Mpakha-va, noowerya ophwanya waakhuliwa wa nikoho nni: Muluku ti Pani? Woopaceryani nooweha wira nsina na Muluku ti Yehova, sintoko Biibiliya onihimya awe, nave nooweha wira mukhalelo awe muulupale ti ophenta. Nooweha-tho itthu Muluku opanke awe ni onrowa awe opaka mwa mureerelo wa apinaatamu. Nnaamwi itthu iyo siniixuttihaka vanceene voohimya sa Muluku, nyuwo pooti wiikohaka so: Mireerelo xeeni sinikiphwanyiha aya?

Yehova ooleiherya wira ‘mwamphavela, owo onimorwa okumana ni nyuwo’. (1 Wahala 28:9) Mwamusuwela Muluku, munookhalana ompatthani woolipa nuuwo! Eyo eparakha yuulupale. (Esalimo 25:14) Ompatthani owo onrowa woophwanyihani mireerelo xeeni?

Ohakalala wekeekhai. MBiibiliyani Yehova onnihimmwa okhala ‘Muluku oohakalala’. (1 Timótheyo 1:11) Omwaattamela Muluku ni weettela iphiro sawe, onimoophwanyihani ohakalala wekeekhai, ni onimookhaliheryani mmuupuweloni ni weerutthuni. (Esalimo 33:12) Munookhalana ekumi yooloka, osyaka orumeela ekumi anyu mwa enamuna yoohikhalela, okhalana soolema sooloka, ni munimwaataana ni atthu akina. Eyo enoowiirihani okupali masu a nasalimo ani: ‘Oreriwa waka owattamelani nyuwo’.​—Esalimo 73:28.

Okhapeleliwa. Yehova onnaaleiherya arumeyi awe otheene oriki: “Miyo kinimovahani miruku, kinimothonyeryani ephiro yorera”. (Esalimo 32:8) Eyo entaphulela wira Yehova onnaathokorerya arumeyi awe otheene ni onnisuwela itthu sinimuthowa khula mutthu. (Esalimo 139:1, 2) Mwakhalana wataana wooloka ni Yehova, munimoona wira okathi wotheene owo onnoothokoreryani.

Okumi wooloka wa muhoolo. Ohiya paahi wookhaliheryani okhalana ekumi yooloka ni yoohakalaliha vano, Yehova Muluku onimoovahani itthu sikina sooloka muhoolo. (Yesaya 48:17, 18) Biibiliya onihimya so: “Ekumi yohimala t’ila: wosuwelani nyuwo, mukhanle Muluku mmosáru èkekhai, n’umusuwela Yesu Kristu, yowo omurummyanyu”. (Yohani 17:3) Tthiri okathi ola wooxankiha, yoolipelela Muluku onivaha awe, enninlipiha “ntoko nankura onemexawe ekalawa”.​—aHéberi 6:19.

Ala mathowa vakhaani paahi anniiriha ophavela omusuwela saana Muluku ni ophavela okhalana ompatthani wooloka ni yena. Nyuwo pooti olavula ni Anamoona a Yehova wala orumeela esaiti jw.org wira mphwanye soohimmwa sikina sinrowa wookhaliheryani.