa Omwene’ okathi aari awe valaponi ni waatumererya awiixutti awe opaka etthu emosaru.​—Matheyo 4:23; 24:14.

Mwaha wa waaphentexa wawe apinaatamu, Yehova Muluku ooleiherya waapakela itthu iya sotheene sooreera. Niireke eyo kheniwiirihani ophavela omusuwela saana yena ni omwaattamela? Nto munrowa ophwanya exeeni mwathanla opaka eyo? Mwaha onittharelana onrowa otthokiherya.